¹ ¡Äyo ttöhué! Ttörömä pi̧yȩ duhuonä cuähuä u̧huä̧ju̧ beipächa'a jä̧'i̧nö̧'a̧nö̧tä̧ jä̧cu̧sä̧, ja̧'hua̧nö̧ ja̧'a̧ttö̧ uva pättänä ko̧cui̧pi̧nö̧'i̧nä̧ juiya'a. U̧huä̧ju̧ pättanä cusuttu'inä po̧cui̧po̧cö̧jä̧, jareönä kärächö higo'inä chucuapäda'anä'inä po̧cui̧po̧cö̧sä̧. ² Jarodocotö pä'ijätömä Pi̧jä̧ttö̧mä ya̧tȩ'i̧nä̧ toa'a, ppjä̧nä̧ ko̧cuä̧tö̧ttö̧mä̧ surujö juiyönä ko̧cuä̧tö̧mä̧ toa'a. Ja'huätömä o'catoi'önä ttucuoja ttihuerädä pä'ötä ko̧cuä̧tö̧, i̧sä̧sa̧ tto'epö usätö tta̧mo̧nä̧ ttahuaruhuärötä. ³ Ja'huätö ttu̧mu̧mä̧ suronä jȩtta̧ pä'ötä a̧di̧huä̧u̧: Ruhuo hue'ätö'inä micuä pärätätä jä̧'ȩpä̧rä̧tö̧, röji pähuä i̧sa̧'i̧nä̧ ttimitäcu yapare pä'ö ja̧'a̧, ja̧'hua̧ta̧'a̧nö̧ pärätä ru̧hua̧mä̧ mi̧tö päöta'anö jȩtti̧ya̧rö̧ pä'ö. Ja̧'hua̧nö̧tä̧, ja'huatömä ji̧nä̧ yo̧mȩtȩ suronätä amucuädätö. ⁴ Ja'huätöttö adiunä jȩpö̧mä̧ zarza jä̧'i̧nö̧'a̧nö̧ hua̧, suronä'inä jȩpo̧cö̧mä̧ dau so̧ä̧i jä̧'i̧nö̧'a̧nö̧tä̧ hua̧. Pi̧yȩ mo̧ro̧ pätecuächa'a ucuturu to̧pä̧rö̧ tta̧'a̧rä̧tö̧ pättänö, ro̧ȩcuä̧ mo̧ro̧ jä̧cua̧'a̧. Jitä mo̧ro̧ 'cuäopa'anä ttieru'unätä ja̧'a̧. ⁵ Chippeyänä kö̧ pä'ö'inä ja̧'a̧tä̧mä̧ tocu'ä, cha̧hua̧ru̧hua̧ pä'ö'inä ja'a̧tä̧mä̧ tocu'ä. Ttu̧'ȩpä̧rö̧nö̧ ucuocuätucui cujonä 'cuä'ächö pä̧ju̧ kä'ca jo̧mȩttö̧mä̧. ⁶ Tti̧tti̧mä̧ jä'orö'inä jarodiö, kittiju'inä ka̧ju̧ru̧ jarodö ä̧dä̧tä̧rä̧ju̧, ja̧'hua̧ta̧'a̧nä̧ chö̧ja̧ri̧ju̧'i̧nä̧ kimiyajuru to'ija̧'a̧cu̧ ä̧dä̧tä̧rä̧ju̧. Ttabo'iyotömä tta̧mo̧nä̧ ttojusodenä ko̧cuä̧tö̧tä̧ ja̧'a̧. ⁷ Ja̧'hua̧nö̧ ja̧'a̧nä̧ ttötämä, to̧chä̧cua̧sä̧ CHÖ̧Ä̧NÄ̧HUA̧RÖ̧TÄ̧. Ttömä tta̧dä̧rä̧cua̧sä̧ Dios surojöttö chö̧ji̧pö̧nä̧ ppä'ädinörö̧, huochö ä̧ju̧cuä̧cua̧ chu̧ru̧hua̧ Diosmä. ⁸ Chabo'iyotö, ttöro suronä 'cuäopa'a topömä cuäsehuätucuä, ttö mädä̧chö̧ o'ca'amä, pä'äjita'anö chä̧rä̧mä̧cua̧sä̧. Yo̧ä̧sa̧ jo̧mȩ chö̧'ä̧mä̧do̧mȩnä̧mä̧, CHÖ̧Ä̧NÄ̧HUA̧TÄ̧ jä̧cua̧'a̧ ttorö tȩa̧u̧mä̧. ⁹ CHÖ̧Ä̧NÄ̧HUA̧ ä'cajo̧mȩttö̧ suronä jȩchi̧na̧'a̧ttö̧, ttömä cha̧mi̧'quidächi̧'ä̧cua̧sä̧ JA̧U̧ ro̧ȩpo̧mȩnä̧mä̧ CHUTÄ ppädäcua'a ja̧'a̧ttö̧ ttö jȩchi̧nö̧, ja̧'hua̧ta̧'a̧nö̧ röji mo̧ro̧ päi'omenä ro̧ȩpo̧mȩjubu ttörö. JA̧U̧TÄ̧ ja̧'a̧ tȩa̧u̧cu̧ i̧'chä̧chä̧cua̧mä̧ ttörö, ja̧'hua̧nö̧ ja̧'a̧ttö̧ ttörö röji moro ppädä'ä to̧chä̧cua̧sä̧. ¹⁰ Juȩnȩmä̧ chabo'iyaju'inä tojäcuaju ja̧'hua̧nö̧ jo̧mȩnä̧ ttörö päjinö̧ji̧nö̧ amucuädö dä'ättujäcuaju: "¿Tȩnȩ o̧jä̧ cu̧ru̧hua̧ CUÄ̧NÄ̧HUA̧ Diosmä?" cha̧mo̧nä̧ chi'äriyä to'äcua'a, ja'huäjumä mänänä redähua tti̧'cuȩ'cua̧'a̧ jä̧'i̧nö̧'a̧nä̧ 'cuȩ'cuä̧huä̧cua̧ju̧. ¹¹ cuidepiyu tto̧ȩpäräbä pä'äjita'anö ttaditö mo̧ro̧'i̧nä̧ pätecuächäcua'a, ja̧u̧nu̧ mo̧ro̧mä̧ cui̧rȩjä̧ beipome'inä yabonänö jä̧cua̧'a̧. ¹² Ji̧yȩnö̧ mo̧ro̧mä̧ ttö̧ja̧'i̧nä̧ ucurutä ttichäcuotö, Asiriattö kä̧mä̧dö̧ Egipto ötahuäyä jubu, Egiptottö kä̧mä̧dö̧ aje rö̧o̧to jubu, Eufrate'inä, dä'ähuotomä koroto dä'ähuoto jubu, ja̧'hua̧ta̧'a̧nö̧ de'a'inä kara'a de'acu. ¹³ Ja̧'huä̧jä̧ rȩjȩnä̧mä̧ ya̧tȩ'i̧nä̧ to̧ä̧cuä̧jä̧ juȩnȩ ko̧cuä̧tö̧ ttö̧ja̧ ttihueyenä, surojönätä̧ jȩpö̧ tto̧jo̧cua̧'a̧ttö̧. ¹⁴ ucutä cu̧mu̧huäyotörö i̧so̧'quȩnä̧ ttö̧'ȩpä̧rö̧ o'ipi, ucutä cu̧yä̧ji̧mö̧ ja̧'a̧ttö̧. Ja'huätömä ji̧nä̧ de'a jo̧metä̧ ko̧cuä̧tö̧, cuähuä ku̧nä̧huä̧nä̧ ppuru'unä jo̧mȩ. Ja'huätörä o'ipi Basanra̧'a̧ ja̧'hua̧ta̧'a̧nö̧ Galaad rȩjȩra̧'a̧cu̧ täbocu ttö̧jo̧cu̧yi̧no̧mȩcu̧. ¹⁵ I̧jȩpi̧tö̧ ji̧yȩnö̧ mo̧ro̧ Egipto rȩjȩtö̧ rä'epö cuicuinöta'anö, TTÖTÄ chi̧jȩpä̧cuo̧tä̧ adiumä. ¹⁶ Ruhuäcuiyä pa̧ja̧cu̧nä̧ tottäcuyotö ja̧'hua̧nö̧ jo̧mȩnä̧ dä'ä ttuttäcuotö juruhuättöjä pättömä. Ja'huätömä ttä ttu̧mu̧nä̧tä̧ ttottecuäcuotö; Ttä̧ja̧hui̧yä̧'i̧nä̧ ttä̧ju̧cu̧ juiyönä jä̧cuo̧tö̧. ¹⁷ Ja'huätömä rȩjȩ i̧sa̧ppȩtä̧ nȩttä̧cuo̧tö̧ äca jä̧'i̧nö̧'a̧nö̧, pi̧jä̧ttö̧ rȩjȩnä̧ dottähua pä'ö pöttädäcuähuotö 'cua̧rö̧nä̧. Ja'huätömä ttäjuttu ye'ecunu rättopäcuotö; Ja'huätömä UCU cu̧jo̧mȩcu̧ ye'ecunutä̧ ttichäcuotö, Chu̧ru̧hua̧ CHÖ̧Ä̧NÄ̧HUA̧ Dios, ja̧'hua̧nö̧ jo̧mȩnä̧tä̧ UCURU yettecuäcuotö. ¹⁸ ¿Di jä̧ttö̧ ucu Dios'anö hua̧mä̧, ucu ja̧'a̧ surunä jȩttö̧'i̧nä̧ si'epö icumä, ucutä ja̧'a̧ cu̧mu̧huäyotö suronä jȩttö̧'i̧nä̧ u̧nichi'ömä? Ucu cu̧'ä̧i̧mä̧ 'cuäopönä jö̧nä̧ hua'adö ku̧no̧kö̧jä̧, ucumä repeäcuähuätä huo̧juȩttö̧jä̧ 'cuäopönä repedä̧cuä̧u̧jä̧ päcuina'a̧ttö̧. ¹⁹ Ucumä pä'äjita'anö re cu̧jä̧cua̧jä̧ ujuturu; UCU ja̧'a̧ suronä jȩttö̧ cu̧jä̧pö̧ dȩa̧'a̧tä̧ kä̧dö̧ cui̧cuä̧cua̧mä̧. UCUTÄ jä̧cua̧'a̧ dä'ähuototö täcuome kä'ö cui̧cuä̧cua̧mä̧ ujutu soronä jȩtö̧. ²⁰ Ucutä cui̧yä̧cua̧jä̧ iso jö̧tä̧ Jacob'rö ji̧nö̧'a̧nö̧ ja̧'hua̧ta̧'a̧nö̧ repeäcuahuä 'cä̧cuȩcui̧nö̧ta'anö Abrahamrö, täbocu'inä tä̧do̧tö̧ mi̧nä̧rö̧ chi̧yä̧cua̧sä̧ päcuina'a̧ttö̧.