¹ Pilatus maambil Yesus wan mamarintahkan supaya Yesus dihukumakan. ² Buhan prajurit manganyam sabuting mahkota dari kayu nang baduri balalu mamakaiakannya ka kapala Yesus, wan mamakaiakan jua jubah ungu ka-Inya. ³ Buhannya maju baparak Yesus sambil baucap, "Salam, hai Raja Urang Yahudi!" Balalu, buhannya manampar muha-Nya. ⁴ Pilatus kaluar lagi sambil bapander lawan buhannya, "Lihati! Aku mambawa Yesus kaluar supaya buhan ikam tahu bahwa Aku kada manamuakan kasalahan apa haja intang -Inya." ⁵ Balalu, Yesus kaluar mamakai mahkota duri wan jubah ungu. Pilatus baucap ka buhannya, "Lihati Inya!" ⁶ Rahat buhan imam kepala wan buhan perwira malihat Yesus, buhannya bakuciak, "Salibakan Inya, salibakan Inya!" Tatapi, Pilatus baucap lawan buhannya, "Bawai aja Inya wan salibakan saurangan lantaran aku kada manamuakan kasalahan apa haja intang-Inya.' ⁷ Urang-urang Yahudi itu manjawab Pilatus, "Kami baisi hukum, wan manurut hukum itu, Inya harus mati lantaran Inya maanngap diri-Inya Anak Allah." ⁸ Imbah Pilatus mandangar itu, inya samakin takutan ⁹ balalu masuk pulang ka gedung pengadilan, wan batakun ka Yesus, "Dari mana garang asal-Ikam?" Tatapi, Yesus kada manjawabinya. ¹⁰ Pilatus baucap lawan Inya, "Ikam kada hakun bapander wan aku? Apakah Ikam kada tahu bahwa aku kawa mambibasakan Ikam wan kawa jua manyalibakan-Ikam?" ¹¹ Yesus manjawab, "Ikam kada baisi kuasa apa pun atas diri-Aku, kacuali itu di bariakan lawan ikamoleh nang dari atas. Itulah sababnya , urang nang manyarahakan Aku lawan ikam labih ganal dosanya." ¹² Imbah andangar itu, Pilatus bausaha mambibasakan Yesus, tapi urang-urang Yahudi bakuciak, "Pabila ikam mambibasakan Urang ini, baarti ikam kada bakawan lawan Kaisar; satiap urang nang maanngap dirinya raja baarti malawan Kaisar." ¹³ Dami Pilatus mandangar panderan itu, inya mambawa Yesus kaluar, balalu baduduk di kursi pengadilan, di wadah nang bangaran Litostrotos, tatapi dalam bahasa Ibrani disambat Gabata. ¹⁴ Hari itu adalah hari parsiapan gasan Paskah, wayah itu sakitar jam kaanam. Pilatus baucap lawan buhan Yahudi, "Ininah Rajaikam!" ¹⁵ Balalu, buhannya bakuciak, "Mati'i aja Inya! Mati'i aja Inya! Salibakan Inya!" Pilatus baucap lwan buhannya, "Haruskah aku manyalibakan Raja buhan ikam?" Imam-imam kapal manjawab, "Kami kada baisi raja salain Kaisar!" ¹⁶ Akhirnya, Pilatus manyarahakan Yesus lawan buhannya untuk disalibakan. Yesus Disalibakan. ¹⁷ Yesus kaluar sambil mamanggul salib-Nya saurang manuju wadah nang bangaran "Wadah Tengkorak", nang dalam bahasa Ibrani dikiyau "Golgota". ¹⁸ Disana, buhannya manyalibakan Yesus baimbai lawan dua urang lain, nang disalibakan jua dikanan wan kiri Yesus, samantara Yesus ada intang tangah-tangah buhannya. ¹⁹ Pilatus jua manulis sabuah tulisan balalu maandaknya di atas kayu salib. Tulisan itu babunyi, "YESUS URANG NAZARET, RAJA URANG YAHUDI." ²⁰ Banyak urang Yahudi mambaca tulisan itu lantaran wadah dimana Yesus disalibakan itu kada jauh dari kota, wan tulisan itu di tulis mamakai bahasa Ibrani, Latin wan Yunani. ²¹ Balalu, imam-imam kapala urang Yahudi baucap wan Pilatus, "Jangan manulisakan, 'Raja urang Yahudi,' tatapi tulisakan Urang ini mangaku, 'Akulah Raja urang Yahudi." ²² Jawab Pilatus, "Apa nang sudah aku tulis, cagar tatap tatulis nangkaya itu!" ²³ Buhan prajurit, rahat buhannya sudah manyalibakan Yesus, maambil pakaian-Inya balalu mambaginya manjadi ampat, sabagian gasan masing-masing prajurit, jua jubah-Inya; jubah itu kadadak sambungannya, lantaran ditenun dari atas ka bawah kada baisi jahitannya. ²⁴ Buhan prajurit itu baucap diantara buhannya, "Jangan kita marabitnya, tatapi baik kita maundinya gasan manantuakan siapa nang mandapatakannya.' Hali ngini supaya ganaplah apa nang sudah tatulis dalam Kitab Suci: "Buhannya mambagi-bagiakan pakaian-Ku diantara buhannya balalu jubah-Ku buhannya mambuang undi." Nnagkya itulah buhan prajurit maulah sabarataan itu. ²⁵ Pahadangan itu, uma Yesus, dinsanak babinian umanya Yesus, Maria bini Klopas, wan Maria Magdalena,badiri di parak salib-Nya. ²⁶ Rahat Yesus malihat mama-Nya lawan murid nang disayangi-Nya badiri di sana, Inya baucap wan mama-Nya, "Mama, itihi, ini anak pian!" ²⁷ Imbah itu, Yesus baucap pulang ka murid nang disayangi-Inya itu, "ini mama ikam!" Mulai wayah itu, murid itu manarima mama Yesus badiam dirumahnya. Kematian Yesus ²⁸ Imbah itu, Yesus nang tahu bahwa sabarataannya sudah tagawi, gasan mangganapi Kitab Suci, Inya baucap, "Aku haus!" ²⁹ Disitu ada baisi sabuting tempayan hibak anggur asam. Marga itu, buhannya manancapakan bunga karang nang imbah dicalupakan ka dalam anggur asam mamakai sabatang hisop wan mangunjukakannya ka mulut Yesus. ³⁰ Imbah merasai anggur asam itu, Yesus baucap, "Sudah tuntung." Balalu, Inya manundukakan kapala-Nya wan manyarahakan nyawan-Nya. ³¹ Lantaran hari itu adalah hari persiapan, wan supaya mayat-mayat itu kada tatap di kayu salib pas hari sabat, sebab Sabat adalah hari besar, urang-urang Yahudi maminta lawan Pilatus supaya batis urang-urang nang disalib itu dipatahakan wan mayat-mayatnya diturunakan dari salib. ³² Balalu, buhan prajurit datang mamatahakan batis uramg nang pertama wan nang lainnya, nang disalibkan taimbai lawan Yesus. ³³ Tatapi, imbah sampai ka Yesus wan malihat bahwa Yesus sudah mati, buhannya kada mamatahakan batis-Nya. ³⁴ Tatapi, salah saurang prajurit itu mancucukakan tumbaknya ka parut Yesus,wayah itu jua, darah wan banyu mangalir kaluar. ³⁵ Urang nang mnayaksiakan paristiwa itulah nang mambariakan kesaksian ini, wan kesaksian nang bujur wan inya tahu pabila inya mamadahakan nang sabujurnya, supaya ikam jua percaya. ³⁶ Sabab, samuaan ini terjadi supaya ganaplah nang imbah tatulis dalam Kitab Suci: "Kada satu pun dari tulang-Nya nang cagar dipatahakan." ³⁷ Wan lagi, intang bagian Kitab Suci baucap, "Buhannya pacangan mamandang Inya nang imbah buhannya tikam." Yesus Dikuburakan ³⁸ Imbah samuaan itu, Yusuf dari Arimatea, nang jua manjadi murid Yesus tatapi badadiaman haja lantaran takutan lawan urang-urang Yahudi, maminta wan Pilatus supaya dibolehakan maambil mayat Yesus; wan Pilatus mangabulakannya. Jadi, Yusuf dari Arimatea datang balalu maambil mayat Yesus. ³⁹ Nikodemus, urang nang dahulu mandatangi Yesus pada malam hari, jua datang mambawa campuran minyak mur wan gaharu, nang baratnya sakitar lima puluh kati. ⁴⁰ Balalu, buhannya maambil mayat Yesus mambungkusnya wan kain linen nang dibari rempah-rempah, sasuai adat panguburan urang Yahudi. ⁴¹ Di parak wadah Yesus disalibakan, baisi taman wan intang taman itu ada sabuah kuburan hanyar nang kada suah satu mayat pun suah diandak disana. ⁴² Lantaran hari itu adalah hari persiapan gasan urang Yahudi, wan wadah kuburan itu kada jauh, buhannya maandak mayat Yesus di sana.