¹ Topi, täcu ttö chi̧huȩnȩ ȩcua̧ ttö̧ja̧rö̧ huedomȩtä̧ päia'a, ja̧'hua̧nö̧ ja̧'a̧ ja̧u̧mä̧ Ttö chä'canä mä̧nä̧ jo̧mȩnö̧ jȩpö̧ u̧ju̧nä̧cua̧. Ja̧'hua̧nö̧ ja̧'a̧ TÖ̧Ä̧NÄ̧HUA̧ ucutu cusätucuäcumä cuieruhuätucua'anä ö̧jo̧denä i̧chä̧cua̧. Ja̧'hua̧nö̧ ja̧'a̧ huȩnȩ ȩcuä̧ i̧sa̧ esecumä ucutu rö̧ä̧nä̧ cuesehuätucunä hua̧mä̧, topi, Ja̧u̧mä̧ i̧chä̧cua̧," pä'ötó TÖ̧Ä̧NÄ̧HUA̧ o'cajuiyönä ju̧ru̧hua̧mä̧. ² Ja̧'hua̧nö̧ ja̧'a̧nä̧ ¿Dijä̧ttö̧ Ja̧u̧ i̧rȩbȩhui̧'ö̧ mo̧ro̧ ami'quiächia'anö̧ hua̧mä̧? ¿Di jä̧ttö̧ Ja̧u̧ i̧jȩcuä̧cho̧mȩnä̧ 'quiyunä ö̧jö̧'a̧nö̧ hua̧mä̧? Ja̧u̧mä̧ ocurä ku icuarä jä̧'i̧o̧nö̧'a̧nö̧ hua̧ jä̧cua̧cö̧, ja̧pö̧ni̧'ca pö̧jä̧ti̧yu̧ tucähuä'ca jä̧'i̧nö̧'a̧nö̧cö̧. ³ Ja̧u̧mä̧ päcuäitä päi'önö jȩä̧cuä̧huä̧ i̧sa̧ jö̧nä̧ ö̧'ä̧mä̧dä̧cua̧ ja̧'hua̧ta̧'a̧nö̧ plata päcuäitä päi'önä jȩä̧cuä̧huä̧ i̧sa̧ jö̧nä̧ ja̧'hua̧nö̧ ja̧'a̧ttö̧ Leví i̧tti̧mö̧rö̧mä̧ päcuotötä pätti'önä jȩä̧cua̧. Ja̧u̧mä̧ oro'inä, plata'inä päcuäitä päi'önä jȩä̧tta̧'a̧ jä̧'i̧nö̧'a̧nä̧ jȩä̧cuo̧tö̧ ja̧'hua̧nö̧ jo̧mȩ jahuätömä adihuäjuäi TÖ̧Ä̧NÄ̧HUA̧RÖ̧ iyähuä ttiya pä'ö tti'cächäcuotö. ⁴ Ja̧'hua̧nö̧ ja̧'a̧ Judá ttö̧ja̧'inä Jerusalén ttö̧ja̧'inä ttöäre iyähuämä, TÖ̧Ä̧NÄ̧HUA̧MÄ̧ eseunä jä̧cua̧, mo̧ täbocu a̧'ȩnä̧ ji̧nö̧'a̧nö̧. ⁵ Ja̧'hua̧nö̧ jo̧mȩnä̧ Ttömä ucuturu chutu'cöhuächi'äcua̧sä̧ adihuomenä jȩcha̧ pä'ö. Ttömä jurunä to'ija̧'a̧cu̧ mä̧ri̧mö̧rö̧'inä, tti̧rȩcua̧ pocojucu jȩpä̧'chö̧tö̧rö̧'i̧nä, yapare ji'ähuätörö'inä toäcuähuä i̧sa̧ jö̧nä̧ pädi'äcusä̧, ja̧'hua̧ta̧'a̧nö̧ ku'cocö chä̧cua̧sä̧ adicuä ttö̧ja̧sa̧rö̧ suronä huehuepö mitocotörö'inä, recuamö̧rö̧'inä, reyotörö'inä, ko̧ro̧jä̧ ttö̧ja̧rö̧ ppa̧ttä̧chu̧nä̧ suronä jȩpä̧tö̧rö̧'inä ja̧'hua̧ta̧'a̧nö̧ ku'cocösä Ttörö ucuotocotörö'inä," pä'ötó TÖ̧Ä̧NÄ̧HUA̧ o'cajuiyönä ju̧ru̧hua̧mä̧. ⁶ " Ttö, CUÄ̧NÄ̧HUA̧TU̧CU̧MÄ̧, pärohuächocösä, ja̧'hua̧nö̧ ja̧'a̧nä̧ ucutu, Jacob i̧tti̧mu̧mä̧ ji̧nä̧ rä̧bȩhuo̧co̧tö̧jä̧ beipomemä. ⁷ Cuä̧do̧tu̧cu̧tu̧ minä ttö̧ji̧nomȩttö̧ kä̧bä̧dö̧ ucutumä ttö huedömä jȩpu̧mä̧ ko̧co̧tö̧jä̧. Ja̧'hua̧nö̧ ja̧'a̧ttö̧ ttörötä kiyönä repeö pa̧'a̧chä̧tu̧cui̧, ja̧'hua̧nö̧ jö̧ttö̧mä̧ Ttö'inä ucutucu pa̧'a̧chö̧ chö̧jä̧cua̧sä̧," pä'ö TÖ̧Ä̧NÄ̧HUA̧MÄ̧. Ja̧'hua̧nö̧ ja̧'a̧nä̧ ucutu pä'ätöjä: ¿Tocu jönä pa̧ta̧chä̧cua̧'a̧jä̧ttö̧?'. ⁹ ¿Ttö̧ja̧mä̧ Diosrö ttö̧nä̧u̧cua̧'a̧nö̧ ja̧'a̧ tä̧ji̧? ja̧'hua̧nö̧ mä̧cö̧ ucutumä ttörömä nä̧u̧cuä̧rä̧tö̧jä̧. ja̧'hua̧nö̧ ja̧'a̧nä̧ ucutumä pä'ätöjä: ¿Tocu jö̧nä̧ tö̧nä̧u̧cuä̧cu̧? Pi̧yȩ ja'a Diezmonä ja̧'hua̧nö̧ ofrendanä. ⁸ Ucutumä ttö̧jö̧'co̧co̧u̧ jö̧nä̧tä̧ cuäcuotöjä, ttörö'i̧nä̧ ttö̧ja̧ o'catoinärö'inä cu̧nä̧u̧cuä̧rä̧tu̧cua̧'a̧ttö̧. ¹⁰ I'chächätucui cuiäre iyähua diezmo o'cajuiyönä hua'adö ku̧nä̧huo̧mȩcu̧. Tto chojusodenä cuäcuähuä juiyä juiyönä jä̧cua̧'a̧nö̧. Ja̧'huä̧nö̧tä̧ ko̧cuä̧mö̧ topittö jitämä," pä'ö TÖ̧Ä̧NÄ̧HUA̧ u̧ru̧hua̧mä̧, "TTÖ mo̧ro̧jä̧ isate badepö juiya pä'ö ja̧u̧nu̧tä̧ tocu'äcuotöjä ttö chö'adihuä ucuturu ro̧'ä̧nä̧tä̧ i̧jȩcuä̧cha̧'a̧. ¹¹ Pä'äjita'anö chu̧cuo̧cuä̧cua̧sä̧ ja'huätö cu̧cuä̧ cuähuä jȩpö̧ tticu juiyönä, cui̧rȩjä̧tu̧cu̧nä̧ cuähuä cu̧ju̧nä̧tu̧cuo̧mȩnä̧'i̧nä̧ jȩpö̧ tticuhuiyäcuotö. Cu̧cuä̧ uva cu̧ju̧nä̧tu̧cuo̧mȩ'i̧nä̧ u̧huä̧ju̧mä̧ toe'oca'a ja̧cua̧'a̧," Ja̧'hua̧nö̧ pä'ö TÖ̧Ä̧NÄ̧HUA̧ ju̧ru̧hua̧mä̧. ¹² "Pi̧jä̧ o'cajuiyönä ttö̧ja̧mö̧ pättäcuotö adiunä ko̧cuä̧tö̧ pä'ö, jua'amä ucutu cui̧rȩjä̧tu̧cu̧nä̧ eseunutä̧ cu̧jä̧tu̧cua̧'a̧ttö̧," Ja̧'hua̧nö̧ pä'ö TÖ̧Ä̧NÄ̧HUA̧ ju̧ru̧hua̧mä̧. ¹³ "Ucutu ttörö päcuä'ijätucumä surojötä ja̧'a̧," Ja̧'hua̧nö̧ pä'ö TÖ̧Ä̧NÄ̧HUA̧ ju̧ru̧hua̧mä̧. "Ja̧'hua̧nö̧ ja̧'a̧ttö̧ ucutumä pä'ätöjä: ¿Däje pätä'ijätö ujutu ucuru surojönämä? ¹⁴ Ucutumä pä'ä'ijätöjä: Ja̧u̧ yapare DIOS hue'ömä jȩpo̧co̧tö̧jä̧. ¿Däje tȩmä̧cua̧'a̧jä̧ttö̧ hueöta'anö jȩtö̧ttö̧mä̧ ko̧ro̧nö̧mä̧ jarodö kä̧nö̧ TÖ̧Ä̧NÄ̧HUA̧ ju̧ru̧hua̧mä̧ o'ca'anä ti̧'chö̧ttö̧mä̧? ¹⁵ Ja̧'hua̧nö̧ ja̧'a̧ ujutumä pä̧'ä̧tö̧jä̧ esehuätö ppä̧dä̧u̧ ja̧'a̧ttö̧. Suronä jȩpä̧tö̧mä̧ adiunätä jä̧u̧, ja̧'hua̧nö̧ ja̧'a̧ttö̧ ko̧cuä̧mö̧'i̧nä̧ topätö Diosrömä ja̧'hua̧nö̧ jȩpö̧tä̧ tö'ipächätö̧." ¹⁶ TÖ̧Ä̧NÄHUA̧ ttöcuocuaa ä̧ju̧cui̧nö̧. isopäi'önä ttu̧ȩpä̧rä̧chi̧'i̧nö̧ TÖ̧Ä̧NÄHUA̧ ja̧'hua̧nö̧ ja̧'a̧ttö̧ jo̧'ú̧ ö̧jo̧mȩttö̧ huȩyu̧cui̧na̧'a̧ cuyärötänä chutä ötö'cö, TÖ̧Ä̧NÄHUA̧RÖ̧ a̧'cua̧ huȩnä̧rö̧mä̧ i̧mi̧'i̧nä̧ ucuotö. ¹⁷ Jahuätömä ttö chahuaröhuä, päinö TÖ̧Ä̧NÄ̧HUA̧ o'cajuiyönä ju̧ru̧hua̧mä̧, ttönätä̧ ttö̧jä̧cuo̧tö̧ jahuätömä, ro̧dȩpu̧ mo̧ro̧'i̧nä̧. ja̧'hua̧nö̧ ja̧'a̧nä̧ ttö ro̧dȩpi̧yä̧cua̧sä̧ jahuätörö, ya̧tȩ ttö̧ja̧sä̧ i̧tti̧rö̧ hueöta'anö jȩo̧mȩnä̧ ro̧ȩpo̧ca̧'a̧ jä̧i̧nö̧'a̧nö̧. ¹⁸ Ja̧'hua̧nö̧ ja̧'a̧ttö̧ ucutu to'cuäcuotöjä i̧mi̧cu̧nä̧ ttaa adihuätörö'inä ja̧'hua̧ta̧'a̧nö̧ suropätörö'inä, DIOSRÖ tta̧'cua̧ huȩnä̧rä̧tö̧rö̧'i̧nä̧ ja̧'hua̧ta̧'a̧nö̧ tta̧'cua̧ huȩnä̧ro̧co̧tö̧rö̧'inä.