¹ TÖ̧Ä̧NÄ̧HUA̧RÖ̧ recui'a'anä̧ tta̧'a̧rä̧ji̧sä̧; Ja̧u̧mä̧ ajaunö̧ huochomȩnä̧mä̧ ädätinä̧cu̧sä̧. ² Ja̧u̧mä̧ reju suräju redähuatä jäjuttö u̧ni̧cu̧ rä'opö icuinä̧cu̧sä̧, ja̧'hua̧ta̧nö̧ Ja̧u̧mä̧ inähuänä chu̧ju̧nä̧ u̧ju̧ni̧nä̧sä̧ ju̧huȩnȩtä̧ 'quiyönö chu̧ju̧nä̧. ³ Ja̧u̧mä̧ jareönä ra̧huä̧huä̧ chu̧ru̧hua̧ Diosrö rä̧dö̧nä̧ iyinä̧cu̧sä̧. Recuätö tottäcuotö ja̧'hua̧ta̧nö̧ Ja̧u̧ru̧tä̧ ttucuotäcuotö juhua'atäcu Ja̧u̧ru̧tä̧ tta̧'cua̧ ttu̧huȩnä̧rä̧cuo̧tö̧. ⁴ TÖ̧Ä̧NÄ̧HUA̧RÖ̧ a̧'cua̧ huȩnä̧rö̧rö̧mä̧ eseäcuähuä ka̧'a̧ ja̧'hua̧ta̧nö̧ ttucuo te'ähuätörö ucuo te'ähuocörömä, ja̧'hua̧ta̧nö̧ jitö Ja̧u̧ru̧ ya̧pa̧rȩhua̧ jö̧nä̧tä̧ pärätö icuätörömä̧. ⁵ TÖ̧Ä̧NÄ̧HUA̧ chu̧ru̧hua̧ Dios, Ucu cuaditähuä ucu aditö ku̧ju̧ni̧nö̧mä̧ juiyi adiu ja̧'a̧, ja̧'hua̧ta̧nö̧ ujutu tötö'cö Ucu cua̧mö̧cuädömä juiyo pa̧ja̧tä̧cuä̧u̧huä̧ juiyönä̧ rö̧a̧'a̧; Ttö ucutu huäjunä ucuocu jidäuttömä ttö̧'a̧to̧mȩttö̧'i̧nä̧ yabonä̧nö̧ jö̧'a̧nö̧ ja̧'a̧. ⁶ Ucumä cueseu juiyönä̧ ja̧'a̧ isotörö ku icu iyähuätämä ja̧'hua̧ta̧nö̧ ttöäre iyähuätämä̧, ja̧'hua̧nö̧ ja̧'a̧nä̧ Ucumä chä̧ja̧hui̧yä̧ ba'epinö̧jä̧; Ucumä̧ jä'epocö pä'ijöjä suronä jȩä̧cuä̧huä̧nä̧ ttöäre iyähuä ku icuähuä'i̧nä̧, ja̧'hua̧ta̧nö̧ isotörö̧ ku icu iyähuä'i̧nä̧ ttiyacu pä'ömä. ⁷ Ja̧'hua̧nö̧ ja̧'a̧, ttömä̧ pä'inö̧sä̧: Topittö, ttömä̧ ichinö̧sä̧; ttö chötö'cömä̧ cuyärubanä huȩyu̧tu̧ rutähua'a pa̧'a̧. ⁸ Ttömä Ucu Diosrö pä̧huä̧rö̧jo̧mȩnä̧ jȩcho̧mȩnä̧tä̧ cheseunä̧ ja̧'a̧; Ucuttö hueähuä huȩnȩmä̧ chamiso'quinä̧ ka̧'a̧." ⁹ Ttömä ji'ähuä'ijösä ucu adiuhuomenä jȩ'cu̧mä̧ ttö̧ja̧ recuätörö; TÖ̧Ä̧NÄ̧HUA̧, Ucumä̧ huo̧jua̧jä̧ pi̧yȩ jȩpö̧ chu'coröchi'oca'amä̧. ¹⁰ Ttömä da̧jä̧ro̧cö̧sä̧ ucu iso jö̧nä̧ jȩcu̧'u̧mä̧ chamiso'quinä; Ttömä ji'ähuä'ijösä ucu huecuinömä ja'huata'anö ucu ppäcuädinö'inä; ttömä da̧jä̧ro̧cö̧sä̧ recuätö ttä'ca jo̧mȩttö̧ ucu esecu jȩchä̧cua̧sä̧ päcuinömä. ¹¹ Ucu rȩrö̧jö̧nä̧ tocu'umä oto jö̧nä̧mä̧ jȩcu̧'ä̧ttö̧, CHÖ̧Ä̧NÄ̧HUA̧; jȩchä̧cua̧sä̧ päcuinö̧ji̧nö̧mä̧ ja̧'hua̧ta̧'a̧nö̧ ucu ujuturu cua̧'cua̧ cu̧huä̧nä̧rö̧mä 'cuäopönätä̧ ka̧ pä'ätöjä. ¹² Rö̧ä̧nä̧ suronä jö̧tä̧ sobutäcusä, suronä jȩchö̧nä̧tä̧ jä̧cu̧sä̧, yorö'iso täcö̧ tochö juiyönätä̧ jä̧cu̧sä̧; ttuyunä ttuhuo'che jä̧'i̧nö̧'a̧nö̧ rö̧ä̧nä̧tä̧ jä̧cu̧sä̧, chamiso'quinä cheseujuiyönätä̧ jä̧cu̧sä̧. ¹³ Cheseunätä̧ jȩpi̧, CHÖ̧Ä̧NÄ̧HUA̧, ppä'ädittö; o'capäi'önä pä'äditö CHÖ̧Ä̧NÄ̧HUA̧. ¹⁴ Ja̧'a̧tä̧ topitö huä̧i̧nä̧ dä'ättutta'anä ja̧'hua̧nö̧ dä'ättu'uttä ja̧'a̧tä̧ra̧'a̧ juotächönä, ttö cha̧'cua̧rö̧ si'epö tticua pä'ö u̧sä̧rä̧tö̧rö̧mä̧. Ja̧'a̧tä̧ topitö jitötä tta̧mo̧nä̧tä̧ ucuo jui'ätö juottächönä, jua'amä törö cuättä pä'ö ttu̧sä̧ra̧'a̧ttö̧. ¹⁵ Ja̧'a̧tä̧ topitö dä'ä ttuttunä jȩcho̧mȩnä̧tä̧ ttu̧ttȩpä̧rä̧chi̧'ä̧cua̧'a̧nö̧, törö pättä'chäjimä: "¡Ajá, ajá!" ¹⁶ Ja̧'hua̧nö̧ ja̧'a̧nä̧ ucuru usätömä ucurutä ttesehuäcuotö; Ja̧'a̧tä̧ topi ucu cu̧ji̧pi̧nö̧ esehuätörömä ppa̧'a̧dä̧rö̧ pätta'anä: "TÖ̧Ä̧NÄ̧HUA̧RÖ̧TÄ̧ esehuätöjä." ¹⁷ Ttömä usurä i̧sa̧sä̧ ja̧'hua̧nö̧ ja̧'a̧ttö̧ recuärö̧jä̧cu̧sä̧; Ja̧'hua̧nö̧ ja̧'a̧nä̧'i̧nä̧, CHÖ̧Ä̧NÄ̧HUA̧MÄ̧ 'cuäopönätä̧ ttörömä amöcuädö. Ucutä ja̧'a̧ ttörö ppä'ädömä ja̧'hua̧nö̧ ja̧'a̧ttö̧ ttörö surojöttö chö̧ji̧pö̧nä̧ ppä'ädö ichöjä; ädätittö o'capäi'önä, CHÖ̧Ä̧NÄ̧HUA̧.