¹ TÖ̧Ä̧NÄ̧HUA̧MÄ̧ Moisésrö ucuocumä pä'inö: ² Israel ttö̧ja̧rö̧ ji'ähui: Ya̧tȩ suronä jȩa̧ päoca ja̧'a̧nä̧ jȩö̧ttö̧mä̧, TÖ̧Ä̧NÄ̧HUA̧ pi̧yȩmä̧ jȩ'cuä̧tu̧cuó päinö jinö jȩö̧ttö̧, ja̧'hua̧ta̧'a̧nö̧ jȩttö̧ juiyönä ro̧ȩpi̧nö̧ jȩö̧ttö̧mä̧, pi̧yȩ jȩa̧ pä'ö ja̧'a̧. ³ Sacerdotetö̧ttö̧ jue'ipa̧ surojö jȩö̧ttö̧mä̧, ja̧u̧ jȩä̧ji̧ jähuänä ttö̧ja̧'i̧nä̧ ma̧ttä̧chö̧ttö̧mä̧, ja̧u̧mä̧ surojö jȩä̧ji̧ jähuänämä TÖ̧Ä̧NÄ̧HUA̧RÖ̧MÄ̧ päcäyä ubo mö̧ä̧ya̧ ötta'inä jui̧'a̧rö̧ iya pä'ö jä̧cua̧'a̧ suronä jȩä̧ji̧ micuä iyähuä jö̧nä̧mä̧. ⁴ Ja̧u̧mä̧ TÖ̧Ä̧NÄ̧HUA̧ ä'ca jo̧mȩ ca̧ca̧cu̧ pä̧cuä̧huo̧decu doächi'äcuähuomettö̧ päcäyä uborö i'cächipö, ja̧u̧ unä me'ö̧, TÖ̧Ä̧NÄ̧HUA̧ ä'ca jo̧mȩttö̧ cuä'ö icua pä'ö jä̧cua̧'a̧. ⁵ Sacerdote pojopö ku̧nä̧hua̧mä̧ päcäyä ucuoja a̧'u̧cu̧nä̧ ȩmo̧po̧'ö̧ TÖ̧Ä̧NÄ̧HUA̧ ö̧jo̧decu ȩpä̧cua̧. ⁶ Ja̧u̧ Sacerdotemä ödo'chenä i̧sa̧ ucuoja tu'ecuäcua̧ ja̧'hua̧nö̧ jȩpö̧ TÖ̧Ä̧NÄ̧HUA̧ ä'ca jo̧mȩttö̧, rö̧ȩnä̧ ro̧o̧mȩ i̧sa̧ ucuojamä a̧'u̧cu̧nä̧tä̧ sietenö̧ jo̧menä ririä̧cua̧. ⁷ Ja̧'hua̧nö̧ ja̧'a̧ Sacerdotemä i̧sa̧ ucuoja a̧'u̧cu̧nä̧ incienso ku icu i̧yä̧huo̧ca̧ ä̧ja̧ o̧na̧nä̧ tuhuepäcua̧ TÖ̧Ä̧NÄ̧HUA̧ Ä'cä jo̧mettö̧, ju̧huo̧ca̧mä̧ ca̧ca̧cu̧ ttö̧'ȩjo̧mȩ ko̧ca̧nä̧, ja̧u̧mä̧ ucuoja ki̧'o̧yamä k icu i̧yä̧huo̧ca̧ kada'ca ririäcua̧ ca̧ca̧cu̧ pä̧cuä̧huo̧mȩcu̧ doächi'äcuähuome ko̧ca̧nä̧. ⁸ Ja̧u̧mä̧ suronä̧ jȩttö̧nä̧ ku icu iyähuä päcäyä ö̧ä̧dȩmä̧ ȩmö̧ i̧cuä̧cua̧; ö̧'a̧dȩ ö'cäbiyunä bä̧rö̧'i̧nä̧ o'cajuiuyönä u̧huä̧sa̧nä̧ bä̧rö̧mä̧ cärö i̧cuä̧cua̧, ⁹ ö̧jä̧cuorä ote toterenä bä̧rö̧'i̧nä̧, abonä rö̧jö̧'i̧nä̧ ja̧'hua̧ta̧'a̧nö̧ atiyanä rö̧jö̧'i̧nä̧ ö̧jä̧cuorä otecutä ȩmö̧ i̧cuä̧cua̧. ¹⁰ O'cajuiyötä ȩmö̧ i̧cuä̧cua̧, ja̧'hua̧nö̧ päcäyärö emö i̧cu̧ huȩnȩ juiyönä kä̧cuä̧huä̧ jähuänä ttiyä'ijö jö̧ta'anö i̧yä̧cua̧. Ja̧u̧nu̧ o'ca'a Sacerdotemä ttiäre ku icu iyähuomettö ja̧u̧ jähuämä ku i̧cuä̧cua̧. ¹¹ Toro i̧jȩta̧'i̧nä̧ ja̧'hua̧ta̧'a̧nö̧ idepä o'cajuiyönä ko̧cui̧pä̧ji̧'i̧nä̧ u'inä̧ ja̧'hua̧ta̧'a̧nö̧ ö̧jä̧pi̧ya̧'i̧nä̧ ja̧'hua̧ta̧'a̧nö̧ öacuä jacuänä ko̧cu̧'i̧nä̧ ja̧'hua̧ta̧'a̧nö̧ ite'inä, ¹² O'cajuiyönä̧tä̧ toronä ko̧cu̧mä̧, ja̧u̧ ȩpä̧cua̧ o'cajuiyönä ä'ähuarätömä u̧mi̧cu̧ TTÖ chö̧ja̧ päö surojö juiyönä̧ aditö ku̧nä̧cuo̧mȩcu̧, a̧ya̧ri̧'osa ma̧o̧mȩcu̧; Jacuätömä ku tticuäcuotö ja̧u̧mä̧ ju̧huä̧nȩta̧ dau isodänä̧. Jahuätömä ku tticua pä'ö jä̧cua̧'a̧ ja̧u̧mä̧ a̧ya̧ri̧'osa mo̧ö̧nä̧ jȩtto̧mȩ jo̧mȩttö̧. ¹³ Israel ttö̧ja̧ o'catoi'önä suronä jȩtta̧ pättoca'anä suronä jȩttö̧ttö̧mä̧, jahuätö ttö̧ja̧mä jerupätö jahuätö surojö jȩttö̧mä̧ ja̧'hua̧ta̧'a̧nö̧ jȩpä̧tö̧ pä̧huä̧rö̧jö̧'a̧nö̧ TÖ̧Ä̧NÄ̧HUÄ̧ jȩ'cuä̧tu̧cuó pä'inö, ja̧'hua̧nö̧ ja̧'a̧ttö̧ huȩnȩ huotö, ¹⁴ Ja̧'hua̧nö jo̧mȩnä̧, jahuätö suronä jȩttä̧ji̧ ttu̧huo̧juä̧chi̧'o̧mȩnä̧mä̧, ttö̧ja̧ ca̧ca̧hui̧pu̧mä̧ toro mu̧ä̧ya̧rö̧ ku'icu iyähuä jȩtta̧ pä'ö ja̧'a̧ suronä jȩttä̧ji̧ mi̧cuähuächa pä'ö ja̧'hua̧ta̧'a̧nö̧tä̧ tti̧'cächa pä'ö ji̧nä̧ yo̧mȩtȩ pä'i'ö ucuocuäcuähuode ä'ca jo̧mȩ. ¹⁵ TTö̧ja̧ tturuhuotö tä̧mu̧mä̧ toro u'nä ttu̧mu̧pi̧yä̧nä̧ mȩttä̧cuo̧tö̧ TÖ̧Ä̧NÄ̧HUÄ ä'ca jo̧mȩttö̧. ja̧'hua̧nö̧ jȩpu̧ toromä cuä'ö tticuä̧cua̧ TÖ̧Ä̧NÄ̧HUÄ̧ ä'ca jo̧mȩttö̧. ¹⁶ Sacerdotehua̧ pojopö ȩmä̧hua̧mä̧ i'chächö'anö ja̧'a̧ päcäyä buo ucuoja ji̧nä̧yo̧mȩtȩ pä'i'ö ucuocuäcuähuodecu, ¹⁷ Ja̧'hua̧ta̧'a̧nö̧ Sacerdotemä ödo'che ucuojanä ta'epö ja̧u̧mä̧ ri̧ri̧'ä̧cua̧ ji̧mu̧tȩ ta'arenö jo̧mȩnä̧ ppa̧'a̧dö̧ TÖ̧Ä̧NÄ̧HUA̧ ö'cajo̧mȩ, ttö̧ȩcuä̧tä̧ ro̧mȩ. ¹⁸ Ja̧u̧mä̧ ji̧'chi̧cha̧nö̧ da̧huȩpä̧cua̧ päcayä ä̧ja̧ i̧sä̧nä̧nä̧ TÖ̧Ä̧NÄ̧HUA̧RÖ̧ ku'icu iyähuome ä'ca chä̧na̧nä̧, jua'amä ka̧'a̧ ji̧nä̧yo̧mȩtȩ pä'i'ö ucuocuäcuähuodenä̧, ja̧'hua̧ta̧'a̧nö̧ ja̧u̧mä̧ ucuoja dahuepä̧cua̧ ttiäre ku'icu iyähuome, jua'amä ka̧'a̧ ji̧nä̧yo̧mȩtȩ pä'i'ö ucuocuäcuähuode doächäcuähuome. ¹⁹ Ja̧u̧mä̧ i̧sa̧ ö̧ä̧dȩ'i̧nä̧ 'cui'ö icu ku iyähuomettötä̧ ku'i̧cui̧ä̧cua̧. ²⁰ Pi̧yȩtó Sacerdote tororö jȩá̧nö̧ jö̧mä. Tororö iyomenä suronä jȩä̧́ji̧ jȩa̧cha̧ pe'ö, ja̧'hua̧ta̧'a̧nö̧ jȩá̧cua̧ jo̧ú̧ tororömä, sacerdotemä i̧yä̧cua̧ ahuaruhuä suronä jȩttä̧ji̧ micuähuächönä , jähuätö soronä jȩttä̧ji̧ jȩa̧cha pe'ö. ²¹ Jo̧ú̧mä̧ ȩpä̧cua̧ tororö ä'ä́huärä i̧mi̧cu̧ ku'ú icua pe'ö ä̧cuo̧mȩnä̧ tororö ujuhuä'ita'anö. Pi̧yȩ ja̧cua̧'a iyähuä̧ cuä̧'i̧mä̧ o'cätoinä suronä jȩttä̧ji̧ jȩä̧cha pe'ö. ²² Ucuo kö̧nä̧rö̧ suronä jȩcha̧já̧ päoca'anä, koro jȩö̧ttö̧mä̧ TÖ̧Ä̧NÄHUA̧ DIOS jȩ'cua̧tö̧cu̧ó päinönö, jo̧'u̧tä̧ suronä jȩpu̧mä. ²³ Ja̧'hua̧nö̧ ja̧'a̧ttö̧ jo̧ú̧mä̧ suronä jȩä̧ji̧mä̧ ttö̧huo̧jä̧cu̧, jo̧ú̧mä̧ i'cächa pe'ö ka̧'a̧ cabra uborö uttä jui̧'á̧rö̧ cuä'ícu iya pe'ö. ²⁴ Ja̧u̧mä̧ cabra ubo unä 'chu̧huä̧dä̧cua̧ ja̧'hua̧nö̧ 'chu'ädö TÖ̧Ä̧NÄ̧HUA̧RÖ̧ ä'ca jo̧mȩttö̧ ku icu i̧yä̧hua̧rö̧ cuä'ö tticuä'ijomȩttö̧ cuä'ö i̧cuä̧cua̧. PI̧yȩ jä̧cua̧'a̧ suronä jȩtto̧mȩnä̧ iyähuä jä̧cuȩmä̧. ²⁵ Sacerdotemä i̧sa̧ ucuoja surojö jȩttö̧ micuä iyähuoya ȩmo̧po̧'ö̧ udo'chenä tu'ecu ku icu i̧yö̧huo̧ca̧ ä̧ja̧ o̧na̧nä̧ tu̧huȩpä̧cua̧, ja̧'hua̧nö̧ jȩpö̧ ja̧u̧mä̧ ku icu i̧yä̧huo̧ca̧ kada'ca to̧to̧ä̧cua̧. ²⁶ Ja̧u̧mä̧ ku icu i̧yä̧huo̧ca̧ huȩnö̧ ö̧a̧dȩmä̧ o'cajuiyötä ku i̧cuä̧cua̧, unichä̧rö̧ ttö̧ja̧ pä'ö iyähuä ö̧a̧dȩ ttiya jä̧'i̧ja̧'a̧nö̧. Sacerdotemä̧ ru̧hua̧ surojö jȩä̧ji̧ jähuänä micuähuächönä jȩä̧cua̧, ja̧'hua̧nö̧ jȩo̧mȩnä̧ ja̧u̧ ru̧hua̧ suronä jȩä̧ji̧mä̧ jȩpo̧cö̧ 'cua̧rö̧nä̧tä̧ pä̧i̧'ä̧cua̧. ²⁷ Ja̧tȩ ttö̧ja̧sa̧ suronä jȩ'a̧ päöca'anä jäyä jȩ'ö̧ttö̧mä̧, churutä pä̧huä̧rö̧jo̧mȩnä̧ TÖ̧Ä̧NÄ̧HUA̧ jȩcu̧'ä̧tu̧cua̧ päinomettö̧'i̧nä̧ i̧mi̧cu̧nä̧ jȩo̧ttö̧mä̧, ja̧'hua̧ta̧'a̧nö̧ suronä jȩpa̧ji̧sä̧ pä'ö u̧huo̧juä̧chi̧'ö̧ttö̧mä̧, ²⁸ ja̧'hua̧nö̧ jo̧mȩnä̧tä̧ juo̧juä̧chi̧'ö̧ suronä jȩä̧ji̧mä̧, chutä a̧mo̧nä̧tä̧, ja̧'hua̧nö̧ä̧ jo̧mȩnä̧tä̧ ja̧u̧mä̧ i̧'chä̧chä̧cua̧ cabra isajuru cuä'ö icua pä'ö, surojö'inä jui'ajuttu, chutä suronä jȩä̧ji̧ micuä päi'önä. ²⁹ Ja̧u̧ma̧ suronä jȩä̧ji̧ micuä iyäcu unä 'chu'ädö ja̧u̧ru̧ cuä'ö i̧cuä̧cua̧ surunä jȩö̧ micuä päi'önä ku'icu iya pä'ö. ³⁰ Sacerdote hua̧mä̧ ödo'chenä i̧sa̧ ucuoja ji̧'chi̧cha̧nö̧ ȩmö̧ päcäyä ä̧ja̧ i̧sä̧na̧nä̧ da̧huȩpä̧cua̧ ttiäre ku'icu iyähuome. Ja̧u̧mä̧ i̧huȩrä̧dä̧cua̧ i̧sa̧ ucuoja o'cajuiyönä ku'icu iyähuome kada'ca. ³¹ Jo̧u̧mä ö̧ä̧dȩ ȩmú̧ i̧cuä̧cua̧, ö̧ä̧dȩ ȩmi̧cuähuamä ttiyinö̧ kuicu surojö juiya pa'ö. Sacerdote u̧ju̧hua̧cua̧ kuicu iyähuome adiu a̧du̧nä̧ 'chopunä TÖ̧Ä̧NÄHUA̧RÖ̧. Sacerdote to̧ä̧rä̧cua̧ ttö̧ja̧sä̧rö̧ ja̧'hua̧ta̧'a̧nö̧ jo̧ú̧ suronä jȩä̧ji̧mä̧ jȩä̧chä̧cua̧'a̧. ³² Ya̧tȩ suronä jȩä̧ji̧ jȩä̧cha̧ pä'ö ovejarö cuäícö iya pe'ö i'cachöttömä, jo̧u̧mä̧ i̧'cä̧chä̧cua̧ oveja isajuru köttahuiyä jiajurö. ³³ Jo̧ú̧mä̧ i̧yä̧cuä̧'i̧nä̧ u̧mú̧ mȩä̧cua̧ ja̧'hua̧ta̧'a̧nö̧ cuä'ö́ icuä̧cua̧ suronä jȩä̧ji̧ jȩä̧chö̧nä̧ iya pä'ö kuhuícu iyähuomettö̧ jähuätö cuättäcuotö. ³⁴ Sacerdotemä i̧sa̧ ucuoja suronä jȩttö̧ jähuänä iyähuoya a̧'u̧cu̧nä̧ ȩmo̧po̧'ö̧ udo'chenä tu'ecu ku icu i̧yä̧hu̧yo̧ca̧ ä̧ja̧ o̧na̧nä̧ tu̧huȩpä̧cua̧ ja̧'hua̧ta̧'a̧nö̧ ja̧u̧mä̧ ku icu i̧yä̧huo̧ca̧ kada'ca ucuojamä o'cajuiyötä totoä̧cua̧. ³⁵ Ja̧u̧mä̧ i̧sa̧ ö̧a̧dȩmä̧ o'cajuiyötä ȩmö̧ i̧cuä̧cua̧, huȩnȩ juiyönä ttö̧ja̧ pä'ö ku icu iyähuä oveja ö̧a̧dȩ ȩmö̧ tticua'a jä̧'i̧ja̧'a̧nö̧tä̧, ja̧'hua̧ta̧'a̧nö̧ ku icu iyähuome huä̧mȩ huȩjö̧ TÖ̧Ä̧NÄ̧HUA̧RÖ̧ ocuränä ku icu iyähuämä, sacerdotemä ku i̧cuä̧cua̧. Sacerdotemä suronä jȩä̧ji̧ jȩä̧chö̧nä̧ jȩä̧cua̧ ja̧'hua̧nö̧ jȩo̧mȩnä̧ ja̧u̧ ttö̧ja̧sa̧mä̧ suronä jȩä̧ji̧mä̧ jȩpö̧cö̧ päji 'cua̧rö̧nä̧tä̧ to̧ä̧cua̧.