¹ Imbah Yesus mamadahakan hal-hal ini, Inya tulak wan murid-murid-Nya ka sabarang sungai Kidron, wadah nang baisi sabuah taman balalu Yesus masuk ka dalamnya lawan murid-murid-Nya. ² Yudas, murid nang manghianati Yesus, jua tahu taman itu lantaran Yesus rancak bakumpul lawan murid-murid-Nya di sana. ³ Yudas, sudah mabarima sajumlah pasukan wan hamba-hamba dari Imam-imam kapala wan urang-urang Farisi, datang ka taman itu mambawa lentera, obor, wan sanjata. ⁴ Yesus nang tahu sabarataan hal nang pacangan terjadi lawan-Inya, maju ka muka wan batakun ka bubuhannya, "Siapa nang ikam cari?" ⁵ Buhannya manjawab, "Yesus dari Nazaret." Yesus baucap wan buhannya, 'Akulah Yesus." Wan jua Yudas, nang mangkhianati Dia, badiri lawan buhannya. ⁶ Rahat Yesus baucap, "Akulah Yesus," urang-urang itu mundur balau gugur ka tanah.n ⁷ Imbah itu, Yesus batakun lagi wan buhannya, "Siapa garang nang buhan ikam cari?" buhannya manjawab, "Yesus dari Nazaret." ⁸ Yesus manjawab, "Udah Kupadahakan wan buhan ikam, Akulah Yesus. Jadi pabila buhan ikam mancari Aku, biarakan murid-murud-Ku tulakan." ⁹ Hal ini terjadi supaya ganaplah panderan nang imbah dipadahakan Yesus: Dari sabarataan nang Pian bariakan gasan-Ku, Aku kadak kahilangan satu pun." ¹⁰ Simon Petrus, nang mambawa sabilah mandau, mancabut mandaunya balalu manimpasakannya ka palayan imam Besar, sahingga tapotong talinga kanan palayan itu; ngaran palayan imam Besar itu adalah Malkhus. ¹¹ Maka, Yesus baucap wan Petrus, "Masukakan pulang mandau itu ka dalam sarungnya! Cawan nang sudah Bapa bariakan wan-Aku, kadakkah Aku harus maminumnya?" Yesus Dibawa ka Hadapan Hanas ( Mat.26:57-58;Mrk.14:53-54; Luk.22:54) ¹² Balalu, buhan prajurit Romawi wan perwira-perwiranya wan para palayan urang Yahudi manangkap Yesus balalu manjarat Inya, ¹³ imbah itu buhannya mambawa Yesus ka Hanas, mintuha Kayafas, nang adalah imam Besar pada tahun itu. ¹⁴ Wan, Kayafaslah nang manasihati urang-urang Yahudi ujarnya labih baik pabila satu urang Yahudi mati demi rakyat. Petrus Kadak Mangakui Yesus (Mat.26:69-70;Mrk.:66-68 Luk.55-57) ¹⁵ Simon Petrus wan saurang murid lainya maumpati Yesus. Murid nang lain itu dipinandui uleh imam Besar balalu inya masuk taimbai Yesus ka dalam halaman istana imam Besar. ¹⁶ Tatapi, Petrus badiri di luar, di parak lawang. Balalu, murid nang lain itu, nang pinandu wan imam Besar, babulik ka luar bapander lawan babinian panjaga lawang, balalu mabawa Petrus masuk. ¹⁷ Balalu, babinian nang manjaga lawang itu batakun wan Petrus, "Kadaklah ikam jua murid dari Orang itu?" Jawab Petrus, "Kadak!" ¹⁸ Imbah maulah parapian, buhan palayan wan perwira badiri disana lantaran wayah itu udara dingin banar, maulah buhannya baparak api. Petrus jua ada lawan buhannya, badiri wan baparak api. Imam Besar Batakun wan Yesus ( Mat.26:59-66 mrk.14:55-64; Luk.22;66-71) ¹⁹ Imbah itu, Imam Besar manakuni Yesus hal murid-murid-Nya wan tentang ajaran-Nya. ²⁰ Yesus manjawab dia, "Aku sudah bapander tarus terang wan dunia. Aku santar mangajar di Sinagoge-sinagoge wan Bait Allah, wadah sabarataan urang Yahudi bakumpul. Aku kadak suah bapander sambunyi-sambunyi. ²¹ Kanapa buhan ikam batakun kaya itu ka -Aku? Takuakan haja wan buhannya nang sudah mandangar apa nang Aku panderakan wan buhannya; buhannya tahu apa nang imbah Akupanderakan" ²² Imbah Yesus baucap kayaitu, saurang panjaga nang badiri di situ manampar muha-Nya wan baucap, "Kayaitukah cara-Ikam manjawab imam Besar?" ²³ Yesus manjawab inya, "Amun Aku manyambat sesuatu nang salah, tampaiakan kesalahannya; tatapi amun nang Kupanderakan bujur, kanapa ikam manampar Aku?" ²⁴ Imbahitu, Hanas mangirim Yesus sambil dijarat ka Imam Besar Kayafas. Petrus Kadak Maakui Yesus Pulang. ²⁵ Samantara itu, Petrus masih badiri parak api. Balalu, buhannya batakun wan Inya, 'Kadakkah ikam jua murid Urang Itu?" Petrus kada maakuinya wan manjawab, "lain." ²⁶ Salah saikung palayan Imam Besar, nang masih kaluarga urang nang talingannya di potong Petrus, baucap, "Rasanya aku malihat ikam ada lawan Inya di taman itu?" ²⁷ Sakali lagi, Petrus kada maakuinya, wan wayah itu jua, ayam bakokok. Yesus Dibawa manghadap Pilatus ²⁸ Imbah itu, buhannya mambawa Yesus dari wadah Kayafas ka gedung pengadilan, wayah itu masih subuh, wan buhannya saurang kada masuk ka dalam gedung pengadilan supaya buhannya kada manajisakan diri, sehingga boleh umpat makan Paskah. ²⁹ Balalu, Pilatus kaluar mandatangi buhannya wan batakun, "Apa garang tuduhan bhuhan ikam gasan Urang ini?" ³⁰ Buhannya manjawab wan baucap, "Amun Urang ini lain Urang Jahat, kadanya kami mambawai-Nya ka wadah ikam." ³¹ Pilatus baucap wan buhannya, "Bawai Inya wan hakimilah sasuai hukum buhan ikam." Urang-urang Yahudi itu manjawab, "Pinanya kada sasuai pang hukum bagi kami mahukum mati urang." ³² ini terjadi gasan mengganapi panderan Yesus, nang manunjukakan nangkaya apa caranya Inya pacangan mati. ³³ Imbah itu, Pilatus babulik masuk ka dalam gedung pengadilan balalu mangiyau Yesus, batakun wan Inya, "Bujurkah Ikam Raja urang Yahudi?" ³⁴ Yesus manjawab, "Apakah ikam batakun kaya itu baasal dari ikam saurang atau lantaran urang lain nang mamadahi ikam tentang Aku?" ³⁵ Pilatus baucap, "Apakah aku urang Yahudi? Bangsa wan imam-imam kepala-Ikam saurang nang mayarahakan Ikam ka aku. Apa nang sudah Ikam ulah?" ³⁶ Yesus baucap, "Kerajaan-Ku lain matan dunia ini. Amun kerajaan-Ku matan dunia in, pelayan-pelayan-Ku pasti pacangan malawan supaya Aku kada di sarahakan ka urang-urang Yahudi. Tatapi, kerajaan-Ku kada dari dunia ini." ³⁷ Pilatus baucap, "Jadi, Ikam saurang Raja?" Yesus manjawab, "Ikam saurang nang manyambat bahwa Aku adalah raja. Gasan itulah Aku lahir, wan gasan inilah Aku datang ka dunia, yaitu gasan basaksi tentang kebenaran. Satiap urang nang baasal dari kebenaran cagar mandangarakan suara-Ku." ³⁸ Pilatus baucap lawan Inya, "Apa garang kebenaran itu?" Imbahnya baucap kayaitu, Pilatus kaluar lagi mandatangi urang-urang Yahudi, wan bapander wan buhannya, "Aku kada manamuakan kasalahan apa haja di-Inya. ³⁹ Tapi, buhan ikam baisi satu kabiasaan bahwa aku harus mambibasakan saikung tahanan pada hari Paskah. Jadi, apakah ikam mau supaya aku mambibasakan 'Raja Urang Yahudi' ini?" ⁴⁰ Buhannya manjawab wan bakuciak, "Jangan bibasakan Urang ini, tapi bibasakan Barabas!" Barabas adalah saurang perampok.