¹ Nang ulun maksud, bila ahli waris nitu masih kakanakan, inya kadada bedanya lawan budak walaupun inya adalah ampun sagala sasuatu. ² Inya ada di bawah kuasa pangawas wan panguruh rumah tangga sampai waktu nang sudah ditatapkan oleh abahnya. ³ Kaya nitu jua kita, bila masih kakanakan, kita diperbudak oleh roh-roh dunia ini. ⁴ Akan tatapi, bila hari pangganapan tiba, Allah mautus Anak-Nya, nang lahir matan saurang binian wan lahir di bawah hukum Taurat, ⁵ gasan manabus buhan nang ada di bawah hukum Taurat supaya kita kawa manarima pangangkatan sabagai anak-anak Sidin. ⁶ Karana ikam adalah anak-anak Sidin, Allah sudah mautus Roh Anak-Nya ka dalam hati kita, nang mangiau, "Abba, Bapa." ⁷ Jadi, ikam bukan lagi budak, tatapi anak. Jika ikam adalah anak, Allah manjadiakan ikam ahli waris malalui Kristus. Jangan Diperbudak Lagi oleh Roh- Roh Dunia ⁸ Dahulu, waktu ikam kada pinandu lawan Allah, ikam adalah budak dari hal-hal nang pada dasarnya lain Allah. ⁹ Namun, wayahini, imbah ikam pinandu lawan Allah atawa labih pasnya Allah pinandu lawan ikam, kaya apakah ikam babulik pulang ka roh-roh dunia nang lamah wan kada baguna? Apakah ikam handak diperbudak pulang? ¹⁰ Ikam manjalanakan parayaan atas hari-hari, bulan-bulan,musim-musim, wan tahun-tahun! ¹¹ Ulun takut jangan-jangan jarih payah ulun nang sudah ulun gawi gasan ikam jadi sia-sia. ¹² Ulun mohon ka ikam, dingsanak-dingsanak, jadilah nang kaya ulun karena ulun jua sudah jadi nang kaya ikam. Ikam kada barsalah lawan ulun. Ikam tahu, matan pamulaan ulun mahabarakan Injil ka ikam karena sakit awak nang ulun alami. ¹⁴ Walaupun kondisi awak ulun marupakan ujian gasan ikam, ikam kada manghina atawa manolak ulun, sabaliknya, ikam manyambut ulun sasolah-olah ulun ini malaikat Allah, nang kaya ulun ini Yesus Kristus saurang! ¹⁵ Kaya apa lawan barkat nang ikam rasakan wayahini? Sabab, ulun kawa basaksi manganai ikam dahulu, bila mungkin, manjolok mata ikam wan manjulungnya ka ulun pun ikam rela. ¹⁶ Apakah wayahini ulun manjadi musuh ikam karena manunjukakan kabanaran ka ikam? ¹⁷ Urang-urang bausaha mandapatkan ikam, tapi kada lawan maksud nang baik, Buhannya handak mangasingkan ikam supaya ikam pacang mancari buhannya. ¹⁸ Memang bujur jika salalu samangat manggawi hal-hal nang batujuan baik, wan bila ulun basama ikam. ¹⁹ Anak-anak ulun, demi ikam, ulun rela mananggung salit baranak sampai Kristus dinyatakan dalam ikam. ²⁰ Ulun baharap, ulun kawa baimbai ikam wayahini wan maubah nada suara ulun karena habis akal mahadapi ikam. Hagar wan Sara sabagai Contoh ²¹ Padahi lawan ulun, hai ikam nang handak hidup di bawah Hukum Taurat, apakah ikam kada mandangarakan Hukum Taurat? ²² Karena ada tatulis, Abraham baisi dua anak lakian; saikung lahir matan saurang budak binian, wan nang saikung lagi matan saurang binian merdeka. ²³ Akan tatapi, anak matan budak binian nitu dilahirakan manurut daging, sedangkan anak matan binian merdeka dilahirakan malalui parjanjian. ²⁴ Lihatlah kisah ini sabagai lambang karena dua binian ini malambangkan dua parjanjian matan Gunung Sinai wan malahirakan anak-anak perbudakan. Sidin adalah Hagar. ²⁵ Wayahini, Hagar malambangkan Gunung Sinai di tanah Arab, nangkaya Yerusalem wayahini karena inya hidup dalam parbudakan baimbai anak-anaknya. ²⁶ Akan tatapi, Yerusalem nang di atas adalah binian nang merdeka, wan inya adalah uma kita. ²⁷ Karena ada tatulis, "Basukacitalah, hai binian nang mandul, nang kada baranak. Basaru wan basoraklah, hai ikam nang kada marasakan sakit baranak. Sabab, labih banyak anak matan binian nang saurangan daripada binian nang baisi laki." ²⁸ Dingsanak-dingsanak, ikam adalah anak-anak parjanjian nangkaya Ishak. ²⁹ Pada saat nitu, anak nang lahir manurut daging manganiaya anak nang lahir manurut roh, nangkaya tajadi wayahini. ³⁰ Akan tatapi, apa nang Kitab Suci padahakan? "Usirlah budak binian nitu lawan anaknya karena anak budak binian nitu kada pacang jadi ahli waris baimbai lawan anak binian merdeka." ³¹ Karena nitu, dingsanak-dingsanak, kita lain dari anak-anak budak binian, tatapi dari binian merdeka.