¹ Pi̧yȩ ji̧na̧'a̧ TÖ̧Ä̧NÄ̧HUA̧ i̧huȩnȩ Sofonías Cusi i̧tti̧rö̧ rȩbȩhui̧na̧'a̧, Gedalíastä ö̧do̧rö̧, Amaríastä ö̧jä̧hua̧yö̧ru̧, ja̧u̧ Amaríasmä Ezequías i̧tti̧ ji̧na̧'a̧, Amón i̧tti̧ Josías Judá ttö̧ja̧rö̧ ru̧hua̧ jö̧nä̧ hueö pä̧nä̧ ji̧na̧'a̧. ² Ttömä o'cajuiyönä̧ si'epö chi̧cuä̧cua̧sä̧ pi̧jä̧ rȩjȩnä̧ ka̧cuä̧tö̧rö̧mä̧, pä'ötó TÖ̧Ä̧NÄ̧HUA̧MÄ̧. ³ Ttömä ttö̧ja̧rö̧'i̧nä̧, de'a isotörö'i̧nä̧ si'epö chi̧cuä̧cua̧sä̧; Ttömä siépö chi̧cuä̧cua̧sä̧ mo̧ro̧jä̧nä̧ co̧'ä̧rä̧tö̧rö̧'i̧nä̧ ja̧'hua̧ta̧'a̧nö̧ po̧i̧ ajenä̧ cuo̧'ä̧rä̧tö̧rö̧'i̧nä̧, suropätörömä si'epö chi̧cuä̧cua̧sä̧. Ttö̧ja̧ pi̧jä̧ rȩjȩnä̧ ka̧cuö̧rö̧mä̧ ȩmö̧ chi̧cuä̧cua̧sä̧, pä'ötó TÖ̧Ä̧NÄ̧HUA̧MÄ̧. ⁴ Judá ttö̧ja̧ ttu̧huä̧mȩnä̧ chu̧mö̧ cä̧dȩpä̧cua̧sä̧ ja̧'hua̧ta̧'a̧nö̧ Jerusalén ttö̧ja̧ o'catoi'önä̧rö̧. Porö ka̧cui̧pi̧nä̧tö̧ttö̧ ttö̧ä̧nä̧hua̧ Baalrö ucuo te'ähuätörömä si'epö chi̧cuä̧cua̧sä̧, ja̧'hua̧ta̧'a̧nö̧ sacerdote huotöttö tätähuä'ca ucuo te'ähuätörömä ttimi'i̧nä̧ si'epö chi̧cuä̧cua̧sä̧, ⁵ ttö̧ja̧ ttoju isodettö si̧ri̧'cö̧rö̧ ucuo te'ähuätörö'i̧nä̧ ttö̧ja̧ TÖ̧Ä̧NÄ̧HUA̧RÖ̧ ucuo te'äu ja̧u̧tä̧ i̧mi̧nä̧ ucuo te'äu kä̧nö̧ ttu̧ru̧hua̧ ru̧hua̧ i̧mi̧nä̧'i̧nä̧ ucuo te'ähuätörömä. ⁶ Ja̧'hua̧ta̧'a̧nö̧ jitö TÖ̧Ä̧NÄ̧HUA̧ o'ca'anä 'chä̧nö̧ jui'ö dö'ecuächinö̧tö̧rö̧'i̧nä̧, TÖ̧Ä̧NÄ̧HUA̧RÖ̧'i̧nä̧ usocotörömä ja̧'hua̧ta̧'a̧nö̧ TTÖ̧NÄ̧HUA̧ oipä̧cuȩ tö'cö'i̧nä̧ jä'epocotörömä." ⁷ ¡TÖ̧Ä̧NÄ̧HUA̧ ä'ca jo̧mȩttö̧mä̧ 'corö jö̧nä̧ kacuätucui! Isopäi'önä TÖ̧Ä̧NÄ̧HUA̧ u̧mo̧ro̧mä̧ täcö tö'cöhuächa'attö; TÖ̧Ä̧NÄ̧HUA̧MÄ̧ ku icu i̧yä̧cuȩmä̧ jo̧mȩnö̧ jȩpö̧ ku̧nä̧ji̧ ja̧'hua̧ta̧'a̧nö̧ ä̧tȩpä̧jä̧u̧rö̧'i̧nä̧ 'cä̧'ȩpö̧ ku̧nä̧ji̧. ⁸ TÖ̧Ä̧NÄ̧HUA̧ ku icu i̧yä̧cuä̧ mo̧ro̧mä̧ 'cuäpäcua'a, Ttömä ruhuajurö'i̧nä̧ ja̧'hua̧ta̧nö̧ ru̧hua̧ i̧tti̧mö̧rö̧'i̧nä̧ ro̧dȩpä̧cua̧sä̧ juhua'atäcu ko̧ro̧jä̧ttö̧ ichäcuähuotö ttö̧'ca̧tä̧huä̧ti̧yu̧ 'ca̧tä̧huä̧tö̧rö̧'i̧nä̧. ⁹ Ja̧u̧nu̧ mo̧ro̧mä̧ jitö o'catoi'önä̧ Dagónrö ucuo te'ähuätörö chutäbotäcua̧sä̧, tturuhuotörö yaparetö suronä jȩpö̧ ttu̧ru̧hua̧ isode 'co̧ä̧chi̧'ö̧nä̧ do'ädö rutätörömä. ¹⁰ Ja̧u̧nu̧ mo̧ro̧ jä̧cua̧'a̧ pä'ötó TÖ̧Ä̧NÄ̧HUA̧MÄ̧, po̧i̧sa̧ äpatenä doächäcuähuomettö̧ huotta'a rä̧mi̧pä̧cua̧'a̧ ötahuiyä päcuäda'a jubö päia'anä po̧ri̧yä̧'tä̧ päi'ome jubö kä'ädö. ¹¹ Ttu̧cuä̧ iyähuome ka̧cuä̧tö̧mä̧ ajahuätucui, o'cajuiyönä ttu̧cuȩ iyähuomemä si'epö icuähuächa'a, o'cajuiyönä platas pättö rö̧nö̧ toäcuähuä'i̧nä̧ si'epö icuähuäcua'a. ¹² Ja̧'hua̧nö̧ ja̧'a̧ ja̧u̧ 'cuäopö mo̧ro̧ jä̧cua̧'a̧ Ttö ȩmö̧ chichäcua'amä Jerusalén ttö̧ja̧rö̧ tejädö jähuäcu ichö, ja̧'hua̧nö̧ jo̧mȩnä̧ 'cuä'ächi'ö pȩjä̧mä̧tö̧rö̧ vivo isoya pȩjö̧ma̧'a̧ jä̧'i̧nö̧'a̧nö̧ huotörö ro̧dȩpä̧cua̧sä̧, ttamiso'quinä TÖ̧Ä̧NÄ̧HUA̧MÄ̧ yorö'iso adiu'i̧nä̧ suroju'i̧nä̧ jȩpo̧cö̧ pä'ätörö. ¹³ ¡Ttöäre pärätämä 'chottipäcuä̧u̧ ja̧'hua̧ta̧'a̧nö̧ ttoju odehuiyämä ma̧ä̧chä̧cua̧'a̧ juiyome jö̧nä̧tä̧! Jahuätömä odehuiyä ttaditäcuotö, ja̧'hua̧nö̧ ttadita'anä ja̧u̧nu̧ odehuiyänämä ko̧co̧tö̧ ttäcuätö ja̧'hua̧ta̧'a̧nö̧ uvamä ttu̧ju̧na̧'a̧nä̧ vino isoyamä ahuocotö ttäcuotö. ¹⁴ ¡TÖ̧Ä̧NÄ̧HUA̧ u̧mo̧ro̧ rö̧ä̧u̧ mo̧ro̧mä̧ täcö tö'cöhuächa'a! ¹⁵ TÖ̧Ä̧NÄ̧HUA̧ u̧mo̧ro̧ i̧huȩnȩmä̧ rä̧mi̧pä̧cua̧'a̧ curä rohuäcuähuä i̧sa̧ pä̧i̧cu̧nä̧ ajahua jä̧'i̧nö̧'a̧nö̧! Ja̧u̧ mo̧ro̧mä̧ a̧mi̧suru mo̧ro̧ jä̧cua̧'a̧, usurä ȩma̧u̧ tta̧'cua̧ tta̧ttȩcu̧ mo̧ro̧, cu'upä urou mo̧ro̧ ja̧'hua̧ta̧'a̧nö̧ kä̧ru̧'co̧u̧ mo̧ro̧, yodo jö̧nä̧ yo̧u̧ mo̧ro̧, ajiya isoppatä rö̧nä̧rö̧ mo̧ro̧, 'quiyu yodo mo̧ro̧. ¹⁶ Ja̧u̧ mo̧ro̧ jä̧cua̧'a̧ trompeta ppöttö mo̧ro̧mä̧, 'quiyö ötahyuiyä ttoecuäbämä rä̧mi̧pä̧cua̧'a̧ ju'toju jäbämä. ¹⁷ Ttö̧ja̧rö̧mä̧ tta̧'cua̧ tta̧huȩpö̧tä̧ ichäcua'a, ä̧to̧cä̧tö̧rö̧ ottipa'a jä̧'i̧nö̧'a̧nö̧ oipa pä'ötä, juhua'amä TÖ̧Ä̧NÄ̧HUA̧RÖ̧ ttucuotoca'a ji̧nö̧ta'anö. Ttucuojamä i̧sa̧ppȩ huerächa'a jä̧'i̧nö̧'a̧nö̧ huerächäcua'a ja̧'hua̧ta̧'a̧nö̧ ttidepämä ttu̧cuä̧rȩ o'co jä̧'i̧nö̧'a̧nö̧tä̧ jä̧cua̧'a̧. ¹⁸ Ttöäre pärätä'i̧nä̧, oro'i̧nä̧ tta̧'cua̧rö̧ ki̧'ö̧nä̧mä̧ ppä̧do̧co̧u̧ ttäcuotö TÖ̧Ä̧NÄ̧HUA̧ a̧mi̧suruttömä. TÖ̧Ä̧NÄ̧HUA̧ ä'cuoyäumä̧ ku icuäcua'a pi̧jä̧ o'cajuiyönä, juhua'amä o'cajuiyönä i'cächa'attö surojömä pi̧jä̧nä̧ ka̧cuä̧tö̧ o'catoi'önä̧rö̧ si'epö icua pä'ö.