¹ Imbah itu, Yesus manampaiakan diri lagi lawan murid-murid-Inya di parak danau Tiberias. Inya manampaiakan diri-Nya nagkaya ini : ² Simon Petrus, Tomas nang di kiau Didimus, Natanael matan Kana di Galilea, anak-anak Zebedeus, wan 2 murid nang lain rahat takumpul. ³ Simon Petrus baucap wan buhannya, "Aku cagar tulak maunjun." Buhannya baucap wan inya, "Kami handak umpat wan ikam." Buahanya sabarataan tulak kaluar balalu babuat ka jukung, tatapi malam itu, buhannya kada kolehan apa-apa. ⁴ Pas parak subuh, Yesus badiri di pantai, tatapi murid-murid kada tahu bahwa itu adalah Yesus. ⁵ Inya baucap wan buhannya, "Anak-anak, adakah buhan ika iwak?" Buhannya manjawab, "Kada." ⁶ Inya baucap wan buhannya, "Timbaiakan jala ikam ka sabalah kanan jukung, ikam pacangan kolehan iwak." Balalu, buhannya manimbaiakan jala, tatapi kada kawa manariknya ka dalam jukung lantaran hibaknya iwak. ⁷ Lantaran itu, murid nang disayangi Yesus baucap wan Petrus, "Itu Tuhan!" Wayah Simon Petrus mandangar bahwa itu Tuhan, inya mamakai baju inya dagana inya mamacul baju inya rahat bagawi, wan tajun ka dalam danau. ⁸ Murid-murid nang lain datang lawan jukung umpat manarik jalanang hibak wan iwak. Sabab, buhannya kada jauh matan darat, jaraknya kira-kira 200 hasta. ⁹ Rahat buhannya sampai ka darat, buhannya malihat bara api lawan iwak yang sudah taandak diatasnya jua ada wadai. ¹⁰ Yesus baucap, "Bawai sapalih iwak nang hanyar buhan ikam tangkap." ¹¹ Simon Petrus babuat ka jukung wan manarik jala nang hibak wan iwak nang ganal itu ka darat, jumalahnya 153 ikong. Biar iwak itu banyak banar, tatapi jalanya kada rabit. ¹² Yesus baucap wan buhannya, "Ayo kita makanan." Kada saikung pun buhan murid itu wani baucap bahwa Inya adalah Tuhan. ¹³ Yesus datang maambil roti itu balalu manjulunginya ka buhannya. Kayaitu jua diulah-Nya wan iwak itu. ¹⁴ Inilah katiga kalinya Yesus manampaiakan diri lawan buhan murid-Inya imbah Inya dibangkitakan dari tangah-tangah urang mati. Yesus Maminta Petrus Mangambalaakan Domba-Domba-Inya ¹⁵ Imbah buhannya tuntung makan, Yesus baucap lawan Simon Petrus, "Simon, anak Yohanes, apakah ikam manyangi Aku labih daripada nang lain?" Pertus manjawab, "Bujur Tuhan, Pian tahu bahwa aku manyayangi Pian." Imbah itu Yesus baucap wan inya, "Gembalaakanlah domba-domba-Ku!" ¹⁶ Yesus baucap lagi kadua kalinya wan buhannya, "Simon, anak Yohanes, apakah ikam manyayangi Aku?" Petrus manjawab, "Bujur Tuhan, Pian tahu pabila aku manyayangi Pian." Yesus baucap wan inya, "Gembalaakanlah domba-domba-Ku!" ¹⁷ Yesus baucap wan inya katiga kalinya, "Simon, anak Yohanes, apakah ikam manyayangi Aku?" Hati Petrus balalu sedih lantaran Yesus batakun untuk katiga kalinya, "Apakah ikam manyayangi Aku?" Balalu, Petrus baucap lawan Sidin, "Tuhan, Pian tahu pabila aku manyayangi Pian!" Yesus baucap wan inya, "Gembalaakanlah domba-domba-Ku! ¹⁸ Aku mamadahakan nang sabujurnya wan ikam, rahat ikam masih anum, ikam saurang nang maikat pinggangikam wan bajalan kamana haja ikam handak; tatapi wayah ikam tuha kena, ikam cagar maulurakan tangan ikam balalu urang lain nang maikat pinggangikam, wan mambawa ka wadah nang kada ikam katuju." ¹⁹ Yesus mamadahakan hal ini gasan maingatkan kena cara mati nangkayaapa Petrus akan mamuliaakan Allah. Wan imbah mamadahakan hal itu, Inya baucap wan Petrus, "Umpati Aku!" Apa nang pacangan terjadi wan murid nang Sangat Disayangi Yesus? ²⁰ Petrus bapaling wan maitihi murid nang paling disayangi Yesus rahat mairingi buhannya. Inya adalah murid nang duduk parak dada Yesus rahat perjamuan malam nang batakun, "Tuhan, siapa garang urang nang cagar mangkhianati Pian itu?" ²¹ Rahat maitihi inya, Petrus batakun wan Yesus, "Tuhan, nangkayaapa kena inya itu?" ²² Yesus manjawab, "Saandainya Aku handak inya tatap hidup sampai Aku datang pulang, apa garang urusanikam? Ikam, umpati Aku!" ²³ Makanya, panderan Yesus ini tasabar di antara-dinsanak-dinsanak itu bahwa murid itu kada pacangan mati, padahal Yesus kada manyambat lawan inya bahwa inya kada cagar mati, tatapi hinggan baucap, "Saandainya Aku handak inya tatap hidup sampai Aku datang pulang, apa urusanikam?" ²⁴ Inyalah murid nang basaksi mengenai sabarataan ini, wan sudah manulisakan samuaan ini, wan kita tahu bahwa kesaksian itu bujur. ²⁵ Masih banyak hal lain nang sudah Yesus ulah, yang pabila ditulisakan tunggal butingan, aku rasa saluruh dunia gin kada pacangan mayu gasan mancatatnsamuaan kitab nang harus ditulis itu.