¹ ¡Líbano ttö̧ja̧ cuäpate ba'epätucui, cudau cedros dauhuiyä cuo'ö icua'acu! ² Ciprés dauhuiyä ajahuätucui, Ciprés dauhuiyämä cuäipächina'a! ¡Adihuäjuei dauhuiyä jä̧ji̧mä̧ si'epö icuähua'a ja̧'a̧! Basánttö Roble dauhuiyämä ajahuätucui, dauhuiyä oi bäreumä ku̧'u̧ icuähua'a. ³ Ovejastö̧ tturuhuotömä huopätö, tturuhuo'inä ttucuo'inä to'e'ächäjä'cotö! Mö yä̧hui̧tö̧ möäyotömä durupätö, Jordán aje ucuo ji̧nö̧mä̧ toepächina'a!. ⁴ TÖ̧Ä̧NÄ̧HUA̧ Diosmä pi̧yȩ ja̧'a̧ päömä: "¡Ovejastö̧ ttu̧ru̧hua̧ tta̧huä̧ra̧'a̧ jä̧'i̧nö̧'a̧nö̧ tta̧'a̧ri̧ ovejastö̧ cuä'äu tticuatö pä'ötä pätetö ku̧nä̧huo̧tö̧rö̧! ⁵ (Jitö mitö ȩmä̧tö̧mä̧ cuä'äutä tticuäcuotö ja̧'hua̧nö̧ cuä'äu tticua'anä ro̧'ȩcuo̧co̧tö̧ ttäcuotö, ja̧'hua̧nö̧ ja̧'a̧ jahuätö iyätömä pättäcuotö: "¡TÖ̧Ä̧NÄ̧HUA̧TÄ̧ adiunä jö̧nä̧ ppä'ädömä! ¡Ru̧hua̧ juodönä! Ovejastö̧ tta̧'ä̧rä̧tö̧ tta̧ttä̧rä̧u̧ tturuhuotömä jahuätörömä rerö̧jö̧nä̧mä̧ topocotö ttäcuotö.) ⁶ Isopäi'önä Ttömä ja̧huä̧jä̧nä̧ ka̧cuä̧tö̧rö̧ yorö'iso rȩrö̧jö̧nä̧mä̧ topocö chä̧cua̧sä̧! Pa̧'a̧nö̧ pä'ötó TÖ̧Ä̧NÄ̧HUA̧MÄ̧. ¡Topi! Ttömä cuippeyänä ka̧cuä̧tö̧ ttu̧mö̧nä̧ yotucunärö̧ chiyätucuacu pä'ötä päiaa'a ja̧'hua̧ta̧'a̧nö̧ ru̧hua̧ u̧mö̧nä̧'inä ja̧hua̧nö̧ jo̧mȩnä̧ jahuätömä tti̧rȩjä̧ si'epö tticuäcuotö, ja̧'hua̧nö̧ ja̧'a̧ttö̧ jahuätö ttumöttö̧mä̧ rä'epömä chicuoco̧u̧ ttäcuotö." ⁷ Ja̧'hua̧nö̧ ja̧'a̧ttö̧ Ttömä ovejastö̧ yo̧mȩtȩ ka̧cuä̧tö̧ ttu̧ru̧hua̧ jö̧nä̧ pä'i'inösä̧, cuä'äu tticuatö pä'ötä huotörö, jitö ovejastö̧ tta̧'ä̧rä̧tö̧rö̧mä̧. Ttömä ttitta'ca to'care ȩmi̧nö̧sä̧; ji'catemä o'inö̧sä̧ ppädä'ca pä'ö koro'camä o'inösä "jinä̧ yo̧mȩtȩ pätti'önä ca̧ca̧tä̧'ca" pä'ö. Pa̧'a̧nö̧ jȩpö̧tä̧ ji̧nä̧ yo̧mȩtȩ ka̧cuä̧tö̧rö̧mä̧ tta̧'a̧ri̧nö̧sä̧. ⁸ Ya'ute kä̧hua̧na̧mä̧ ovejastö̧ tturuhuoturumä huämetucuärö si'epö icuinö̧sä̧, juhua'amä chami'qui'ächi'ö tta̧dä̧rä̧ji̧mä̧ beipächäcu jahuätörömä, ja̧'hua̧ta̧'a̧nö̧ jahuätömä ttörömä kö'cocotö pinä̧tö̧. ⁹ Ja̧'hua̧nö̧ ji̧yä̧cu̧ Ttömä tturuhuotörö pä'inö̧sä̧: Ttömä täcö ovejastö̧ ttu̧ru̧hua̧ jö̧nä̧mä̧ ucuturumä aditocö iyocö chä̧cua̧sä̧. Ovejastö 'corujuo'ächätörömä, 'corujuottächa'anä ja̧'a̧tä̧ topitö; ovejastö̧rö̧ si'epö tticuttömä, si'epö tticua'anä̧ ja̧'a̧tä̧ topätucuitö. Ovejastö̧ ka̧cui̧pä̧tö̧rö̧mä̧ ja̧'a̧tä̧ topätucuitö, ttippeyänä ka̧cuä̧tö̧ ttidepä ttucua'anä." ¹⁰ Ja̧'hua̧nö̧ ja̧'a̧ttö̧ chitta'ca ppädä'ca ȩmo̧po̧'i̧nö̧sä̧ ja̧'hua̧nö̧ ȩmö̧ 'te'ädö icuinö̧sä̧, o'catoi'önä ttahuaruhuä 'cotucu chesecuinö jinö 'to'ocu icumä. ¹¹ Ja̧u̧nu̧ pä̧nä̧tä̧ chesecuinö̧mä̧ 'toi'ina'a ja̧'hua̧ta̧'a̧nö̧ jitö ovejastö̧rö̧ iyätömä ja̧'hua̧ta̧'a̧nö̧ ttörö to̧pä̧ri̧nä̧tö̧ TÖ̧Ä̧NÄ̧HUA̧MÄ̧ ttönä ucuocu pä'ö ttu̧huo̧jua̧'a̧ttö̧. ¹² Ttömä jahuätörö pä'inösä̧: Ucuru adihuomenä jö̧ttö̧mä̧, chaditä'ijö micuämä mitittö. Ja̧'hua̧nö̧ ja̧'a̧nä̧ ucuru adihuoca'a jö̧ttö̧mä̧ cuimitättö." Ja̧'hua̧nö̧ pä̧dä̧u̧ jahuätömä amöcuädinä̧tö̧, chaditäji micuämä platamä̧ treintanö o̧bi̧tä̧ ttimitattö pä'ö. ¹³ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ päinä̧cu̧sä̧: ¡Ä̧tȩcuä̧nä̧ pärätä ruhuähuome ruti, ucu cuimicuähuome jo̧mȩ micuähuäjimä!" Ja̧'hua̧nö̧ ja̧'a̧ttö̧ ttömä pärätä o̧bo̧mä̧ treintanö o̧bi̧tä̧ ȩmi̧nö̧sä̧ ja̧'hua̧nö̧ ȩmä̧ji̧'ca̧' TÖ̧Ä̧NÄ̧HUA̧ ojusodenä pärätä rutähuome rutinö̧sä̧. ¹⁴ Ja̧'hua̧nö̧ ja̧'a̧ Ttömä 'tȩ'ä̧dö̧ icuinösä̧, ttitta'ca "Ca̧ca̧tä̧'ca" pä'ö micuä'camä, ja̧'hua̧nö̧ 'toi'ina̧'a̧ Judá ttö̧ja̧ Israel ttö̧ja̧cu̧ ttesecuä'ijömä. ¹⁵ TÖ̧Ä̧NÄ̧HUA̧ pä'äji ttörömä̧: " pä̧'äji̧ta̧'a̧nö̧ ppä̧'ä̧chu̧mä̧, ȩmi̧ ya̧tȩ pastor a̧mo̧cuädo'cö jo̧nä̧, ¹⁶ ,ucumä̧, tocua'a pä'ö, ttömä̧ ko̧sä̧ täkö tö'cö cuächa'a ya̧tȩ pastor chu̧ju̧nä̧'a̧ pä'ö juä̧'ä̧ rȩjȩnä̧mä̧. Ja̧u̧mä̧ ja̧'a̧tä̧ topu äji oveja toeächa pä'öinä̧, ja̧u̧mä̧ toeächa pä'öinä̧ öso'cö äji ovejarömä̧, yorisotä 'tahuipomenä̧nä̧'ä̧ örarähui'önänä'a̧ adito'co. äji ovejarö'inä u̧huȩdä̧jä̧ adi'ömä̧ a̧dȩcu̧nä̧mä̧ iyo'cö, ja̧'hua̧'a̧nö̧ ja̧'a̧nä̧ äji oveja bä̧rȩpä̧ttö̧ idepä'ättötä u̧huä̧'ä̧cua̧ ja̧'hua̧ta̧'a̧nö̧ o̧noji̧yä̧dä̧jä̧ jȩpi̧cuä̧'a̧ ja̧u̧mä̧.