¹ CHÖ̧Ä̧NÄ̧HUA̧, Cuä̧i̧cu̧nä̧ cu'ä̧i̧cu̧mä̧ cu̧ro̧huä̧rä̧ttö̧; cu'ä̧i̧cu̧mä̧ ro̧cuȩpä̧ttö̧. ² Ro̧cuȩpö̧mä̧ juiyo barau ja̧'a̧, ja̧'hua̧ta̧'a̧nö̧ ucu cu̧mu̧mä̧ rȩjȩcu̧tä̧ i̧nȩpä̧rä̧cu̧sä̧. ³ Ucu cu̧'ä̧i̧ttö̧ chidepä o'cajuiyönä na̧huä̧cha̧'a̧; adiunämä jo̧co̧cu̧sä̧ cha̧'cua̧rö̧'i̧nä̧ chijue'chiyu jacuänä ttötä suronä jȩcha̧'a̧ttö̧. ⁴ Suronä jȩchö̧tä̧ rö̧ä̧nä̧ jä̧cu̧sä̧; ja̧u̧ ja̧'a̧ ttörö juiyo amä'cömä. ⁵ Chöttahuiyä'inä eripächäcusä ja̧'hua̧nö̧ eripächa'attö suronä a̧mȩhua̧'a̧ ttötä suronä jȩcha̧'a̧tö̧. ⁶ Ttömä cha̧'cua̧ tta̧'ȩcu̧sä̧ ja̧'hua̧nö̧ cha̧'cua̧ tta̧'ȩcu̧ suräusä mo̧ro̧ juoöta'anö; tta̧'a̧nö̧ pä'ö ja̧'hua̧nä̧ jȩchä̧jä̧ pä'ö amöcuädösä mo̧ro̧ juo̧ö̧ta̧'a̧nö̧. ⁷ Ttötä jacuänämä, röänä du'unä na̧'a̧chö̧sä̧, chidepänämä adinämä jo̧co̧cu̧sä̧. ⁸ Ä'ätö jä̧'i̧nö̧'a̧nö̧tä̧ jä̧cu̧sä̧ ja̧'hua̧nö̧ ja̧'a̧ttö̧ rö̧ä̧nä̧ 'cuädönä jä̧cu̧sä̧; Ttömä ajuäusä cha̧'cua̧tta̧'ȩcu̧ chamiso'quinämä. ⁹ TÖ̧Ä̧NÄHUA̧, ucumä huo̧jua̧jä̧ ttö chamiso'quittö rö̧ȩnä chöjö'cömä, ja̧'hua̧nö̧ ja̧'a̧nä ttö chöjö'cömä ucutumä däjähuächoca'a. ¹⁰ Ttö chamiso'quimä ka̧'a̧ bo̧rȩpu̧tä̧, ttö chujurumä jiyuhuächäcusä, ja̧'hua̧ta̧'a̧nö̧ ttö chiäremä yo̧'cu̧ joächäcusä. ¹¹ Ttö nädä̧cho̧menä ttö chahuäruhuämä̧ jarotti'inäcu̧sä̧; ttö chö̧jo̧me jäyä kä̧tö̧'i̧nä ki̧'i̧pi̧nätö̧ ototä. ¹² Ja'u̧ jue'imä ttö cha̧'cua̧rö̧ usu 'chuhuäda pe'ö chä̧tȩcuä̧tä̧. Jahuätö ttörö usu a̧'u̧tä̧tö̧mä surojötä ucuocuätö surojottepä pe'ö ja̧'hua̧ta̧'a̧nö̧ yaparetä ucuocuätö moro̧ 'cuäpunä. ¹³ .Ja̧'hua̧nö̧ ja̧'a̧nä̧ ttömä̧, jä̧ri̧yä̧hua̧ jä̧'i̧nö̧'a̧nö̧ hua̧sä̧ ja̧'hua̧nö̧ jo̧mȩnä̧ yorisotä ä̧ju̧cuo̧cö̧sä̧; Ttömä i̧huȩnȩ jui̧'a̧ jä̧'i̧nö̧'a̧nö̧ hua̧sä̧ ji̧yȩtȩ'i̧nä̧ pädoca'atä. ¹⁴ Trö̧mä̧ ä̧ju̧cuo̧cö̧ 'cua̧rö̧nä̧ hua̧sä̧ ja̧'hua̧nö̧ jo̧mȩnä̧ yorö'iso ädätocö jä̧'o̧i̧nö̧'a̧nö̧tö̧. ¹⁵ I̧sopä'iönätä̧ ucurutä tta̧'a̧rö̧sä̧, TÖ̧Ä̧NÄ̧HUA̧; Ucu TÖ̧Ä̧NÄ̧HUA̧ Diostä jä̧cua̧'a̧ cuä̧dä̧tä̧cua̧mä̧. ¹⁶ Ttömä̧ pi̧yȩ pä'ösä chaboiyotö ttörö huȩnȩ jö̧nä̧ tteseu juiyäcua'anö̧, surojö̧nä̧ jȩchö̧ttö̧mä̧ jahuätömä rö̧ä̧nä̧ surojötä jȩttä̧cha̧sä̧. ¹⁷ Ja̧'hua̧nö̧ ja̧'a̧ täcö pȩnȩ jubötä ja̧'a̧ pädomȩtä̧ päia'a, 'cuäopönä̧tä̧ bahuäcusä. ¹⁸ Ttö suränä̧ jȩchä̧'i̧jö̧mä̧ ji'äu icusä; Ttömä suronä jȩchä̧'i̧jö̧nä̧ cha̧'cua̧ rodecunä̧ ja̧'a̧. ¹⁹ Ja̧'hua̧nö̧ ja̧'a̧nä̧ chaboiyotömä̧ juiyo recuätö ja̧'a̧; koro'i̧nä̧ jo̧ca̧'a̧nä̧ ttörö ttöjö'cocömä yaparetä ja̧'a̧. ²⁰ Jahuätömä ttörö adiu jȩtta̧jueimä suronätä̧ jȩpä̧tö̧; ttörömä̧ suronä̧ jȩpä̧ji̧ pähuätä tticuä'chäcusä adiutä jȩcha̧'a̧nä̧. ²¹ TÖ̧Ä̧NÄ̧HUA̧; chu̧ru̧hua̧ Dios cuicuipättö, ttötömä̧ otomä̧ päcui'ä. ²² Jurunä̧nö̧ ichi'i ppäcuädattö, TÖ̧Ä̧NÄ̧HUA̧, ucutä ja̧'a̧ chu̧ji̧pu̧nä̧ ppä'ädömä̧.