¹ Isopäi'önä ya̧tȩ ttö̧ja̧sa̧ adiunä ja̧ pä'ö iäre iyähuä iyöttö ä̧ji̧mu̧ttö̧ ya̧tȩrö̧, ubo'cö ja̧'hua̧nö̧ jö̧ juiyöttö'inä isaju'cö̧, ja̧u̧mä̧ cuä'ö iyö'anö ja̧'a̧ ttötta'inä jui'ätöttö TÖ̧Ä̧NÄ̧HUA̧ ä'cajomemä. ² Ja̧u̧ cuä'ö i̧cuä̧cua̧ unä 'chu'ädö ji̧nä̧ yo̧mȩtȩ ca̧ca̧cuä̧rö̧ päi'äcuähuode apate'ä'cattö cuä'ö i̧cuä̧cua̧. Ja̧u̧nu̧ o'ca'a Arón i̧tti̧mu̧mä̧ i̧sa̧ ucuoja 'chitäcuotö ku'icu iyähuome ppeyänä. ³ Ya̧tȩ i̧sa̧rö̧ cuä'ö icu surojö juiya pä'ö TTÖ̧Ä̧NÄ̧HUA̧RÖ̧ iyähuä ocuränä ku'icu iyöttömä. Ja̧u̧ ö̧a̧dȩmä̧ todeunä ka̧'a̧ idepä jacuänä, ⁴ ja̧'hua̧ta̧'a̧nö̧ tta'arenä acué ppeädome'inä ö̧ä̧dȩ ppeyänä ko̧cu̧'i̧nä̧ abo iso'tänä'inä, atiya'inä, ja̧u̧ acué ppeädome ö̧ä̧dȩcu̧ o'cajuiyönä huihuatö icuä̧cua̧. ⁵ Arón i̧tti̧mu̧tä̧ ku tticuäcuotö i̧sa̧rö̧ ku iyähuome, dauhuiyättö ocurä cuome huä̧mȩ. Ja̧'hua̧nö̧ jo̧mȩnä̧ ö̧a̧mȩ adiunä 'chopäcua'a TÖ̧Ä̧NÄ̧HUA̧RÖ̧MÄ̧; Ja̧'hua̧nö̧ jo̧mȩnä̧tä̧ ocuränä ku iyähuä jä̧cua̧'a̧ ja̧u̧ru̧mä̧. ⁶ Isopäi'önä ya̧tȩ ttö̧ja̧sa̧ ä̧ji̧mu̧ttö̧ TTÖ̧Ä̧NÄ̧HUA̧RÖ̧ i̧sa̧rä̧ ku'icu iyähuä surojö juiyä pä'ö iyá pä'öttömä; ubo'cö ja̧'hua̧nö̧ jö̧ juiyöttö'inä isaju'cö̧, ja̧u̧mä̧ cuä'ö iyö'anö ja̧'a̧ ttötta'inä jui'ätöttö. ⁷ Oveja i̧tti̧ttö̧ cuä'ö icu iyöttömä, ja̧'hua̧nö̧tä̧ TTÖ̧Ä̧NÄ̧HUA̧ ä'cajome iyö'anö ja̧'a̧. ⁸ Ja̧u̧ cuä'ö i̧cuä̧cua̧ unä 'chu'ädö ji̧nä̧ yo̧mȩtȩ ca̧ca̧cuä̧rö̧ päi'äcuähuode apate'ä'cattö cuä'ö i̧cuä̧cua̧. Ja̧u̧nu̧ o'ca'a Arón i̧tti̧mu̧mä̧ i̧sa̧ ucuoja 'chitäcuotö ku'icu iyähuome ppeyänä. ⁹ Ya̧tȩ ttö̧ja̧sa̧ surojö juiyönä ö̧ja̧ pä'ömä i̧sa̧rö̧mä̧ ocuränätä̧ ku'icu i̧yä̧cua̧ TTÖ̧Ä̧NÄ̧HUA̧RÖ̧MÄ̧. Ö̧a̧dȩ'i̧nä̧, I̧hui̧ri̧ppa̧ päjure ö̧a̧dȩ'i̧nä̧ öcäcä kada'canä 'cuiocua'a, Ja̧'hua̧ta̧'a̧nö̧ jacuänä o'cajuiyönä ö̧ä̧dȩ'i̧nä̧, ja̧'hua̧ta̧'a̧nö̧ ö̧a̧dȩ jua'a jacuä ko̧cu̧'i̧nä̧, ¹⁰ ja̧'hua̧ta̧'a̧nä̧ ta'are 'tacué ppeädome ko̧cu̧ ö̧ä̧dȩ'i̧nä̧ juȩnȩ ppeyänä ko̧cu̧ ö̧ä̧dȩ'i̧nä̧, ja̧u̧mä̧ ko̧cua̧'a̧ abo iso'tänä ja̧'hua̧ta̧'a̧nö̧ ö'cäbiyunä'inä, ja̧u̧ acué ppeädome ö̧ä̧dȩcu̧ o'cajuiyönä huihuatö'icuä̧cua̧. ¹¹ Ja̧u̧nu̧ o'ca'a, sacerdotehua̧ ku i̧cuä̧cua̧ ttiäre iyähuome i̧yä̧cua̧ TÖ̧Ä̧NÄ̧HUA̧RÖ̧. ¹² Ttö̧ja̧sa̧ ubo ku'icu iya pe'ö hua̧mä̧ cabra jö̧ttö̧mä̧, jo̧u̧mä̧ TÖ̧Ä̧NÄHUA̧ ö̧jo̧me i̧yä̧cua̧. ¹³ Jo̧ú̧mä̧ u̧mú̧ mȩhuö̧́ cabra unä jȩcua̧ ja̧'hua̧nö̧ ja̧'a̧ttö̧ cuäö́ i̧cua̧cua̧ TÖ̧Ä̧NÄHUA̧ ö̧jode ä'cattö. Aarón i̧tti̧mu̧mä ririttäcuotö ucuoja kuicu iyähuä'ca jäyänä. ¹⁴ Ttö̧ja̧sa̧ ubomä kuícu i̧yä̧cua̧ ucuränä TÖ̧Ä̧NÄHUA̧RÖ̧. Jo̧ú̧mä̧ ö̧á̧dehua ȩmú̧ i̧cuä̧já̧ jacuänä ka̧cú̧ ja̧'hua̧ta̧'a̧nö̧ ö̧á̧dehua o'ca juiyönä jacuä́ tö'cöhuächönä ka̧cu̧'i̧nä̧ . ¹⁵ Jo̧u̧mä̧ ȩmú̧ i̧cuä̧cua̧ ta'are ijäcuräte abó päte'ö ka̧cú̧ ja̧'hua̧ta̧'a̧nö̧ ö̧á̧dȩ jo̧u̧cu̧ ka̧cu̧'i̧nä̧, jo̧u̧tä̧́cu̧ ȩmú̧ i̧cuä̧cua̧ atiya'inä. ¹⁶ Kuhuö́'i̧cuä̧cua̧ TÖ̧Ä̧NÄHUA̧RÖ̧ iya pä'ö sacerdotemä jo̧ú̧ o'cajuiyönä kuicu iyähuä'canä, a̧dö̧nä̧ 'chopunä. O'ca juiyönä ö̧á̧dȩmä̧ TÖ̧Ä̧NÄHUA̧RÖ̧TÄ̧ iyähuä. ¹⁷ Pi̧yȩ́ hueähuämä cuahuaruhuä o'cotö'inä ttö̧jo̧mȩpunä ucutöttö ttirecua ttȩmomenämä̧, jähuätö'inä ttöcuó ö̧á̧dȩmä̧ ja̧'hua̧ta̧'a̧nö̧ ucuja'i̧nä̧.