¹ CHÖ̧Ä̧NÄ̧HUA̧, ttörö suronä jȩ'ta̧ pä'ö amucuädätöttö chö̧ji̧pö̧nä̧ pä'ädittö; jahuätö ttörö rohuähuätöttörö rohuähui. ² Ppä'äditö chuädö UCUTÄ cucurächu a̧u̧cuo̧dä̧'inä ja̧'hua̧ta̧nö̧ rö'odä'i̧nä̧. ³ Ȩmi̧ UCUTÄ cudacuodä'inä ja̧'hua̧ta̧nö̧ cudapäyu'inä curohuäcua ttörö ru̧'ä̧rä̧tö̧rö̧; cha̧'cua̧ jahuätö päittö, TTÖTÄ ja̧'a̧ ucuru ppä̧dä̧dä̧cua̧mä̧.'' ⁴ Jahuätö dä'ä ttu'u ucuo juittönä jȩpi̧ttö̧ ttörö ru̧ä̧rä̧tö̧rö̧. Ttörö suronä jȩtta̧ pä'ö amucuädätörö u̧di̧'di̧ icui ja̧'hua̧ta̧nö̧ o'ca'acutä ppä̧ta̧chö̧nä̧. ⁵ Sä̧ru̧'coppa mȩji̧yä̧'che ȩmi̧pa̧'a̧ jä̧'i̧nö̧anötä̧ juottacha, CHÖ̧Ä̧NÄ̧HUA̧ huȩä̧hua̧ Angél räepö icuomenämä. ⁶ Tta̧'cua̧rö̧ ttö̧jö̧mä̧ yo̧'ö̧nä̧tä̧ ja̧'hua̧ta̧nö̧ säyupätötä jö̧nä̧, TÖ̧Ä̧NÄ̧HUA̧ huȩä̧hua̧ Angél ru̧huä̧rä̧u̧. ⁷ Koro'inä jȩcho̧ca̧'a̧nä̧ i̧sä̧sa̧nä̧ 'chuttäda pättäcusä; Koro'inä jȩcho̧ca̧'a̧nä̧ reju sa'ätö cha̧'cua̧rö̧ si'epö tticua pä'ö. ⁸ Si'epö tticua pättäji ttieruhua'anä rä̧bȩhuä̧cuo̧tö̧. I̧sä̧sa̧ tö̧tä̧jä̧sa̧tä̧ ttieyucuächäcuotö. Ja'huäju rejunä ttȩki̧pä̧cuo̧tö̧, ja̧'hua̧nö̧tä̧ ttödäpähuächäcuotö. ⁹ Ja̧'hua̧nö̧ ja̧'a̧nä̧ CHÖ̧Ä̧NÄ̧HUA̧NÄ̧MÄ̧ eseusä ja̧'hua̧ta̧'a̧nö̧ chȩsȩhuä̧cua̧sä̧ chö̧ji̧pö̧nä̧ ppäda'attö. ¹⁰ Chihue'quiyu o'cajuiyönä päcua'a: "CHÖ̧Ä̧NÄ̧HUA̧, dijä̧ttö̧ ucu'anö, usurä ȩmä̧huä̧tö̧rö̧ ppä'ädömä jitö juiyo ujuruhuätöttö ja'huätörö ja̧'hua̧ta̧'a̧nö̧ usurä isotörö'inä ja̧'hua̧ta̧'a̧nö̧ recuärö̧jä̧u̧ru̧ ttö̧nä̧u̧cua̧ ppä'ö jepätörö?" ¹¹ Jarodätömä huȩnecu̧ ttä̧rä̧mi'äcusä; jahuätömä huȩne jo̧cö̧ ttöcuocuäcusä. ¹² Jahuätörömä surojötä jȩpu̧sä̧ adiu jȩchu̧mä. Ttömä cha̧'cua̧tä̧ tta̧ȩcu̧sä̧. ¹³ Ja̧'hua̧nö̧ ja̧'a̧, jahuätö nattä̧cho̧menämä, ttötä 'ca̧tä̧hui̧nösä̧ jahuätönä; ttö chu̧cuȩ a̧do̧chi̧nösä̧ jahuätönä ja̧'hua̧nö̧ känö chamucacu chu ja̧rȩyu̧ päinösä̧. ¹⁴ Barahuächi'inäcu̧sä̧ chamunä chahuaruhuä jö̧nätä̧; ja̧'hua̧nö̧ ja̧'a̧ttö̧ chamunä cha̧ju̧ru̧ a̧'u̧ ttöttaa jö̧nä̧tä̧ päinäcu̧sä̧. ¹⁵ Ja̧'hua̧nö̧ ja̧'a̧nä̧ ttö ppe'tächi'ö ma̧di̧nö̧mä̧, juätömä̧ esehuinätö̧ ja̧'hua̧ta̧nö̧ ca̧ca̧cui̧pi̧nä̧tö̧, ttörö si'epö tticua pä'ö ja̧'hua̧nö̧ jo̧mȩnä̧ ttö̧mä̧ yettepe'inä̧cu̧sä̧ juätömä̧. Jahuätömä̧ cuäcuättinä̧cu̧sä̧ kättädoca'a. ¹⁶ Yotucu pönä̧mä̧ ttöcuotoca'a ya̧ttä̧huȩ'i̧nä̧cu̧sä̧; juätömä̧ ra̧huä̧ri̧nä̧tö̧ ttacu'i̧nä̧ 'paruru päi'önä̧. ¹⁷ TÖ̧Ä̧NÄ̧HUA̧, ¿Ti̧yȩnö̧ jubö to̧'cuä̧rä̧cua̧'a̧ttö̧? ppä'ädittö cha̧'cua̧rö̧ si'epö tticua pättöttö, cha̧'cua̧rö̧ mö̧ yä̧hui̧tö̧ttö̧ ki̧'i̧pö̧nä̧. ¹⁸ Ja̧'hua̧nö̧ jo̧mȩnä̧ ttö̧ja̧ rö̧ä̧nä̧ ttö̧ja̧cuo̧mȩttö̧ chȩsȩhuä̧cua̧jä̧; recuätö ttö̧'cä̧tȩttö̧ ra̧'ö̧ chȩsȩhuä̧cua̧jä̧. ¹⁹ Chaboiyotö ttö chötö'cö yapareu jittähuä'cha'anä̧mä̧ ja̧'a̧tä̧ to'cuä; suropätö suronä jȩtta̧ pä'ö tta̧mö̧cuädäji isojuoa'anä̧mä̧ ja̧'a̧tä̧ to'cuä. ²⁰ Juhua'amä jahuätömä huȩnȩ juiyönä kä̧cuä̧huä̧mä̧ ucuocuocotö, jahuätömä huȩnȩ juiyönä ka̧cuä̧tö̧rö̧ to'ija̧'a̧cu̧ a̧mö̧cuädö yapare huȩnȩ ji'ähuätö. ²¹ Jahuätömä ttörö suronä̧tä̧ ucuocuätö; jahuätömä pä'ätö: A̧ja̧, a̧ja̧, ujutumä pi̧yȩ topäjätöjä̧. ²² TÖ̧Ä̧NÄ̧HUA̧ Ucumä topäjijä̧, 'coruchi'ömä cu̧jä̧; Chö̧ä̧nä̧hua̧, ttöttömä̧ otomä cu̧jä̧. ²³ Porächi'i ja̧'hua̧ta̧nö̧ ppäcuädattö ä̧rä̧mi̧'ö̧; chö̧ä̧nä̧hua̧ Dios, ttö jähuämä ppä'ädittö. ²⁴ TÖ̧Ä̧NÄ̧HUA̧ chu̧ru̧hua̧ Dios ppä'ädittö, Ucu adihuomenä jȩ'cu̧ jähuänä̧; ttö usurä chȩmä̧hua̧'a̧ ttesehua'anä̧ ja̧'a̧tä̧mä̧ to'cuätö. ²⁵ Tta̧mi̧so'quinä pa̧'a̧nö̧ pä'ätörömä̧ ja̧'a̧tä̧mä̧ to'cuätö: "A̧ja̧, tu̧ju̧nä̧ra̧ pätino̧mä̧ ku̧nä̧rä̧tö̧jä̧." ²⁶ Dä'ä tuhuähuära̧'a̧tä̧ ȩpi̧tö̧ ja̧'hua̧ta̧nö̧ jitö ttörö suronä̧ jȩtta̧ pä'ö a̧mö̧cuädätörö unidicuitö. JItö ttörö ya̧'a̧huȩ'ä̧tö̧rö̧mä̧ dä'ä ttuhuähuätä ja̧'hua̧ta̧nö̧ ttucuo'i̧nä̧ jui'ätötö jö̧nä̧ jȩpi̧tö̧. ²⁷ Jitö ttö adiu jȩchö̧ esehuächi'ö pä̧i̧cu̧nä̧ huopätörömä, yabonö̧ pa̧'a̧nö̧ pä'ätörömä: TÖ̧Ä̧NÄ̧HUA̧RÖ̧ tesehuätucua, Ja̧u̧ u̧mö̧huä̧ya̧ öäre rö̧ä̧chö̧nä̧ eseu ku̧ru̧mä̧." ²⁸ Ja̧'hua̧nö̧ jo̧mȩnä̧ Ttömä̧ ucu adihuo̧mȩnä̧ jȩ'cu̧ chu̧cuo̧cuä̧cua̧sä̧ ja̧'hua̧ta̧nö̧ 'cuäopönä̧ mo̧ro̧tä̧ ra̧dä̧cua̧jä̧.