¹ UPaulosi na banine bala bo bakindile mu Amfipoli na Apoloniya po bafikite mu Tesalonika mumo mukaba inyumba ya kwiputilamo ya baYuda. ² UPaulosi akingilamo ngali mo bisubile, sona ukwa basabata batatu bayughisanyagha nabo sya mumasimbo. ³ Po akayughisanyagha nabo ukubapani!a ukuti sibaghite ukuti Mesiya akomwe nu kusyuka kubufwe. Po atile, "Yuyuyo Yesu ngubapalasyila, we Mesiya." ⁴ Po abangi bababo basubalile, po bamukongite uPaulosi nu Sila. Sona pala chilundilo ichingi cha baGiliki bo bakwiputa Chala ukasubila pamupene na bakolo bamanyanibwa bingi. ⁵ Lole abaYuda bali ni sanje, po bakegha bangi babibi na babwakawaka po bakati babunganya ichilundilo, bakanyamusya ubwite mukaya. Bakindilile ku nyumba ya Yasoni kulonda Paulosi ni Sila kuti babasosye kuse, ku chilundilo cha bandu. ⁶ Pala batakabagha, bakamughusa Yasoni na bakilisitu banine nukuya nabo pandasi pa balongi mu kaya, uku bakukolela kuti, "Bandu aba bo bafulunganya ichisu, bisile nu kuno. ⁷ Po uYasoni akabapokela. Po bosi babombagha syakulekana-lekana ni ndaghilo sya Kalonga wa ku Loma. Bo bakati ali kuko ukalonga yungi yo Yesu." ⁸ Na masyu gho bakafifa abandu pamupene na balongi ba mukaya. ⁹ Pala akati apoka ichikole kwa Yasoni na bakilisitu banine, babasatwile. ¹⁰ Po kwati kwila, abakilisiti bamwabo pakatuma uPaulosi nu Sila ukuya ku Beleya. Popo bati bafika, bakingila mu nyumba yakwiputilamo ya baYuda. ¹¹ Lole abaYuda bala Bali ni ngalo yisa, ukukinda bala bamu Tesalonika pakuti bakaghapokela amasyu nakalinga ngani. Po isiku ni siku bakamanyisyanagha amalembo kuti bakete pala ifyindu fifyo fyali naloli momumo. ¹² Abingi mubabo bakisa pamupene na bakolo bokamanyikwagha aba Giliki bingi na balisya bope. ¹³ Pala abaYuda naba Tesalonika bakati bapukika ukuti Paulosi wakapalazya amasyu gha Chala uku Beleya, bisile na mukaya kalakala, sona bakafulunganya, nukubwama. ichilundilo. ¹⁴ Po abakilisiti bakatuma uPaulosi ukuya ku nyanja, lole Sila nu Timoti bakikala kulakula. ¹⁵ Bandu bo bakamubikisya Paulosi bakabuka nayo mpaka ku Eteni po bakanyokela ku Beleya po bakalamula ukuti, Timote nu Sila bamukonge nakalinga. ¹⁶ Papo Paulosi bakabalindila mu Eteni, umoyo wake ukaba mumwanya ngani pakubomba kuti mukaya kala mwisile nififwani. ¹⁷ Po asusyanite na baYuda na bandu bangi bo bakwiputa uChala munyumba yakwiputilamo. Bakasusyana na bandu bangi bakwiputa munyumba yakwiputilamo. Bayughisyanagha sona na bandu pa sokoni isiku ni siku. ¹⁸ Bandu bamo sona bakughana mahala ba bapa wa Epikulo wa bandu bo bakongagha ifimanyilo ifyakuti kuhoboka cho chindu chakulondiwa ngani cho umundu abaghile ukuba nacho mu bumi bwake, nu wa Stoyiki, wakomanite nawe uPaulosi. Bangi bakati, "Ka chiyugho chichi chikulonda ukuyughaki?" Bangi sona bakati, "Takabe ngali we mupalasyi wa bachala bahesya." Bakayugha lulo pachifukwa wakafumusya Yesu Sona kusyuka kubufwe. ¹⁹ Sona bakamukola ukuya nawe ku mbala ya kaya yakwitisyibwa Aleyopaga. Bakati, "Tikulonda tumanye, ka chimanyisyo uli ichipya chocho ukuyugha? ²⁰ Pakuti ifindu ifingi fyo tukupulika fya chilendo kukwitu. ²¹ Po Ateni na bahesya nabo bakikalagha mulamula, batakaba na kabalilo ka kandu kangi sona lole ukuphala nu kupulika kandu kapya. ²² Po uPaulosi akimilila mukati mu mbala ya Areyopaga, wakati, "Balisya ba mu Ateni, ngubona kuti mufyosi muli abandu bakwiputa ngani. ²³ Pakuti pala nendagha nukubonesya fyo mukwiputa, ngagha mumo inyochelo lya sembe popapa pasimbiwe ukuti, "Ukwa Chala yo atakumanyikwa." Sona cho mukwiputa ngali chitamanyikwa, chocho une ngubapalazgila. ²⁴ Chala yo akapela chisu nafyosi fyo fili mumo, pakuba yuyo Malafyale wa kumwanya na pasi, ukuti akwikala munyumba ya kwiputilamo yo yitakayengiwa nabandu. ²⁵ Sona atakubombeliwa ni nyobe sya bandu ngali yo mupina kandu. Pakuti we yuyo yo akubapa abandu bosi ubumi ni fyosi. ²⁶ Sona apilile mitundu yosi ya bandu ukufuma mu mundu yumoywene kuti yikabe pa chalu chosi chapasi. Abikite akabalilo ko katemiwe kale na mbaka sya chisu fya kwikalamo. ²⁷ Bakuti bamulonde Chala, mu lwitiko lwakuti bamwakwasye nu kumwagha. Po uli atali kubutali na wesi wa uswe. ²⁸ Pakuti mwa yuyo iswe tuli babumi, tukwenda, sona tuli kuko. Ngali mo abimbi binyu bangi ba umwe, bakuyughila ukuti, 'Pakuti tuli naloli luko lwake. ²⁹ Po pakuti tuli luko lwa Chala, tutabaghile ukwinong'ona ukuti uChala bwake ufwene nu Chala ngosa wa golide, pamo siliva pamo wa libwe, fyo fibajibwe na maluso na mahala gha mundu. ³⁰ UChala aselisye akabalilo kabujila, lole lino akulamula abandu bosi ukuti bang'anamuke mu ndumbula. ³¹ Pakuti asangite isiku tiakalonge ichisu mu bulunji nu mundu amwimike. Po na chichicho abapanikisyila abandu pakumusosya yuyo kubufwe." ³² Pala bakapulika nifya kusyuka kubufwe, bamo bakamusyogha, lole bamo bakati, "Tukulonda pakupulika sona pa chicho." ³³ Po Paulosi akufumamo mukati mwabo. ³⁴ Lole bandu bamo bakamukonga, sona bakitikisya mukati mwabo mwali Diyoni sisyo wa mbala ya Aleyopaga nu mukolo yungi ngamu yake Damalisi sona namwake.