¹ Ja̧hua̧nä̧ ja̧'a̧nä̧ röji mo̧ro̧ päi'omenämä TÖ̧Ä̧NÄHUA̧ ojusode huä̧mä̧dä̧cua̧'a̧ juȩnȩ de'a jo̧mȩ, Rö̧ä̧nä̧ ttesehuäcuotö jahuä'ca muä'ca jo̧mȩttömä̧, ja̧'hua̧ta̧'a̧nö̧ ötahuiyä'inä rö̧ä̧chä̧cua̧'a̧ juorömä. ² Pi̧jä̧ pa̧ja̧cu̧nä̧ 'chä̧nä̧ ja̧'hua̧nö̧ pättäcuatö: "Ichätucui, muä'cara̧'a̧ TÄÖ̧Ä̧NÄ̧HUA̧ ö̧ja̧'a̧cu̧ 'chatächätucua, Jacob Ö̧Ä̧NÄ̧HU̧S Dios ojusodera̧'a̧cu̧. Ja̧u̧tä̧ jiähuäcuotöjä chutä u̧mä̧nä̧, Ja̧'hua̧nö̧ jo̧mȩnä̧tä̧ ti̧'chä̧cuo̧tö̧jä̧ chutä i̧'cho̧mȩnä̧." Sionttö̧tä̧ räopäcua'a hueähua huȩnȩ'i̧nä̧, ja̧'hua̧ta̧'a̧nö̧ TÖ̧Ä̧NÄ̧HUA̧ i̧huȩnȩnȩ räopäcua'a Jerusalenttö̧. ³ Ja̧u̧tä̧ ro̧ȩpä̧cua̧ recuätö ttö̧ja̧rö̧ ja̧'hua̧ta̧'a̧nö̧ ja̧u̧tä̧ röji pä̧cua̧ recuätö tti̧rȩjä̧ oto pö̧nä̧ kä̧cuä̧tö̧rö̧'i̧nä̧. Ja'huätö tucurä'chumä ttu̧cua̧ adicuätä juottepäcuotö ja̧'hua̧ta̧'a̧nö̧ ttödäcuä o'chumä dau ä̧na̧jui̧yä̧ 'cuiähuätä. Ti̧rȩjä̧ pö̧nä̧ ko̧cuä̧tö̧mä̧ korotö ti̧rȩjä̧cu̧mä̧ rohuäu ttö̧jo̧ juiyäcuotö, curä ttörohuähua pä'ö huo̧jui̧cuä̧'i̧nä̧ juiyäcua'a. ⁴ Ja̧'hua̧nö̧ jo̧ca̧'a̧, Jahuätömä uva isade dȩa̧'a̧ ttö̧'ö̧jä̧cuo̧tö̧ ja̧'hua̧ta̧'a̧nö̧ huiguera dau dȩa̧'a̧'i̧nä̧. Ya̧tȩ'i̧nä̧ ye'epe'öcö jä̧cua̧, o'catoi'önä su̧ro̧do̧u̧ttö̧'i̧nä̧ TÖ̧Ä̧NÄ̧HUA̧MÄ̧ pa̧'a̧nö̧ ucuocuäji. ⁵ O'catoi'önä ttö̧ja̧mä̧ 'chä̧tö̧, ya̧cu̧pö̧nä̧, jitötä yapare ttö̧ä̧nä̧hua̧ i̧mi̧nä̧tä̧. Ja̧'hua̧nö̧ ja̧'a̧nä̧ ujutumä ti̧'chä̧cuo̧tö̧jä̧ TÖ̧Ä̧NÄ̧HUA̧ Dios i̧mi̧nä̧tä̧ 'cuäopönä ja̧'hua̧ta̧'a̧nö̧ 'cuaopönätä̧. ⁶ "Ji̧yȩnö̧ mo̧ro̧mä̧," pä'ö TÖ̧Ä̧NÄ̧HUA̧, "TTÖ ji̧nä̧ yo̧mȩtȩ pätti'önä jȩchä̧cua̧sä̧ juiyupätörö ja̧ro̧ttä̧u̧ru̧'i̧nä̧, Jitö TTÖTÄ tusuräunä jȩchi̧nä̧u̧ru̧'i̧nä̧. ⁷ TÖTÄ pärotö chi̧cuä̧cua̧sä̧ ko̧cui̧pi̧nä̧tö̧ surojönä ko̧cuä̧tö̧tö̧'i̧nä̧, jä̧'hua̧ta̧'a̧nö̧ pä̧i̧cu̧nä̧ rä'epö chi̧cui̧nä̧u̧ru̧'i̧nä̧ rö̧ä̧nä̧ ucuounä jȩchä̧cua̧sä̧, ja̧'hua̧nö̧ ja̧'a̧ttö̧, TTÖ CUÄ̧NÄ̧HUA̧TU̧CU̧MÄ, ruhuo hue'ö chö̧jä̧cua̧sä̧ Sion Muä'cattö, jitä kä̧mä̧dö̧ ja̧'hua̧ta̧'a̧nö̧ 'cuäopönätä̧. ⁸ Ja̧'hua̧nö̧ ja̧'a̧nä̧ ucumä, to̧pä̧rö̧ tta̧cuä̧rä̧cua̧jä̧ Israélnä kä̧cuä̧tö̧rö̧, Sión muä'ca ju'tä kä̧cuä̧tö̧rö̧, ucuru ttichäcuotö, täbucu hue'ö cu̧ji̧nä̧u̧'i̧nä̧ pä'äji ta'anö ttichäcuotö, pä'äji ruhuo hue'ö cu̧ji̧nö̧tra'anö ucutä ja̧'a̧ Jerusalén ittijumä. ⁹ Jitämä, ¿Dä̧bö̧ pä̧i̧cu̧nä̧ huocu'ätucuä? ¿Ruhuo hue'ömä toa'a ucututtumä? ¿Isaju ji̧'qui̧cha̧hua̧rö̧ uhuäbecu barahuäcua huoja'a jä̧'i̧nö̧'a̧nö̧ huocuöätucua'a? ¹⁰ Barahua'anä aditätucui o'ca päcui'ätucua, Siónnä ko̧cuä̧tö̧mä̧, isaju o'ca juäja'a 'cua̧rö̧nä̧. Jitämä ötahuiytättö'inä oto cui̧'chä̧cuo̧tö̧jä̧, cu̧jä̧cuo̧tö̧jä̧ de'a ttö̧ja̧ tome juorötä cui̧'chä̧cuo̧tö̧jä̧ Babiloniacu̧. Juorötä ppädäcuähua rä̧bȩhuä̧cua̧'a̧ ucuturu. TÖ̧Ä̧NÄ̧HUA̧TÄ̧ pä̧dä̧cua̧s cuaboiyottöttömä. ¹¹ Jitämä, pi̧jä̧ pa̧ja̧cu̧nä̧ ko̧cuä̧tö̧mä̧ surojönätä amucuädätö ucuturu; Ja'huätö pä'ötö: 'Ja̧'a̧tä̧ topätucui surojönä jȩtta̧'a̧nä̧; ja̧'a̧tä̧ topätucuitö ttusurähua'a totäcua'anö Sión muä'canä ko̧cuä̧tö̧.' ¹² Profetamä pa̧'a̧nö̧ pä'ö: "Ja'huätömä TÖ̧Ä̧NÄ̧HUA̧ a̧mu̧cuä̧dö̧mä̧ jerupätö, jerupätö chutä jȩä̧cuä̧'i̧nä̧, JA̧U̧MÄ̧ ji̧nä̧ yo̧mȩtȩ ö̧ca̧ca̧tä̧u̧ mi̧ jä̧'i̧nä̧'a̧nä̧ ro̧ȩpa̧pä'ö." ¹³ TÖ̧Ä̧NÄ̧HUA̧ ju̧ru̧hua̧mä̧ pa̧'a̧nö̧ pä'ö: "Ä̧rä̧mi̧'ö̧ rohuähuätucui, Sión i̧tti̧mö̧, TTÖTÄ jȩchä̧cua̧sä̧ cuä̧ja̧ i̧sä̧nä̧'i̧nä̧ cuo̧rä̧u̧na̧ jö̧nä̧, ja̧'hua̧ta̧'a̧nö̧ jȩchä̧cua̧sä̧ cu̧na̧ji̧yä̧tu̧cu̧'i̧nä̧ broncetä jö̧nä̧. Ucutä ja̧'a̧ kä̧dö̧ cui̧cuä̧cua̧mä̧ recuätö tö̧ja̧rö̧. Tötä yȩchä̧cua̧sä̧ jahuätö aditö ruhuotö jö̧nä̧ ttö̧jö̧mä̧ ttötä jä̧hua̧ ja'attö, TÖ̧Ä̧NÄ̧HUA̧ iyinö ttörö, ttö̧ä̧nä̧hua̧ pi̧jä̧ o'cajuiyönä u̧ru̧hua̧ ja̧'a̧ttö̧."