¹ Ttö dajahuächö chö̧jo̧mȩmä̧ TÖ̧Ä̧NÄ̧HUA̧NÄ̧TÄ̧ ja̧'a̧; ¿Tocu pä̧cuä̧cua̧ cha'attö̧: ppiyuhuä 'cua̧rö̧nä̧ tö'ipächi mö̧ä̧'cara̧'a̧ jö̧nä̧? ² ¡Topätucui! Suropätömä ttu'popobö jo̧mȩnö̧ jȩpö̧ ku̧nä̧tö̧. Ttö'popa̧ri̧'i̧nä̧ jo̧mȩnö̧ setädö ku̧nä̧tö̧ yo̧mȩ päte'ö adiu jȩpä̧tö̧ ttamiso'quinä̧ 'potta pä'ö. ³ Isopäi'önä̧tä̧ kada'ca 'chu̧huä̧ro̧mȩ jȩpö̧ tticuttömä̧, ¿däjetä jȩttö̧'a̧nö̧ttö̧ adiu jȩpä̧tö̧mä̧? ⁴ TÖ̧Ä̧NÄ̧HUA̧MÄ̧ ö̧jo̧de surojö juiyodenä̧ kö; i'äriyämä pi̧jä̧ ttö̧ja̧ tti̧tti̧mö̧rö̧ ka̧cuä̧mö̧ toa'a. ⁵ TÖ̧Ä̧NÄ̧HUA̧MÄ̧ ka̧cuä̧mö̧ topö adiu jȩpä̧tö̧rö̧''i̧nä̧ ja̧'hua̧ta̧nö̧ suronä̧ jȩpä̧tö̧rö̧'i̧nä̧, ja̧'hua̧nö̧ ja̧'a̧ Ja̧u̧mä̧ kö'cocö surojö jȩä̧cuä̧huä̧ repe'ätörö. ⁶ Ja̧u̧mä̧ suropätörömä a̧ya̧ri̧ cuo̧a̧ri̧'i̧nä̧ ja̧'hua̧ta̧nö̧ ja̧'tu̧huö̧nä̧ cuou'i̧nä̧ i̧i'cächö; kä̧ru̧'coppa kärähuoppa jä̧cua̧'a̧ jahuätö tta̧huo̧'ta̧ jö̧nä̧ jä̧cuȩmä̧. ⁷ Isopäi'önä TÖ̧Ä̧NÄ̧HUA̧ adihuä i̧sa̧ ja̧'a̧ttö̧ adihuomenä jȩä̧cuä̧huä̧tä̧ repe'ö, jueö huȩnȩnä̧ kä̧tö̧mä̧ Ö'ä tottäcuotö.