¹ Po Apolo akaba ku kolinte, uPaulosi akakinda mukaya ya kululu kwa kolinte po akafika ku Efeso. Kulakula abaghite abatumiwa bangi. ² Sona akati kukwabo, "Ka mutakapokela Umbepo mwelu pala mukitikisya?" Abene bakamula ukuti, "Chala, tutakapulikapo ukuti Umbepo mwelu aliko." ³ Sona akati, "Po bakabosha nu bo boshi bule?" Bakamula bakati, "Tukoshibwa nu boshi uwa Yohane." ⁴ UPaulosi akamula wakati, "UYohane akosha nu boshi bwakung'anamuka mu ndumbula. Po akababulagha abandu ukuti, babaghile kupulikana na yuyo abaghile kwisa panyuma pake, we yuyo we Yesu." ⁵ Po bakapulika chichicho, bakoshibwa mu ngamu ya Yesu. ⁶ UPaulosi akabika inyobe syake pa babo, Umbepo mwikemo wisile pa babo, po bakanda pakuyugha injughilo sya uhesya nu kusolola. ⁷ Bosi bakaba papipi kumi na babili. ⁸ Paulosi akingila munyumba iya kwiputilamo ya baYuda, po akayugha kubandu na maka ghakulu pa myesi mitatu, bakayughagha, bakayughisan'ya nabo pa sya unyafyale wa Chala. ⁹ Lole pala bangi bakaba ni ndumbula sikafu, batakaba nu lwitiko nukuyughila ubibi isila pandashi pa babunganibwa. Paulosi akatilapo. Akatisyapo abatumiwa po isuba ni suba bayughisan'yagha mu sukulu ya Tilano. ¹⁰ Bo bakindilila pakuwomba sisyo pa myaka yibili, mwakuti abandu bosi bo bakikalagha ku Asiya, abaYuda na bakulekana-lekana bakapulika amasyu gha Malafyale. ¹¹ UChala akabombagha ifyimanyikilo ifya pambali ngani ni nyobe iya Paulosi. ¹² Mwakuti napo fyali ifitambala ni myenda yo yalemibwe numubili uwa Paulosi, sikeghibwa ukubikiwa pababine, sona bakapona numbepo sinyali syope bakatisyagha mu mwabo. ¹³ AbaYuda bangi bakenda-kendagha, bo bakatisya imbepo inyali, bope bakaghela ukutamula apa ngamu ya Malafyale Yesu, po babo bali ni mbepo inyali bakati, "Ngubalamula mu ngamu ya Yesu, yo u Paulosi akayughagha." ¹⁴ Abana bangonde na babili ba mukulu wa chiYuda ingamu yake we Sikeva, bo bakabombagha fifyo. ¹⁵ Lole imbepo inyali ikamula ukuti, "Yesu m'menye, uPaulosi wepe mumenye, lole umwe mwe bawini?" ¹⁶ Po umundu yo akaba nimbepo inyali wakinda nukulimbana nabo bosi nu kubatonda, mwakuti akasokamo munyumba bwasi po akipweteka ngani. ¹⁷ Po chikamanyikwa ku ku boshi bo bakikalagha ku Efeso, abaYuda na baGiliki bope. Po bosi bakisula nu bolo po ingamu ya Yesu likweshekibwe. ¹⁸ Aba bingi bo bakitikisya bakisa nukwitika pabwelu po bakavumbula imbombo syabo sibibi. ¹⁹ Bandu bingi bo bakabombagha isya bulo si bakisa namabuku gho bakachimilagha nukocha pandashi pabandu bosi, bakabelenga umutengo bwa mabuku ghala, baghite ukuti ghakufwana indalama ni zasiliva fikwi amakumi ghangonde. ²⁰ Po amasyu gha Chala ghakindilile ukuba gha maka. ²¹ Panyuma pa fififi, uPaulosi adumwile mundumbula yake ukuti, abuke ku Yelusalemu nukukinda ku Makedoniya, nu ku Akaya. Wakati, "Nanti nikalako kula, mbaghile pakuketa sona Roma." ²² Sona akatuma babili mwa bo bakamutulagha, uTimote nu Erasito, ukuya ku Makedoniya, umwene akikala akabalilo ku Asiya. ²³ Pakabalilo kala kwali ichifulupi chikulu mu Efeso ukukolana ni sila ya Malafyale. ²⁴ Umundu yungi ingamu yake Demetiliyo, yo akapangagha usiliva. Akapanga utu siliva utwa kwiputila uchalamukolo, Alatemisi. Wambombo akasungagha ichilato chikulu ngani pa mbombo yiyo. ²⁵ Po umundu uyu abungenye abambombo bake pamupene, nabo bakabombagha imbombo sisisyo, po atile, "Mwe bandu umwe, mumenye ukuti ukabi bwitu ufumile mumbombo yiyo. ²⁶ Lole mukuketa sona mukupulika ukuti Paulosi ahobwisye nu pulusya abandu bingi mu Efeso, te mo muEfeso mwene, lole nu muAsiya mwesi mwene akuyugha ukuti, abachala bo bapangibwe ni nyobe te bo bachala. ²⁷ Ubibi bwakuti, te imbombo syitu syene syo tisipepuke, sona ninyumba ya kwiputilamo Alatemisi, uchala kasi mukulu yope tiyikabe yabulo. Po ulughindiko lwa Alatemisi, yo abandu bosi bamu Asiya, naba muchisu chosi ichapasi bakumwiputa, kope ti kumale." ²⁸ Po bakapulika chicho bakakalala ngani, sona bakitisya ukuti"Umukulu we Alatemisi uwa ba Efeso!" ²⁹ Po sona mumusumba wosi, ukisula nu kuwukilana, ichilundilo na bandu balotoka pamupene ukuchipanga icha lusekelo, nukughusilako Gayo nu Alisitaliko abaku Makedoniya bo bakendagha nu Paulosi. ³⁰ Po Paulosi alondagha ukwingila mu chilundilo cha bandu, lole abatumiwa bakanite. ³¹ Bamo bamaka bamu Asiya, pakuba basubiliwa bake, bamutumile amasyu uPaulosi nukumusuma ukuti aleke ukibika umoyo wake muubibi pakwingila mu chipanga icha lusekelo. ³² Pakabalilo kala ulusekelo losi lukakomanika pakuti bamo bakayughagha isingi, bamo sona ifingi. Sona abingi mumwabo batakamanya cho bawunganile. ³³ Abandu bangi bakaya kala, bakinong'onagha ukuti we Alekizandala, pakuti abaYuda bamukaghile pandasi. ³⁴ Lole pala bakati bamumenye ukuti we muYuda, bakitisya pamupene ma ola ghabili bakati, "Songo we Alatemisi uwa baEfeso." ³⁵ Popapo msimbi wa musumba watimisyagha ichilundilo cha bandu wakati, "Umwe bandu ba muEfeso, ka we wini atakamanyagha ukuti musumba wa Efeso, wo mulinda wa inyumba ya kwiputilamo Alatemisi songo nuwa ibwe lya kupatulika lyo likawa ukusoka kumwanya? ³⁶ Pakuti patakaba nayumo yo akinda ifindu fifyo, mubaghile pakwikala mye po manye mukabombe akandu mwalubilo. ³⁷ Pakuti umwe mwisile nabo abandu kuno sona batakibamo akandu munyumba sya bachala pamo ukutukana uchalakazi bwitu. ³⁸ Pala u Demetiliyo nabamusili, bali nu nongwa nu mundu, imbala silipo nabalongi ba nongwa bope balipo. Babaghile ukuyughana mumumo. ³⁹ Lole pala kalipo kamo ko mukulonda, ti kadumuliwe ulukomano lwa amashiku ghoshi, cho mukulonda chibaghile ukuyughibwa pa lukomano lwa boshi. ⁴⁰ Pakuti pachicho chabombiwa ilelo, pali ubibi wakuti, pala batupele inongwa iyakusosya ubwite sona patakabe icha kubwamilapo pa bwite bula." ⁴¹ Po akati ayugha sisyo, akighala ulukomano.