1 TÖ̧Ä̧NÄ̧HUA̧TÄ̧ ja̧'a̧ ttö chi̧tȩa̧u̧mä̧ ja̧'hua̧ta̧nö̧ hua'arettö chö̧ji̧pi̧nä̧cu̧mä̧; ¿Dirö yedecua'anö̧ ja̧'a̧ttö̧? TÖ̧Ä̧NÄ̧HUA̧TÄ̧ ja̧'a̧ ttö cha'cuarö̧ daju ku̧ni̧nö̧mä̧; ¿Dirötä yedecu'anö̧ttö̧? 2 Suronä̧ jȩpä̧tö̧mä̧ ttö chö̧jo̧mȩcu̧ tö'cöpächätömä̧ chidepä si'epö tticua pä'ö, ttö chaboiyotömä̧ ttöecuächu mattä̧cuo̧tö̧. 3 Su̧ro̧do̧mä̧ ttöru chä̧tȩcuä̧ jö̧nö̧ ttö̧ja̧cuä̧ma̧'a̧nä̧, cha̧miso'quimä̧ yecuoca'a jä̧cua̧'a̧; curänä̧ ttöcu ttörohuähua pä'ö jȩtta̧'a̧nä̧; ja̧'hua̧nö̧ jȩtta̧ pä'ö'i̧nä̧ ttömä̧ cha̧'cua̧tä̧ chu̧huȩnä̧rä̧cua̧sä̧. 4 Ji̧yȩtȩ jä'epinö̧sä̧ CHÖ̧Ä̧NÄ̧HUA̧RÖ̧MÄ̧, ja̧'hua̧nö̧ ja̧'a̧ttö̧ ttömä chu̧sä̧cua̧sä̧: 'cuä'opönä mo̧ro̧ chö̧ja̧ pä'ö CHÖ̧Ä̧NÄ̧HUA̧ ojusodenä cha̧'cua̧rä̧i̧mä̧, CHÖ̧Ä̧NÄ̧HUA̧ öadihuä tocha pä'ö ja̧'hua̧ta̧'a̧nö̧ ojusodenä kä̧nö̧ chamucuäda pä'ö. 5 Ja̧'hua̧'a̧nö̧ ja̧'a̧ttö̧ huȩnȩ jö̧ mo̧ro̧mä̧ JA̧U̧TÄ̧ ö̧jo̧mȩ dajö ku̧nu̧ ppä̧dä̧cua̧sä̧; ¡JA̧U̧TÄ̧ inähuä juttä cä'epö u̧ju̧nä̧cua̧sä̧! 6 ¡Ja̧'hua̧nö̧ ja̧'a̧ttö̧ ttömä ju'tojunä cä'epö ku̧nä̧cua̧ hua̧ chö̧jä̧cua̧sä̧ chabo'iyotö'inä chippeyänä pätti'ö juiyönä, ja̧'hua̧nö̧ ja̧'a̧ttö̧ eseu chiäre iyähuä jȩchä̧cua̧sä̧ chutä ö̧jodettö ja̧'hua̧ta̧nö̧ ttömä ra̧ö̧'inä ra̧da̧cua̧sa̧ CHI̧Ä̧NÄ̧HUA̧RÖ̧!. 7 !Ä̧ju̧cui̧ttö̧, CHÖ̧Ä̧NÄ̧HUA̧, ucuru huopönö jädepomenämä! ¡rȩrö̧jö̧nä̧ topittö, ja̧'hua̧nö̧ topö ädätittö! 8 Chamiso'quimä ucuru päa'a: "Ja̧u̧ i̧'cho̧mȩnä̧ cui̧'cha̧ usi" ¡Ucurutä ususä, CHÖ̧Ä̧NÄ̧HUA̧! 9 Dajahuächömä jȩcu̧'ä̧ttö̧ ttörömä, ttörö cuämisuru topömä jarocu'ättö! ¡Ucutä jä̧'i̧ja̧'a̧ ttörö ppä̧'ä̧dä̧rö̧mä̧, jarocui'ättö icuipö'inä cuicuipättö, CHÖ̧Ä̧NÄ̧HUA̧ ttörö ppädäcuähuä i̧sa̧! 10 Chä'o'inä cha̧ju̧'i̧nä̧ tticuipöttömä, CHÖ̧Ä̧NÄ̧HUA̧TÄ̧ ȩmä̧cua̧sä̧. 11 ¡Huo̧juȩti̧ttö̧ ucu cuamucuädötä, CHIÄ̧NÄHUA̧! ji̧'ä̧huä̧rö̧ oipíttö suronä ttämucuädöttö chabu'oyotö. 12 ¡Iyö cuicuättö chabu'oyotö iso joepu tteseunämä, ja̧'hua̧ta̧'a̧nö̧ yapare toicutä ucuocu'ätö ttörömä, jahuätömä surojötä i'cächätö! 13 ¿Suronä 'cuä'opa pe'ö ji̧naa̧ ttö chesetocaa ji̧nöttö̧mä TÖ̧Ä̧NÄHUA̧ adiunä jȩ'ö̧mä ttörö pi̧jä̧nä ttö̧jo̧menä? 14 ¡Ttä̧'a̧ri̧ TÖ̧Ä̧NÄHUA̧RÖ̧, esehuächiö cuamiso'quittö juruhuächii! ¡Tta̧'a̧ri̧ TÖ̧Ä̧NäHUA̧RÖ̧TÄ̧!