¹ Jitämä ä̧ju̧cuä̧tu̧cui̧ TÖ̧Ä̧NÄ̧HUA̧ pä'ö: ''Ä̧rä̧mi̧ö̧ jiähui ucutä jȩ'cui̧nö̧ dea ä'ca jo̧mȩttö̧; muä'quiyutä ä̧ju̧cua̧cu̧ cui̧huȩnȩ. ² Ä̧ju̧cui̧ TÖ̧Ä̧Nä̧HUA̧ ro̧ȩpu̧ pä'ö, ucututä dea, ja̧'hua̧ta̧nö̧ ucutu rȩjȩ 'quiyönä chuä̧ro̧mȩ'i̧nä̧ . TÖ̧Ä̧NÄ̧HUA̧MÄ̧ öjö'cö juiyonä jä̧cu̧ umuhuäyotorö, ja̧'hua̧nö̧ ja̧'a̧ttö̧ JA̧U̧TÄ̧ örohuähuäcua̧ röji pähuä ä'catömä Israel ttö̧ja̧cu̧mä̧.'' ³ TTÖTÄ chumuhuäyötö, ¿däje jȩchä̧jä̧cu̧? ¿Tocu cuju'cö juiyönämä̧? ¡jȩchi̧nö̧ ädätö jiähuitö! ⁴ TTÖTÄ jinä'a̧ Egipto rejera'a cui̧'chä̧ pä'ö jȩpi̧nö̧'i̧nä̧ ja̧'hua̧nö̧ ja̧'a̧tö̧ pä̧i̧cu̧nä̧ huettometö̧ räepu chicuinä̧cu̧jä̧. Moisésrö̧'i̧nä̧, Aarónrö̧'i̧nä̧, ja̧'hua̧ta̧nö̧ Mi̧ri̧a̧mrö̧'i̧nä̧ hue'ö ucuru. ⁵ TTÖ chumuhuäyotö, amuhuädätucui Balac , Moab ru̧hua̧ jȩa̧ pä'ö ji̧nö̧, ja̧'hua̧ta̧nö̧ Balaam'inä,Beor i̧tti̧, ädätinö ja̧u̧ru̧ Sintimttö̧ Gi̧lga̧l jubu 'chänö'cänö, ttö CHIÄNÄ̧HUA̧RÖ̧ ttu̧huo̧jä̧cua̧'a̧nö̧ surojö'inä jui̧'a̧ pä'ö. ⁶ ¿Ttömä däjetä chi'cächö'anö ja̧'a̧tö̧ TÖ̧Ä̧NÄ̧HUA̧ DIOS ju̧ru̧hua̧rö̧mä̧? ¿Cuichö'anö ja̧'a̧ ja̧u̧ru̧mä̧ cuiäre ku'icu iyähuäcu, oveja i̧tti̧ yaute a̧ȩ cua̧cu̧? ⁷ ¿TÖ̧Ä̧NÄ̧HUA̧MÄ̧ esehua'anö ja̧'a̧ tä̧ji̧ ovejatö̧ tti̧tti̧mu̧ milesnö jo̧mȩnä̧tä̧ ja̧'hua̧ta̧nö̧ diez milnö aje a̧dȩ jo̧mȩnä̧tä̧? ¿Chi̧tti̧ a'canä i̧sa̧rö̧ chiyö'anö ja̧'a̧ tä̧ji̧ ttö suronä jȩchi̧nö̧ micuämä, ttötä chidepätö u̧huä̧ju̧tu̧ ttötä chamonä suronö jȩchi̧nö̧mä̧? ⁸ JA̧U̧MÄ̧ päcujä, adiunä jö̧ta̧ ja̧'hua̧ta̧nö̧ TÖ̧Ä̧NÄ̧HUA̧ ucurumä pä̧cuä̧rö̧jä̧cu̧ : Adiunä̧tä̧ jȩpu̧ cu̧ji̧ya̧rö̧ pä'ö, repeähuähuänätä̧ känö̧ ja̧'hua̧ta̧nö̧ huo̧jua̧sä̧ pähuä juiyönä 'chänö Dioscutä. ⁹ TTÖ̧Ä̧NÄ̧HUA̧ i̧huȩnȩ huopönö ji'äu ötahuiyänä, jitä mo̧ro̧'i̧nä̧, huo̧juä̧chi̧'ä̧tö̧mä̧ ucu cui̧mi̧ huo̧juä̧tö̧: "I̧so̧'quȩnä̧ ttu̧'ȩpä̧rö̧nö̧ topätucui ja̧'hua̧nö̧ pä̧jo̧mȩtä̧ pa̧ pä̧'ö̧. ¹⁰ Rö̧ä̧nä̧ micuäu juei ku̧nä̧rä̧tö̧ jarodätö ttojusodena näu̧cuä̧rö̧ ttȩma̧'i̧jö̧, ja̧'hua̧ta̧'a̧nö̧ rö̧nö̧ toäcuähuä jäyä jö̧mä̧ kö'cähuocötä ja̧'a̧. ¹¹ ¿TTÖMÄ pädö'anö ja̧'a̧ tä̧ji̧ ja̧u̧mä̧ jerupu jȩa̧'a̧ rö̧nä̧huäcä surojäcänä jea̧'a̧mä̧, sacuyunä rö̧nä̧'chö̧ yapare jȩa̧'a̧mä̧? ¹² Ruhuotömä usurä isotörö näu̧cuä̧rä̧tö̧, ötahuiyä ttö̧ja̧mä̧ yaparetä ucuocuätö ja̧'hua̧ta̧'a̧nä̧ tti̧nȩttö̧'i̧nä̧ ttättö'inä yapare jö̧tä̧ huotö. ¹³ Ja̧'hua̧nö̧ ja̧'a̧ttö̧, ttötä pä̧i̧cu̧nä̧ ro̧dȩpi̧nä̧u̧jä̧, usurä isotö huo̧dȩpi̧nä̧u̧jä̧ suronä jȩcuä̧tu̧cua̧'a̧ttö̧. ¹⁴ Ucumä cucua'anä'inä cuesehuiyä̧cua̧jä̧; 'cuä'opunä̧ jui̧'a̧tä̧ cu̧jä̧cua̧jȩ. Ucumä cuiäre ca̧ca̧tö̧ cu̧ju̧nä̧'a̧nä̧'i̧nä̧, ki̧'i̧po̧'cö̧ cua̧cua̧jä̧, ja̧'hua̧ta̧'a̧nö̧ cu̧ji̧pä̧tu̧cu̧ttu̧'i̧nä̧, TTÖTÄ curä'chura̧'a̧tä̧ chiyäcuotöjä̧. ¹⁵ Ucumä cuähuä'inä cu̧ju̧nä̧cua̧jä̧, ja̧'hua̧nö̧ ja̧'a̧nä̧ u̧huä̧ju̧mä̧ topocö cuä̧cua̧jä̧; A̧dȩmä̧ tacua'anä, isoyamä topocö cuä̧cua̧jä̧; Uva cui̧'cuȩcua̧'a̧nä̧'i̧nä̧ vino isoyamä ahuocö cuä̧cua̧jä̧ ¹⁶ Ucutumä Omri hueinötä̧ hua̧'a̧dä̧rö̧ ku̧nä̧tö̧jä̧, ja̧'hua̧ta̧'a̧nö̧ Acab ojusodettö aditinötä̧. Ucutumä jahuätö pättötä jȩpä̧tö̧jä̧. Ja̧'hua̧nö̧ ja̧'a̧ttö̧ TTÖTÄ yȩchä̧cua̧jä̧, ötahuiyä'inä, surojönätä, ucuturu̧ ötahuiyä ttö̧ja̧mä̧ ya̧'a̧huȩ'ö̧tä̧ ya̧ttä̧huȩ'ä̧cuo̧tö̧, ja̧'hua̧ta̧'a̧nö̧ pi̧jä̧ ttö̧ja̧'i̧nä̧ ttö'jö'cö juiyönä tottäcuotäjä.