¹ "Mwabakamu bangu, na mwatata, mupulike fyo nguyugha pandashi pinyu." ² Po bakapulika ukuyughila muchiHebeli, abene bakatughasya po umwene akati, ³ Une muYuda yuyo yo apapiwile mu Tulaso nu mu Kilikiya, lole ngulite mumusumba wuwuwo, nali mutumiwa wa Gamaliyele. Namanyisyibwe ukulinganya koshi aka ndaghilo sya bosekulu bitu. Nali walubilo ngani pa findu fya Chala nga mo mwesi mukubombela amashiku agha. ⁴ Bandu bo bakongagha isila iyi ngabatamya nukubaghogha. Ngapinya abanyambala nabakolo nukubatagha mujela. ⁵ Muputi songo pamo nu lukomano lyoshi pamupene nabasongo bo bakamboni bangu. Napokite ku babo abokalata bo batumiwe ku baYuda bamwitu, po ngabuka ku Damaseko pakwegha bo bakaba kula nukwisa nabo ku Yelusalemu mumabunyolo ukuti balongiwe. ⁶ Pala nendagha kuseghelela ku Damaseko, pamusanya, mulubilo ubwelu bwingi ubwakung'anima ufumite kumwanya ukashungulila pangu. ⁷ Nawile pasi, po ngapulika amasyu ukuti, 'Sauli, Sauli, kasi ukushungushilaki?' ⁸ Ngalalusya ngati, 'Kasi mwe wini Malafyale?' Po akati kukwangu, 'Une ne uYesu munazala, yuyo ukumusikisya.' ⁹ Bo bakaba nune bakaketa ubwelu, lole batakapulika amashu gha yuyo akayughagha nune. ¹⁰ Po ngati, 'Malafyale, po mbombeki?' Malafyale akati kukwangu, 'Sumuka, buka kingile mu Damaseko, mulamula mo tibakakubule choshi chicho chinoshekile ukuti ubombe.' ¹¹ Pakuti ngapotwagha pakuketa pachifukwa icha bwelu bula, bamwangu bakatetesyagha bulo, mpaka ukwingila mu Damaseko. ¹² Mumusumba wula wula mwali umundu ingamu yake we Ananiya, yo aghanite ukwiputa uChala nukusunga indaghilo syitu syosi, ali mumanyaniwa wa baYuda woshi. ¹³ Papo akimilila papipi nune akati, 'Mukamu wangu Sauli keta sona.' Po pakabalilo kalakala naketile sona, po ngamuketa yuyo. ¹⁴ Akambula akati, 'UChala wa basekulu bitu akakusala uwe ukuti umumanye yuyo, nukuketa umwisa yula nukupulika amashu mumulomo wake. ¹⁵ Pakuti tiukabe wakamboni wake, pamaso pa bandu boshi, pafyo ufibwene nukufipulika. ¹⁶ Sona ukulindaki? nyamuka woshiwe nu koghesya ku ku mbibi syako pakwitisya ingamu yake.' ¹⁷ Po nganyokela ku Yelusalemu, po ngiputagha munyumba ya Chala ngaketa ifiloto. ¹⁸ Ngaketa Malafyale po akayugha nune ukuti, 'Nakalinga sokamo mu Yelusalemu, pachifukwa abandu muno manye tibakitike ukamboni bwako pa une.' ¹⁹ Ngamula ngati, 'Malafyale, abene bamenye ngani ukuti inyumba ya kwiputilamo yoshi, ngakungagha nukwighalila mu njela nu kubakoma boshi bo bakitisyagha mumwako. ²⁰ Pala ibanda lya Sitefano kamboni winyu, nune numilile palapala ngitikisyagha ukughoghibwa kwake. Nune ngasunga imyenda ya bo bakaghogha.' ²¹ Po Malafyale akayugha kwangu, 'Bukagha, pakuti tingutume ukutali ku bamanyaniwa.'" ²² Abandu bapulikisya ukufika po po akayugha amasyu agha, po bakakolela bakati, "Mutisyamo muchisu umundu wawakawaka uyu! Atabaghile ukwikala wa bumi." ²³ Abandu bakakolela nukutisya imyenda yabo, nukukwesya ulufumbi mumwanya. ²⁴ Songo wa bwite wa baLoma akalangula ukuti Paulosi bamwingisye munjela, nukumukoma, nukumulalusya ichifukwa cho abaYuda bapomelagha ngani lululo. ²⁵ Pala bakamukunga ni ni fingwe, Paulosi akalalusya wa bwite yo imilile papapo akati, "Ka chikwitisyiwa kumukoma mwene chisu wabaLoma kwambula kumulonga nukumususya tasi?" ²⁶ Pala usongo akapulika amasyu agha, akabuka kwa songo wa bwite, akalalusya akati, "Ka mukulonda mubombechi? Umundu uyu we mwene chisu wa chiLoma." ²⁷ Po umukulu wa bwite wakisa nukumulalusya akati, "Umbule, ka we mwene chisu wa chiLoma?" Po Paulosi akati, "Ena." ²⁸ Mukulu wa bwite yula akati, "Une uLoma ngawula ni ndalama syingi." Lole Paulosi akati, "Une ne muLoma kufuma upapwa wangu." ²⁹ Popapo abandu bo bakalonda ukumulalusya uPaulosi bakanyokela. Songo wa bwite akoghopa ngani, pala akamanya ukuti Paulosi we mwene chisu wa chiLoma sona amukunga. ³⁰ Mukulu wa bwite pakuti amanye bwisa ichifukwa cho abaYuda bakamukola nacho Paulosi, bamusatwile, bakalangula abaputi basongo, nimbala yoshi ya baYuda ukuti baghanite. Bakikila nu Paulosi po bamwimike pandashi pawo.