¹ TTömä 'cuäopönätä CHÖ̧Ä̧NÄ̧HUA̧RÖ̧ chȩsȩhuä̧cua̧sä̧, ja̧u̧ru̧ ra̧dö̧mä̧ 'cuäopönätä̧ ttö chänä kä̧cua̧'a̧. ² ¡Tömä eseu ra̧dä̧cua̧sä̧ CHÖ̧Ä̧NÄ̧HUA̧RÖ̧TÄ̧! ttusuräunä jȩttä̧u̧'i̧nä̧ ä̧ju̧cu̧ ttgeseunä. ³ TTucu eseunu ra̧'ä̧tu̧cui̧ TÖ̧Ä̧NÄ̧HUA̧RÖ̧, Ja̧u̧ i̧mi̧nä̧tä̧ cä'epö huotäcucua. ⁴ Ttö TÖ̧Ä̧NÄHUA̧RÖ̧TÄ̧ usinösä̧ ja̧'hua̧nö̧ ja̧'a̧ttö̧ Juo̧'u̧ ädätinö̧ ttörö, ja̧'hua̧ta̧'a̧nö̧ ttö yedecuä'iji juo̧'u̧ ppädinäcu̧sä̧ iso jodepunä. ⁵ Usätömä rö̧ȩnä esehuätö ja̧'hua̧ta̧'a̧nö̧ tti'ättömä dääcu'ocotö. ⁶ Pide ttö̧ja̧sä̧mä jäepinö ja̧'hua̧ta̧'a̧nö̧ TÖ̧Ä̧NÄHUA̧ ä̧ju̧cui̧näcu̧ ja̧'hua̧nö̧ ja̧'a̧ttö̧ ppädinäcu̧ o'cajuiyönä jȩi̧yö̧nä jö̧mä. ⁷ TÖ̧Ä̧NÄHUA̧ huȩ'ä̧hua̧mä tta̧'ä̧rö̧ yeecunö ucuotätörömä. ⁸ Jȩpu̧nö ja̧'hua̧ta̧'a̧nö̧ ka̧cuä̧mu topi TÖ̧Ä̧NÄHUA̧ MÄ̧ adihuä'i̧sa̧. Adiunätä̧ ucuocu ku̧nä̧hua̧ ttö̧ja̧sa̧ Juo̧'u̧ru̧tä̧ ucuo te'äumä. ⁹ Ucutumä TÖ̧Ä̧NÄHUA̧RÖ̧MÄ yeecuätucui. Jähuätö yeecuätömä juiyiyönä ttö̧ja̧ cu'ä̧cuo̧tö̧. ¹⁰ Mu yähuitö muäyotö koronömä ttö̧cuä̧ jui'ätö ja̧'hua̧nö̧ jo̧mȩnä̧ ppäittö usurä ȩmä̧huä̧tö̧, Ja̧'hua̧nö̧ ja̧'a̧nä̧ ju̧huä̧tö̧ TÖ̧Ä̧NÄ̧HUA̧RÖ̧ usätömä adiutä ttu̧ju̧nä̧rä̧cuo̧tö̧. ¹¹ Ichätucui, chi̧tti̧mu̧, ä̧ju̧cuä̧tu̧cui̧. Tt'ömä chu̧huo̧juȩtä̧u̧jä̧ TÖ̧Ä̧NÄ̧HUA̧RÖ̧ yecuäcuähuä huȩnȩtä̧ ¹² ¿Tidetä ja̧'a̧ttö̧ a̧'cua̧rö̧ ö̧ja̧ pä'ömä ja̧'hua̧ta̧nö̧ rȩcuo̧ mo̧ro̧ ö̧ja̧ pä'ömä adiu juei toa pä'ömä? ¹³ Ja̧'hua̧nö̧ jö̧ttö̧mä̧, suronämä cucuocuä ja̧'hua̧ta̧nö̧ yapare huȩnȩmä̧ cucuocuä. ¹⁴ Surojuttö tö'ipächi ja̧'hua̧nö̧ jȩpö̧ adiutä jȩpi̧. Huȩnȩ juiyonä kä̧cuä̧huä̧tä̧ usi ja̧u̧nä̧tä̧ cui̧'cha̧jä̧. ¹⁵ TÖ̧Ä̧NÄ̧HUA̧MÄ̧ adiu jȩpä̧tö̧rö̧mä̧ juiyo to̧pä̧rö̧ ja̧'hua̧ta̧nö̧ ttajahuomȩnä̧'i̧nä̧ ä̧ju̧cu̧. ¹⁶ Jitö suronä̧ jȩpä̧tö̧rö̧ TÖ̧Ä̧NÄ̧HUA̧MÄ̧ toa pä'ocö, jahuätömä pi̧jä̧nä̧ttö̧ jȩtti̧nä̧mä̧ a̧mö̧cuädäcuähuocotö ttäcuotö. ¹⁷ Adiu jȩpä̧tö̧mä̧ huopätö, ja̧'hua̧nö̧ huottomenä̧ TÖ̧Ä̧NÄ̧HUA̧MÄ̧ jahuätörö ä̧ju̧cu̧ ja̧'hua̧nö̧ jo̧mȩnä̧ jahuätö o'catoi'önä̧rä̧ ra̧huä̧pi̧ju̧ttö̧ ttö̧ji̧pö̧nä̧ ppä̧dä̧cua̧. ¹⁸ TÖ̧Ä̧NÄ̧HUA̧MÄ̧ tö'cö kö̧ ppäda pä'ö tta̧mö̧cuädönä tta̧'cua̧ tta̧'ȩcuä̧tö̧rö̧ ja̧'hua̧ta̧nö̧ Ja̧u̧mä̧ ppä'ädö tta̧'cua̧rö̧nä̧ tta̧'cua̧ tta̧'ȩcuä̧tö̧rö̧. ¹⁹ Adiu jȩpä̧tö̧ usurä ttȩmä̧u̧mä̧ rö̧ä̧nä̧t ja̧'a̧, ja̧'hua̧nö̧ ja̧'a̧nä̧ TÖ̧Ä̧NÄ̧HUA̧MÄ̧ jahuätö o'catoi'önä̧rö̧ juoröttö rä'epö i̧cuä̧cua̧. ²⁰ Ja̧u̧mä̧ jahuätö ttihue'quiyumä adiutä jȩpö̧ ku̧nö̧, yoröiso ji'cate'i̧nä̧ 'teähui'ö juiyönä̧tä̧. ²¹ Suronä̧ jȩpä̧tö̧mä̧ surojötä cuä'ö icuäcuotö. Adiu jȩpä̧tö̧rö̧ kö'cocotömä ro̧ȩcuä̧ra̧'a̧tä̧ pätetö ku̧nä̧huo̧tö̧. ²² TÖ̧Ä̧NÄ̧HUA̧MÄ̧ u̧mö̧huäyotörö tta̧'cua̧rö̧ ki̧'i̧pö̧nä̧ ppä'ädö. Ja̧u̧nä̧tä̧ dajahuächö ki̧'ä̧tö̧rö̧mä̧ ya̧tȩrö̧'i̧nä̧ ro̧ȩcuä̧ra̧'a̧mä̧ pätetö ku̧nä̧huo̧ca̧'a̧ jä̧cua̧'a̧.