¹ Ya̧tȩ suronä jȩö̧ttö̧mä̧ toäja'anä jiuähuoca'a ja̧u̧ jiähua pä'ö jättepäcu, toäjittö'inä ä̧ju̧cuä̧ji̧ttö̧'i̧nä̧ ja̧'hua̧nö̧ 'cuäopaji̧, ja̧u̧tä̧ jä̧cua̧'ä̧ huȩnȩ jua̧mä̧. ² Dios pi̧yȩmä̧ surojötó päinö̧ji̧nö̧ ya̧tȩ mȩö̧ttö̧mä̧, de'a i̧sa̧ 'corujuo'ächäjicö̧ ja̧'hua̧nö̧ jö̧ juiyöttömä ya̧tȩ päcäyä 'corujuo'ächäjicö̧, i̧sa̧ rȩjȩnä̧ do'äucö̧, ja̧'hua̧nö̧ ja̧'a̧nä̧ mȩa̧ päoca'anä mȩä̧huä̧chö̧ttö̧mä̧, ja̧u̧mä̧ surojönätä hua̧ ja̧'hua̧nö̧ ja̧'a̧ttö̧ huȩnȩtä̧ hua̧. ³ Ya̧tȩ surojö kunärö̧ pä̧'ä̧hua̧rö̧ mȩ'ö̧ttö̧mä̧, o'cajuiyönä surojönä pätecuächinömä, ja̧'hua̧nö̧ surojö ieruhua'anä jȩö̧ttö̧mä̧, ja̧u̧mä̧ huȩnȩ jö̧nä̧ jä̧cua̧ u̧huo̧huä̧chi̧'o̧mȩnä̧. ⁴ Ja̧'hua̧nö̧ ja̧'a̧nä̧ ya̧tȩ chutä ättö räopächönä suronä jȩchä̧cua̧sä̧ pä'ö amucuädöttömä, ja̧'hua̧nö̧ jo̧ca̧'a̧ adiutä jȩa̧ pä'ö amucuädöttömä, adiunä amucuädoca'atä ya̧tȩ i̧mi̧nä̧ jȩchä̧cua̧sä̧ pä'öttömä, ja̧'hua̧nö̧ ja̧'a̧nä̧'i̧nä̧ ja̧u̧ u̧huo̧juä̧chi̧'o̧ca̧'a̧ jo̧ttö̧mä̧, o'ca'atä u̧huo̧juä̧chi̧'ö̧ttö̧mä̧, ja̧u̧mä̧ huȩnȩtä̧ hua̧, ja̧'hua̧nö̧ suronä jö̧mä̧. ⁵ Ya̧tȩ pi̧yȩ jähuänä u̧huȩnȩcuä̧chö̧ttö̧mä̧, ji̧yȩtȩ suronä jȩä̧ji̧mä̧ ji'äu icua pä'ötä ja̧'a̧. ⁶ Ja̧'hua̧nö̧ jo̧mȩnä̧ ja̧u̧mä̧ suronä jȩä̧ja̧'a̧ u̧huȩnȩcuä̧chä̧ja̧'a̧ micuä jö̧nä̧ TÖ̧Ä̧NÄ̧HUA̧RÖ̧ iyähuä i'cächa pä'ö jä̧cua̧'a̧, ä̧ji̧mö̧ttö̧mä̧ isajurutä, oveja jö̧ttö̧'i̧nä̧, cabra jö̧ttö̧'i̧nä̧ suronä jȩä̧ji̧ micuä iyähuä jö̧nä̧ ja̧'hua̧nö̧ jo̧mȩnä̧ sacerdotemä ja̧u̧ suronä jȩä̧ji̧ jȩä̧chö̧nä̧ jȩä̧cua̧. ⁷ Ja̧u̧mä̧ oveja i̧tti̧rö̧ mitö ȩmä̧ pä'ömä jo̧ca̧'a̧ jä̧cua̧'a̧, ja̧'hua̧nö̧ jo̧mȩnä̧ ja̧u̧mä̧ suronä jȩä̧ji̧ micuä iyähuä jö̧nö̧mä̧ du'o ä̧ji̧mö̧ ta̧ju̧rö̧cö̧, unucutö̧ möäyotöröcö̧ i'cächa pä'ö jä̧cua̧'a̧ suronä jȩä̧ji̧ micuä TÄÖ̧Ä̧NÄ̧HUA̧RÖ̧ iya pä'ömä, ja̧'hua̧ta̧'a̧nö̧ koromä ku icu iyähuä'inä i̧'cä̧chä̧cua̧. ⁸ Ja̧u̧mä̧ sacerdoterö i'cächö i̧yä̧cua̧, ja̧u̧mä̧ ä̧cuo̧mȩnä̧mä̧ suronä jȩä̧ji̧ mi̧cuä jö̧nä̧ i̧yä̧cua̧, ja̧u̧mä̧ i̧sa̧rö̧mä̧ u meropö icua'anä 'toi'önä̧mä̧ jȩpö̧cö̧ jä̧cua̧. ⁹ Ja̧'hua̧nö̧ jȩpi̧'ö̧'ca̧ i̧sa̧ ucuojamä a̧'u̧cu̧nä̧tä̧ ririäcua̧ suronä jȩä̧ji̧ mi̧cuä iyähuo̧ca̧ i'esobänä̧mä̧ ja̧'hua̧nö̧ jȩpö̧ ku icu i̧yä̧huo̧ca̧ kada'ca ucuojä royamä jo'ädö i̧cuä̧cua̧. Pi̧yȩ ja̧'a̧ suronä jȩttö̧ micuähuächönä iyähuämä. ¹⁰ Ja̧u̧nu̧ o'ca'a todäre päi'önä iyö'anö ja̧'a̧ i̧sa̧ co'örö öäre ku'icu iyähuä päi'önä, pa̧'a̧nö̧tä̧ jȩcu̧'a̧ja̧ pä'ö rutäuta'anötä̧ ja̧'hua̧nö ja̧'a̧ttö̧ sacerdote hua̧tä̧ i̧sa̧ ucuoja riripu jȩä̧cua̧ ja̧u̧ suronä jȩ'ä̧ji̧mä̧, ja̧'hua̧nö̧ jo̧mȩnä̧tä̧ ro̧'ȩcuo̧cö̧ jä̧cua̧. ¹¹ Ja̧'hua̧nö̧ ja̧'a̧nä̧ mitö ȩmu̧ juiyöttö duhuo äjimu̧ tä̧ju̧ru̧cö̧ ja̧'hua̧nö̧ jo̧ juiyöttö unucutu̧ mu̧äyotö ta̧ju̧ru̧cö̧, ja̧u̧mä i'cächa pä'ö ja̧'a̧ 3.7 kg. jo̧mȩ harina adihuäjuäittö ku'icu iyähuä päi'önä suronä̧ jȩä̧ji̧ mi̧cuä päi'önä. Ja̧u̧mä̧ ötö juiyö'anö ja̧'a̧ a̧dȩja'i̧nä̧ ja̧hua̧ta̧'a̧nä̧ ameunä 'chopö'inä, ja̧u̧mä ttöäre iyähuä ja̧'a̧ surojönä̧ jȩttö̧ micuä päi'önä. ¹² Ja̧u̧mä̧ sacerdoterö i'cächö i̧yä̧cua̧, ja̧'hua̧nö̧ iyäcu sacerdotemä̧ ya'ute cacuopö ȩmä̧cua̧ iyähuä huȩnȩcuä̧chö̧ jö̧nä̧tä̧ ku icu iyähuomettö̧ TÖ̧Ä̧NÄ̧HUA̧RÖ̧ i̧yö ocuränä ku tticuäji o'cottömä. Pi̧yȩ ja̧'a̧ suronä jȩttö̧ jȩä̧chö̧nä̧ iyähuämä. ¹³ Sacerdotemä ya̧tȩ suronä jȩä̧ji̧ jȩä̧chö̧nä̧ jȩä̧cua̧, ja̧'hua̧nö̧ ja̧'a̧ ja̧u̧ ttö̧ja̧sa̧mä̧ suronä jȩä̧ji̧mä̧ jȩä̧chä̧cua̧. Ttiyomenä̧ ka̧cui̧pä̧ji̧mä̧ sacerdote u̧cuä̧ jö̧nö̧tä̧ jä̧cuȩ, u̧huä̧ju̧ otettö ttiyäji jö̧ttö̧'i̧nä̧." ¹⁴ Ja̧u̧nu̧ o'ca'a TÖ̧Ä̧NÄ̧HUA̧MÄ̧ Moiséscu ucuocumä pä'inö: ¹⁵ "Ya̧tȩ hueähuä huȩnȩ ucuotoca'a jö̧ttö̧mä̧ ja̧'hua̧ta̧'a̧nö̧ TÖ̧Ä̧NÄ̧HUA̧RÖ̧ iyähuäcu suronä jȩpö̧rö̧mä̧, ja̧'hua̧nö̧ ja̧'a̧nä̧ suronä jȩcha̧jä̧ pä'ömä jȩo̧ca̧'a̧nä̧, ja̧'hua̧nö̧ ja̧'a̧ttö̧ ja̧u̧mä̧ suronä jȩä̧ji̧ micuä jö̧nä̧ TÖ̧Ä̧NÄ̧HUA̧RÖ̧ iya pä'ö i'cächa pä'ö ja̧'a̧. Pi̧yȩ iyähuämä oveja ubo suropocörö ji̧nä̧ yo̧mȩtȩ ka̧cuä̧tö̧ttö̧; imicuämä 11.4 kg plata jo̧mȩnä̧ micuähuäcua̧, suronä jȩä̧ji̧ micuämä. ¹⁶ Ja̧u̧mä̧ TÖ̧Ä̧NÄ̧HUA̧RÖ̧ suronä jȩä̧ji̧ jähuämä iya pä'ötä jä̧cua̧'a̧, surojö jui̧'a̧tä̧ päi'a pä'ömä, ja̧'hua̧nö̧ jo̧mȩnä̧ ja̧u̧mä̧ jimöte jähuättömä yabonä̧nö̧ iya pä'ö jä̧cua̧'a̧ juhua'atäcu sacerdoterö'i̧nä̧. Ja̧'hua̧nö̧ jo̧mȩnä̧ sacerdotemä ja̧u̧ surojö jȩä̧ji̧mä̧ jȩä̧chö̧nä̧ jȩä̧cua̧, oveja uborö suronä jȩä̧ji̧ jähuänä micuähuächönä ja̧'hua̧nö̧ jo̧mȩnä̧tä̧ ja̧u̧mä̧ jȩä̧chä̧cua̧ surojö jȩä̧ji̧mä. ¹⁷ Ja̧'hua̧nö̧ ja̧'a̧nä̧ ya̧tȩ TÖ̧Ä̧NÄ̧HUA̧ pi̧yȩmä̧ surojuto pä'ö hueinönä ji̧yȩtȩ jȩ'ö̧ttö̧mä̧, Ieruhua'anä̧ jȩ'ö̧mä̧, ja̧u̧mä̧ yabocutä huȩnȩcuä̧chu̧ ja̧'huä̧nö̧ jö̧mä̧ chu̧nä̧tä̧ ki̧'ä̧cuä̧'a̧ ja̧u̧mä̧. ¹⁸ Oveja ubo suröjö jui'a̧rö̧ cui̧'cächa pä'ö ja̧'a̧ i̧micunä̧ ttoecuä'a ka̧cuä̧tö̧tö̧, Jitä micuähuometö'inä abonänö micuähua̧rö̧, ofrenda ja̧'i̧nö̧'a̧nö̧ ja̧'a̧ jö̧nä̧ Sacerdoterö huȩnȩcuä̧chu̧ja̧'a̧. Ja̧'hua̧'a̧nö̧ ja̧'a̧ ja̧u̧ Sacerdotemä jȩä̧cua̧ ieruhua'anä jȩ'ä̧ji̧mä̧ suronä jȩpo̧cö̧ jö̧nä̧tä̧ a̧mu̧cuädoca'anä jȩä̧ji̧mä̧, ja̧'hua̧ta̧'a̧nö̧ ja̧u̧mä̧ surojömä juiyunätä̧ ki̧'ö̧. ¹⁹ ji̧yȩtȩ ofrenda suronä jȩcuä̧huä̧ huȩnȩchu̧nä̧ jȩä̧ji̧mä̧, ja̧u̧mä̧ isopäi'önä i̧huȩnȩcuä̧chä̧cua̧ TÖ̧Ä̧NÄ̧HUA̧ ä'cattö'inä.''