¹ Dios ppä'ädittö, ja̧'hua̧nö̧ ja̧'a̧ ttö̧mä̧ ucunä̧tä̧ dajahuächösä. ² Ttömä pä'ösä TÖ̧Ä̧NÄ̧HUA̧RÖ̧: "Ucutä ja̧'a̧ Chö̧ä̧nä̧hua̧mä̧; ttö̧ adiu jȩchö̧mä̧ Ucuttömä otomä̧ ko̧ca̧'a̧. ³ Ttö̧ja̧ surojö̧ jui'ätö pi̧jä̧nä̧ ka̧cuä̧tö̧mä̧, ruhuotö ttippeyä ruhuotö jä̧'i̧nö̧'a̧nö̧ huotö; o'cajuiyönä cheseumä jahuätönätä̧ ka̧'a̧. ⁴ Yabocutä rö̧ä̧chä̧cua̧'a̧ tta̧'cua̧ tta̧ttȩcu̧mä̧, jitö korotö ttö̧ä̧nä̧huo̧tö̧rö̧ usätörömä̧. Ttömä̧ ttöäre iyähuä ahuähuä ttucuoja jö̧ korotö ttö̧ä̧nä̧huo̧tö̧rö̧ ttiyömȩmä̧ ppä̧'ä̧chä̧ro̧cö̧ chä̧cua̧sä̧ ja̧'hua̧nö̧ jo̧ca̧'a̧ttö̧'i̧nä̧ jahuätö tti̧mi̧nä̧mä̧ chucuocua pä'ömä̧ jo̧ca̧'a̧ jä̧cua̧'a̧. ⁵ TÖ̧Ä̧NÄ̧HUA̧, ucumä chu̧cuä̧ pojopö ku̧nä̧huä̧ jö̧nä̧ hua̧jä̧ ja̧'hua̧ta̧nö̧ cha̧huo̧'ta̧ jö̧nä̧. Ttö chö̧jä̧cuȩmä̧ ucunä̧tä̧ ka̧'a̧. ⁶ Isappä pa̧ja̧cua̧ppämä ttönä ku̧nä̧hui̧'i̧na̧'a̧ cheseunä̧ jo̧mȩ; isopäi'önä̧tä̧ ttörö iyähui'inomemä adihuome ja̧'a̧. ⁷ TÖ̧Ä̧NÄ̧HUA̧RÖ̧MÄ̧ adiunä̧tä̧ ja̧'a̧cua̧ja̧ pä̧dä̧cua̧sä̧, ja̧u̧tä̧ ja̧'a̧ cha̧'cua̧ chȩmö̧nä̧ ppä'ädömä̧; yodo jö̧ttö̧'i̧nä̧ chamöcuädönä jiähuäcusä. ⁸ 'Cuäopönä̧ mo̧ro̧tä̧ chä'canä rö̧nä̧huä̧i̧jö̧sä̧ TÖ̧Ä̧NÄ̧HUA̧RÖ̧MÄ̧, ja̧'hua̧nö̧ ja̧'a̧ttö̧ u̧mö̧ u̧huo̧jua̧'a̧cu̧nä̧ttö̧mä̧ rä'epömä̧ icuococu chä̧cua̧sä̧. ⁹ Ja̧'hua̧nö̧ ja̧'a̧ttö̧, Cha̧mi̧so'quimä esehua'a, chucuo'i̧nä̧ esehua'a. Isopäi'önä̧tä̧ ttömä huȩnȩ juiyönä̧tä̧ chö̧jä̧cua̧sä̧. ¹⁰ Ja̧'hua̧nö̧ ja̧'a̧ ucumä hua'are rejuttö'i̧nä̧ cha̧'cua̧rö̧mä̧ icuipocö cuä̧cua̧jä̧. Ucu päcuta'anö̧tä̧ jȩpö̧rö̧mä̧ hua'are rejumä toamä̧ pä'ocöjä. ¹¹ Ucumä kä̧cuä̧huä̧ mä̧nä̧ cu̧huo̧juȩtä̧cu̧sä̧; Ucu cu̧jo̧mȩmä̧ rö̧ä̧nä̧ eseäcuähuätä ka̧'a̧; cu̧mö̧ cu̧huo̧jua̧'a̧cu̧nä̧mä̧ 'cuäopönä̧tä̧ eseäcuähuätä kä̧cua̧'a̧."