¹ Jangan kasar managur lalakian nang labih tuha, tatapi jadiakan inya nangkaya abah saurang, wan jadiakan jua lalakian nang labih anum nangkaya dinsanak. ² Jadiakan binian nang labih tuha angkaya uma saurang, wan binian nang labih anum nangkaya binian nang dihormati. Manganai Buhan Janda ³ Hormati buhan janda nang bujur-bujur janda. ⁴ Tatapi, pabila janda baisi anak atawa cucu. Buhannyalah nang panampaian harus balajar manampaiakan bakti ka saisi rumahnya saurang. Dengan kaitu, buhannya sudah mambalas budi ka kuitan buhannya, sabab hal inilah nang dikatujui Allah. ⁵ Balalu janda nang bujur-bujur janda nang hidup saurangan haja, inya musti maandak harapannya ka Allah balalu santar manaikakan permohonan wan doa siang atawa malam. ⁶ Tatapi, janda nang hidup hinggan berfoya-foya, inya sudah parak mati waalaupun inya masih hidup. ⁷ Parintahakan jua hal-hal ini gasan jemaat supya buhannya kada bercela. ⁸ Tatapi, pabila urang kada mamalihara sanak kaluarganya saurang, khususnya kaluarga nang parak, baarti inya sudah manyangkali imannya wan labih buruk daripada urang nang kada percaya. ⁹ Janda nang dimasukakan dalam daftar hinggan binian nang sudah baumur paling sadikit anam puluh tahun, manjadi janda dari satu laki, ¹⁰ wan dikenal lantaran bakalakuan baik, yaitu mangganalakan anak-anak, mambari tumpangan, mambasuh batis urang-urang kudus, manolong urang yang rahat kasusahan, wan rajin dalam satiap gawian nang baik. ¹¹ Tatapi, janda-janda nang labih anum jangan dimasukakan ka dalam daftar, sabab pabila hasrat seksualnya maulah buhannya jauh matan Kristus, buhannya cagar handak balaki pulang. ¹² Hal ini maulah buhannya tahukum lantaran sudah maingkari janji nang imbah buhannya satujui dahulu. ¹³ Di samping itu, buhannya mulai tabiasa mangoler, bakuliling matan satu rumah ka rumah nang lain. Kada hinngan itu haja, buhannya jua bagosip wan mancampuri urusan urang. manyambat hal-hal nang kada saharusnya buhannya panderakan. ¹⁴ Jadi, aku handak supaya janda-janda anum balaki pulang, baisi anak, wan mangurus rumah tangganya supaya kadada kasampatan gasan lawan untuk mahina buhannya. ¹⁵ Dagana, beberapa urang sudah babulik maumpati setan. ¹⁶ Pabila ada babinian percaya nang baisi sanak kaluarga nang janda, biarhaja buhannya nang maharagui janda-janda itu sehingga gereja kada tabebani, wan gereja kawa manolong janda-janda lain nang bujur-bujur parlu ditolong. Tentang Panatua wan Hal-hal lainnya ¹⁷ Panatua-panatua nang mangurus jemaat dengan baik layak manarima penghormatan dua kali lipat, tarutama buhannya nang cangkal bagawi dalam berkhotbah wan mangajar. ¹⁸ Sabab, Kitab Suci bapadah, "Jangan mambharangus muntung lembu nang rahat manggiling gandum." wan "Urang nang bagawi berhak mandapat upahnya." ¹⁹ Jangan manarima tuduhan nang didawaakan ka buhan penatua kacuali sudah tabukti dua atawa tiga urang saksi. ²⁰ Buhan nang baulah dosa harus ditagur dihadapan sabarataan urang supaya nang lain kada wani maulah dosa. ²¹ Dhadapan Allah, Yesus Kristus, wan buhan malaikat nang tapilih, aku maingatakan buhan ikm bujur-bujur supaya manuruti patunjuk-patunjuk ini kada manangguh atawa pilih kasih. ²² Jangan talalu lakas manumpangakan tangan awan siapahaja atawa jangan umpat- umpatan dalam dosa urang lain. Jagalah agar diriikam tatap suci. ²³ Jangan hinggan minum banyu putih haja, tatapi, minum sadikit anggur supaya parutikam wan awakikam nang rancak garing waras. ²⁴ Dosa sapalih urang nyata-nyata ditampaiakan sehingga maulah buhannya di adili. Tatapi, dosa dari sapalihnya urang hanyar talihat kena imbahnya. ²⁵ Kaitujua ada ulahan baik nang nyata talihat. Tatapi ulahan nang baik nang kada talihat gin, kada pacangan kawa disambunyiakan.