¹ Ttö̧ja̧ suronä jȩpä̧tö̧rö̧mä̧ cu̧ra̧huä̧ri̧'ä̧; cuami surunä̧'i̧nä̧ to'cuä jitö adihuocomenä̧ jȩpä̧tö̧rö̧mä̧. ² Juhua'amä 'coru juottächäcuotö jeruhua'anä̧tä̧ isä'cua jä̧'i̧nö̧'a̧nö̧tä̧ ja̧'hua̧ta̧nö̧ juottächächäcuotö adiyä ja̧'tu̧huö̧ joächächa'a jä̧'i̧nö̧'a̧nö̧. ³ TÖ̧Ä̧NÄ̧HUA̧RÖ̧TÄ̧ Cua̧'cua̧ huä̧nä̧ri̧ ja̧'hua̧ta̧nö̧ adiutä jȩpi̧; pi̧jä̧nä̧ kä̧mä̧di̧ juhua'atäcu jȩchä̧cua̧sä̧ päcuinö'a̧nö̧tä̧ tta̧'ä̧ri̧tö̧. ⁴ Ja̧'hua̧nö̧ ja̧'a̧ttö̧ esehui TÖ̧Ä̧NÄ̧HUA̧NÄ̧TÄ̧ ja̧'hua̧ta̧nö̧ Ja̧u̧mä̧ cuami isä'qui kö'quecu jö̧'a̧cuä̧tä̧ i̧yä̧cua̧jä̧. ⁵ Jȩ'cua̧ pä'ö cua̧mö̧cuädäjimä̧ TÖ̧Ä̧NÄ̧HUA̧RÖ̧TÄ̧ iyi; Ja̧u̧ru̧tä̧ cua̧'cua̧ huȩnä̧ri̧ ja̧'hua̧nö̧ jo̧mȩnä̧ Ja̧u̧tä̧ ja̧'a̧ ucuru ppä̧di̧pä̧cua̧mä̧. ⁶ Ja̧u̧mä̧ adihuomenä̧ jȩ'cu̧ i̧jȩpä̧cua̧, mo̧ro̧ tȩya̧u̧ i̧jȩpa̧'a̧ jä̧'i̧nö̧'a̧nö̧ ja̧'hua̧ta̧nö̧ suronä̧ jȩ'cuo̧cö̧ jä̧ji̧mä̧ kä̧hua̧ jueö kö̧rö̧ i̧jȩpa̧'a̧ jä̧'i̧nö̧'a̧nö̧. ⁷ TÖ̧Ä̧NÄ̧HUA̧ to̧ä̧ro̧mȩttö̧mä̧ jä̧rö̧nä̧ kä̧hui̧ ja̧'hua̧ta̧nö̧ Ja̧u̧ru̧tä̧ tta̧'a̧rö̧ kä̧hui̧. Ka̧ra̧ jȩä̧ji̧ isojuomenämä cu̧ra̧huä̧ri̧'ä̧, ja̧'hua̧nö̧ jo̧ca̧'a̧ttö̧'i̧nä̧ suronä̧ jȩtta̧ pä'ö tta̧mö̧cu̧ädomenä̧'i̧nä̧. ⁸ Cu̧ra̧huä̧ri̧'ä̧ ja̧'hua̧ta̧nö̧ rö̧ä̧nä̧mä̧ cu̧ra̧huä̧ri̧'ä̧. Cua̧'cua̧mä̧ rocuecuä. Pi̧yȩmä̧ suro huȩnȩ käbe'ö ja̧'a̧. ⁹ Suronä̧ jȩpä̧tö̧rö̧mä̧ si'epötä icuähuäcua'a, ja̧'hua̧nö̧ ja̧'a̧nä̧ TÖ̧Ä̧NÄ̧HUA̧RÖ̧ tta̧'a̧rä̧tö̧mä̧ tti̧rȩjä̧ päi'önä ttȩmä̧cuo̧tö̧. ¹⁰ Suronä jȩpö̧mä̧ a̧'u̧cua̧'a̧tä̧ jö̧ o'ca'a to̧ȩpä̧chä̧cua̧; ö̧jo̧mȩ ttösa'anä̧, po̧cui̧po̧co̧ ttä̧cua̧. ¹¹ Ja̧'hua̧nö̧ ja̧'a̧nä̧ tta̧'cua̧pö̧nö̧ ka̧cuä̧tö̧mä̧ tti̧rȩjä̧ päi'önä̧ ttȩmä̧cuo̧tö̧ ja̧'hua̧ta̧nö̧ ttöäre rö̧ä̧cho̧mȩnä̧mä̧ ttesehuäcuotö. ¹² Ttö̧ja̧sa̧ su̧ro̧jö̧ jȩpö̧mä̧ jueö jähuä jȩpö̧cu̧mä̧ surojö jȩa̧ pä'ötä a̧mö̧cuädö ja̧'hua̧ta̧ ja̧u̧rö̧ surojö ucuocumä acu norö. ¹³ TÖ̧Ä̧NÄ̧HUA̧MÄ̧ ja̧u̧rö̧ ya̧'a̧huä̧'chö̧, juhua'a ja̧u̧ u̧mo̧ro̧ mo̧ro̧mä̧ i̧icha'amä toa'attö. ¹⁴ Suronä jȩpä̧tö̧mä̧ ttucurä'chu rä'epätö ja̧'hua̧nö̧ rä'epö ttu'potpbö'inä jo̧mȩnö̧ ttö̧'ȩpö̧ ku̧nä̧tö̧ usurä ȩmä̧huä̧tö̧rö̧ ja̧'hua̧ta̧'a̧nö̧ recuärö̧jä̧u̧ru̧ si'epö tticua pä'ö. Adiunätä̧ jȩpö̧ kä̧tö̧rö̧ cuä'äu tticua pä'ö. ¹⁵ Tta̧mo̧nä̧ ttucurä'chutä ttamiso'quinä ppörahui'äcuotö ja̧'hua̧ta̧'a̧nö̧ ttu'popä obö'inä 'te'chächiyäcuotö. ¹⁶ Adiunä jo̧mȩnä̧ jȩpö̧ kä̧cuä̧huä̧nä̧tä̧ adihua'a adihuä juäi cu̧ju̧nä̧ra̧'a̧nä̧ su̧ro̧nä̧ jȩtta̧ juäimä. ¹⁷ Surono jȩpä̧tö̧ ttucurumä pparächi'äcua'a, ja̧'hua̧nö̧ ja̧'a̧nä̧ TÖ̧Ä̧NÄ̧HUA̧MÄ̧ tta̧'a̧rö̧ yaparehuocotö. ¹⁸ TÖ̧Ä̧NÄ̧HUA̧MÄ̧ to̧pä̧rö̧ tta̧'a̧rö̧ mo̧ro̧ jö̧ta̧'a̧nö̧ jȩpo̧co̧tö̧ päjätörömä ja̧'hua̧nö̧ ja̧'a̧ttö̧ ttöäremä 'cuäopönätä̧ ttu̧ju̧nä̧rä̧cuo̧tö̧. ¹⁹ Ja'huätömä dä'ättuttujuiyäcuotö ji̧yȩnö̧ surojö mo̧ro̧ pätecuächomänä'inä. Ppäi pä̧nä̧ pätecuächomenä'inä, ja'huätömä 'cuäopönä ttu̧cuä̧mä̧ ttu̧ju̧nä̧rä̧cuo̧tö̧. ²⁰ Ja̧'hua̧nö̧ ja̧'a̧nä̧ ttö̧ja̧ suronä jȩpä̧tö̧mä̧ tottepo'ächäcuotö. TÖ̧Ä̧NÄ̧HUA̧ abo'iyotömä dede'cua eseu kä̧'i̧nä̧'a̧nö̧tä̧ huotö; ku icuähuäcuotö ja̧'hua̧nö̧ ku tticua'attö tottepo'ächäcuotö isoppanätä̧. ²¹ Ttö̧ja̧ suronä jȩpä̧tö̧mä̧ päröhuittö pä'ipö'inä pä'äjita'anö pa̧'a̧do̧co̧tö̧, ja̧'hua̧nö̧ ja̧'a̧nä̧ ttö̧ja̧ adiunä ppä̧'ä̧dä̧rä̧tö̧mä̧ ppa̧'a̧dä̧tö̧. ²² Jitö DIOS adiunätä̧ ji̧ya̧rö̧ päinä'u̧ru̧mä tti̧rȩjä̧ päi'önä ti̧jä̧cuo̧tö̧; ja̧'hua̧ta̧'a̧nö̧ jitö Juo̧'u̧tä̧ suronä pä̧'i̧näu̧mä ttȩmiyä̧cuo̧tö̧. ²³ TÖ̧Ä̧NÄHUA̧TÄ̧ päädö ttö̧ja̧sä̧ iso joepumä, ttö̧ja̧sä̧ amucuädömä DIOSMÄ to̧ä̧rö̧nätä ja̧'a̧. ²⁴ Ja̧'hua̧nö̧ ja̧'a̧ juo̧'u̧ yieputtö'inä, mäi̧yä̧cua̧, TÖ̧Ä̧NÄHUA̧ chutä u̧munä tta̧hua̧ra̧'a̧ttö̧. ²⁵ Ttömä muä̧ya̧ chö̧jo̧menä ja̧'hua̧ta̧'a̧nö̧ jitämä buosa̧sä̧; ttömä topocö pä'isä ya̧tȩ tti̧ja̧sa̧ pä̧'ö̧ ta̧'a̧nö̧ jȩpu̧rö̧mä jaro'iamä ja̧'hua̧ta̧'a̧nö̧ i̧tti̧mu'i̧nä̧ jä̧ȩpä̧rö̧ ttö̧cuȩ ttöcua'amä. ²⁶ Moro̧ 'cuäpunätä̧ juo̧'u̧mä repeö ja̧'hua̧ta̧'a̧nö̧ ppä̧'ä̧dä̧rö̧ ja̧'hua̧nö̧ ja̧'a̧ttö̧ i̧tti̧mä ichinö adiunä ucuocu u̧ju̧na pe'ö. ²⁷ Surojötömä 'que'i̧pä̧chä̧ri̧ ja̧'hua̧ta̧'a̧nö̧ adiutä jȩpi̧; ja̧'hua̧nö̧ jö̧ttö̧mä̧ 'cuä'opunätä̧ huȩnȩ juiyönä 'chö̧ja̧ä̧. ²⁸ Isopäi'önä̧ TÖ̧Ä̧NÄ̧HUA̧MÄ̧ adihuomenä jȩä̧cuä̧huä̧tä̧ repe'ö ja̧'hua̧ta̧nö̧ päinö'a̧cuä̧ jȩpö̧ o'ca'anä̧ 'chä̧tö̧rö̧mä̧ icuipocö. Juätömä 'cuä'opönätä tta̧huä̧rä̧cuo̧tö̧, ja̧'hua̧nö̧ ja̧'a̧nä̧ suronä jȩpä̧tö̧ tti̧tti̧mö̧mä̧ si'epö icuähuäcuotö. ²⁹ Adiu jȩpä̧tö̧mä̧ tti̧rȩjä̧tä̧ iyähui̧'inäu̧ ja̧'hua̧ta̧nö̧ ju̧huȩnȩtä̧ 'cuäopönä ttö̧ja̧cuä̧cuo̧tö̧. ³⁰ Ttö̧ja̧ adiu jȩpä̧tö̧mä huo̧juȩcu̧nä̧ ucuocuätö ja̧'hua̧nö̧ jo̧mȩnä̧ adihuomenä jȩä̧cuä̧huä̧mä̧ rö̧ä̧cha̧'a̧. ³¹ Dios hueö huȩnȩmä̧ cuamiso'quinä ka̧'a̧; 'quiyönä̧tä̧ ttikichächi'oca'a ttö̧jä̧cuo̧tä̧. ³² Ttö̧ja̧ suropätömä̧ adiu jȩpä̧tö̧rö̧ to̧pä̧rä̧tö̧ ja̧'hua̧nö̧ to̧pä̧rö̧mö̧ cuä'ö tticua pä'ötä usätö. ³³ TÖ̧Ä̧NÄ̧HUA̧MÄ̧ suronä jȩpä̧tö̧ ttö̧mu̧nä̧mä̧ iyipocö jä̧cua̧ juhua'atäcu ttu̧tä̧bo̧to̧mȩnä̧mä̧ toe'ächäcuähua'atä pätetömä ku̧nä̧huo̧cö̧. ³⁴ TÖ̧Ä̧NÄ̧HUA̧RÖ̧TÄ̧ tta̧'a̧ri̧ ja̧'hua̧ta̧nö̧ a̧mö̧cuädina'acutä̧ täi juhua'atäcu Ja̧u̧mä̧ tta̧huä̧ra̧'a̧ttö̧ cui̧rȩjä̧'i̧nä̧ i̧yä̧cua̧jä̧. Suropätö si'epö tticua'a'i̧nä̧ to̧'cuä̧cua̧jä̧. ³⁵ Ttö suronä̧ jȩpö̧rö̧'i̧nä̧ topä'ijösä ja̧'hua̧ta̧nö̧ yettecunä̧ jȩpö̧ ja̧'a̧nä̧ dau rȩjȩ käi ojiyä ja̧'tu̧huäi jä̧'i̧nö̧'a̧nö̧ hua̧rö̧. ³⁶ Ja̧'hua̧nö̧ ja̧'a̧ pä'äjita'anö̧ ju̧huȩnȩnä̧ 'cuä'opö tochomȩnä̧, ja̧u̧mä̧ toina'a. Chusa'anä chö̧'o̧cui̧'o̧co̧cu̧ pinö̧. ³⁷ Ttucuotäcurö topi ja̧'hua̧ta̧nö̧ topi adiunä̧ jȩpö̧rö̧'i̧nä̧; yodoji mo̧ro̧ ö̧jä̧cuȩmä̧ adiunä̧tä̧ jä̧cua̧ ya̧tȩ huȩnȩ juiyönä kö̧rö̧mä̧. ³⁸ Siurojötä jȩpä̧tö̧mä̧ toächi'önä̧tä̧ päi'önä̧ si'epö icuähuäcuotö; suronä̧ jȩpö̧ i̧tti̧mä̧ si'epötä i̧cuä̧huä̧cua̧. ³⁹ Adiu jȩpä̧tö̧ ra̧huä̧pi̧jö̧ttö̧ ttö̧ja̧cui̧'ö̧mä̧ TÖ̧Ä̧NÄ̧HUA̧TTÖ̧ ichö ja̧'a̧; Ja̧u̧mä̧ huȩnȩ jö̧ mo̧ro̧mä̧ jahuätörö to̧pä̧rö̧ tta̧'a̧rö̧ ja̧'a̧. ⁴⁰ TÖ̧Ä̧NÄ̧HUA̧MÄ̧ ra̧huä̧pi̧jo̧mȩnä̧ ttö̧ji̧pö̧ ppä'ädö. Ja̧u̧mä̧ suronä̧ jȩpä̧tö̧rö̧'i̧nä̧ ra̧huä̧pi̧jö̧ttö̧ ttö̧ji̧pö̧nä̧ ppä'ädö ja̧'a̧ ja̧'hua̧ta̧nö̧ juhua'amä̧ ppä'ädö ja̧'a̧ Chönätä̧ dajahuächö ka̧cuä̧tö̧rö̧tä̧.