¹ Eseu repedäcujä̧ TÖ̧Ä̧NÄ̧HUA̧, ucutäjä̧ chujurumä̧. ² TÖ̧Ä̧NÄ̧HUA̧TÄ̧ ja̧'a̧ chido'quimä, chujurumä, 'quiya'a jacuätä chö̧jö̧nä̧ ȩpö̧mä̧; Ja̧u̧tä̧ ja̧'a̧ chu̧ru̧hua̧ Diosmä̧, chido'quimä̧; ttömä ja̧u̧nä̧tä̧ dajahuächösä. Ja̧u̧tä̧ ja̧'a̧ chabo jähuä ttoecuäcuähuämä, ujurunä ra̧huä̧pi̧jo̧mȩttö̧ chö̧ji̧pö̧nä̧ jȩpö̧ ja̧'hua̧ta̧nö̧ ja̧u̧tä̧ ja̧'a̧ chujurumä̧. ³ Ttömä̧ TÖ̧Ä̧NÄ̧HUA̧RÖ̧ huopösä, ja̧'hua̧nö̧ jo̧mȩnä̧ chaboiyotöttö chö̧ji̧pä̧cua̧sä̧. ⁴ Hua'are apiyämä̧ ttörö kärähuina'a ja̧'hua̧ta̧nö̧ aje pä̧i̧cu̧nä̧ huerächotottömä̧ surojötä suhuädi'inä̧cu̧sä̧. ⁵ Hua'are reju appiyämä sobutinä̧cu̧sä̧; ttä̧tȩcuä̧ hua'are jȩpö̧ ku̧nä̧huä̧mä̧ ma̧'ä̧mi̧nä̧cu̧sä̧. ⁶ Cha̧'cua̧ tta̧'ȩcu̧mä̧ TÖ̧Ä̧NÄ̧HUA̧RÖ̧ pä̧i̧cu̧nä̧ huopinö̧sä̧; Chu̧ru̧hua̧ Dios ppädattö pä'ö pä̧i̧cu̧nä̧ huopinö̧sä̧. Ja̧u̧mä̧ ö̧jo̧dettö chi̧huȩnȩmä̧ ä̧ju̧cui̧nö̧; ppädattö pä'ö huächäjimä ö̧jo̧mȩ jubö rȩbȩhui̧'i̧na̧'a̧; ja̧u̧mä̧ ä̧ju̧cui̧nö̧. ⁷ Ja̧u̧nu̧ o'ca'a Dios amisurächi'omenä rȩjȩ'i̧nä̧ tti̧ȩpi̧na̧'a̧ de'anä ko̧cu̧ o'cajuiyönä ye'ecuiö tti̧ȩpi̧na̧'a̧. ⁸ I̧ji̧yu̧ttu̧mä̧ rä'opinä'a̧ ocurä isoppa ja̧'hua̧ta̧'a̧nö̧ ättömä räopina̧'a̧ ocurä. A̧ya̧ri̧ osattömö Ja̧u̧tä̧ cuoepinö. ⁹ JA̧U̧MÄ̧ mo̧ro̧jä̧ baepö icu meyȩhuinö; JA̧U̧ i̧dȩa̧'a̧cu̧mä juiyo 'quiyönä yo̧'i̧na̧'a̧. ¹⁰ JA̧U̧MÄ̧ querubínä huä̧mä̧dö̧ co'inö; JA̧U̧MÄ̧ kä̧ruö̧'coppa ujuabä jä̧i̧nö̧'anö mȩyȩhui̧nö̧. ¹¹ Ja̧u̧tä̧ aditinö yo̧ö̧'i̧nä̧ ttödäjuächome jö̧nä̧ churutä sobucuächönä, isoppa'inä ajiyattö amä'cönä rönära̧'a̧ mo̧ro̧jä̧ttö̧. ¹² Ajiya ido'qui'inä ja̧'hua̧ta̧'a̧nö̧ ocurättö ä̧ya̧ri̧'i̧nä̧ ma̧i̧na̧'a̧ cu'upä örohua'a jä̧'i̧nö̧'a̧nö̧ chutä ä'cajo̧mȩ. ¹³ ¡TÖ̧Ä̧NÄ̧HUA̧ i̧huȩnȩ rä̧mi̧pi̧na̧'a̧ cu'upä jä̧'i̧nö̧'a̧nö̧ mo̧ro̧jä̧ra̧'a̧ttö̧! Juiyo o̧to̧pä̧ i̧huȩnȩ huopinö. ¹⁴ Ja̧u̧mä̧ u̧'po̧pa̧ri̧nä̧ 'po'inö ja̧'hua̧nö̧ 'pomenä abo'iyotömä pperecuächinätö̧; rö̧ä̧nä̧ cu'upä cuähuomenä pperecuächinätö̧. ¹⁵ Ja̧'hua̧ta̧'a̧nö̧ ajehuiyä oto ra̧mädi̧naa̧; pi̧jä̧ ä̧cuo̧menä cuäbeomenämä ucu cuihuenenätä̧. CHIÄ̧NÄHUA̧, ucu kä̧cuä̧huä̧ i'co cui̧ji̧yu̧nä ppucuomenä. ¹⁶ ¡Juo̧'u̧ moro̧ jä̧ra̧'a̧ttö̧ u̧mu te'ädö; 'chuhuädinäcu̧sä̧! ajé suädomettö̧ räepu icuinäcu̧sä̧. ¹⁷ Juo̧'u̧mä ppädinäcu̧sä̧ chaboyotö juruhuätöttö'inä, ttörö kö'co'cotö pinätö̧ttö jahuätömä, juiyo rö̧'ȩnä juruhuinätö̧ ttörömä jahuätömä. ¹⁸ ¡Jahuätömä̧ ttöcu tturohuähua pä'ö ichinä̧tö̧ cha̧cua̧tta̧ jö̧ mo̧ro̧, ja̧'hua̧nö̧ ja̧'a̧nä̧ TÖ̧Ä̧NÄ̧HUA̧TÄ̧ ja̧'a̧ ttö̧rö̧ ppä'ädömä̧! ¹⁹ Ja̧u̧mä̧ rä'epinä̧cu̧sä̧ rö̧o̧mȩ cähueächi'omettö̧; Ja̧u̧mä̧ chu̧ji̧pö̧nä̧ ppädinä̧cu̧sä̧ juhua'amä̧ Ja̧u̧mä̧ ttörö esehua'attö. ²⁰ TÖ̧Ä̧NÄ̧HUA̧MÄ̧ jueö huȩnȩ jȩchi̧nö̧ micuämä̧ iyinä̧cu̧sä̧; Ja̧u̧mä̧ ä'coji jjä̧ji̧ta'anö chö̧nä̧ jȩi̧nä̧cu̧sä̧, adiutä jȩchi̧na̧'a̧ttö̧. ²¹ Ja̧'hua̧nö̧ ja̧'a̧ ttö̧mä̧ ucuotinö̧sä̧ hue'ähuä huȩnȩ TÖ̧Ä̧NÄ̧HUA̧ hueinö̧mä̧ ja̧'hua̧ta̧nö̧ chu̧ru̧hua̧ Diosmä surojöra̧'a̧mä̧ 'cä̧'ȩpö̧mä̧ icuococu pi̧nö̧sä̧. ²² Ja̧'hua̧nö̧ ja̧'a̧ jȩttä̧cuȩ pä'ö ku̧nä̧huä̧ jueö huȩnȩmä̧ ttö chä'ca jo̧mȩtä̧ kä̧'i̧ja̧'a̧; jȩ'cuä̧tu̧cua̧ja̧ päinö ji̧nö̧ttö̧mä̧ ttömä 'cä̧'i̧pä̧cho̧cö̧ pä'ijösä. ²³ Ttömä̧ Ja̧u̧ ä'ca jo̧mȩttö̧mä̧ huȩnȩ juiyönä̧tä̧ kä̧'i̧jö̧sä̧, ja̧'hua̧nö̧ jo̧mȩnä̧ surojömä jȩchö̧ juiyönä tta̧huä̧rä̧'i̧jä̧cu̧sä̧. ²⁴ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧MÄ̧ jueö huȩnȩ jȩchö̧ jähuänä̧tä̧ pä'äjita'anä̧ ²⁵ Yotöte pättö'acuä̧tä̧ jȩpä̧tö̧rö̧mä̧, päcuäjita'anö̧tä̧ jȩpö̧jä̧; ya̧tȩ surojö jȩpä̧ji̧ pä'ähuocörömä̧, ja̧u̧ suronä̧ jȩpä̧ji̧ pähuocötä i̧jȩpö̧jä̧ä̧. ²⁶ Ya̧tȩ surojö jui̧'a̧rö̧mä̧, surojö juiyötä i̧jȩpö̧mä̧; ja̧'hua̧nö̧ ja̧'a̧nä̧ ucumä ya̧'a̧huȩ'ö̧jä̧ jueönä a̧mö̧cuädocörömä̧. ²⁷ ¡Isopäi'önä̧tä̧ Ucumä̧ usurä ȩmä̧huä̧tö̧rö̧ ppä'ädöjä̧, ja̧'hua̧nö̧ ja̧'a̧nä̧ ttucuo te'ähuätörömä̧ ttucuo juittönä̧tä̧ jȩpö̧ icujä̧! ²⁸ Ja̧'hua̧nö̧ ja̧'a̧ Ucumä chu̧ra̧pa̧ra̧ tejädönä jȩpö̧jä̧; TÖ̧Ä̧NÄ̧HUA̧ chu̧ru̧hua̧ Diosmä̧ ttörö yo̧mȩ'i̧nä̧ tejädö. ²⁹ Isopäi'önä̧tä̧ Ucu ppädäcuähuänä̧mä̧ ttoepa'anä̧'i̧nä̧ jochö'anö̧ ja̧'a̧; chu̧ru̧hua̧ Diosnä̧mä̧ räbä'i̧nä̧ tö'ö 'cuädo'anö ja̧'a̧. ³⁰ Dios ötö'cömä̧: A̧mö̧cuädömä jueönä̧tä̧ a̧mö̧cuädö. TÖ̧Ä̧NÄ̧HUA̧ i̧huȩnȩmä̧ korocumä̧ huihuacuocö! Ja̧u̧mä̧ ttabo jähuä ttoecuäcuähuä jä̧'i̧nö̧'a̧nö̧ hua̧ Chunä̧tä̧ dajahuächö kä̧tö̧rö̧mä̧. ³¹ Ja̧'hua̧nö̧ ja̧'a̧, ¿Dijä̧ttö̧ Diosmä̧ TÖ̧Ä̧NÄ̧HUA̧CÖ̧? ¿Dijä̧ttö̧ ido'quimä ttu̧ru̧hua̧ Diosmä̧cö̧? ³² Dioatä ja̧'a̧ chujuru ttönä̧ ku̧nö̧mä̧ ttäcä isäya jä̧'i̧nö̧'a̧nö̧, Ja̧u̧tä̧ ja̧'a̧ ttö̧ja̧sa̧rö̧ chutä u̧mä̧nä̧nä̧ suröjö jȩpö̧ icu ku̧nö̧mä̧. ³³ ¡JA̧U̧MÄ̧ jurunä jochönä jȩä̧cu̧sa̧ yä̧mä̧ 'cua̧rö̧nä̧ ja̧'hua̧nö̧ jȩpö̧ ju'toju utäcusä! ³⁴ JA̧U̧MÄ̧ u̧huo̧juȩtä̧cu̧sä̧ chu̧mö̧pi̧yä̧ curä chörohuähuäcua'a pä'ö ja̧'hua̧ta̧'a̧nö̧ chöjohuiyä'inä 'quiyönä 'chudädäcua'a pä'ö 'po'obu broncettö adicuobu. ³⁵ UCUTÄ ja̧'a̧ ttörö tto̧ȩcuä̧räbi iyö tta̧'a̧rö̧mä̧. UCUTÄ cu̧mu̧ cu̧huo̧ju̧a̧'a̧nä̧ chu̧cuä̧rä̧cu̧sä̧, ja̧'hua̧ta̧nö̧ ucu re topö ppäcuädömä adiu chö̧jö̧nä̧ jȩcu'ä̧cu̧sä̧. ³⁶ Ucutä adiu rö̧o̧mȩ chö̧jö̧nä̧ jȩcu̧'ä̧cu̧sä̧, ja̧'hua̧nö̧ ja̧'a̧ttö̧ 'quiyönä chö̧jö̧nä̧ tta̧cuä̧rä̧cu̧sä̧. ³⁷ Ttömä chobo'iyotörö ru̧huä̧rö̧ chu'ädinösä̧; Ppa̧'a̧cho̧cö̧ pinösä̧ ja'huätörö si'epö chicuome jubu päi'önä. ³⁸ Ttömä ttidepä sesepötä icuinösä̧ jua'a yabocu ttä̧rä̧mö̧ juiyäcua'anö̧ pä'ö; ja'huätömä chö̧jä̧pö̧ dȩa̧'a̧tä̧ ma̧'ä̧mi̧nä̧tö̧. ³⁹ Ucutä ji̧na̧'a̧ chujuru iyinömä chäcä isäya 'quiyönä curä chörohuähua pä'ö; Ucutä ja̧'a̧ chi̧dȩa̧'a̧nä̧ rötäjimä ttörö 'cö'cocotörö. ⁴⁰ Ucutä chujuru cuiyinäcu̧sä̧ chabo'iyotörö si'epö chicua pä'ömä; Ttömä si'epö icuinösä̧ ttörö a̧'u̧ti̧nä̧tö̧rö̧mä̧. ⁴¹ Ja'huätömä ppättädätö pä'ö huopinätö̧, ja̧'hua̧nö̧ ja̧'a̧nä̧ ya̧tȩ'i̧nä̧ ppä̧do̧co̧u̧ pinätö̧; TÖ̧Ä̧NÄ̧HUA̧RÖ̧'i̧nä̧ jä'epinätö̧, ja̧'hua̧nö̧ jättepa'anä ä̧dä̧to̧co̧u̧ pinätö̧. ⁴² Tömä si'epö chicuinäu̧ i̧sa̧ppȩ kä̧rö̧'coppa ȩmi̧pa̧'a̧ jä̧'i̧nö̧'a̧nö̧; mänäni̧yä̧nä̧ chi̧cui̧nä̧u̧ redä'ca tticua'a jä̧'i̧nö̧'a̧nö̧. ⁴³ Ucumä ttö̧ja̧ jarodätöttömä 'que'ȩpu̧ cu̧ju̧ninäcu̧sä̧. Ucú pi̧jä̧ ttö̧ja̧ ttu̧ru̧hua̧ päi'önä cuju̧ninäcu̧sä̧. Ttö̧ja̧ cheruhuä'u̧tä̧ huedö jȩpä̧tö̧mä. ⁴⁴ Ja̧'hua̧ta̧'a̧nö jahuätömä ttörö ä̧ju̧cu̧'i̧nätö̧, ttö huedö jȩpi̧nätö̧; koro̧jä̧ rȩjȩ ttö̧ja̧'i̧nä ttö chä'ca jo̧me ja̧rȩyu̧ pätti'önä huȩ'i̧näu̧. ⁴⁵ Korome ttö̧ja̧'i̧nä yeecunö ichinätö̧ ttö̧jo̧mettö̧mä. ⁴⁶ CHIÄ̧NÄHUA̧ ucumä kö̧jä̧; ttö chido'quitä ucuo tettä'huäcuotö. DIOS ttörö tta̧'a̧rö̧rö̧tä̧ ttucuocu'äcuotö. ⁴⁷ Juo̧'u̧tä̧ ttö CHIÄ̧NÄHUA̧ DIOSTÄ ro̧ȩpä̧cua̧ ttönämä, ttö̧ja̧rö̧mä ttö chi̧dȩ'a̧tä̧ ku̧ninöjä̧. ⁴⁸ ¡TTömä ki'ipinösä chabo iyotöttömä! Isopä'iönä, ¡ Ucumä jäyädu cu̧ju̧ni̧nä̧cu̧sä̧ to'tocomecu̧ jitö chabo iyotö ttöcu ttöröhuähua pä'ätörö! Ucumä ppäcuädäjäcusä ttöja̧ pä̧'i̧cuä̧tö̧ ttä̧'ca̧ jo̧mȩtö̧. ⁴⁹ Ja'huanö ja̧'a̧ttö̧, !TTömä eseusä ucurumä, TÖ̧Ä̧NÄ̧HUA̧, pi̧jä̧ 'cä̧tȩnä̧ o'cajuiuyönä; TTömä ra̧dä̧cua̧sä̧ ucu cui̧mi̧nä̧ ji̧yȩtȩ ra̧huä̧huä̧! ⁵⁰ Diosmä riänä ujuru iyö Chuttä uröhuaru, ja̧'hua̧ta̧'a̧nö̧ JA̧U̧MÄ̧ i̧jä̧pu̧ esecuinö ö'ojo'inäcuru, Davidrö ja̧'hua̧ta̧nö̧ ahuaruhuä o'cotörö 'cuäopunätä.