¹ Adiunä̧tä̧ jä̧cua̧ jiyupätörö a̧'cua̧ ro'ecumä̧; huȩnȩ jö̧ mo̧ro̧'i̧nä̧ TÖ̧Ä̧NÄ̧HUA̧MÄ̧ rä'epö icu ppä̧dä̧cua̧. ² TÖ̧Ä̧NPHUA̧MÄ̧ tta̧huä̧rä̧cua̧ ja̧'hua̧ta̧nö̧ a̧'cua̧rö̧ u̧ju̧nä̧tä̧ 'chu̧huä̧rä̧cua̧, pi̧jä̧ rȩjȩttö̧mä̧ adiunä̧ kö̧ pä̧ttä̧cua̧; TÖ̧Ä̧NÄ̧HUA̧MÄ̧ aboiyotörömä iyö icuococu jä̧cua̧. ³ TÖ̧Ä̧NÄ̧HUA̧MÄ̧ na̧'a̧chö̧ usärä ȩmä̧huo̧mȩnä̧'i̧nä̧ tta̧huä̧rä̧cua̧; mä̧richei usurä ȩmä̧huä̧cuä̧huä̧ jä̧ji̧ttö̧mä̧ pi̧'ä̧cuä̧huä̧ jö̧nä̧tä̧ pärohuächäcua'a. ⁴ Ttömä̧ pä'ösä: "TÖ̧Ä̧NÄ̧HUA̧, ¡Ttörö re kä̧hui̧! chu̧'i̧pö̧nä̧ aditö icuittö, isopäi'önä̧tä̧ ucurumä suronä̧ jȩpi̧nö̧sä̧." ⁵ Chaboiyotömä ttörömä̧ suronä̧tä̧ ucuocuätö pa̧'a̧nö̧ pä'ö: ¿Ti̧yȩnö̧ 'corujuoächäcua'attö̧ ja̧'hua̧ta̧nö̧ i̧mi̧ toepächa pä'ömä̧? ⁶ Chaboiyotö ttörö topö ttichöttömä̧, ja̧u̧mä̧ micuähuocötä pä̧cua̧; a̧mi̧so'quinä̧ surojömä̧ ca̧ca̧cuä̧ 'cua̧rö̧nä̧tä̧ a̧mö̧nä̧ pa̧ja̧tö̧tä̧ u̧cuo̧cuä̧cua̧; ja̧u̧ ttöttö 'cä̧i̧pä̧cho̧mȩnä̧mä̧, korotörö suronä̧tä̧ u̧cuo̧cuä̧cua̧. ⁷ O'catoi'önä̧ ttörö kö'cocotömä suronä̧tä̧ ja̧cuä̧nä̧tä̧ suronä̧ ucuocuätö; jahuätucu yo̧mȩtȩnä̧ tta̧huä̧ra̧'a̧ ttörö baraumä. ⁸ Juätömä pä'ätö: "Surojö märiche'itä ja̧u̧ru̧mä̧ 'quiyönä̧ 'chuhuädi'äcua'a; ja̧u̧ jitämä̧ tȩba̧ba̧nö̧tä̧ pö̧, ä̧rä̧mi̧'o̧cö̧ jä̧cua̧." ⁹ Ja̧'hua̧ta̧nö̧ tö'cönänö cha̧hua̧ru̧hua̧'i̧nä̧, cha̧'cua̧ chu̧huȩnä̧rä̧'i̧jä̧cu̧mä̧ chu̧cuä̧ cui'inö, ja̧u̧mä̧ suronä̧ pä'ötä ppa̧'a̧chi̧'ä̧ji̧. ¹⁰ Ja̧'hua̧nö̧ ja̧'a̧nä̧ Ucumä, TÖ̧Ä̧NÄ̧HUA̧MÄ̧, rȩrö̧jö̧nä̧ topittö ja̧'hua̧ta̧nö̧ äräbe'ittö jahuätörö chädätäcua'anö. ¹¹ Pa̧'a̧nö̧ jo̧mȩttö̧ ucumä kö'quecunä̧ to'cuäcusä chaboiyotö ttörö isojuo'epö kȩdö̧ tticu juiyäcua'anö. ¹² Ji̧nä̧ ja̧'hua̧nö̧ ja̧'a̧nä̧mä̧, ucumä huäjönä chö̧jo̧mȩttö̧ ppä̧cuä̧dä̧rä̧cu̧sä̧ ja̧'hua̧nö̧ jo̧mȩttö̧ 'cuäopönä̧tä̧ ucu cu̧jo̧mȩtä̧ tta̧cuä̧rä̧cu̧sä̧. ¹³ TÖÄNÄHUATÄ ja̧'a̧cua̧ja̧,. Israel ttö̧ja̧ ttu̧ru̧hua̧ Diosmä, 'cuäopönä̧tä̧ ȩsȩä̧cuä̧hua̧ jä̧cua̧. Ja̧'hua̧nö̧tä̧ jä̧cua̧'a̧ ja̧'hua̧ta̧nö̧ ja̧hua̧nö̧tä̧ jä̧cua̧. To'täre päi'önä̧mä̧.