¹ ¡Ötahuiyä ttö̧ja̧ jarodätömä usurä ttȩmä̧huä̧cuo̧tö̧! Ötahuiyä suronä jȩä̧cuä̧huä̧tä̧ ko̧mȩmä̧ ucuotäcuähuocötä ko̧mȩ ja̧'a̧. ² Jahuäjumä Dios i̧huȩnȩmä̧ kä̧ju̧cua̧nä̧ pä'ocoju pinä̧ju̧, Dios jue'epö aditö icua'anä iyähuocoju pinä̧ju̧. Jahuäjumä Diosrömä esetocoju pinä̧ju̧. Jahuäjumä TÖ̧Ä̧NÄ̧HUA̧RÖ̧MÄ̧ ka̧'cua̧ huȩnä̧ro̧co̧ju̧ pinäju̧ ja̧'hua̧ta̧'a̧nö̧ Diosmä kötö'cöhuächa pä'ocoju pi̧nä̧ju̧. ³ Umöhuäyotö ruhuotömä juorö kä'cottö mu̧ yä̧hui̧tö̧ durupätö jö̧nä̧ huotö. Röji pä'ö icuätömä nipä̧ro̧mȩcu̧ tä̧mö̧ ä̧hui̧ri̧tö̧mä̧ mo̧ro̧ päia'a yu̧tta̧tö̧ pä'ömä iyähuocotö. ⁴ Profetatö̧mä̧ ucuotocotö ja̧'hua̧ta̧'a̧nö̧ pättäji'anö̧mä̧ jȩpo̧co̧tö̧. Sacerdotetö̧mä̧ surojö juiyäjo̧mȩmä̧ surojuo'epätö ja̧'hua̧ta̧'a̧nö̧ hueähuä huȩnȩ päö'i̧nä̧ ucuotocotö. ⁵ Ja̧'hua̧nö̧ jo̧mȩ kä'cottömä TÖ̧Ä̧NÄ̧HUA̧MÄ̧ adihuä i̧sa̧ ja̧'a̧, Ja̧u̧mä̧ yorisotä surojömä jȩpo̧cö̧. ¡Mo̧ro̧ juoöta'anö, chutä adihuomenä jȩö̧tä̧ iyö ja̧'a̧! I̧tȩya̧u̧'i̧nä̧ dajumä icuocö, ja̧'hua̧nö̧ ja̧'a̧tä̧ surojötä jȩpä̧tö̧mä̧ ji̧nä̧ dä'ä ttuhuähuämä jerupätö. ⁶ Ttömä ttö̧ja̧rö̧ si'epö icuinö̧sä̧ 'quiyönä adicuinömä pparächächina̧'a̧. Ttö̧mä̧nä̧'i̧nä̧ surojuodepiniyä̧u̧, ya̧tȩ'i̧nä̧ juä̧mä̧nä̧ i̧'chö̧ juiyäcua'anö pä'ö. Ttötahuiyä'inä si'epö icuähua'a ju̧huȩnȩ ya̧tȩ'i̧nä̧ ö̧ja̧'a̧cu̧ pä'ö. ⁷ Ttömä pä'inö̧sä̧: isopäi'önä̧tä̧ Ttörömä yettecuäcuotö; jue'epö chicua'anä ttiyähuäcuotö ja̧'hua̧nö̧ jo̧mȩnä̧ ttö̧ja̧cuo̧mȩmä̧ si'epömä icuähuoca'a jä̧cua̧'a̧, o'cajuiyönä a̧mö̧cuädö chu̧ju̧na̧'a̧nö̧mä̧. Ja̧'hua̧nö̧ ja̧'a̧nä̧ jahuätömä mo̧ro̧ juoöta'anö jȩtta̧ pä'ötä pä̧huä̧rö̧ji̧nä̧u̧ jȩttö̧mä̧ o'cajuiyönä surojuo'epötä. ⁸ Ja̧'hua̧nö̧ ja̧'a̧ttö̧ Ttörö tta̧'ä̧ri̧pä̧tö̧cui̧, pä'ötó TÖ̧Ä̧NÄ̧HUA̧MÄ̧, Ttö po̧ya̧ juo'inä̧tö̧rö̧ ä̧rä̧mi̧'ö̧ si'epö chicuome jubö päi'önä. Ttömä isopäi'önä a̧mö̧cuädö ku̧ni̧nö̧sä̧ ttö̧ja̧rö̧mä̧ ji̧nä̧ yo̧mȩtȩ chö̧ca̧ca̧ti̧'a̧ pä'ötä, ruhuo hue'ätörö'i̧nä̧ ja̧'hua̧nö̧ jo̧mȩnä̧ jahuätönä̧tä̧ chö̧'ä̧i̧nä̧ räopächäcua'anö̧, o'cajuiyönä Ttö cha̧mi̧ surumä, ja̧huä̧jä̧ o'cajuiyötä chamisuru ocurä jä̧'i̧nö̧'a̧nö̧ jö̧mä̧ ku icuäcua'anö̧. ⁹ Ja̧'hua̧nö̧ ja̧'a̧nä̧ Ttömä tti̧huȩnȩ ttucuocuome ttä̧yä̧mä̧ surojömä juiyönä̧tä̧ jȩchä̧cuä̧u̧, TÖ̧Ä̧NÄ̧HUA̧ i̧mi̧ ottäcua'anö, Ttö huedötä ya̧tȩtä̧ jä̧'i̧nö̧'a̧nö̧ ttaditäcua̧'a̧nö̧. ¹⁰ Etipía aje yabonä̧ttö̧ kä̧mä̧dö̧ Ttörö ucuo te'ähuätö, pperecuächinä̧tö̧mä̧ ttöäre iyähuä tti'cächäcuyotö. ¹¹ Ja̧u̧nö̧ pä̧nä̧mä̧ dä'ä ttuttunämä̧ jȩpä̧cuä̧huo̧co̧tö̧ ttäcuotö Ttörömä suronä jȩ'cui̧nä̧tu̧cua̧'a̧nä̧, juhua'amä̧ jitö ucuturu ucuo te'ähuinä̧tö̧rö̧mä̧ 'cä̧'ȩpö̧ chicuäcua'attö̧, isopäi'önä ucutumä chö̧jä̧'ca mö̧ä̧'camä 'cho'i̧i̧pö̧ suronä jȩ'cuä̧tu̧cu̧cu̧ juiyäcua'anö. ¹² Ja̧'hua̧ta̧'a̧nö̧ ttö̧ja̧ tta̧'cua̧ pö̧nö̧ kä̧tö̧ usurä isotö jä̧'i̧nö̧'a̧nö̧tä̧, ja̧'hua̧nö̧ jȩpö̧ ucutumä ä̧tȩcuä̧nä̧ TÖ̧Ä̧NÄ̧HUA̧ i̧mi̧nä̧ ki̧'ä̧cuä̧huo̧mȩ ttȩmä̧cuo̧tö̧. ¹³ Israel ttö̧ja̧ totte'ächa'anä ka̧cui̧pi̧nä̧tö̧mä̧ yorö'isotä adihuocomenämä jȩpo̧co̧tö̧ ttäcuotö yapare'inä ucuocuocotö ttäcuotö ja̧'hua̧ta̧'a̧nö̧ ji̧yȩtȩ'i̧nä̧ ttättö räopa'a surojuo'epömä po̧cui̧cuo̧ca̧'a̧ jä̧cua̧'a̧; ja̧'hua̧nö̧ jo̧mȩnä̧ tta̧ttä̧rä̧cuo̧tö̧ ja̧'hua̧ta̧'a̧nö̧ cuä'ipö ttu̧ȩjä̧cuotö ja̧'hua̧nö̧ ja̧'a̧ttö̧ jahuätörömä yettecu juiyönä̧tä̧ jȩchä̧cua̧sä̧. ¹⁴ Sión i̧tti̧mö̧ ra̧'ä̧tu̧cui̧, Israel ttä̧ja̧ huopätucui! cua̧mi̧ so'qui o'cajuiyönä eseunö ka̧cuä̧tu̧cui̧ Jerusalén ittiju. ¹⁵ TÖ̧Ä̧NÄ̧HUA̧MÄ̧ ucuru ro̧ttȩpa̧ pä'ö jȩpö̧ ku̧nä̧hui̧nö̧mä̧ jȩpö̧ icuäji; ucu cuaboiyotörömä rä'opö icuinö, ucutu cu̧'cä̧tȩcu̧ttö̧ ru̧hua̧mä̧ TÖ̧Ä̧NÄ̧HUA̧TÄ̧ jä̧cua̧'a̧! ¡Ucumä yorö'isotä surojömä ye'ecuocotö cuäcuotöjä! ¹⁶ Ji̧yȩnö̧ pä̧nä̧ jahuätömä Jerusalén ötahuiyämä pättäcuotö; Yecuecuä sión, cumö jiyuhuächi'a'anämä ja̧'a̧tä̧mä̧ tto'cuäcuähuätucuä. ¹⁷ TÖ̧Ä̧NÄ̧HUA̧MÄ̧ ucutä cu̧'cä̧tȩ jo̧mȩ kö̧mä̧, ra̧huä̧pi̧ju̧ttö̧ cu̧ji̧pö̧nä̧ jȩa̧'a̧ttö̧. Ja̧u̧mä̧ ucuru eseu pä'cäri jȩä̧cua̧, eseunö 'corujö̧nä̧tä̧ repeömä jȩä̧cua̧, ucurumä ȩsȩhuä̧cua̧, ja̧'hua̧ta̧'a̧nö̧ eseumä huo̧ä̧cua̧. ¹⁸ pä'cäri kä̧cuȩ mo̧ro̧ jȩpö̧ ku̧huä̧huö̧ta'anö. Ttömä ucuru surojömä jȩpö̧ chi̧cuä̧cua̧sä̧, ucumä yabonö dä'ämä ttu'ocö cuä̧cua̧jä̧ ¹⁹ Topittö, Ttömä cuaboiyotucu chadita pä'ömä tö'cöhuächia'a, ppi̧sä̧ppi̧sä̧ 'chä̧tö̧rö̧mä̧ surojöttö ttö̧ji̧pö̧nä̧ jȩchä̧cua̧sä̧ ja̧'hua̧ta̧'a̧nö̧ suronä jȩttä̧u̧rö̧'i̧nä̧ chö̧ca̧ca̧tä̧cua̧sä̧. Ttömä ra̧huä̧huä̧ jö̧nä̧tä̧ jȩchä̧cua̧ ja̧'hua̧ta̧'a̧nö̧ dä'ä ttuhuähuä ji̧nö̧mä̧ ja̧huä̧jä̧ jä̧ttä̧jä̧ ucuou jö̧nä̧tä̧ jȩchä̧cua̧sä̧. ²⁰ Ji̧yȩnö̧ pä̧nä̧, ttö jä̧cua̧'a̧ o̧di̧pä̧cua̧mä̧; ja̧u̧nu̧ mo̧ro̧mä̧ ttömä jinä yo̧mȩtȩ pätti'önä jȩchä̧cua̧sä̧. Ttö̧ja̧ o'catoi'önätä ucuru ttucuotäcua'anö ja̧'hua̧ta̧'a̧nö̧ ra̧ttä̧cua̧'a̧nö̧, ucuru ra̧'ö̧ ttesehuäcuyotö, ucu ja̧u̧ to'cuomenä, ttömä ja̧u̧ ra̧huä̧pi̧ju̧ttö̧ ppä̧dä̧dä̧cua̧jä̧. "Pä'öto TÖ̧Ä̧NÄ̧HUA̧MÄ̧.