¹ Intang hari panampaian minggu itu, Maria Magdalena tulak ka kubur Yesus sunsung banar, pas hari masih kadap, wan malihat batu panutup kubur sudah digeser dari kubur itu. ² Balalu, inya bukah mandatangi Simon Petrus wan murid lain nang disayangi Yesus, baucap wan buhannya, "Buhannya sudah maambil Tuhan dari kubur, wan kami kada tahu di mana buhannya maandak-Inya." ³ Balalu, Petrus wan murid nang lain itu tulak ka kubur. ⁴ Kaduannya bukah baimbai, tatapi murid nang lain itu bukah labih laju dari pada Petrus sehingga inya sampai badahulu ka kuburan. ⁵ Inya manjinguk malihat ka dalam, wan maitihi kain linen pembungkus mayat Yesus talantang disana, tatapi inya kada masuk ka dalam. ⁶ Balalu, Simon Petrus datang, manyususl inya wan masuk ka dalam kuburan wan inya malihat kain linen pembungkus taurai di sana. ⁷ Wan, kain panutup muha nang mambalut kapala Yesus kada diwadah kain linen pembungkus tadi, tatapi sudah tagulung di wadah nang lain. ⁸ Imbah itu, murid nang lain tadi, nang badahulu sampai, masuk jua. Malihat wan percaya. ⁹ Sebab, sabalum kajadian itu, buhannya balum paham Kitab Suci, bahwa Yesus harus bangkit dari kematian. Yesus manampaiakan Diri ka Maria Magdalena ¹⁰ Jadi, kadua murid itu bulik ka rumah. ¹¹ Tatapi, Maria badiri di luar kuburan wan menangis. Sambil menangis, inya manjinguk ka dalam kuburan itu, ¹² wan inya malihat dua malaikat babaju putih rahat duduk di wadah mayat Yesus dirabahakan. Nang saikung duduk di bagian kapal wan nang lain di bagian batis. ¹³ Kadua malaikat itu batakun lawan Maria, "Bu, kanapa pian manangis?" Maria manjawab malaikat itu, "Buhannya sudah maambil mayat Tuhanku wan aku kada tahu di mana buhannya maandak Inya." ¹⁴ Imbah bapadah kayaitu, Maria manuleh kabalakang wan malihat Yesus badiri di situ, tatapi kad tahu kalau itu adalah Yesus. ¹⁵ Yesus batakun waninya, "Ibu, kanapa pian manangis? Siapa garang nang pian cari?" Lantaran inya mangira Inya adalah penjaga taman, Maria baucap wan-Inya, "Tuan, amun Tuan sudah mamindahakan-Inya, padahi aku di mana Tuan sudah maandak-Nya, wan aku pacangan maambil-Inya." ¹⁶ Yesus baucap lawaninya, "Maria.' Maria pun bapaling wan baucap wan-Inya dalam bahasa Ibrani, "Rabuni", yang artinya "Guru". ¹⁷ Yesus baucap lawaninya. "Jangan ikam mamingkuti Aku lantaran Aku balum tulak ka Bapa. Tatapi, tulaklah ka dinsanak-dinsana-Ku wan padahakan wan buhannya, 'Aku cagar tulak ka wadah Bapa-Ku wan Bapamu, ka wadah Allah-Ku wan Allahikam." ¹⁸ Maria Magdalena tulak wan mamadahakan murid-murid, "Aku sudah malihat Tuhan," wan bahwa Yesuslah nang sudah mamadahakan hal-hal ini lawaninya. Yesus Manampakakan Diri lawan Murid-Murid-Nya. ¹⁹ Wayah hari sudah malam, yaitu hari panampaian dalam minggu itu, wan lawang-lawang wadah buhan murid bakumpul tatutup lantaran buhannya takutan lawan urang-urang Yahudi, Yesus datang wan badiri di tangah-tangah buhannya baalu baucap, "Damai sejahtera gasan buhan ikam!" ²⁰ Imbah bapander kayaitu, Yesus manampaiakan tangan wan parut-Nya lawan buhannya. Buhan murid himung banar pas malihat Tuhan. ²¹ Imbah itu, Yesus baucap lawan buhannya lagi, "Damai sejahtera gasan buhan ikam. Sama nangkaya Bapa sudah mangutus Aku, kayaitu jua wayahini Aku mangutus ikam," ²² Imbah Inya bapander kayaitu, Yesus maniupi buhannya wan baucap, "Tarimalah Roh Kudus! ²³ Pabila ikam mangampuni dosa urang, maka dosa urang itu diampuni. Pabila ada urang nang dosa-dosanya kada ikam ampuni, maka dosa buhannya kada diampuni." Yesus Manampaiakan Diri lawan Tomas ²⁴ Tomas, saurang murid matan 12 murid, nang dikiyau Didimus, kada ada lawan buhannya pas Yesus datang. ²⁵ Balalu, murid-murid nang lain mamadahi inya, "Kami sudah malihat Tuhan." Tatapi , Tomas baucap wan buhannya, "Kacuali aku malihat bakas paku intang tangan-Inya wan mancucukakan jariku ka dalam bakas paku itu, balalu mamasuakan tanganku ka dalam parut-Nya, aku kada pacangan percaya." ²⁶ Dalapan hari imbahitu, murid-murid babulik bakumpul di rumah itu, wan Tomas ada lawan buhannya, Biar lawang-lawang tatutup, Yesus datang badiri di tangah-tangah buhannya, balalu baucap, "Damai sejahtera gasan buhan ikam!" ²⁷ Imbah itu, Inya baucap wan Tomas, "Ulurakan jariikam disini wan andakakan di parut-Ku. Jangan kada percaya, tatapi percayalah!" ²⁸ Tomas manjawab Yesus, "Nggeh, Tuhanku wan Allahku! ²⁹ Yesus baucap lawaninya, "Apakah ikam wayahini percaya lantaran ikam imbah malihat Aku? Diberkatilah buhannya nang kada malihat, tatapi percaya." Tujuan Yohanes Manulis Kitab Ini ³⁰ Masih banyak tanda ajaib lain nang diulah Yesus di hadapan murid-murid-Nya, nang kada tatulis dalam kitab ini. ³¹ Tatapi, samuaan ini ditulis supaya ikam percaya bahwa Yesus adalah Kristus, Anak Allah, wan supaya maliwati kapercayaan buhan ikam itu, ikam mandapatakan hidup di dalam ngaran-Nya.