¹ Isiku lya pentekositi mwo lyafika, bosi bakabungana ubuyo mumubwene. ² Ichongo chikapulikikwa ukufuma kumwanya, ikaba ngati imbepo ingamu, ichongo ichi chikisula munyumba mwo bakikalagha. ³ Indimi syo sikaba ngati mulilo sikababonekela, indimi isi sikaghabana paliwesi. ⁴ Bosi bakisula nu mbepo, bakanda ukuyugha amasyu ghachilendo isamumo umbepo akabapela amaka ghakuyughila. ⁵ Pakabalilo ako abayuda bakwiputa bakikalanga mu Yelusalemu, bakafuma mu luko losi ulwa pano pasi. ⁶ Mo bapulika ichongo, ichilundilo chikabungana nukuswigha chifukwa bosi bala bakaba pamupene bakapulikikwanga namasyu ghakukwabo. ⁷ aMukuswigha kwabo bakayugha bakati, "Abandu bosi aba bakuyugha ngati po bakugalileya? ⁸ Choni Cho bakuyugha injugha yakukwi. ⁹ Utwe twe ba Palitu, naba Medi, Elamu, twe tukwikala muchisu cha Mesopotamiya twe ba kulubafu lwa Yudeya nu Kapadokiya , twe ba ku Pontu nu Asiya. ¹⁰ Twe ba ku Filigiya, nu Pamfiliya, ku Egipite nu lubafu lwa Libiya ku Kilene, twe balendo baku Roma, ¹¹ nu Yuda natwe twingila ichiYuda, twe tukwikala mumbali mwa Kelete nu chisu cha Alabiya twebosi tukubapulika bakuyugha injugha yakwitu ifindu ifikulu fifyo uChala ababombela." ¹² Nukuswigha kwabo bakanda ukulalusania bakuti, ngimba chikung'anamulaki ichindu ichi? ¹³ Bamu bakanda ukwobela ulobesyo bakatingi, "Abandu aba bakolwa nu bwalwa". ¹⁴ UPeteli akimilila pamupene nabatumiwa bala 11 akakolela kubandu akati, "Mwe bayuda umwe, namwe mukwikala mu Yelusalemu, pulikisya amasyu gho timbabusye, ¹⁵ Abandu aba batakolitwe isamwo mukwinong'onela lole akabalilo kakwana akabutatu bwapangelo (Kubuche) ¹⁶ Umusololi uYoweli akayugha akati, ¹⁷ "UChala akuti fyofyo tise imbombe mumasiki ghabumalilo, tingapungulile umbepo wangu kubandu bosi, abana bingu abalisya nabakolo tibakachimaghe, abakeke tibaketesyange andashi yabo, abalisya abasongo tibakalote ifilota. ¹⁸ Mumasiku agho tingapungulile umbepo wangu nakubambombo wangu abalisya nabakolo bope tibakachimaghe. ¹⁹ Tingabombe ifyakuswighisya kumwanya na panu pachisu, tise kube ibanda, umulilo nilyosi. ²⁰ Isuba tise libe lititu, umwesi bope tise ghukesame ngati libanda bwo likali isiku lyakoghofya ilya Malafyale. ²¹ Wesi yo akumwiputa uMalafyale tise apone. ²² Mwe basongo ba ku Isilayeli pulika, uYesu waku Nazaleti akasali nu Chala ukuti abombe ifyakuswighisya fifyo uChala akendelamo ukwisa kukwinyu isamwo mukusimanyila. ²³ Umundu uyu akapeghiwa kukwinyu nubwighane bwa Chala, lole mukamughogha nukumubika mutokono twa balughu bakumupayika pachipinjika. ²⁴ Lole uChala akamusyusya kufwa nukumutisya ukubaba kwa bufwe, pakuti chitakaba chisa ukuti afwe. ²⁵ Davidi akayugha akati, natesya uMalafyale amasiku ghosi, Ali pamupene nune ukuti manye njungwange. ²⁶ chifukwa indumbula syangu sikasekelela, bope umubili wangu ghuli nulusubilo. ²⁷ Tamukaleke umzimu wangu mubuyo bwa bufwe, pamu ukundeka ukuti umundu winyu umusakiwa abole. ²⁸ Mwandangisya isila sya bumi, tingabe numwe pamupene nuchimwemwe. ²⁹ Bakamu imbabule pabwelu isya sekulu Davidi, akafwa nukusungiwa isyeto lyake lilipo. ³⁰ Sona akaba wakuchima, akamanya ipangano lya Chala ukuti amwikasye pa mpando wa bunyafyale bwa Chala uwa mbepo yake. ³¹ Davide akamanya akayugha isya kusyuka kwa kilisitu, akati atakalekiwa mubuyo be bafwe na mubili wake ghutangabola. ³² Weyo we Yesu yuyo uChala akamusyusya kubufwe. Twebosi twe bakamboni paichi. ³³ Bo akwela mumaka gha Chala, akapokela umbepo ukuyana nilaghano lya wise, weyo akatupa utwe Cho mukuchibona nukupulika. ³⁴ Pakuti tewi Davide yuyo akakwela kumwanya. umwene u Davide akuti, uMalafyale wangu akati twikale pamupene nune. ³⁵ Mupaka imbatosye abalughu bako. ³⁶ Munyumba ya Isilayeli mubabusye ukuti uYesu yo mukamupachika, uChala amusala pakuba Malafyale sona mupoki. ³⁷ Mo bapulika ichi chikabakwafya mundumbula, bakamulalusya u Peteli bakati, Ingapo tubombeki? ³⁸ UPeteli akababusya akati, mung'anamuke indumbula, mwose umundu wesi mungamu ya Yesu kilisitu ukuti imbibi syabo sihobokeliwe, sona timupokele ichabupe cha mbepo mwikemo. ³⁹ Ukupangana ukukwinyu, nabana binyu nabo balikubutali babo uMalafyale witu uChala tiwabitinye. ⁴⁰ UPeteli akalumbilila ngani nukuyugha ifya Yesu ukuti, "mwipoke mwibene ku mbapo yakunyongana". ⁴¹ Bosi bo bakaghitikisya amasyu ghake, bakasiba, pisiku lilyo bakongela ukwisa mupaka 3000. ⁴² Bakapeleka kufimanyisyo fya batumiwa, bakaba pamupene nukongana pakulya numunyiputo. ⁴³ Ubwonga bukaba pabancu abingi chifukwa cha filanginyo fifyo fikabombiwanga na batumiwa. ⁴⁴ Bosi bo bakitikinya bakongana pamupene. ⁴⁵ Bakaghulisya ifindu fyabo ni fyuma bakayebana nabapina. ⁴⁶ Isiku lyosi bakabunganagha munyumba iya Chala nukulyela pamupene nulusekelo ukuti abaghanite nabandu bosi. ⁴⁷ Isiku lyosi uChala akabongelelagha abandu muchipanga chake ukuti bapikiwe.