¹ Ttömä chamiso'qui jacuättö adihua'a pä̧dä̧cua̧sä̧ CHÖ̧Ä̧NÄ̧HUA̧RÖ̧; ttömä chu̧cuo̧cuä̧cuä̧sä̧ juiyo adiunä cuaditinötä̧. ² Ttömä eseunu chö̧jä̧cua̧sä̧ ja̧'hua̧ta̧'a̧nö̧ chȩsȩhuä̧cua̧sä̧ ucunätä; ¡ttömä ucu cui̧mi̧nä̧tä̧ eseu ra̧dä̧cua̧sä̧, ucutä ja̧'a̧ ju'toju i̧sa̧mä̧! ³ Chabo'iyotö tto'ca'acu ppä̧tä̧chi̧'ö̧ttö̧mä̧, ja'huätömä dö'ätö ja̧'hua̧nö̧ dö'ö ucutä cuä'ca jo̧mȩttö̧ to'epätö. ⁴ Ucumä isopäi'önä ppä'ädöjä adiunä jȩcho̧mȩnä̧tä̧; Ucumä pä̧mä̧dö̧jä̧ curuhuo deäcänä, röji pähuä i̧sa̧ jo̧nä̧! ⁵ Ucumä ji̧ä̧huä̧rö̧jä̧ ttö̧ja̧rö̧; ucumä jarodätörömä ro̧ȩpu̧jä̧; Ucumä tti̧mi'i̧nä däepä'ipu icujä ttönöchä chönätä̧. ⁶ Taboyotörö ro̧cuȩpo̧mȩnämä däepä'ipu cuähuotötä ki̧i̧nätö̧ ja̧'hua̧ta̧'a̧nö̧ ucumä ttidepiyu'inä ro̧cuȩpi̧nö̧jä̧. Jahuätörö o'cato'inärö̧ täcö tta̧mucuä̧ri̧yä̧cua̧'á̧nö. ⁷ Ja̧'hua̧nö̧ ja̧'a̧nä̧ TÖ̧Ä̧NÄHUA̧MÄ̧ 'cuäopunätä̧ uruhuonä ö̧jä̧cua̧; Juo̧'u̧mä uruhuonätä̧ känö jue'önä pä'ä pe'ötä ö̧jä̧cua̧. ⁸ Juo̧'u̧mä jue'önä pä̧cua̧ ttö̧ja̧ jȩttö̧nätä̧, ja̧'hua̧ta̧'a̧nö̧ juo̧'u̧mä ro̧ȩpä̧cua̧ jeönätä̧ ttö̧ja̧rö̧mä̧. ⁹ TÖ̧Ä̧NÄ̧HUA̧MÄ̧ ppä̧dä̧cua̧ usurä ttȩmä̧u̧nä jȩttä̧u̧rö̧, huȩnȩ jö̧ mo̧ro̧'i̧nä̧ tta̧huä̧rä̧cua̧. ¹⁰ Jitö ucu cuimi huo̧juä̧tö̧mä̧ ucurutä tta̧'cua̧ huä̧nä̧rä̧tö̧, ja̧'hua̧nö̧ ja̧'a̧, Ucu TÖ̧Ä̧NÄ̧HUA̧MÄ̧, icuipocöjä̧ jitö Ucuru usätörömä. ¹¹ Ra̧'ä̧tu̧cui̧ TÖ̧Ä̧NÄ̧HUA̧RÖ̧, Jerusalenä ru̧hua̧ jö̧nä̧ hue'örö; ttö̧ja̧rö̧ Ja̧u̧ jȩi̧nö̧mä̧ ji'ähui. ¹² Ja̧'hua̧nö̧ ja̧'a̧ a̧mö̧cuädittö Diosrö jitö ttö̧ja̧rö̧ cuä'ö icuätörö micuä jȩpö̧rö̧, Ja̧u̧mä̧ yoriso unichi'ocö usurä ȩmä̧u̧ ttajaumä̧. ¹³ TÖ̧Ä̧NÄ̧HUA̧ Ttörö rȩrö̧jö̧nö̧ topittö; topi jitömä̧ ttörö kö'cocö jui'ö suronä̧ jȩpä̧tö̧, hua'are äpatettö rä'epö icu ppä'ädittö. ¹⁴ Oh, Ttömä̧ o'cajuiyönä̧ ucurumä ra̧dä̧cua̧sä̧. ¡Jerusalén äpatiyättö ra̧huä̧pi̧ju̧ttö̧ ki̧'i̧pö̧ chȩsȩhuä̧cua̧jä̧! ¹⁵ Ttö̧ja̧mä̧ reju jitötä sa'ö ttu̧ju̧ni̧nä̧junä ma̧'ä̧chi̧nä̧tö̧; ttö̧jä̧pi̧yä̧mä̧ jitötä dajö ttötinä̧sa̧nä̧tä̧ jutächi'inä̧u̧. ¹⁶ TÖ̧Ä̧NÄ̧HUA̧MÄ̧ chutä a̧mö̧nä̧ pa̧ja̧tö̧tä̧ ttu̧huo̧juä̧chi̧'ö̧nä̧ i̧jȩcui̧nö̧; Ja̧u̧mä̧ adihuomenä jȩpi̧nö̧; suropätömä jitötä jȩttö̧ jähuänä̧tä̧ ma̧ä̧mä̧cuä̧u̧. ¹⁷ Suronätä̧ jȩpä̧tö̧mä̧ ya'ocuäcuähuotö ja̧'a̧ ja̧'hua̧ta̧nö̧ hua'are rejura̧'a̧tä̧ hue'ö icuähuotö, ttö̧ja̧ Diosrö ttunichi'omȩtä̧ pätetö ku̧nä̧huo̧tö̧. ¹⁸ Ja̧'hua̧nö̧ ja̧'a̧ recuä rö̧jä̧u̧rö̧mä̧ yoröisotä unichi'äcuähuoca'a jä̧cua̧'a̧, ja̧'hua̧ta̧nö̧ suronä̧ jȩttä̧u̧ tta̧ttä̧rö̧mä̧ isotä juoäcua'a. ¹⁹ Ji̧yȩtȩ jȩpi̧, oh TÖ̧Ä̧NÄ̧HUA̧; ucuru yabonä̧nö̧ 'cuäoa'anä̧mä̧ ja̧'a̧tä̧ to'cuä; ttö̧ja̧mä̧ Ucu to̧'cuä̧ro̧mȩttö̧tä̧ ro̧ȩcuä̧cuo̧tö̧. ²⁰ Ye'epä'chitö, TÖ̧Ä̧NÄ̧HUA̧; ttö̧ja̧mä̧ ujutu ttö̧ja̧tä̧ huotöjä pä'ö ttu̧huo̧juä̧cua̧'a̧nö̧.