¹ Hai ikam, urang-urang Galatia nang bodoh ! Siapa nang sudah mampardaya ikam? kadakah ikam malihat Yesus Kristus disalibkan di depan umum? ² Satu hal nang handak ku takuni ka ikam, apakah ikam manarima Roh Taurat, atawa karana mandangar lawan iman? ³ bagitu bodohnyakah ikam? Ikam sudah mamulai lawan Roh, apakah ikan wayahini handak maakhiri lawan daging? ⁴ Sia-siakah ikam mangalami pandaritaan nang bagitu banyak -- jika memang nitu kasia-siaan? ⁵ Jadi, apakah Sidin mangaruniakan Roh ka ikam wan manggawi mukjizat di antara ikam karana ikam manjalani Hukum Taurat, atawa karana ikam mandangar lawan iman? ⁶ Nang kaya Abraham parcaya lawan Allah sahingga hal nitu diparhitungkan ka inya sabagai kabanaran. ⁷ Karana nitu, katahuilah bahwa urang-urang nang baimanlah nang disambat anak-anak Abraham. ⁸ Kitab Suci, nang sudah mangatahui sabalumnya bahwa Allah pacang mambujurakan urang-urang lain Yahudi karana iman, sudah badahulu mahabarakan Injil ka Abraham wan baucap, "Sabarataan bangsa pacang dibarkati malalui ikam." ⁹ Jadi, buhannya nang baiman pacang dibarkati baimbai Abraham, urang nang parcaya nitu. ¹⁰ Sabarataan urang nang bagantung pada Hukum Taurat ada di bawah kutuk, sabab ada tatulis: "Takutuklah satiap urang nang kada tunduk pada sagala sasuatu nang tatulis dalam kitab Hukum Taurat wan malakukannya." ¹¹ Jadi, wayahini jalas bahwa kadada saurang pun nang dibujurakan di hadapan Allah oleh Hukum Taurat, sabab "Urang bujur pacang hidup oleh iman." ¹² Tatapi, Hukum Taurat kada didasarkan pada iman. Sabaliknya, "urang nang malakukan Hukum Taurat pacang hidup karananya". ¹³ Kristus manabus kita dari kutuk Hukum Taurat wan manjadi kutuk gasan kita, sabab ada tatulis, "Takutuklah urang nang digantung di kayu salib!" ¹⁴ Bila ada dalam Kristus, barkat Abraham kawa sampai ka urang-urang lain Yahudi sahingga lawan iman kita kawa manarima Roh nang sudah dijanjiakan nitu. Janji Allah wan Hukum Taurat ¹⁵ Dingsak-dingsanak, ulun pacang mambari contoh kahidupan sahari-hari: bila parjanjian sudah disahkan, walaupun hanya kontrak antarmanusia, kadada urang nang kawa mambatalakan atawa manambahakan apapun dalam parjanjian nitu. ¹⁶ Wayahini, manganai parjanjian nang disampaiakan Allah ka Abraham wan ka katurunanya. Allah kada baucap, "...ka katurunan-katurunannya," nang manunjuk ka banyak katurunan. "... wan ka katurunan ikam," bararti manunjuk ka saikung urang, yaitu Kristus. ¹⁷ Maksud ulun, Hukum Taurat nang muncul 430 tahun imbahnya kada kawa mambatalakan parjanjian nang sudah disahkan oleh Allah. Jadi, parjanjian nitu kada kawa dihilangakan. ¹⁸ Bila warisan didasarakan pada Hukum Taurat, maka warisan nitu kada lagi didasarakan pada parjanjian. Tatapi, Allah maanugerahkannya gasan Abraham malalui sabuah parjanjian. ¹⁹ Jadi, mangapa ada Hukum Taurat? Hukum Taurat dijulung karana palanggaran-palanggaran, sampai katurunan nitu datang sabagaimana maksud parjanjian nitu diolah. Hukum Taurat dibarlakukan malalui buhan malaikat lawan parantara. ²⁰ Namun, parantara kada gasan mawakili saikung urang, padahal saikung urang adalah satu. Tujuan Hukum Taurat ²¹ Kalau damikian, apakah Hukum Taurat balawanan lawan parjanjian Allah? Tantu kada! sabab, jika Hukum Taurat dijulung gasan kawa mambari hidup, kabanaran pasti barasal dari Hukum Taurat. ²² Tatapi, Kitab Suci sudah mamanjarakan sagala sasuatu wan sabarataan urang di bawah dosa supaya parjanjian oleh iman dalam Kristus Yesus kawa dijulung ka bubuhan nang parcaya. ²³ Sabalum iman datang, kita ditawan di bawah Hukum Taurat, ditahan sabagai tawanan sampai iman nang pacang datang dinyataakan. ²⁴ Jadi, Hukum Taurat adalah pangawas gasan kita sampai Kristus datang supaya kita kawa dibujurakan oleh iman. ²⁵ Wayahini, iman kada lagi mambutuhkan Hukum Taurat sabagai pangawas kita. ²⁶ Dalam Yesus Kristus, ikam sabarataan adalah anak-anak Allah malalui iman. ²⁷ Ikam sabarataan sudah dibaptis dalam Kristus sudah ada dalam Kristus. ²⁸ Kadada lagi urang Yahudi atawa urang Yunani, busak atawa urang mardeka, lakian atawa binian karana ikam sabarataan satu dalam Yesus Kristus. ²⁹ Jika ikam adalah milik Kristus, ikam adalah katurunan-katurunan Abraham wan ahli-ahli waris sasuai lawan parjanjian.