¹ Panyuma pa fifi, bakafuma mu Ateni, bakabuka ku Kolinte. ² Kukuko bakagha mu Yuda ngamu yake Akwila, mu Pontu. Umwene afikite bubo kufuma ku Italiya nu mukasi wake Prisila, pachifukwa Kilaudiyo akalamula ukuti baYuda bosi bafumemo mu Loma . Po Paulosi akabuka kubabona. ³ Sona pakuti imbombo syabo syali syoka, akikala nabo sona bakabombelagha pamupene pakuti mbombo yali yakusona amahema. ⁴ Pisiku lya Sabata lyosi Paulosi wakayughisyagha na bandu mu nyumba ya kwiputilamo, ukuti wahobosye abaYuda naba Giliki. ⁵ Sila nu Timoti pala bakafika kufuma ku Makedoniya, Paulosi atangwanike nukufumusya pa kupanika abaYuda ukuti Yesu yo Mesiya. ⁶ Pala abaYuda bakima nayo nu kutukana bakakupula imyenda yake po akababula akati, "Ibanda lyinyu lube pamutu yinyu! une nda ni nongwa, kwanda ilelo ngubuka ku bamanyanibwa." ⁷ Po akasokako kula nukuya kunyumba ya wamwabo ingamu yake Tito Yusto. Yuyo ali wakwiputa Chala. Inyumba yake yali papipi ni nyumba ya kwiputilamo. ⁸ UKilisipo songo wanyumba ya kwiputilamo wakapukana mwa Malafyale pamupene naba nyumba yake yosi. Bakolinte bingi bope bakati bamupulika Paulosi bakapulikana, sona babatisibwe. ⁹ Isiku linyabo nubusiku, Malafyale akamubula Paulosi mu filota akati, "Utakoghope, lole upalasyaghe manye wikale mye. ¹⁰ Pachifukwa ndi nawe. Sona kuta nayumo yo tibakakubusambukile ukuti akupweteke, pakuti ndi nabo abandu bingi mukaya aka." Po ¹¹ akikala mukaya mula ichinja chimochene ni myesi yingonde nu umobwene, wakamanyisyagha amasyu ya Chala mukati mwabo. ¹² Papo Galiyo ali nduna ya Akaya, baYuda ni ndumbula yimoyene bakamukola uPaulosi nukuya nayo pandasi pa balongi. ¹³ Bakati,"Umundu uyu akubabula abandu ukuti biputaghe uChala musila yo yitakwitisyiwa ni ndaghilo." ¹⁴ Lole po Paulosi akati ayughe,uGaliyo akababula abaYuda akati, "Mwe abaYuda, ikabe inongwa yakongila indaghilo, ngali umomanya ichindu cha koghofya, pamo ngali chibaghile ukupulikiwa. ¹⁵ Lole pakuti mukwimikana pafya masyu ingamu ni ndaghilo syinyu, po timudumule mwebene. Une nganite ukuba mulongi wa fifyifi." ¹⁶ Po akabafumyamo mu mbala. ¹⁷ Po bosi bakasambukila Sositeni, songo wa nyumba yakwiputilamo nukumukoma pandasi pa balongi. Lole Galiyo atakapasya pa fyosi fifyo. ¹⁸ Paulosi akikala mu Kolinti masiku ghingiko. Panyuma akalaghila abakilisiti nu kuwolokela ku Siliya pamupene nu Prisila nu Akwila. Ku Kenteleya, Paulosi akatisha sisi lyake pakuti ali ni ndaghilo. ¹⁹ Po akafika mu Efeso, po abalekite kulakula. Lole umwene akaba ingila munyumba ya kwiputilamo nu kuyughisania na baYuda. ²⁰ Pala bakalalusya ukuti wikale nabo kabalilo katalipo, umwene atitikisye. ²¹ Lole po akabalekagha akati, "Tinyokele sona kukwinyu pala lyo kumbo lya Chala." Po akafuma mu Efeso mu ngalaba. ²² Pala akafika pa dowoko lya Kesaleya, akabuka pakuponya abakilisiti, po akikila ku Antiyoke. ²³ Akati ikalako masiku ghamo mukaya kala akafumamo. Bakenda nukukinda mumalo gha kulekana-lekana mufighabo fya Galatiya ni Filigiya, kukwimisya abamanyili bosi. ²⁴ Po muYuda yumo ngamu yake Apolo, yo apapiwile ku Alekizandiliya akafika ku Efeso. Akaba mundu yo amenye pakuyugha sona akaba namaka pa masimbo ghelu. ²⁵ Mwene amanyisyibwe musila ya Malafyale, po nulubilo nu mbepo, wakayughagha nukumanyisya fifya Yesu akisa ngani, po uli amenye ububatiso wa Yohani. ²⁶ Akanda pakuyugha na maka munyumba ya kwiputilamo. Pala Prisila na Akwila bakamupulika, bakamweghela kukwabo, popo bakalongosola bwisa isila ya Chala. ²⁷ Pala Apolo akalondagha kwambukila ku Akaya, abakilisiti bakamukwimisya, po abasimbile abakilisiti bamwabo baku Akaya ukuti bamupokele. Pala akati afika, akabafwa ngani babo mubwisa bwa Chala bakwitikisya. ²⁸ Pakuti yuyo wakasusyana na baYuda mu maka pa chilundilo, pakubanangisya ukufuma mu masimbo ukuti Yesu we Mesiya.