¹ CHIÄ̧NÄHUA̧ DIOS, CHIÄ̧NÄHUA̧ DIOS, ¿Dä̧ pe'ö jarocui'ättö? ¿Dä̧ pe'ö otó cui̧jä̧ttö̧ ttörö ppäcuäda pe'ömä ja̧'hua̧ta̧'a̧nö̧ chä̧'cua̧ tta̧dȩcu̧'í̧nä otó jä̧cu̧sä̧? ² CHIÄ̧NäHUA̧ DIOS, ttömä chucuocuäcujä moro̧ jö̧ a̧'u̧cua̧, ja̧'hua̧nö̧ ja̧'a̧nä̧ Ucumä cuädätocuocusä, ja̧'hua̧ta̧'a̧nö̧ yodo'inä̧ 'curunämä ko̧cö̧sä̧! ³ ja̧'hua̧ta̧'a̧nö̧ Ucumä adihuä i̧sa̧jä̧; Israel ttö̧ja̧mä ucuo tettähuäcujä Ucurutä ru̧hua̧cua'attö. ⁴ Ujutu tä̧do̧tö̧ minämä ucurutä ucuo te'ähuinätö̧, jahuätömä ucurutä ucuo teähuinätö̧, ja̧'hua̧nö̧ ja̧'a̧ttö̧ ucutä ppäcuädinäu̧. ⁵ Jahuätömä ucuru jäepinätö̧ ja̧'hua̧ta̧'a̧nö̧ jahuätörömä ppä'ädinöjä̧. Jahuätömä ucurutä ucuo teähuinätö̧ ja̧'hua̧ta̧'a̧nö̧ rä'epu icuähuocotö pinätö̧. ⁶ Ja̧'hua̧nö̧ ja̧'a̧ ttömä̧ äcahuätä hua̧sä̧ ttö̧ja̧ i̧sa̧mä̧cö̧sä̧, Pi̧jä̧ ttö̧ja̧rö̧mä̧ surojötä ja̧hua̧ta̧nö̧ ttö̧ja̧mä̧ ttöjö'cococusä. ⁷ O'ca toi'önä ttörö topätömä suronä̧tä̧ pä'ä'chätö ja̧'hua̧ta̧nö̧ ya̧ttä̧huä̧'chä̧cu̧sä̧. jahuätömä ttörömä̧ ttötä poripori jȩpä̧tö̧. ⁸ Jahuätömä̧ pä'ätö: Ja̧u̧mä̧ TÖ̧Ä̧NÄ̧HUA̧RÖ̧TÄ̧ a̧'cua̧ huȩnä̧ri̧nö̧, ja̧'a̧tä̧ topirö TÖ̧Ä̧NÄ̧HUA̧TÄ̧ ppädarö. Ja̧'a̧tä̧ topirö Ja̧u̧tä̧ ppädarö juhua'a ja̧u̧tä̧ ja̧'a̧ juiyo esehuäcumä̧. ⁹ Ja̧'hua̧nö̧ ja̧'a̧ Ucumä cha̧ju̧ cu̧cuä̧ba̧ jacuättö cui'cächinä̧cu̧sä̧; Ucutä ja̧'a̧ cha̧ju̧ katate isoya chahuäi'i̧nä̧ cha̧'cua̧ chu̧huȩnä̧rö̧nä̧ jȩpi̧nö̧jä̧. ¹⁰ Cha̧ju̧ cu̧cuä̧ba̧ jacuättö Ucuru iyö icuähua̧ pinö̧sä̧; Ucumä ji̧nä̧ cha̧ju̧ cu̧cuä̧ba̧ jäcuä chȩcä̧i̧tä̧ kä̧mä̧dö̧ chu̧ru̧hua̧ Diosjä̧! ¹¹ Ttöttömä otomä̧ cu̧jä̧, juhua'amä huȩnȩ tö'cötä ka̧'a̧ttö̧, ya̧tȩ'i̧nä̧ toa'a ppä'ädömä̧. ¹² Pä̧cä̧yö̧ recuätö ttusobötäcusä; Basán ötahuiyättö pä̧cä̧yö̧ ujuruhuätö ttusobötäcusä. ¹³ Jahuätömä ttörö ttucui'a pä'ö ttä cähuetö battepäcusä, mö yähui jä̧'o̧nö̧'a̧mö̧ durupä̧rö̧ pö̧mä̧ ö̧'o̧ya̧rö̧ sesepö icu. ¹⁴ Ajiya jä̧'i̧nö̧'a̧nö̧ to'ötä i̧cuä̧hua̧sä̧, ja̧'hua̧ta̧nö̧ chihue'quiyömä o'cajuiyötä pperetö icuähua'a. Chamiso'quimä isähua dö'cähuähua jä̧'i̧nö̧'a̧nö̧ ja̧'a̧; jacuänä̧mä̧ isoya jö̧nä̧tä̧ juoächa'a. ¹⁵ Chujurumä joipächina'a redä'cattö ji'cate jä̧'i̧nö̧'a̧nö̧; chi̧nȩmä̧ chä huä̧mȩ (chacu kada'catä) bäipä̧rä̧cu̧sä̧. Ttörömä hua'areba po̧mȩtä̧ rötinö̧. ¹⁶ Ja̧'hua̧nö̧ ja̧'a̧ ä̧hui̧ri̧tö̧mä̧ chippeyänä ttusobutinä̧cu̧sä̧; yotöte suronä jȩpä̧tö̧ ttusobutinä̧cu̧sä̧; jahuätömä chu̧mö̧nä̧'i̧nä̧, chö̧jä̧pö̧nä̧ ppu̧ra̧hui̧'ö̧nä̧ yu̧tti̧nä̧cu̧sä̧. ¹⁷ Chihue'quiyömä o'cajuiyötä chö̧'a̧ta̧'nö̧ ja̧'a̧. Jahuätömä usäu tto̧ttä̧rä̧cu̧sä̧. ¹⁸ Jahuätömä chu̧'ca̧tä̧ 'cä̧'chä̧u̧ iyä'chähuiä̧tö̧, chu̧'ca̧tä̧huä̧ta̧mä̧ ya̧tȩrö̧ pätecuächönä icu toäcuähuänä icu topinä̧tö̧. ¹⁹ Otomä̧ cu̧jä̧ oh TÖ̧Ä̧NÄ̧HUA̧; chujuru iyö ppäcuädattö jurunä ichi! ²⁰ Chaboiyotöttö chö̧ji̧pö̧nä̧ ppä'äditö, dea ä̧hui̧ri̧tö̧ ttö̧näji̧yä̧ttö̧ ttö cha̧'cua̧rö̧mä̧ ya'utetä ja̧'a̧. ²¹ Mu yähui ättö chö̧ji̧pö̧nä̧ ppä'äditö; ppä'äditö de'a päcäyä äja̧'i̧sä̧na̧ttö̧ chi̧ji̧pö̧nä̧. ²² Ttö chu̧cuo̧cuä̧cua̧sä̧ ucutu cui̧minä chi̧jä̧hua̧tö̧ huotörömä; ji̧nä̧ yo̧mȩtȩ pä'i'ö ttö̧ca̧ca̧cuä̧ro̧mȩttö̧ ttö chesehuä̧cua̧sä̧ ucurutä. ²³ ¡Ucutu'inä TÖ̧Ä̧NÄ̧HUA̧RÖ̧ ye'ecunö ucuotätömä, esehuätucui! ¡ucutu Jacobminä ahuäruhuä 'cotö o'catoi'önä, ucuo teähuätucui JA̧U̧RU̧TÄ̧! ¡Ye'ecunö topätucui JA̧U̧RU̧MÄ̧, Ucutu Israel ttö̧ja̧ ttahuaruhuä 'cotömä!. ²⁴ Ja̧u̧mä̧ kö'cocösänö'inä pä'ocö, jaropö'inä jaropicö, na'a̧chö̧ surähuätörö'inä; TÖ̧Ä̧NÄ̧HUA̧MÄ̧ a̧'cua̧juä̧'i̧nä̧ dajömä icuocö; usurä ȩmä̧u̧ juopönö jäepäcumä, ja̧u̧mä̧ ä̧ju̧cui̧nö̧. ²⁵ Tömä recuätö ttö̧jo̧cuo̧mȩtö̧mä̧ eseunutä̧ huopösä ucuru; Ttömä jȩchä̧cua̧sä̧ pädinöta̧'a̧nö̧ jȩchä̧cua̧sä̧ korotö ja̧u̧ru̧ yettecuttu'inä. ²⁶ Usurä ȩmä̧huä̧tö̧'i̧nä̧ tucuäcuotö ja̧'hua̧nö̧ cuä̧nö̧ ttesehuäcuotö, jitö TTÖ̧Ä̧NÄ̧HUA̧RÖ̧ usätömä ja̧u̧ru̧tä̧ ttesehuäcuotö. ¡Eseunutä̧ ttö̧jä̧cuo̧tö̧ tta̧miso'quinä! ²⁷ O'catoi'önä pi̧jä̧nä̧ ko̧cuä̧tö̧mä̧ ttamöcuädäcuotö ja̧'hua̧nö̧ amöcuädö ppa̧ttä̧chä̧cuo̧tö̧ TTÖ̧Ä̧NÄ̧HUA̧RÖ̧; O'catoi'önä pi̧jä̧ ruhuäcuiyänä ko̧cuä̧tö̧mä̧ ucurutä ja̧rȩyu̧nu̧ pä'i'ö ucuo tettähuäcuotö. ²⁸ Isopäi'önä̧ ruhuomä̧ TÖ̧Ä̧NÄ̧HUA̧ uruhuotä ja̧'a̧; Ja̧u̧mä̧ ttö̧ja̧ o'catoi'önä̧rö̧ ruhuonä̧ hue'ö ja̧'a̧. ²⁹ Ttö̧ja̧mä̧ o'catoi'önä̧tä̧ ttöäre rö̧'ä̧chö̧mä̧ ttucuäcuotö ja̧'hua̧ta̧nö̧ ucuo'i̧nä̧ tettehuäcuotö; o'catoi'önä̧ 'corujuo'ächätö'i̧nä̧ Ja̧u̧ ä'ca jo̧mȩ ttihue'quiyönä ttö̧'ȩjä̧mä̧cuo̧tö̧, ji̧nä̧ jitö tta̧mö̧nä̧ pa̧ja̧tö̧ tta̧'cua̧rö̧ ttö̧ji̧pö̧ juiyönä̧ huotö'i̧nä̧. ³⁰ Tti̧tti̧mu o'cotötä Juo̧'u̧ hue'ö jȩttä̧cuo̧tö̧, juo̧nö o'ca'atä jahuätö tti̧tti̧mu o'cotötä ttöcuocuäcuotö TÖ̧Ä̧NÄHUA̧RÖ̧. ³¹ Jahuätö ichö jittähuäcuotö juo̧'u̧ adihuö jȩi̧nö̧tä̧; ¡Jahuätö tti̧tti̧murö̧ jittähuäcuotö Juo̧'u̧ adihuö jȩi̧nö̧tä̧!