¹ Sabab, ulun handak ikam tahu betapa baratnya parjuangan nang sudah ulun gawi gasan ikam, wan gasan buhan nang ada di Laodikia, wan gasan sabarataan urang nang balum suah batamuan muha lawan ulun. ² Tujuan ulun adalah supaya hati buhannya tahibur wan diparsatuakan dalam kasih sahingga buhannya baisi sagala kakayaan nang barasal dari jaminan akan pangartian wan pangatahuan dari rahasia Allah, yaitu Kristus saurang. ³ Dalam Sidin, tasambunyi sagala harta dari hikmat wan pangatahuan. ⁴ Ulun mamadahakan hal ini supaya kadada urang nang pacang manipu ikam lawan pardabatan nang kadangarannya masuk akal. ⁵ Sabab, meskipun awak jasmani ulun kadada basama ikam, tatapi ulun basama ikam dalam roh, wan ulun basukacita malihat kadisiplinan ikam nang baik wan kataguhan iman ikam dalam Kristus. Taruslah Maumpati Kristus ⁶ Jadi, karana ikam sudah manarima Yesus Kristus sabagai Tuhan, hiduplah tarus dalam Sidin, ⁷ barakar wan bangunlah diri ikam dalam Sidin, taguhkanlah iman ikam sabagaimana sudah diajarakan ka ikam, wan malimpahlan lawan ucapan syukur. ⁸ Bahati-hatilah supaya jangan ada saurang pun nang manjarat ikam lawan filsafat nang kosong wan manyasatakan, nang barasal dari tradisi manusia wan asas-asas roh dunia, lain prinsip-prinsip Kristus. ⁹ Sabab, dalam Sidin badiam sabarataan kapanuhan keilahian nang hidup dalam bentuk jasmani. ¹⁰ Ikam sudah dipenuhi dalam Sidin, nang adalah kapala atas sabarataan pamarintah wan panguasa. ¹¹ Dalam Sidin, ikam jua disunat, lain lawan sunat nang digawi oleh tangan manusia, tatapi lawan sunat nang digawi oleh Kristus, yaitu mamotong awak kadagingan nang badosa. ¹² Dalam baptian, ikam dikuburakan baimbai lawan Kristus, wan jua dikabangkitan baimbai lawan Sidin malalui iman ikam dalam kuasa Allah nang mambangkitakan Sidin matan urang mati. ¹³ Walaupun dahulu ikam mati dalam palanggaran-palanggaran ikam wan dalam kadagingan ikam nang kada basunat, Allah maolah hidup ikam baimbai lawan Sidin imbah Sidin mangampuni sabarataan palanggaran kita. ¹⁴ Sidin sudah mambatalakan surat utang wan aturan-aturan tuntutannya nang manghalangi hubungan antara Allah lawan kita. Sidin sudah mangambilnya wan manggawinya di atas kayu salib. ¹⁵ Sidin malapasakan buhan pamarintah wan panguasa, lalu manjadikan buhannya tontonan nang manyupani oleh karena kamanangan Sidin di atas kayu salib. Jangan Maumpati Aturan-Aturan nang Diolah Manusia ¹⁶ Karena nitu, jangan biarakan saurang pun manghakimi ikam lawan masalah makanan wan minuman atawa hari raya keagamaan, parayaan bulan hanyar atawa hari Sabat. ¹⁷ Sabarataan nitu hanyalah bayangan manganai hal-hal nang pacang datang, tatapi wujud nang sabujurnya adalah Kristus. ¹⁸ Jangan biarakan urang nang himung lawan karandahan hati nang palsu wan panyambahan ka malaikat-malaikat manghakimi ikam. Buhannya adalah urang-urang nang hakun lawan panglihatan hal-hal detail sahingga maolah pikiran buhannya sombong karana ide-ide duniawi. ¹⁹ Urang nang kayaitu kada bapingkut taguh lawan kapala. Kapala adalah nang manopang sabarataan awak, wan sabarataan awak diparsatuakan oleh sendi-sendi wan otot-otot, sabarataan tumbuh lawan partumbuhan matan Allah. ²⁰ Jika baimbai Kristus ikam sudah mati tarhadap asas-asas dunia, mangapa saolah-olah ikam masih ampun dunia, tunduk pada aturan-aturan nangkaya: ²¹ "Jangan jamah, jangan cicipi, jangan santuh"? ²² Aturan-aturan ini pacang binasa imbah diumpati karana aturan-aturan nitu diolah badasar pada parintah wan ajaran manusia. ²³ Aturan-aturan nangkaya nitu memang kalihatannya bijaksana lawan manonjolakan ibadah nang bapusat pada diri wan karandahan hati nang palsu serta panyiksaan awak. Namun, sabarataan nitu kadada nilainya salain gasan mamuasakan kadagingan.