¹ Po tufikite tufikite akisa kumulima, tukivwa ukuti ingamu ya chilwa chila yo Melita. ² Abene chisu chila bali bachisa ngani, bakakosya umulilo nukutupokela, papo ifula yatimagha sona kwatalalite. ³ UPaulosi akaseba ingwi umukukwe. Po abikagha pamulilo, injoka ya chipili yikafuma mungwi yikoghopagha ubutukilefu, po yikamumamatila panyobe. ⁴ Pala abene chisu bakayibona injoka yila bo yimamatile panyobe, bayughisyanagha bakitingi, "Umundu uyu abaghile ukuba mufyeka, napo aponite munyanja ubwisa akamwitikisya ukuba wabumi." ⁵ Paulosi akayitagha injoka yila pamulilo, lole yitamukomania. ⁶ Lole abene bakaba nulusubilo ukuti tiwatupe, pamo umwalubilo tiawe pasi nukufwa papo. Po abene balindile akabalilo akingi sona katali kwa musita kuketa akandu kabibi ko kabombiwe, bachenjite minong'ono yabo po bakayughisanya bakati, "Mundu uyu wa Chala." ⁷ Po papipi namalo ghala pali mighunda iya Pubuliyo, umulongosyi bwa chilwa chila. Yuyo akatupokela akisa ngani, po akatupwelela bwisa ngani pamasiku matatu. ⁸ Utata wa Pubuliyo aghona pasi pachifukwa abinagha nukutukila kwa mubili pamu nimbungo ya kupawuka ibanda. Paulosi akingila muchipinda nukwiputa, bo abikite inyobe syake pa yuyo nukumuposya. ⁹ Po syabombiwe sisyo, ababine bosi bakufuma mu chilwa chila bisile sona bapolite. ¹⁰ Sona abatupile ifyabupe fingi, sona pala tukabukagha, batupile fyosi fyo twasobagha pa bulendo bwitu. ¹¹ Po yakindite imyesi yitatu, tukanda sona ubulendo bwitu mu ngalaba yiyo yalinda kabalilo kosi kafula mu chilwa chila. Ingalaba yiyo yali yaku Alekizandiliya, yoyo ichifwanikisyo chake chali chakuti, "Aba chala ba phundu." ¹² Tufikite mumusumba wa Silakusi, po tukalinda papo amasiku matatu. ¹³ Tufikite kula tusyungulile ukufika mu Regiyo. Po lyakindite isiku lyoka, ichimbepo chikasyuka ukufuma kumwela, sona pisiku ilya bubili lyake twafikite uku Peteloyi. ¹⁴ Kulakula tukabagha abakamu aba lwitiko, po bakatusuma ukuti twikalepo nano pamasiku ghangonde na ghabili. Sona po tukafika ku Loma. ¹⁵ AbaKilisitu bamwitu kula, pala bakapulika sya uswe, bisile mipaka pa sokoni lya Apiya, ni pa inyumba sitatu sya sya bahesya, bakisa pakumana nuswe. Paulosi pala akabaketa akamutufya uChala, po akaboma mundumbula. ¹⁶ Po tukafika mukaya is Loma, Paulosi akitisyibwa ukwikala pamwene nu musilikali yo akamukongagha. ¹⁷ Po ghakindite amasiku matatu, uPaulosi wakabitisya pamupene abalongosyi ba chiYuda ba kulakula. Pala bakongana, ababulite ukuti, "Mwee bakamu, une ndikuno mupinyibwa ukufuma mu Yelusalemu, sona une ndababombela akandu kabibi abandu bakumyitu, pamo ifibombibwa fya bosekulu, lole bakangola nukumbika ku baLoma. ¹⁸ Panyuma bandalusisye, balondagha ukunsatula, pachifukwa batakagha nakamo kandu ko kakungoghela. ¹⁹ Lole pala abaYuda bakakana bakayugha ukuti inongwa yangu yibuke kwa kalonga wa kuLoma. Po ndakaba nabo ni nongwa yo yakubakolela abaluko lyosi lyangu. ²⁰ Cho chifukwa ngabitisya ukuti ndimukete nukuyughisania numwe. Pakuti panongwa ya lwitiko lwa baIsiliyeli po une ngupinyibwila." ²¹ Bo Bo bakamula, "Tutapokitepo abokalata ukufuma mu Yudeya ukuyugha fyako, pamo ukuyugha ubibi bwako. ²² Lole twalondagha ukupulika minong'ono yako, pachifukwa kosa kosa abandu batalonda akachipanga la mpatuko." ²³ Po bapanganite isiku lyo bangaya bakumanila nu Paulosi, abingi bakisa kulakula koko uPaulosi akikalagha, ukufuma pandabi mpaka panamasuba. UPaulosi akayughagha, nukubabula sya unyafyale wa Chala. Lole akaghelagha ukubahobosya ukuti bapulikane nu Yesu ukufuma mundaghilo sya Mosesi nu masimbo gha basololi. ²⁴ Bamo bakitikisya amasyu gha Paulosi, lole abamo batakitikisya. ²⁵ Sona bakatilapo kwambula kwitikisya. Lole bwo atatilepo, Paulosi akayugha amasyu aghanandi bulo ukuti, "Umbepo mwikemo ali bwanaloli pala akayugha amasyu ukufuma ku basekulu mu musololi Yesaya ukuti, ²⁶ 'Bukagha ku bandu aba, ukayughe ukuti, Kupulika timupulike, lole te mukitikisya, ukuketa timukakete, lole te mukakete kandu kosi. ²⁷ Pachifukwa indumbula sya bandu aba syaghoma, sona amakutu ghabo ghang'wama ukupulika, bakighala amaso ghabo, ukuti pamo bakete namaso ghabo, po tibakapulike na makutu ghabo, kuti bangamanya indumbula syabo, sona banyokele kwangu ukuti mbaposye.'" ²⁸ Sona mukamanye kuti, ubupoke bwatumibwe ku bamanyani, bo tibakapulike. ²⁹ Paulosi pala akayugha masyu agha, abaYuda bakatilapo, nususyana ngani mumwabo. ³⁰ Paulosi akikala ifyinja fibili pa malo papo akalipilagha mwene sona akapokelagha bosi bakafikagha kukwake. ³¹ Wakabayughilagha sona isya masyu ya Chala nukubamanyisya ifya Malafyale Yesu Kilisitu pabwelu kwambula kubwama kwa wesi.