¹ Jika ikam sudah dibangkitakan baimbai Kristus, carilah hal-hal nang di atas, wadah Kristus bagana, duduk di higa kanan Allah. ² Pikirakanlah hal-hal nang di atas, bukan hal-hal nang di bumi. ³ Sabab, ikam sudah mati wan hidupmu tasambunyi baimbai Kristus dalam Allah. ⁴ Saat Kristus, nang adalah hidup ikam, manyatakan diri Sidin, ikam jua pacang dinyatakan dalam kamuliaan baimbai lawan Sidin. ⁵ Karana nitu, matikan sifat apa pun nang barasal matan sifat dunia ikam, yaitu parcabulan, kacamaran, hawa nafsu, kahandak nang jahat, wan kasarakahan, nang adalah panyambahan berhala. ⁶ Hal-hal inilah nang manyababkan murka Allah datang. ⁷ Dahulu, ikam jua manggawinya waktu ikam masih hidup di dalamnya. ⁸ Namun, wayahini, buanglah sabarataan nitu: panyarikan, kamurkaan, kebencian, fitnah, wan pandiran kotor matan muntung ikam. ⁹ Jangan saling badusta karana ikam sudah malapaskan manusia lawas ikam baimbai lawan parbuatan-parbuatannya. ¹⁰ Pakailah manusia hanyar, nang tarus-manarus diparbaharui dalam pangatahuan sasuai lawan gambar matan Panciptanya. ¹¹ Dalam hal ini, kadada lagi urang Yunani atawa urang Skit, budak atawa urang merdeka, tatapi Kristus adalah sagalanya wan sabarataannya. Hidup nang Hanyar lawan Sasama ¹² Jadi, sabagai urang-urang pilihan Allah nang kudus wan nang dikasihi, pakailah ka ikam belas kasih, karamahan, karandahan hati, kalambutan, wan kasabaran. ¹³ Sabarlah saurang tahadap nang lain, wan saling ba maapanlah jika ternyata ada saurang nang basalah tahadap nang lain. Nangkaya Tuhan sudah mambari maap ka ikam, maka ikam jua harus saling ba maapan. ¹⁴ Di atas sabarataan nitu, pakailah kasih, nang manjadi pangikat nang sampurna. ¹⁵ Biarlah damai sejahtera Kristus mangandalikan hati ikam karana memang gasan nitulah ikam dikiau manjadi satu awak, wan basyukurlah. ¹⁶ Biarlah pandiran Kristus bagana di dalam ikam dengan melimpah, lawan sagala hikmat ikam mangajar wan manasihati saurang tahadap nang lain, manyanyikanlah mazmur, lagu-lagu pujian, wan nyanyian-nyanyian rohani, sabarataan lawan ucapan syukur dalam hati ikam gasan Allah. ¹⁷ Apa pun nag ikam gawi, dalam pandiran atawa parbuatan, gawiakanlah sabarataan nitu dalam ngaran Tuhan Yesus, sambil basyukur gasan Allah Bapa, malalui Sidin. Hidup nang Hanyar dalam Rumah Tangga ¹⁸ Istri-Istri, tunduklah lawan laki ikam sabagaimana saharusnya dalam Tuhan. ¹⁹ Suami-suami, kasihilah bini ikam wan jangan kasar tahadap buhannya. ²⁰ Kakanakan, taatilah kuitan ikam dalam sagala hal karena hal ini mahimungakan Tuhan. ²¹ Bapak-bapak, jangan mamicu kamarahan anak-anak ikam supaya buhannya kada patah samangat. ²² Budak-budak, taatilah tuan-tuan ikam nang ada di dunia ini dalam sagala hal. Gawiakanlah nitu bukan saat buhannya malihat ikam wan gasan mahimungakan buhannya malainkan lawan tulus hati karana takut akan Tuhan. ²³ Apa haja nang ikam gawi, gawiakanlah lawan saganap hati nangkaya gasan Tuhan wan bukan gasan manusia, ²⁴ sabab ikam tahu bahwa matan Tuhan ikam pacang manarima warisan sabagai upah ikam. Kristus Tuhanlah nang ikam layani. ²⁵ Sabab, urang nang babuat salah pacang manarima balasan atas kasalahan nang digawiakannya wan kadada nang dikecualikan.