¹ TÖ̧Ä̧NÄ̧HUA̧ ucutänä̧, ttömä̧ dajahuächö kö̧sä̧; yorisotä ucuo jui̧'a̧ 'cua̧rö̧nä̧mä̧ ja̧'a̧tä̧mä̧ to'cuättö. Ucu adihuomenä̧ jȩ'cö̧nä̧ chö̧ji̧pö̧nä̧ jȩpi̧ttö̧. ² Ä̧ju̧cu̧ttö̧, chu̧ji̧pu̧nä̧ ppä'ädittö jitätä ja̧'a̧cu̧; ucutä ja̧'a̧ chudahuächomemä̧, surojöttö chö̧ji̧pö̧nä̧ chujuru Iyö'i̧nä̧. ³ Ucutä ja̧'a̧ ttö chido'qui jö̧nä̧ hua̧mä̧ ja̧'hua̧ta̧nö̧ chujurumä̧ ja̧'hua̧nö̧ jo̧mȩttö̧; ucu cuimi ttucuotäcua'anö̧, ȩpö̧ o'ipittö. ⁴ Ttörö chä̧tȩcuä̧ jö̧nä̧ ttötäjome rä'epö icuittö, isopäi'önä̧ ja̧'a̧ ttö chudajuomemä̧. ⁵ Ttö cha̧'cua̧ru̧hua̧rö̧mä ucu cu̧mu̧nä̧tä̧ iyösä; Ucutä rä'epö icu ppä̧cuä̧dä̧cua̧sä̧, CHÖ̧Ä̧NÄ̧HUA̧, Dio cha̧'u̧ chu̧huä̧nä̧rä̧cu̧. ⁶ Ttö̧mä̧ a̧'u̧tu̧sä̧ tätähuä'ca micuähyuoco'ca ucuo te'ähuätörömä, ja̧'hua̧nö̧ ja̧'a̧nä̧ ttömä CHÖ̧Ä̧NÄ̧HUA̧RÖ̧TÄ̧ cha̧'u̧ huä̧nä̧rö̧sä̧. ⁷ Ttömä chȩsȩhuä̧cua̧sä̧ jȩchä̧cvu̧a̧sä̧ päinöta'anö jȩa̧'a̧ttö̧, ucumä topinö̧jä̧ chusurähua'a; Ucumä huo̧jui̧nö̧jä̧ cha̧'cua̧ jäcuänä cha̧'cua̧tta̧dȩcu̧'i̧nä̧. ⁸ Ucumä cuiyäjäcusä chabo'iyotö ttu̧mu̧nä̧. Ucutä cu̧ju̧nä̧jä̧cu̧sä̧ cähueönä bahuecuächome. ⁹ Rȩrö̧jö̧nä̧ topittö, CHÖ̧Ä̧NÄ̧HUA̧, rö̧ä̧nä̧tä̧ suräusä; chö'äre jö̧ä̧mä̧cu̧sä̧ chajuähuomenä, cha̧'cua̧rö̧'i̧nä̧ ja̧'hua̧ta̧'a̧nö̧ chidepänä'inä. ¹⁰ Cha̧'cua̧rö̧nä̧ ajuäutä juiyupächösä ja̧'hua̧ta̧'a̧nö̧ cha̧'ȩ'i̧nä̧ ajuäutä 'cuächächa'a. Suronä jȩcha̧'a̧ttö̧ juiyupächösä, chihue'quiyu'inä täcö juiyuhuächa'a. ¹¹ Chabo'iyotö ttihueye, ttö̧ja̧'i̧nä̧ tta̧'u̧tä̧cu̧sä̧; chippeyänä ko̧cuä̧tö̧mä̧ tta̧'a̧nö̧ki̧ jä̧cu̧ pättäcusä, ja̧'hua̧ta̧'a̧nö̧ ttörö topä'ijätömä yettecuäcusä. Mänättö̧ ttörö topäcuäumä ttö'ipächätö. ¹² 'Corujuo'ächätörö ja̧'i̧nö̧'a̧nö̧ jȩttä̧cu̧sä̧ ya̧tȩ'i̧nä̧ amucuädäcö. Ttömä i̧so̧'ta̧ di̧ä̧huo̧'ta̧ ja̧'i̧nö̧'a̧nö̧tä̧ hua̧sä̧. ¹³ Ä̧ju̧cuä̧cuä̧u̧sä̧ recuätö ttö̧ja̧ ttörö ttucuocua'a, huȩnȩ o'catoi'önä suronätä̧ ttu̧cuo̧cua̧'a̧, ja'huätö ttörö suronä jȩtta̧ pä'ötä ttucuocua'anä. Ja'huätömä ucuocuätö ttö cha̧'cua̧rö̧ si'epö tticua pä'ötä. ¹⁴ Ja̧'hua̧nö̧ ja̧'a̧ ucurutä ucuo teähuösä ttömä, CHIÄ̧NÄHUA̧; ttö pädäcujä: Ucumä ttö CHIÄ̧NÄHUA̧ DIOSJÄ. ¹⁵ Ttö chi̧jä̧cuȩ'i̧mä ucu cumunätä̧ ka̧'a̧. Ppäädittö chaboyotö ttumuttö̧mä ja̧'hua̧ta̧'a̧nö̧ jitö ttörö 'chuttäda pä'ätörö'inä. ¹⁶ Ucú huecuäcurumä huäjunä i̧jȩcui̧; adiunä ucuocu cu̧ju̧ninömä ppäädittö. ¹⁷ Ja̧'a̧tä̧ to'cuättö ucuo tedähua'anämä, CHIÄ̧NÄHUA̧, ¡Ucurutä ucuo teähuösä! ¡Jarodätötä ucuo teähuätömä! ja̧'hua̧ta̧nö̧ jahuätömä 'corödö kö̧nähuo̧tö̧ hua'are rejunätä̧!. ¹⁸ Ja̧'hua̧nö̧ ja̧'a̧nä̧ adiunä kä̧tö̧rö̧mä ttättötä surojö ucuocuächätö a̧u̧tä̧cua̧'hua̧tä̧ ja̧'hua̧nö̧ ja̧'a̧ttö̧ ttöjö'quiyönä̧ jö̧tä̧ 'corödö'icuitö. ¹⁹ ¡Ucu adiunä jȩ'cu̧mä juiyo rö̧a̧'a̧, ja̧u̧mä̧ daju ku̧ni̧nö̧jä̧ jitö ucuru ucuotätörötä, jȩpö̧jä̧ jitö ucunä̧tä̧ dajahuächö ka̧cuä̧tö̧rö̧tä̧, o'catoi'önä pi̧jä̧ ttö̧ja̧ ttä'ca jomettömä̧! ²⁰ Cuä'ca jometö däjacuähuämä ucutä ja̧'a̧, ucumä daju̧jä̧ ttö̧ja̧ suronä jȩpä̧tö̧ttö̧mä̧. Ucumä dajacuähuome dajöjä̧ suronä ucuocu̧ätöttömä. ²¹ Adiunätä̧ jä̧cua̧ TÖ̧Ä̧NÄ̧HUA̧MÄ̧, ja̧'hua̧nö̧ ja̧'a̧ u̧huo̧juȩti̧nä̧cu̧sä̧ Chutä adiu jȩpö̧ jȩchä̧cua̧sä̧ pä'ö esecu ucuocuinönä ttö ö̧ta̧hui̧yä chö̧ji̧nö̧ pä̧nä̧mä̧. ²² Ttö jurunä päda pä'ö'i̧nä̧. " Cuä'ca jo̧mȩttö̧mä̧ räcuepinä̧cu̧sä̧," ja̧'hua̧nö̧ ji̧na̧'a̧nä̧'i̧nä̧ Ucumä̧ ä̧ju̧cu̧jä̧ ppäcuäda pä'ö pä̧i̧cu̧nä̧ huopönä Ucuru jädepomenämä. ²³ Oh, TÖ̧Ä̧NÄ̧HUA̧RÖ̧TÄ̧ repe'ätucui, ucutu o'catoi'önä̧ päö'acuä̧tä̧ jȩpö̧ o'ca'anä̧ 'chä̧tö̧mä̧, ja̧'hua̧nö̧ ja̧'a̧nä̧ ja̧u̧mä̧ ucuo te'ähuätörömä̧ rö̧ä̧nä̧tä̧ ro̧'ȩpö̧. ²⁴ Juruhuätucui ja̧'hua̧ta̧nö̧ 'quitönä̧ ka̧cuä̧tu̧cui̧, ucutu o'catoi'önä̧ cua̧'cua̧ huȩnä̧rä̧tö̧mä̧ juhua'atäcu TÖ̧Ä̧NÄ̧HUA̧ ppädätucuacu pä'ö tta̧'ä̧rä̧tö̧mä̧.