¹ Esehuätucui CUÄ̧NÄHUA̧TU̧CU̧RU̧, ucutu adiunä jȩpä̧tö̧mä; ra̧a̧tu̧cu'i̧ esehuönö adihuä'i̧sa̧rö̧tä̧. ² Adihua pä'ätucu'i arpanä 'porö TÖ̧Ä̧NÄHUA̧RÖ̧; Arpa 10 appiyä räbanä 'porö esehuönö ra̧a̧tu̧cui̧rö̧ Juo̧'u̧ru̧mä. ³ Ra̧a̧tu̧cu'i̧rö̧ jareö ra̧huä̧huä̧ Juo̧'u̧ru̧; 'po̧rö̧ ese'unö ra̧a̧tu̧cu̧'i̧. ⁴ Ja̧'hua̧nö̧ ja̧'a̧ TÖ̧Ä̧NÄHUA̧ i̧huȩnemä jueö huȩnȩ ja̧'a̧, ja̧'hua̧ta̧nö̧ o'cajuiyönä Ja̧u̧ jȩö̧mä adiu ja̧'a̧. ⁵ Ja̧u̧mä repeö jueö huȩnȩtä̧ ja̧'hua̧ta̧nö̧ adihuomenä jȩpä̧tö̧rö̧tä̧. TÖ̧Ä̧NÄHUA̧ jȩchä̧cua̧sä̧ pä'ö ucuocu esecuinömä ja̧huä̧jä̧nä̧mä̧ jo̧mȩnö̧tä̧ ka̧'a̧. ⁶ TÖ̧Ä̧NÄHUA̧ i̧huȩnȩnätä̧ uhuäbe'inö moro̧ji̧yä̧mä, ja̧'hua̧ta̧nö̧ si̧ri̧'cö̧mä̧ o'catoi'önä̧rö̧tä̧ uhuäbe'inö i̧huȩnȩnä̧tä̧. ⁷ Ja̧u̧mä̧ ca̧ca̧tö̧ aje de'ähuotomä̧ ji̧nä̧ yometȩ päi'önä̧; Ja̧u̧mä̧ ca̧ca̧tö̧ ku̧nö̧ aje de'ähuotottö täcuometä̧. ⁸ O'catoi'önä pi̧jä̧nä ka̧cuä̧tö̧mä̧ ye'ecuätö TÖ̧Ä̧NÄ̧HUA̧RÖ̧MÄ̧; pi̧jä̧ ttö̧ja̧ o'catoi'önä̧ Ja̧u̧ ä'ca jo̧mȩtä̧ to̧pä̧rö̧ ttö̧jä̧cuo̧tö̧. ⁹ Ja̧'hua̧nö̧ ja̧'a̧ Ja̧u̧mä̧ ucuocuinö̧ ja̧'hua̧nö̧ ucuocuinö̧ isojuoina'a ja̧u̧mä̧ adiu jȩpö̧ ku̧ni̧nö̧ ja̧'hua̧ta̧nö̧ ka̧ pä'ö ji̧no̧mȩtä̧ ku̧ni̧nö̧. ¹⁰ TÖ̧Ä̧NÄ̧HUA̧MÄ̧ si'epu icuinö ttö̧ja̧ korotucu ttesecuinömä; Ja̧u̧mä̧ ttö̧ja̧ jȩtta̧ pä'ö tta̧mö̧cuädömä jȩpö̧ icu. ¹¹ TÖ̧Ä̧NÄ̧HUA̧ amucuädömä beipocö, amiso'quinä amucuädömä tti̧tti̧mu̧ juȩnȩ yabo tti̧tti̧mö̧nä̧'i̧nä̧ a̧di̧tä̧cua̧. ¹² Adiutä ja̧'a̧cuä̧ TÖ̧Ä̧NÄ̧HUA̧ Diosrö ucuo te'ähuätörömä̧, Ja̧u̧ ö̧'o̧jo̧'i̧nä̧u̧ chutä ahuaruhuä päi'önä. ¹³ TÖ̧Ä̧NÄ̧HUA̧MÄ̧ mo̧ro̧jä̧ra̧'a̧ttö̧ to̧pä̧rö̧ kö̧; ja̧u̧mä̧ ttö̧ja̧rö̧mä̧ o'catoi'önä̧rö̧tä̧ to̧pä̧rö̧. ¹⁴ Ja̧u̧ ö̧jo̧mȩttö̧mä̧, rȩjȩcu̧ ttö̧ja̧ pi̧jä̧ rȩjȩnä̧ ka̧cuä̧tö̧rö̧mä̧ o'catoi'önä̧rö̧tä̧ topö. ¹⁵ Ja̧u̧tä̧ ja̧'a̧ ttö̧ja̧ tta̧mö̧cuädö'i̧nä̧ tta̧mö̧cuädäcua'acutä jȩpö̧ ku̧ni̧nö̧mä̧, aditähuä'i̧nä̧ usäu topö. ¹⁶ Recuätö su̧ro̧da̧u̧tä̧mä̧ jo̧ca̧'a̧ jä̧cua̧'a̧ ru̧hua̧rö̧ rä̧huä̧pi̧ju̧ttö̧ ö̧ji̧pö̧nä̧ ppä'ädätömä̧; ruhuähuäcuähuä ttö̧ja̧sa̧'i̧nä̧ a̧mö̧nä̧ ujurunä̧mä̧ rä̧huä̧pi̧ju̧ttö̧ ki̧'o̧cö̧ jä̧cua̧. ¹⁷ Caballo ju̧ru̧hua̧ jö̧ttö̧'i̧nä̧ isojuo'epöcö jä̧cua̧, ujuru rö̧ä̧nä̧ u̧ju̧nä̧ra̧ja̧ pä'ö'i̧nä̧ curättömä̧ ki̧'o̧cö̧ jä̧cua̧. ¹⁸ Topittö, TÖ̧Ä̧NÄ̧HUA̧MÄ̧ topärö jitö chutärö ye'ecuätörötä, jitö jȩchä̧cua̧sä̧ pä'ö ucuocu esecuinö tta̧'a̧rä̧tö̧rö̧tä̧. ¹⁹ hua'arettö tta̧'cua̧rö̧ ki̧ö̧i̧pö̧nä̧ ppädatö pä'ö ja̧'hua̧ta̧nö̧ ppäi ttuhuähuä mo̧ro̧'i̧nä̧ a̧'cua̧rö̧ ttö̧jö̧nä̧ tta̧huä̧ra̧ pä'ömä. ²⁰ Ujutumä TÖ̧Ä̧NÄ̧HUA̧RÖ̧ tta̧'ä̧rä̧tö̧jä̧; Ja̧u̧mä̧ i̧jȩpö̧ ppädäcuähuätä ja̧'hua̧ta̧nö̧ ttabojähuä ttoecuäcuähuä'i̧nä̧. ²¹ Tamiso'quimä TÖ̧Ä̧NÄ̧HA̧RÖ̧ esehua'a; juhua'amä adihuäjuei i̧mi̧nä̧ ta̧'cua̧ tu̧huȩnä̧ra̧'a̧ttö̧. ²² I̧jȩpi̧tö̧ ucu cuesecuinö, TÖ̧Ä̧NÄ̧HUA̧, ppä'äditö ucurutä ta̧'u̧ tu̧huä̧nä̧ra̧'a̧ttö̧.