¹ Ttö huochö ä̧ju̧cui̧ttö̧, CHÖ̧Ä̧NÄ̧HUA̧; ttö chajau amucuädi. ² Ttö ucuocunä huochö ä̧ju̧cui̧, ttö CHU̧RU̧HUA̧ ttö̧tä̧ CHÖ̧Ä̧NÄ̧HUA̧, ucurutä ja̧'a̧ tö chucuocua'amä. ³ CHÖ̧Ä̧NÄ̧HUA̧, mo̧ro̧ päi'a'amä ttö chajahua'a ä̧ju̧cu̧jä̧; mo̧ro̧ päi'a'atä chi̧'chä̧chä̧cua̧sä̧ ucuru jedepä pädömä ja̧'hua̧ta̧'a̧nö̧ a̧mä̧cuä̧rö̧tä̧ tta̧dä̧rä̧cua̧sä̧. ⁴ Iso päi'önä ucutä ja̧'a̧ TÖ̧Ä̧NÄ̧HUA̧ suronä jȩä̧cuä̧huä̧ ko̧cuä̧mö̧ topömä; ttö̧ja̧ suronä jȩpä̧tö̧mä̧ ucu cuä̧tȩpo̧co̧u̧tä̧ ja̧'a̧. ⁵ Ttötäsä pä'ömä ucu cuä'cajome ö̧jö̧ juiyö'anö hua̧; Ucumä a̧'u̧tu̧jä̧ o'catoi'önärö cuju'cocomenä jȩpä̧tö̧rö̧mä̧. ⁶ Ucutä si'epö cui̧cuä̧cua̧jä̧ yapärehuätörömä ; TÖ̧Ä̧NÄ̧HUA̧MÄ̧ kö'cocö ttujurunä kä̧tö̧rö̧mä̧ ja̧'hua̧ta̧'a̧nö̧ yapare pä'ä'chätörö'inä. ⁷ Ja̧'hua̧nö̧ ja̧'a̧nä̧ ttö chötö'cömä̧ jȩchä̧cua̧sä̧ pä'ö ucuocu cuesecuinö jähuänä̧ ttömä̧ do̧dä̧chä̧cua̧sä̧ cuojusodenä; ucuotönä̧ ja̧rȩyu̧ pä̧di̧'ä̧cua̧sä̧ cu̧jo̧de surojö juiyodenä̧. ⁸ Ucu TÖ̧Ä̧NÄ̧HUA̧ chaboiyotö jähuänä̧mä̧ adihuomenä o'ipittö, cu̧mä̧nä̧mä̧ chä'ca jo̧mȩmä̧ jue'epö ru̧ni̧. ⁹ Ja̧'hua̧nö̧ ja̧'a̧nä̧ ttättö adiumä pättä pe'ömä jui'ätö; ttämucuädö'inä suropätö; ttucuocu'inä cuä'ö icuähuätä ucuocu'ätö; pättö'inä ttöjö'coca'anätä̧ pä'ätö jahuätömä. ¹⁰ Suronä jȩpä̧tö̧rö̧mä ja̧'a̧tä̧ to'cuä, CHIÄ̧NÄHUA̧ DIOS; ¡ttämucu'ädinömä tti̧rȩbȩhui̧yö̧nä! räepicuitö rö̧ȩnä surojö jȩpä̧tö̧, ja̧'hua̧nö̧ ja̧'a̧ttö̧ jahuätömä ucuru jarodätö. ¹¹ Ja̧'hua̧nö̧ ja̧'a̧nä̧ jahuätö o'catoi'önä ucunä dajahuätömä, esehuätö; ja̧'a̧tä̧ topitö 'cuäopönä̧tä̧ eseu huotta'anä̧, juhua'amä Ucutä ppäcuädä̧u̧ ja̧'a̧ttö̧, ja̧'a̧tä̧ topitö ucunätä̧ ttesehua'anä̧, jitö ucu cuimi repä'ätörömä̧. ¹² Ja̧'hua̧nö̧ ja̧'a̧ TÖ̧Ä̧NÄ̧HUA̧ Ucumä̧ adiunätä̧ ja̧rö̧jä̧ pä̧cuä̧cua̧jä̧ adiu jȩpu̧rö̧mä̧; Ucu ja̧u̧rö̧ to̧pä̧rö̧ tta̧cuä̧cua̧jä̧ ttabojähuä ttoecuäbi jä̧'i̧nö̧'a̧nö̧.