¹ Ji̧nä̧ yo̧mȩtȩ ca̧ca̧cui̧pä̧tu̧cui̧ ttö̧ja̧ dä'äcuocotö 'cua̧rö̧nä̧. ² Jȩa̧ pä'ö pä'ö ku̧nä̧hua̧ isojuo'äcua'a ä'canä, ojiyä coächa'a jä̧'i̧nö̧'a̧nö̧ emipäcua'a ä̧'ca̧nä̧, TÖ̧Ä̧NÄ̧HUA̧ u̧'ä̧i̧ ucuturu rȩbȩhuä̧cua̧'a̧ ä'canä. ³ ¡TÖ̧Ä̧NÄ̧HUA̧RÖ̧TÄ̧ usätucui ja̧huä̧jä̧ rȩjȩnä̧ ka̧cuä̧tö̧ ucuo te'ähuocotömä, jȩ'cuä̧tu̧cua̧ pä'ö hueähui'äjimä ucuotätucui! Adiu jȩä̧cuä̧huä̧tä̧ usätucui, tta̧'cua̧pö̧nö̧ kä̧cuä̧huä̧tä̧ usätucui, ja̧'hua̧nö̧ jö̧ttö̧tä̧ jä̧cua̧'a̧cö̧ TÖ̧Ä̧NÄ̧HUA̧ ö̧ra̧huä̧rö̧ttö̧ cu̧ji̧ä̧pä̧tu̧cuä̧cua̧'a̧mä̧. ⁴ Isopäi'önä Gaza ötahuiäyä yörö'iso tocuome ja̧'hua̧ta̧'a̧nö̧ Ascalón'i̧nä̧ si'epö icuähuäcua'a. Jahuätömä mo̧ro̧ kä'co Asdodrömä rä'epö tticuäcuotö, ja̧'hua̧ta̧'a̧nö̧ Ecrónrö'i̧nä̧ ö̧jo̧mȩttö̧mä̧ rä'epö icuähuäcua'a! ⁵ Rö̧ä̧nä̧ ubara ttuttäcuotö dä'ähuoto jäyotö ka̧cuä̧tö̧mä̧, Queret ttö̧ja̧rö̧'i̧nä̧. TÖ̧Ä̧NÄ̧HUA̧MÄ̧ ucuturu to'ija̧'a̧cu̧ ucuocuäji, Canaán rȩjȩnä̧ ka̧cuä̧tö̧rö̧'i̧nä̧, filisteas tti̧rȩjä̧nä̧ ka̧cuä̧tö̧rö̧'i̧nä̧. Ttömä si'epö chi̧cuä̧cua̧sä̧ ya̧tȩ'i̧nä̧ ö̧ji̧pö̧ juiyönä. ⁶ Ja̧hua̧nö̧ ja̧'a̧ttö̧ dä'ähuoto jäyotonä̧mä̧ mȩji̧yä̧'chetä ovejatö̧rö̧ tta̧'ä̧rä̧tö̧ ttucuäje'a pä'ötä pärohuächäcua'a ja̧'hua̧ta̧'a̧nö̧ ovejastö̧ ttö̧ja̧cuo̧ca̧ jö̧nä̧tä̧. ⁷ Ja̧huä̧jä̧ jäyänä ka̧cuä̧tö̧mä̧ Judá ahuaruhuättö ka̧cui̧pi̧nä̧tö̧tä̧ jä̧cua̧'a̧, juhuorö ttä̧ji̧mö̧ ovejastö̧rö̧ tta̧ttä̧rä̧cuo̧tö̧mä̧. NI̧pä̧cho̧mȩnä̧, ttö̧ja̧mä̧ Ascalón ojusodenä ttä'ecuäcuotö, juhua'amä TÖ̧Ä̧NÄ̧HUA̧ Dios jahuätörö tta̧huä̧ra̧'a̧ttö̧ ja̧'hua̧nö̧ jȩpö̧ ttöäre ji̧nö̧mä̧ ppa̧huä̧dä̧cuo̧tö̧. ⁸ Ttömä Moab ttö̧ja̧ ya̧ttä̧huȩ'a̧'a̧mä̧ ä̧ju̧cui̧nö̧sä̧, ja̧'hua̧ta̧'a̧nö̧ Amón ttö̧ja̧ surojuo'epö pättä'chinö'i̧nä̧, Ttö chumö̧huäyotörö ya̧ttä̧huä̧'cho̧mȩnä̧, suronä jȩpö̧ abora̧'a̧ 'cuä'o'inä̧tö̧. ⁹ Ja̧'hua̧nö̧ ja̧'a̧ttö̧, ji̧nä̧ Ttö chö̧jä̧i̧mä̧ pä'ötó TÖ̧Ä̧NÄ̧HUA̧ o'cajuiyönä ju̧ru̧hua̧, Israel ttö̧ja̧ ttu̧ru̧hua̧mä̧, Moab rȩjȩmä̧ Sodoma ji̧nö̧'a̧nö̧ pärohuächäcua'a ja̧'hua̧ta̧'a̧nö̧ Amón ttö̧ja̧mä̧ Gomorra ji̧nö̧'a̧nö̧; adoyä ka̧cuo̧mȩtä̧ jö̧nä̧ juhua'atäcu 'cäruhuäbö'ca jö̧nä̧tä̧, 'cuäopönä de'a jui̧yä̧jä̧tä̧ jö̧nä̧. Ja̧'hua̧nö̧ ja̧'a̧ chumö̧huäyotöttö ka̧cui̧pi̧nä̧tö̧mä̧ ttu̧nä̧u̧cui̧yä̧cuo̧tö̧ ja̧'hua̧ta̧'a̧nö̧ jahuätöttö ka̧cui̧pä̧tö̧mä̧ ju̧huȩnȩtä̧ ttö̧ja̧cuä̧mä̧cuo̧tö̧. ¹⁰ Pi̧yȩmä̧ öcuäopäcua'a Moab ttö̧ja̧rö̧'i̧nä̧ Amón ttö̧ja̧rö̧'i̧nä̧ ucuo tettäcuähuomettö̧, juhua'amä ye'epä'chö ya̧'a̧huȩ'ö̧ jȩtti̧no̧mȩttö̧ TÖ̧Ä̧NÄ̧HUA̧ o'cajuiyönä ju̧ru̧hua̧ umähuäyotörö. ¹¹ Ja̧'hua̧nö̧ jo̧mȩnä̧ jahuätömä TÖ̧Ä̧NÄ̧HUA̧RÖ̧ yettecuäcuotö juhua'amä ja̧huä̧jä̧nä̧ ka̧cuä̧tö̧ ttö̧ä̧nä̧huo̧tö̧rö̧ ya̧huä̧huȩ'o̧mȩttö̧. Suhuacuächome Ttö̧ja̧cuo̧mȩ pö̧nä̧ttö̧mä̧ Ja̧u̧ru̧tä̧ ucuo tettähuäcuotö. ¹² Ucutu Etiopes ttö̧ja̧mä̧ chucurä'chutä 'cuä̧o̧'ä̧cuä̧u̧jä̧ ¹³ ja̧'hua̧ta̧'a̧nö̧ Dios u̧mö̧tä̧ rohuäcua'a ttu̧huo̧jua̧'a̧cunä̧ttö̧mä̧, ja̧'hua̧ta̧'a̧nö̧ Asiria ttö̧ja̧rö̧mä̧ si'epö i̧cuä̧cua̧, Nínive ötahuiyämä surojomä toome jö̧nä̧tä̧ jä̧cua̧'a̧nö̧ ajiya'inä joometä̧ de'a jui̧yä̧jä̧ 'cua̧rö̧nä̧tä̧. ¹⁴ Ja̧u̧nu̧ o'ca'amä ju̧huȩnȩtä̧ isotö yo̧mȩtȩ ka̧cuä̧tö̧mä̧ cuä'ipö ttö̧'ȩjä̧cuo̧tö̧, ttö̧ja̧ ttä̧ji̧mö̧ttö̧mä̧ yotucu pö̧nä̧tä̧ ubo'inä̧ isaju'i̧nä̧, pepepeyu de'a jui̧yä̧jä̧nä̧ kö'i̧nä̧, 'chajatö ju'toju jä'ca isä'canä ttu̧huȩjä̧cuo̧tö̧. Huottömä ventananä rä̧mi̧pä̧cua̧'a̧; pparächinä̧samä apatettö mä̧nä̧nä̧ pä̧cua̧'a̧; käcuorä o'ca ji̧nö̧ 'co̧'ö̧ adicuä ji̧nö̧mä̧ ra̧huä̧pi̧ju̧nä̧tä̧ jä̧cuȩ. ¹⁵ Pi̧yȩ ötahuiyä ja̧'a̧ yettecuoca'a eseutä ttö̧ja̧cui̧nö̧mä̧, a̧mi̧so'quinämä pä'inö̧: "Ttötäsä, ttö'anö hua̧ ka̧ra̧mä̧ toa'a" Surojome jö̧nä̧tä̧ pärohuächinome, isotö cuä'ipö ttö̧'ȩjo̧mȩ jö̧nä̧tä̧. Ya̧tȩ ju̧huȩnȩ tö'cönä̧nö̧ 'cuä'opömä jua̧ttä̧cua̧ ja̧'hua̧nö̧ jo̧mȩnä̧ u̧mö̧ i̧hui̧'cuä̧cua̧.