¹ ¡Ucurutäjä̧, TÖ̧Ä̧NÄ̧HUA̧MÄ̧, cha̧'cua̧rö̧mä̧ Ucurutä iyäusä! ² Chu̧ru̧hua̧ Dios, Ucurutä cha̧'cua̧ huä̧nä̧ru̧sä̧. Ja̧'a̧tä̧mä̧ to'cuätö ucuo jui̧'a̧ pätta'anä̧mä̧; ja̧'a̧tä̧mä̧ to'cuä chaboiyotö kä'ö ticuäcu pätta'anä̧mä̧. ³ ¡Ya̧tȩ'i̧nä̧ Ucuru tta̧'a̧rö̧rö̧ kä'ö tticua'anä̧mä̧ ja̧'a̧tä̧ to'cuä jitö yaparehuätörömä̧ koro'i̧nä̧ juiya'anä̧ dä'ä ttutte pätucuäcu. ⁴ Cu̧mä̧nä̧ chu̧huo̧jua̧ jȩpi̧ttö̧. TÖ̧Ä̧NÄ̧HUA̧, Ucu cu̧mä̧ni̧yä̧ huo̧juȩti̧ttö̧. ⁵ Jueö huȩnȩnä̧ o'ipittö u isopä'önä Ucutä ja̧'a̧ cha̧'cua̧rö̧'i̧nä̧ ki̧'i̧pö̧nä̧ ppä'ädömä; Ucurutä o'cajuiyö̧nä̧ mo̧ro̧ tta̧'a̧ru̧sä̧ ⁶ Oh TÖ̧Ä̧NÄ̧HUA̧ a̧mö̧cuädittö. Ucumä ttörö rȩrö̧jö̧nö̧ topöjä ja̧'hua̧ta̧nö̧ esecu jȩchä̧cua̧sä̧ päcuinö̧mä̧; jahuätömä mo̧tä̧ päi'önä ka̧cui̧nä̧tö̧. ⁷ ¡Mö̧ä̧ya̧ chö̧jä̧i̧ suronä̧ jȩchi̧nö̧mä̧ cuamöcuädä ja̧'hua̧nö̧ jo̧ca̧'a̧ttö̧'i̧nä̧ chu̧ra̧huä̧ri̧nö̧mä̧; ttörömä̧ a̧mö̧cuädi esecu jȩchä̧cua̧sä̧ päcuinönä̧tä̧ ucu adiu jȩ'cu̧nä̧tä̧, TÖ̧Ä̧NÄ̧HUA̧! ⁸ TÖ̧Ä̧NÄ̧HUA̧ adihuä i̧sa̧ ja̧'hua̧ta̧nö̧ jueötä hua̧mä̧; ja̧'hua̧nö̧ ja̧'a̧ttö̧ suronä̧ jȩpä̧tö̧rö̧mä̧ tti̧'chä̧cuo̧mȩtä̧ huo̧juȩtö̧jä̧. ⁹ Ja̧u̧mä̧ ucuo te'ähuocotö ti̧'chö̧mȩmä̧ jueönä̧tä̧ o'ipö, ja̧'hua̧nö̧ Chutä a̧mö̧cuädö'i̧nä̧ huo̧juȩtö̧. ¹⁰ TÖ̧Ä̧NÄ̧HUA̧ a̧mö̧cuädömä o'cajuiyönä re kä̧cuä̧huä̧mä̧ ja̧'hua̧ta̧nö̧ tta̧'cua̧ huȩnä̧ȩä̧cuä̧huä̧'i̧nä̧ toepächocö ja̧'a̧ jitö esecu ucuocuinö̧nä̧'i̧nä̧ juhua'atäcu pä'cari jȩttä̧cuȩ hueähuä huȩnȩ'i̧nä̧ jȩpö̧ ka̧cuä̧tö̧rö̧mä̧. ¹¹ Ucu TÖ̧Ä̧NÄ̧HUA̧ cui̧mi̧ jähuänä̧, suronä̧ jȩchö̧nä̧ jepö icu, juhua'amä rö̧ä̧ö̧ ja̧'a̧ttö̧. ¹² ¿Dijättö TÖ̧Ä̧NÄ̧HUA̧RÖ ucuotömä̧? TÖ̧Ä̧NÄ̧HUA̧TÄ̧ ja̧u̧rö̧ u̧huo̧juȩtä̧cua̧ mä̧nä̧ pojopö ȩmö̧'a̧nö̧ jä̧mä̧. ¹³ Ja̧u̧ ö̧jö̧mä̧ yabonö̧ ro̧ä̧chä̧cua̧ Ja̧hua̧ta̧nö̧ i̧tti̧mö̧'i̧nä̧ tti̧rȩjä̧ ttȩmä̧cuo̧tö̧. ¹⁴ TÖ̧Ä̧NÄ̧HUA̧ rȩpȩä̧u̧mä̧ jitö ja̧'a̧ churutä ucuo te'ähuätö ja̧'hua̧ta̧'a̧nö̧ esecu u̧ju̧ninö̧ ji̧nö̧'inä huo̧ju̧nä̧ jȩpä̧tö̧. ¹⁵ Ttömä 'cuäopönä CHÖ̧Ä̧NÄ̧HUA̧RÖ̧TÄ̧ to̧pä̧rö̧sä̧, JA̧U̧TÄ̧ ja̧'a̧ttö̧ ttö ro̧huä̧pi̧jo̧nä̧ chö̧jo̧mȩttö̧ ppä̧dä̧cua̧mä̧. ¹⁶ Ttörö topi ppäcuädattö kätä kä̧nö̧ cha̧'cua̧ tta̧dȩcu̧nä̧ jä̧cu̧sä̧. ¹⁷ ¡Ttö chamiso'quittö cha̧'cua̧ tta̧dȩcu̧nä̧ jö̧mä̧ rö̧ä̧chä̧cu̧sä̧; ttö cha̧'cua̧ tta̧dȩcu̧ rä'epö icuittö! ¹⁸ Topi ttö ye'ecu cha̧'cua̧ tta̧dȩcu̧nä̧ jö̧mä̧; suronä jȩchi̧nö̧mä̧ u̧ni̧chi̧'i̧ttö̧. ¹⁹ topi ttö chabo'iyotörö, jahuätömä juiyö rehuätö; jähuätömä ttöjö'cö juiyönä jä̧u̧ tta̧'u̧tä̧cu̧sä̧. ²⁰ Cha̧'cua̧rö̧ tta̧'a̧ri̧ttö̧ ja̧'hua̧nö̧ tta̧'a̧rö̧ surojöttö chö̧ji̧pö̧nä̧ ppä'ädittö; ya̧ttä̧huä̧'cha̧'a̧nä̧mä̧ ja̧'a̧tä̧ tocu'ättö, jua'amä ucunä̧tä̧ chö̧ja̧'a̧ttö̧! ²¹ suronä'i̧nä̧ jȩpo̧cö̧sä̧ ja̧'hua̧nö̧ jȩcho̧ca̧'a̧ttö̧ adihuomenätä̧ tta̧'a̧ri̧ttö̧; ucurutä cha̧'u̧chu̧huä̧nä̧ra̧'a̧ttö̧. ²² Israél ttö̧ja̧rö̧ surojöttö ttö̧ji̧pö̧nä̧ ppä'ädi, CHÖ̧Ä̧NÄ̧HUA̧, rö̧ä̧nä̧ usurä ȩmä̧huä̧tö̧.