¹ TÖ̧Ä̧NÄ̧HUÄ̧ Moisérö̧ ucuocu, pä'inö: ² "Ya̧tȩ suronä jȩö̧ttö̧mä̧ TÖ̧Ä̧NÄ̧HUÄ̧ hueö u̧ju̧ninö̧ji̧nö̧ttö̧ jäyäcu jȩo̧mȩnä̧, ippeyänä ko̧rö̧ amö̧nä̧tä̧ esecu 'cua̧rö̧nä̧, yapare jiäu churutä ucuotönö ttesecuäcu'inä, amonä̧ i'äu nä̧u̧cuä̧rö̧, ippeyänä ko̧ro̧ usuräunä jȩpä̧'chö̧, ³ Ippeyänä kö̧ öäre toepäji'inä ku̧nä̧rö̧ ja̧'hua̧'a̧nö̧ ja̧'a̧nä ä̧ppu̧tä̧rö̧ ja̧u̧ öttö'cömä, yaparetä pä'ä'chö, pi̧yȩtä̧ ja̧'a̧ ttö̧ja̧ suronä jȩttö̧mä̧. ⁴ Ja̧'hua̧'a̧nö̧ ja̧'a̧ttö̧ 'cuä'opäcua'a suronä jȩä̧ji̧mä ja̧u̧tä̧ jä̧cua̧'a̧, pa̧cuä̧dö̧'a̧nö̧ ja̧'a̧ pä̧i̧cu̧nä̧ jȩpu̧ ö̧nä̧u̧cuä̧ji̧mä̧, churutä tta̧'cua̧ huȩnä̧rö̧ ttiyäji'inä, koro toepäji'inä u̧ju̧nä̧rö̧'inä. ⁵ Ä̧ppu̧tä̧rä̧ji̧ttö̧'i̧nä̧ pi̧yȩ öttö'cö jäcuä jö̧, ja̧u̧mä̧ ppa̧huä̧dö̧'a̧nö̧ ja̧'a̧ o'cajuiyönä̧tä̧ ja̧'hua̧ta̧'a̧nö̧ ji̧mu̧tȩ jähuä jo̧mȩ abonänö ppädipu imitö̧'anö ja̧'a̧ imippotäcurumä, ji̧yȩnö̧ mo̧ro̧ ja̧u̧ru̧ ttö̧o̧hui̧o̧mȩnä̧ huȩnȩ cua̧ päö. ⁶ Ja̧u̧nu̧ o'ca'amä, ö,cächö'anö ja̧'a̧ öäre iyähuä Ö̧Ä̧NÄ̧HUA̧RÖ̧: oveja ubottö öttä'inä jui̧'a̧ttö̧ jitä pänä mi̧cuäcuomȩ cua̧ttö̧, suronä jö̧ ko̧mȩnä̧ iyähuä cua̧rö̧ sacerdoterö. ⁷ Sacerdotetä jȩä̧cua̧ iyäcuämä TÖ̧Ä̧NÄ̧HUÄ̧ a'ca jo̧mȩmä̧, ja̧'hua̧'a̧nö̧ jo̧mȩnä̧tä̧ ja̧u̧mä huȩnȩ jui̧'a̧ pä̧i̧'ä̧cua̧ ja̧u̧ jȩä̧ji̧ttö̧mä̧." ⁸ Ja̧u̧nu̧ o'ca'a TÄ̧Ö̧NÄ̧HUA̧ ucuocuinö Moiserö, pa̧'a̧nö̧ pä'ö: ⁹ Arón'rö̧ ja̧'hua̧ta̧'a̧nö̧ i̧tti̧mu̧rö̧'i̧nä̧ hue'i, pa̧'a̧nö̧ pä'ö: Pi̧yȩ ja̧'a̧ hue'ähuamä i̧sa̧rö̧ ku'icu iyähuättömä: Ttiäre ku'icu tti̧yä̧huä̧mä ku iyähuome pä̧cua̧'a̧ yodo 'cuäo'önä mo̧ro̧ juome jubu, ja̧hua̧nö̧ ja̧'a̧ttö̧ ocurämä 'cuäopönä cuo'ö pä̧cua̧'a̧. ¹⁰ Saceredote hua̧mä̧ ö̧'ca̧tä̧huä'pi linottö̧ adicuä'pitö ö̧'ca̧tä̧hui̧'ä̧cua̧, Ja̧'hua̧ta̧'a̧nö̧ jacuänä ö̧'ca̧tä̧huä̧ti̧yu̧'i̧nä̧ linottö̧tä̧. Ja̧u̧mä̧ ö̧ca̧ca̧tä̧cua̧ ku'iyähuomettö̧ ä̧ya̧ri̧ osa isa̧rö̧ kutticu o'ca'a, ja̧u̧ ä̧ya̧ri̧ osamä ö̧tä̧cua̧ ku'iyähuome ppeyänä. ¹¹ Ja̧u̧mä̧ ö̧'ca̧tä̧huä̧ti̧yu̧ ka̧sä̧u̧ icu ö̧tä̧cua̧ ä̧yä̧ri̧ osa isode u̧mi̧cu̧ ȩpa̧pä'ö, adiu te'önä juatädö icuähuomecu̧. ¹² Co'ötä ki̧na'a̧ kuhuicu iyähuomemä. Nahui̧pä̧ pe'ömä hueyecuina'a̧, ja̧'hua̧ta̧'a̧nö̧ sacerdote mi tta̧tä̧dä̧ri̧nö̧, 'cuäpunä moro̧ ju̧'a̧cua̧. Jo̧u̧mä̧ a̧di̧tä̧ra̧cua̧ kuhuicu iyähuä jiähuinö ta̧'a̧nö̧, päinöta̧'a̧nö̧ kuhuö i̧cuä̧cua̧ jo̧u̧ta̧cu̧ ö̧a̧dȩ suronä jȩttä̧ji̧ juiya pä'ö. 'Cuäpunä kuhuö icu iyähuomemä ucuräma coö ki̧na̧'a̧. ¹³ Jo̧u̧mä̧ na'ȩpu̧ icua pe'ömä juiyaca'a̧. ¹⁴ Pi̧yȩ ja̧'a̧ huedömä ö̧huȩju̧ obattö iyähuä. Aarón i̧tti̧mu̧tä̧ ttiyäcuotö TÖ̧Ä̧NÄHUA̧ ö̧jo̧mȩ, kuicu iyähuomettö̧. ¹⁵ Sacerdote ȩmä̧cua̧ u̧mu̧nä̧ trigo i̧sä̧ppȩ a̧dȩja dahuȩpä̧cua̧ ja̧'hua̧ta̧'a̧nö̧ a̧dö̧nä̧ a̧meu̧nä kuicu iya pe'ö, pa̧'a̧nö̧ ja̧cua̧'a̧ ö̧hua̧ju̧ obattö iyähuämä, jo̧u̧mä̧ kuhuö i̧cuä̧cua̧ kuicu iyähuome 'chopa pe'ö adiunä a̧du̧nä̧ jähuatö ttiyö. ¹⁶ Aarón'i̧nä̧ ja̧'hua̧ta̧'a̧nö̧ i̧tti̧mö̧'i̧nä̧ ttucuäcuotö ttiya'anä ka̧cui̧pä̧ji̧ttö̧mä̧. Ppö̧ä̧mö̧cu̧mä̧ ȩttä̧huo̧cö̧ jä̧cuȩ ro̧o̧mȩttö̧mä̧. Jahuätömä ca̧ca̧cu̧ pä̧cuähuode ä'ca isarättö ttucuäcuotö. ¹⁷ Ppö̧ä̧mö̧cu̧ huihuatömä ȩttä̧huo̧ca̧'a̧ jä̧cua̧'a̧tó. Ttö mippoönä chiyinö ku icuähuättö ppächämä̧ iyinö̧sä̧. Ja̧u̧mä̧ ro̧ö̧ ja̧'a̧ suronä jȩttö̧nä̧ huȩnȩcuä̧chö̧nä̧ iyähuämä ja̧'hua̧ta̧'a̧nö̧ suronä jȩttä̧ji̧ huȩnȩcuä̧chö̧ jähuänä iyähuämä. ¹⁸ Ucu cuahuaruhuä cuo'ca'atucunä yo'ähui'ätöttömä 'cuäopönä̧tä̧, Aarón i̧tti̧mö̧ttö̧ u̧mä̧tö̧mä̧ ttucua pä'ötä jä̧cua̧'a̧, ocuränä ku icu TÖ̧Ä̧NÄ̧HUA̧RÖ̧ ttiyäjittömä. Ya̧tȩ ja̧u̧nä̧ mȩ'ö̧mä̧ 'cä̧'ȩpö̧ ku̧nä̧hua̧ jö̧nä̧tä̧ päi'äcua̧. ¹⁹ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧MÄ̧ pä'äjita'anö Moiséscu ucuocumä pä'inö: ²⁰ Pi̧yȩ ja̧'a̧ Aarón'inä, i̧tti̧mö̧'i̧nä̧ ttiya pä'ö 'cä̧'ȩpö̧ ttu̧ju̧nä̧ji̧ TÖ̧Ä̧NÄ̧HUA̧RÖ̧ tti̧yä̧cuȩmä̧ tti̧tti̧mö̧ o'catoi'önä̧rö̧ pojopö ttȩmö̧ mo̧ro̧mä̧: Trigo i̧sa̧ppȩ adihuäjuei i̧sa̧ppȩmä̧ 3.7 kg jo̧mȩnä̧ u̧huä̧ju̧ otettö iyähuä jö̧nä̧mä̧, yo̧ȩi̧ ja̧'a̧cu̧mä̧ ja̧u̧ttö̧mä̧ ju'totä ja̧'hua̧ta̧'a̧nö̧ ni̧pä̧rä̧mȩcu̧'i̧nä̧ ju'totä. ²¹ Sä̧rä̧bä̧ pä̧rä̧huä̧bä̧nä̧ a̧dȩjcu jȩpö̧ ö̧'ä̧rä̧cua̧. Cuä̧mi̧'ö̧ 'cucuächi'äji o'ca'amä, ucumä jacuojucu cui'cächaja. Ȩttä̧huä̧ttö̧ a̧'u̧cu̧nä̧ u̧huä̧ju̧ ote ttiyä'ija'anö cuiyajá, TÖ̧Ä̧NÄ̧HUA̧RÖ̧ adiu 'chopönä̧ jä̧cua̧'a̧nö̧. ²² Sacerdotetö̧ttö̧ juȩ'i̧pa̧ pä'äjita'anö jareönä ppa̧'a̧chi̧'ö̧mä̧ i̧tti̧mö̧cu̧ i̧yä̧cua̧. Ttiya pä'ö pähui'inö̧ta'anö ja̧u̧ o'cajuiyönä TTÖ̧Ä̧NÄ̧HUA̧RÖ̧ ttiyömä ku icuähuä jä̧cua̧'a̧. ²³ U̧huä̧ju̧ otettö Sacerdote iyömä o'cajuiyönä ku icuähuä jä̧cua̧'a̧, ja̧u̧mä̧ ttucuocö jä̧cuȩ. ²⁴ TÖ̧Ä̧NÄ̧HUA̧MÄ̧ pä'äjita'anö Moiséscu ucuocumä pä'inö: ²⁵ Aaróncö'inä i̧tti̧mö̧cö̧'i̧nä̧ ucuyocumä pa̧'a̧nö̧ pä'itö: Pi̧yȩ ja̧'a̧ suronä jȩtto̧mȩnä̧ hueähui'inö̧mä̧: Suronä jȩtto̧mȩnä̧ i̧yä̧hua̧rö̧mä̧ TÖ̧Ä̧NÄ̧HUA̧ ä'ca jo̧mȩttö̧ ku icu ttiyä'ijomettö̧ cuä'ö icuähuäcua'a. Juiyo ro̧ö̧ jä̧cuȩ. ²⁶ Sacerdote suronä jȩä̧cuä̧huä̧nä̧ ku icu iyäjimä ucua pä'ötä jä̧cua̧'a̧. Ja̧u̧mä̧ u̧cuä̧cua̧ ro̧o̧mȩ ca̧ca̧cu̧ pä̧cuä̧huo̧mȩ ä'ca isarättö. ²⁷ Ji̧yȩtȩ idepänä mȩä̧huä̧chö̧ttö̧mä̧ mȩä̧huä̧chä̧ji̧mä̧ surojö juiyö jö̧nä̧tä̧ päi'ä̧cuȩ, ja̧'hua̧ta̧'a̧nö̧ i̧sa̧ ucuo ttö̧'ca̧tä̧huä̧ta̧nä̧ rihuächöttömä, ro̧o̧mȩttö̧ töcö tticua pä'ötä jä̧cuä̧ta̧, ucuoja 'cucuächi'äjä̧ta̧mä. ²⁸ Ja̧'hua̧nö̧ ja̧'a̧nä̧ reda'ca uriyu dattäjäyumä dö'ö tticua pä'ötä jä̧cua̧'a̧. Broncettö adicuäbanä dattöttömä quirö icu ajiya teoyanä 'ca̧'u̧ tticua pä'ö jä̧cua̧'a̧. ²⁹ Ya̧tȩ Sacerdote päi'önä hua̧mä̧ a̧'u̧cu̧nä̧tä̧'i̧nä̧ ucua pä'ö jä̧cua̧'a̧, isopäi'önä ja̧u̧mä̧ rö̧ä̧nä̧ ja̧'a̧ttö̧. ³⁰ Ja̧'hua̧nö̧ ja̧'a̧nä̧ suronä jȩttö̧ jähuänä iyähuä, ucuoja ro̧o̧mȩ ca̧ca̧cu̧ pä̧cuä̧huo̧mȩ riritta pä'ö tti'cächäjäcu idepämä ttiucua pä'ömä jo̧ca̧'a̧ jä̧cua̧'a̧. Kutä i̧cuä̧huä̧cuȩ.