¹ ¿CHÖ̧Ä̧NÄ̧HUA̧, tta̧'a̧nö̧ pä'ö oto cu̧jä̧ttö̧? ¿Tocu pä'ö cudajuächättö ttö huȩnȩ chu̧ju̧nä̧ro̧mȩnä̧mä̧? ² Tta̧mo̧nä̧ ttujurunä hue'ätömä suronä jȩpä̧tö̧ usurä isotörö; ja̧'hua̧'a̧nö̧ ja̧'a̧ttä̧ topö ppä'äditö tta̧mo̧nä̧ suronä amucuädö jȩpö̧ ttu̧ju̧nu̧nä̧tä̧ ttȩki̧pa̧'a̧nä. ³ Suronä jȩpä̧tö̧mä̧ jacuänä ȩnä̧rä̧tä̧ juiyo suronä jȩtta̧ pä'ö amucuädäcuähuätä; ja̧u̧mä̧ juiyo abora'a hua̧rö̧tä̧ eseu ppä'ädö ja̧'hua̧nö̧ ja̧'a̧nä̧ TÖ̧Ä̧NÄ̧HUA̧RÖ̧MÄ̧ suronä pä'ötä pä'ö. ⁴ Suronä jȩä̧cuä̧huä̧ i̧sa̧mä̧ ttötä ja̧'a̧ adihuä i̧sa̧mä̧ pähuä ku̧nä̧rö̧; ja̧u̧ Diorömä uso'cö, recuä rö̧jo̧co̧cu̧sä̧ JA̧U̧RU̧MÄ̧ pä'ö. ⁵ Ja̧u̧mä̧ 'cuä'opönä chö̧jä̧cua̧sä̧ pä'ö, ja̧'hua̧nö̧ ja̧'a̧nä̧ UCU jueönä pä'ö ku̧ju̧ni̧nö̧mä̧ juiyo oto jä̧cu̧ ja̧u̧mä̧; ja̧u̧mä̧ kö'cocö o'catoinä abo iyotörömä. ⁶ Ja̧u̧ a̧mi̧so̧'qui̧nä̧mä̧ pä'ö: "Ttömä yorö'isotä jäyämä jȩpo̧cö̧sä̧; pi̧jä̧nä̧ ko̧cuä̧tö̧ttö̧mä̧ po̧cui̧po̧cö̧ chä̧cua̧sä̧ ttörö to'ija̧'a̧cu̧ pä'örömä." ⁷ Ättömä surojö ucuocutä hua̧ ja̧'hua̧ta̧'a̧nö̧ yapare pähuätä, yapare pä'ö 'choicuätä; i̧nȩttö̧ ubara ttu'epö si'epö icu. ⁸ Ötahuiyä tö'cö jo̧mȩ öyapärehua pä'ö tta̧'a̧rö̧tä̧ kö̧; yä̧huä̧'i̧nä̧ da̧ja̧huä̧chä̧rö̧ kä̧nö̧ jȩpo̧co̧tö̧rö̧ cuä'ö icu; jȩttö̧ juiyö'anö huotörö topö cuä'ö icu. ⁹ Ja̧u̧mä̧ dajahuächö tta̧'a̧rö̧ yähui isa'cuanä tta̧huä̧ra̧'a̧ jä̧'i̧nö̧'a̧nö̧; ja̧u̧mä̧ rȩjȩ pä̧nö̧ tta̧'a̧rö̧ juiyupächörö 'chuhuäda pä'ö. Ja̧u̧mä̧ juiyupä'chörö 'chu'ädö tta̧huä̧ro̧mȩ ichomenämä. ¹⁰ Ja̧rȩyu̧nu̧ pä'i'ö pä̧mä̧dö̧tä̧ iyähuätö; ja'huätömä ttä̧tȩcuä̧ setädö rötähuometä̧ ȩki̧pä̧tö̧. ¹¹ Juo̧'u̧ amiso'quittö amucuädömä: DIOSMÄ̧ unichi'inäcu̧sä̧ pä'ö; ja̧'hua̧nö̧ ja̧'a̧tö̧ juo̧'u̧mä ö'ätä a̧tto̧cu̧; ja̧'hua̧ta̧'a̧nö̧ juo̧'u̧mä toa'inä pä'ocö. ¹² Jȩ'cua̧ pä'ömä jȩpi̧ CHI̧Ä̧NÄHUA̧, käepi ucu cumutä̧, CHIÄ̧NÄHUA̧ DIOS! cunöchiä surähuätörömä. ¹³ ¿Tta̧'a̧nö pe'ö ttö̧ja̧sä̧ jarodömä DIOSRÖ öjö'coca'attö ja̧'hua̧ta̧'a̧nö̧ amucuädö amiso'quittömä ucumä jȩchi̧nömä jäcuepi̧yä̧cua̧sä̧? ¹⁴ Ucumä huo̧ju'a̧jä̧ jȩttö̧ ä̧'u̧cuä̧, ja̧'hua̧ta̧'a̧nö̧ ucumä 'cuäpunätä̧ huo̧jua̧jä̧ jitö jui'ätörö'inä ja̧'hua̧ta̧'a̧nö̧ tta̧'cua̧ tta̧ȩcu'ä̧tö̧rö̧ suronä jȩttä̧u̧ru̧. Ttä̧munä ppättädäcuahua pa'ö jui'ätömä ucurutä amucuädätö; ucutä ppäcuäda'attö ttä'o toätörö'inä. ¹⁵ Suronä̧ jȩpö̧ ujuru si'epö icui, suronä̧ jȩö̧'i̧nä̧. suronä̧ jȩi̧nö̧nä̧tä̧ ro̧'ȩpi̧rö̧, ja̧u̧mä̧ a̧mu̧cuädinö̧ Ucumä̧ ö̧'o̧cui̧'ö̧ jiyö'anö ja'a. ¹⁶ TÖ̧Ä̧NÄ̧HUA̧MÄ̧ 'cuäopönä̧tä̧ ru̧hua̧ ja̧'a̧ ja̧hua̧ta̧nö̧ beipö juiyönä̧tä̧; ttö̧ja̧mä̧ tti̧rȩjä̧ttö̧ rä'epö icuähuöcuotö. ¹⁷ TÖ̧Ä̧NÄ̧HUA̧, Ucumä̧ ä̧ju̧cuä̧ji̧jä̧ usurä ȩmä̧huä̧tö̧rö̧mä̧; Ucumä ttamiso'quinä ttesehuipönä̧ jȩpö̧jä̧, Ucuru jä̧ttȩpä̧rö̧mä̧ ä̧ju̧cu̧jä̧; ¹⁸ Ucumä ppä'ädujä jä'o to̧a̧rö̧mä̧ ja̧'hua̧ta̧nö̧ usurä ȩmä̧u̧ru̧'i̧nä̧ ya̧tȩ'i̧nä̧ pä'äta'anö̧ pi̧jä̧ttö̧ yepä'chö juiyäcua'anö.