¹ Jitämä, ucutu sacerdote huotörö pa̧'a̧nä̧ pä'ö hue'ösä. ² Ucutu cuä̧ju̧cu̧ juiyätucuttumä, ja̧'hua̧ta̧'a̧nö̧ iso päi'önä cuamiso'quitucunä ja̧rȩju̧nu̧ pä'i'ö ucuotö jȩcu̧'ä̧tu̧cuo̧ca̧'a̧ jö̧ttö̧mä̧, "Ja̧'hua̧nö̧ pä'ö TÖ̧Ä̧NÄ̧HUA̧ u̧ju̧ru̧a̧mä̧," Ja̧'huanö̧ jö̧ttö̧mä̧ ttötä huȩdä̧cuotöja surojätucuacu pä'ö, ja̧'hua̧ta̧'a̧nö̧ ucutu cui'äre iyähuä'inä surojönätä̧ pä̧dä̧cua̧sä̧. Iso päi'önätä̧, surojätä pä'ösä ttömä, pädinö̧ta'anö cuamiso'quitucu jacuänä jȩcu̧'ä̧tu̧cuo̧i̧ca̧'a̧ttö̧. ³ Topätucui, ucu cuahuaruhuä o'cotörö'inä yabocu tti̧'chö̧juiyönä jȩchä̧cua̧sä̧, ja̧'hua̧nö̧ ja̧'a̧ttö̧ ttötä tudepäcuotä ttä̧ji̧mö̧ ttitehuatä, pä'cari jȩtto̧mȩ'i̧nä̧ ttitehuatä. Ja̧u̧ru̧'i̧nä̧ jahuähuacutä jue'ö chi̧cuä̧cua̧. ⁴ Ucutumä cu̧juo̧juä̧cuo̧tö̧jä̧ TTÖ huedäjä'a pä'ömä, ja̧'hua̧nö̧ ja̧'a̧nä̧ ttö chesecuinömä yäbocutä 'chä̧cua̧'a̧ Levi ahuaruhuä o'cotönä, Ja̧'hu̧no̧ pä'ö TÖ̧Ä̧NÄ̧HUA̧ ju̧ru̧hua̧mä̧. ⁵ Jo̧u̧cu̧ esecuinösä̧ a̧cu̧rö̧'i̧nä̧ ja̧'hua̧ta̧'a̧nö̧ huȩnȩ juiyönä ö̧ja̧ peö'i̧nä̧, ttötä iyinö̧sä̧ jo̧u̧rö̧mä̧; ttörö ucuota peö'inä iyinösä̧ ja̧'hua̧ta̧'a̧nö̧ jo̧u̧mä̧ ttörö ucuotinö, jo̧'ú̧ ttö chimí huo̧juä̧chi̧'i̧nö̧. ⁶ Hueähuä huȩnȩ päöta'anö jȩpi̧nö̧ ja̧'hua̧ta̧'a̧nö̧ surojömä ucuo cuocö pinö. Jo̧'ú̧ ki̧nö̧́ huȩnȩ́ juiyönätä̧ ja̧'hua̧ta̧'a̧nö̧ suronä jȩtti̧yö̧nä̧ ji̧ä̧huä̧ri̧nö̧. ⁷ Ya̧tȩ sacerdotemä u̧huo̧jua̧ pe'ö ka̧a̧ ädätä cuȩmä̧ ttö̧ja̧ ttusu jiähua pe'ömä, jo̧u̧tä̧ ja̧a̧ TI̧Ä̧NÄHUA̧ ju̧ru̧hua̧ i̧huȩnȩ ȩpu̧ 'chö̧mä̧. ⁸ Ucutu a̧di̧huä̧ mä̧ttö̧mä̧ räopächinätö̧jä̧. Ucutu suronä jȩ'cuä̧tu̧cu̧ttu̧tä̧ suronä jȩttö̧nä̧ jȩpi̧nä̧tu̧jä̧ hueähuä huȩnȩttö̧mä. Levicu esecu ucucu chuju̧ni̧nö̧ ucutu ucuotocotö pinätö̧jä̧ päinö, TÖ̧Ä̧NÄHUA̧ ju̧ru̧hua̧mä̧. ⁹ Ja̧hua̧nö̧ ja̧'a̧nä ttötä, huedina'a̧nö̧mä̧ ko̧co̧tö̧jä̧ ja̧'hua̧ta̧'a̧nö̧ ttö jidähui nöttö̧mä̧ 'quȩi̧chi̧nä̧tö̧jä̧ o'cato'inä úcuo teäcuä'utä kä̧tö̧jä̧, ttö huedinömä jȩpo̧co̧ tö̧jä̧, ja̧'hua̧nö̧ ja̧'a̧nä̧ cui̧jä̧tu̧co̧mȩ ttö̧ja̧rö̧ i̧mi̧cu̧nä̧ huo̧juȩti̧nä̧tö̧jä̧ ri̧ȩnä̧ mi̧cuäu 'cu̧a̧rö̧nä̧. ¹⁰ ¿Ja̧'hua̧nö̧ ja̧'a̧mä̧ o'catoi'önä ujutu tä'omä to'ätöjä̧ tä̧ji̧? ¿Ya̧tȩ Diostä jo̧ca̧'a̧ ujuturu uhuäbe'inö̧mä̧? ¿Tta̧'a̧nö̧ pä'ö tö̧jä̧hua̧tu̧cu̧mä̧ esetäcuähuocotöjättö̧, ttä̧'o̧tö̧ ttesecuinö surojuo'epömä? ¹¹ Judámä esetocö pinö. Ji̧yȩtȩ rö̧ä̧nä̧ surojö jȩpi̧nä̧tö̧ Israelttö'inä ja̧'hua̧ta̧'a̧nö̧ Jerusalénttö'inä, isopäi'önä Judá ttö̧ja̧mä̧ TÖ̧Ä̧NÄ̧HUA̧ ö̧jo̧mȩ surojö juiyome surojuo'epinö, Ja̧u̧ rö̧ä̧nä̧ repeome ja̧'hua̧ta̧'a̧nö̧ korotö ttö̧ä̧nä̧hua̧ ittijucu u'cähuinö irecua päi'önä. ¹² TÖ̧Ä̧NÄ̧HUA̧MÄ̧ Jacob ojusodettömä ja̧'hua̧nö̧ jȩpö̧rö̧mä̧ si'epö icua pä'ötä ja̧'a̧, chu porächi'ö to̧pä̧rö̧ jö̧ttö̧'inä ja̧'hua̧ta̧'a̧nö̧ ädätö jö̧ttö̧'inä, ji̧nä̧ TÖ̧Ä̧NÄ̧HUA̧ o'cajuiyönä ju̧ru̧hua̧rö̧ iyähuä iya pä'ö ji̧nä̧ i'cächuru jö̧ttö̧'inä. ¹³ Ja̧'hua̧ta̧'a̧nö̧ ucutumä pi̧yȩ jȩpä̧tö̧jä̧: "Ucutumä ku icu TÖ̧Ä̧NÄ̧HUA̧RÖ̧ iyähuome cui̧'chȩrȩja̧ tucunä a̧tto̧pä̧tö̧jä̧, ajaunö ja̧'hua̧ta̧'a̧nö̧ ba̧ra̧hua̧u̧ huopönö, juhua'amä cuiäretucu iyähuämä tooca'acö̧, cuaditähuätucu ppä'ädipö emö'a̧nö̧cö̧. ¹⁴ Ja̧'hua̧nö̧ ja̧'a̧nä̧ ucutumä pä'ätöjä̧: ¿Tta̧'a̧nö̧ pä'ö ja̧u̧mä̧ jȩpo̧cö̧ttö̧? Isopäi'önä TÖ̧Ä̧NÄ̧HUA̧TÄ̧ ji̧na̧'a̧ ucu möäya̧ cu̧jä̧i̧ cuirecuarö cuȩmi̧nö̧ topinömä, Ja̧u̧tä̧ ja̧'a̧ päcuinö ji̧nö̧ jȩ'cuo̧ca̧'a̧ to'ija̧'a̧cu̧ jȩ'cuä̧cu̧mä̧, jahuäjumä cuahuaruhuaju ji̧na̧'a̧ ja̧'hua̧ta̧'a̧nö̧ cuirecua ji̧na̧'a̧ cuesecuinönämä. ¹⁵ ¿Ya̧tȩtä̧ jö̧nä̧mä̧ jȩpä̧cuä̧huo̧co̧tö̧ pinätö̧jä̧, ya̧tȩ cua̧'cua̧ru̧hua̧tu̧cu̧nä̧mä̧? ¿Ja̧'hua̧nö̧ ja̧'a̧mä̧ tta̧'a̧nö̧ pä'ö ya̧tȩtä̧ cuätucunä̧mä̧ jȩ'cuä̧cuä̧hui̧nä̧tu̧cuä̧ttö̧? Isopäi'önä ja̧u̧mä̧ Dios i̧tti̧rö̧ usina'attö. Ja̧'hua̧nö̧ ja̧'a̧ttö̧ ttu̧'ȩpä̧rö̧nö̧ ka̧cuä̧tu̧cui̧ cua̧'cua̧ru̧tu̧cu̧nä̧mä̧ möäyotö cu̧jä̧tu̧cuä̧i̧ cueminäcua̧rö̧ päcuinö ji̧nö̧mä̧ jȩpi̧, " ¹⁶ isopäi'önä ttirecuarö jaroi'äcuähuämä ku'cocösä pä'ötó TÖ̧Ä̧NÄ̧HUA̧ Israel ttö̧ja̧ Ttö̧ä̧nä̧hua̧ Diosmä ja̧'hua̧ta̧'a̧nö̧ chu suronä jȩpö̧ ö̧ä̧rȩta̧ juä'ocumä pä'ötó TÖ̧Ä̧NÄ̧HUA̧ ju̧ru̧hua̧mä̧. Ja̧'hua̧nö̧ ja̧'a̧ttö̧ ttu̧'ȩpä̧rö̧nö̧ ka̧cuä̧tu̧cui̧ cua̧'cua̧ru̧tu̧cu̧nä̧mä̧ ja̧'hua̧ta̧'a̧nö̧ jȩchä̧cua̧sä̧ päcuinä̧tu̧cu̧mä̧ jȩpä̧tu̧cui̧." ¹⁷ TÖ̧Ä̧NÄ̧HA̧RÖ̧ cui̧huȩnȩtu̧cu̧nä̧mä̧ suronä pä'ä'ijätöjä. Ja̧'hua̧nö̧ ja̧'a̧nä̧ ucutumä pä'ätöjä: ¿Tocu 'cuäcuächi'önä jȩtä̧'i̧jä̧ttö̧? Ucutumä pä'ätöjä: O'cajuiyönä surojö jȩttö̧mä̧ Diosmä adihua'a jö̧nä̧tä̧ topö ja̧'hua̧ta̧'a̧nö̧ jahuätörömä eseu," ¿To ö̧jä̧ttö̧ Dios adihuomenä jȩpö̧mä̧?"