¹ Po twapatukana nabo, tunyamukite ni ngalaba po po tukagholoka mpaka ku Kosi. Pangelo pake tukabuka ku Rode, kufuma kuko tukakindila ku Palata. ² Po tukayagha ingalaba yakugholokela ku Fonike, tukakwela nukubuka. ³ Papo tukanda ukuketa ichilwa cha Kipulo, nukuchileka kulusele kwa kwake, tukendela ukuSiliya. Tukakwela pa Tule, kulakula ko ingalaba yikabikagha ifililo. ⁴ Tukabagha abakilisiti, tukikala nabo kulakula amashiku ghangonde na ghabili. Pakulongoshibwa numbepo bakamubula Paulosi ukuti akaleke ukubuka ku Yelusalemu. ⁵ Lole pala amashiku ghamala, tukanyamuka ukukindilila nubulendo witu. Abandu bosi pamo na bakashi babo na bana, bakatubikisya mpaka kuse kwa musumba. Tkafughama pasi pambali pa nyanja nukwiputa. ⁶ Panyuma pakulaghana nabo, tukingila mungalaba, po babo bakanyokela kukwabo. ⁷ Po twati twamalisya ubulendo witu wapanyanja ukufuma pa Tule, tukafika pa Tulemayi, kulakula tukabaponia aba kilisiti nukwikala nabo ishiku lyaka. ⁸ Pangelo pake tukatilako po tukafika pa Kasaleya, tukingila munyumba ya Filipu mufumusyi, yuyo ali yumo wa bangonde na babili po tukatuhasya munyumba yake. ⁹ Ali nabana bakolo banayi bo bateghibwe bo bakasololagha. ¹⁰ Tukangalapo amashiku amingi, kwisile umusololi yumo ngamu yake Agabu, ukufuma ku Yudeya. ¹¹ Bo wafika kukwitu, akegha ulamba wa Paulosi nukupinya ifilundi fyake ni nyobe, po atile, "Mbepo mwikemo akuyugha, 'Mumumo mo abaYuda mu Yelusalemu ti bakamupinyile mwene walamba uyu, nukumubikisya munyobe sya bamitundu.'" ¹² Pala tikapulika chicho, iswe pamupene na bandu ba palapala, tukamubeya ukuti manye abuke ku Yelusalemu. ¹³ Lole uPaulosi akamula akati, "Mukubombaki, mukulila bunubo nukubutagha umoyo wangu? Une ndakanosyekela ukupinyibwa kwene, lole nukufwila mu Yelusalemu pachifukwa cha ingamu lya Malafyale Yesu." ¹⁴ Pala tukapotwa kumuhobosya, tukamuleka po tukati, "Ulughano lya Malafyale lufyanilisyibwe." ¹⁵ Bo ghakindilepo amashiku agha, tukakosya fililo fyitu nukukwelela uku Yelusalemu. ¹⁶ Abamanyili bamo aba mu Kesaleya bakabuka nuswe. Bakatubikisya kunyumba ya Munashoni wa ku chilwa icha Kipulo. Umwene ali mu kilisiti wakwanda po kwa yuyo ko tubaghile pakwikala. ¹⁷ Pala tukafika mu Yelusalemu, abakilisiti bamwitu bakatupokela nu lusekelo. ¹⁸ Pangelo pake akabuka pamupene pa kwaghana nu Yakobo, uwa ku Yelusalemu. Abasongo ba chipanga bosa bali papo. ¹⁹ Po bakalamukana, bakababula fyosi fyofyo Chala ababombela abamutundu mububombiwa wake. ²⁰ Po akati apulika sisisi, akuputa kwa Chala. Sona akati ukwa Paulosi, "Keta abakamu bitu, fikwi fya baYuda bo bitikisya,bosa babo bali nulusubilo pakusunga indaghilo sya Mosesi. ²¹ Babulibwe kale nisyako, ukuti ukumanyisya abaYuda bosa bo bali mu bamitundu ukuti balekane nu Mosesi, pakuti bakaleke kukonga fibombiwa fya baYuda. ²² Po tutiki? Abandu tibapulike naloli ukuti wisile. ²³ Po ubombe syo tukukubulila. Tuli nabo abandu banayi bo bo babomba ichilapo. ²⁴ Ubuke nabo, po winosye poka na babo nukulipila indalama syakuti baye bamete isisi lyabo. Po abandu bosi tibamanye ukuti mu nubwanaloli mufyoshi fyo babuliwe fyako, lole ukuti uwe wemwene ukusunga indaghilo sya Mosesi. ²⁵ Lole abandu bo bitikisya tubasimbile ukalata wa wa fyo tupulikene, ukuti batakalye fyo fipelekiwe kufifwani ukuba sembe, sona nibanda, pamo nyama yoshi yo bayinyongite bulo. Bakaleke sona ububibi." ²⁶ Po uPaulosi akabegha abandu bala, pangelo pake abombite akaluso ka kwitosya. Po akingila munyumba ya Chala nukubabula amashiku gho gho babaghile kubombela sembe yila, ukufika pakabalilo ka kwibosya kwabo, po tibakamanye ukupeleka sembe ya weshi mwa babo. ²⁷ Pala amashiku ghangonde na ghabili ghakaba papipi kukwanilisyibwa, abaYuda ba kuAsiya, bakamuketa uPaulosi munyumba ya Chala, po bamushungulile ichilundilo cha bandu, nukumulema. ²⁸ Bakolela bakati, "Mwe ba Isilayeli, mutafwe, uyo yo mundu yo akumanyisya abandu kosakosa ukususya luko litu, ni ndaghilo sya Mosesi ni mala agha. Pamwanya pa chicho, abingisye abaGiliki munyumba ya Chala, po onenge amalo ghelu agha." ²⁹ Pakuti bakwanda bamuketapo uTule fimo mu Efeso ali nayuyo mumusumba po akati uPaulosi ingile nabo munyumba ya Chala. ³⁰ Po umusumba bosi watangwanike, bandu bakindilile pamupene. Bakamukola Paulosi nukumughusila kuse kwa nyumba ya Chala, palapala ifighi fikighalika. ³¹ Sona pala balondagha kumughogha, songo wa bwite wa baLoma apilike ukuti, musumba woshi wa Yelusalemu uli mundamyo. ³² Nakalinga akegha babwite nabalongoshi babwite bakakindilila ko kwali chilundilo. Pala abandu bakamuketa songo wabwite yula na basilikali, balekite pakumukoma uPaulosi. ³³ Songo wa bwite akafika kwa Paulosi wakamukola, po akalamula ukuti bamupinye namaunyolo ghabili, papo akamulalusya atile, "Ka we wini yuyo, sona anangaki?" ³⁴ Abandu bangi muchilundilo bakakolela ichindu choka, bangi ichingi. Sona pakuti akapotwa ukupulika ubwanaloli, pachifukwa cha chongo wakamula ukuti Paulosi bamweghele ukulinga la babwite. ³⁵ Po ati afika pafikwelelo abasilikali bakamunyamula uPaulosi, pakuti bandu bali nubukalale. ³⁶ Abandu bingi bakabakongagha, nukukolela ukuti, "Mughoghe!" ³⁷ Popo bakati bamwingisye mulinga, uPaulosi akayugha ku songo wa babwite akati, "Tangayugha numwe?" Usongo wa babwite akalalusya atile, "Ka umenye chiGiliki?" ³⁸ Po te we muIgipiti yuyo piyolo asumwisye ififupi nukulongosyela mutengele ifigebenga fikwi finayi?" ³⁹ Paulosi akamula akati, "Une ne muYuda, wamu Talaso wamu Kilikiya, umwe chisu icho chimanyikwe, ngusuma ukuti munyitikisye ukuti njughe nu bandu aba." ⁴⁰ Usongo wa bwite amwitikisye. UPaulosi akimilila pa fikwelelo, abalekisye ninyobe syake, sona po balekite ukuyugha, po akanda pakubayughila mu chiHebele atile,