¹ Pi̧yȩ hueähuä huȩnȩmä ttiäre iyähuä ja̧'a̧ hu̧ene ttu̧ju̧nä̧ro̧mȩnä̧. ² ja̧'hua̧'a̧nö̧ ja̧'a̧ttö̧ surojö juiyötó ja̧u̧mä̧. Jahuätö huȩnȩ huotömä ttiäre iyähuämä cuättö'anö ja̧'a̧ ä̧tȩcuä̧nö̧ cuähuomȩttö̧, ja̧hua̧'a̧nö̧ ja̧'a̧ttö̧ jahuätomä uhuoja ririttö'anö ja̧'a̧ ku'icu iyähuä'ca ppeyänä. ³ O'cajuiyönä ö̧'ä̧dȩmä̧ ttiyapä'ö ja̧'a̧: I̧hui̧ri̧pa̧ ö̧a̧dȩ'i̧nä̧ ja̧'hua̧ta̧'a̧nö̧ ö'acuä ö'cäbiyu jacuä u̧cua̧sa̧ ö̧a̧dȩ'inä, ⁴ Ta'arehuäi öjacuorä ote' inä ja̧'hua̧ta̧'nö ja̧u̧ ö̧a̧dȩ'inä abosottä ppeyenä ko̧cu̧'inä, ja̧'hua̧ta̧'a̧nö̧ atiya a̧tto̧pä̧rö̧'inä, öjäcuorä ote'inä, o'cajuiyönä̧tä̧ siepu icuä'cuäcua'a pi̧yȩmä̧. ⁵ Sacerdote hua̧mä̧ ocuränä ku'icu iya päö ja̧'a̧ öäre iyäcuämä Ö̧Ä̧NÄ̧HUA̧RÖ̧. Pi̧yȩmä̧ surojö ttu̧ju̧nä̧rö̧ micuä päinä iyäcuä jö̧ ja̧'a̧. ⁶ Sacerdote huotötö ya̧cu̧nä̧mä̧ tucua päö ja̧'a̧ pi̧yȩ i̧sa̧rö̧ cuä'ö iyäcuätömä. Ttucua päö ja̧'a̧ surojö'inä juiyomȩttö̧ surojö juiyö ja̧'a̧ttö̧. ⁷ suronä jȩttä̧ji̧ micuä jö̧nä̧ ttiäre iyähuämä jua'amä ja̧'a̧ suronä jȩttä̧ji̧ micuä jo̧nä̧tä̧. Ja̧u̧ hueähuätä jȩtta̧ pä'ö ja̧'a̧ ta'arecue'önä. Sacerdote hua̧tä̧ ja̧'a̧ ja'huätö suronä jȩttä̧ji̧ ttiya'ä toa'anö hua̧mä̧. ⁸ Sacerdote hua̧tä̧ ja̧'a̧ o'catoi'önä ttäre ku'iyähuome toö'anö̧ hua̧mä̧, ja̧u̧tä̧ ja̧'a̧ i̧sa̧rö̧ ku'icu tiyö o'ca'a i̧jȩta̧ u̧ju̧nä̧rö̧'a̧nö̧ hua̧mä̧. ⁹ Ttiäre iyähuä u̧huä̧ju̧ otemä ȩttä̧huä̧cua̧'a̧ ȩttä̧huäbanä̧tä̧, ja̧'hua̧nö̧ ja̧'a̧ttö̧ ya̧cu̧nä̧ ttiäre iyähua pä̧rä̧huä̧bä̧nä̧ dahuähua'a jö̧ttö̧'i̧nä̧ ja̧'hua̧ta̧'a̧nö̧ ȩttä̧huä̧bä̧nä̧ jö̧ttö̧'i̧nä̧ sacerdote hua̧rö̧tä̧ pätecuächäcua'a iya pä'ömä. ¹⁰ Ya̧cu̧pö̧nä̧ ttiäre iyähuä otemä, jo'ö otecö̧ ja̧'hua̧ta̧'nö̧ a̧dȩjacu huihuacuä ote'cö̧, yoräteunätä iyähuäcua'a Arón i̧tti̧mö̧ o'cotörö. ¹¹ Pi̧yȩ ja̧'a̧ huedumä cuiyätucua pe'ö surojöttö juiyönä pä'iönä cu̧jä̧tu̧cua̧ pe'ö, tti̧yä̧cuȩmi̧ ttö̧ja̧ TÖ̧Ä̧NÄHUA̧RÖ̧. ¹² Ya̧tȩ i̧yöttömä adihuarö pä'ö, ja̧'hua̧nö̧ ja̧'a̧ttö̧ jo̧u̧mä̧ i̧yä̧cua̧ cuäicu iyähuäcu pä̧ a̧dȩcu̧tä̧ ppu̧ä̧mu̧ juiyönä adicuäcu, pä̧ bäreunä a̧dȩcu̧tä̧ adicuä ppu̧a̧mu̧ juiyönä ja̧'hua̧ta̧'a̧nö̧ pastelenä adicuä a̧dȩcu̧tä̧ ppu̧ä̧mu̧ juiyönä. ¹³ Ja̧'hua̧nö̧ ja̧'a̧ttö̧, eseunö̧ ttiyäcuotö, jo̧u̧ iya pe'ö jö̧mä̧ ja̧'hua̧nö̧ iyömä surojö juiya pä'ö jö̧ pä̧ppä̧ ppu̧ä̧mu̧cu̧ adicuätä ja̧'a̧. ¹⁴ Jo̧u̧mä̧ i̧yä̧cua̧ ji̧yȩtȩ ya'acunä pi̧yȩ i̧yä̧cua̧ cuäicu iyähuäcu ö̧jȩpu̧nö̧ TÖ̧Ä̧NÄHUA̧RÖ̧. Sacerdoterötä hue'ö́ könähuä̧ ucuoja riria pe'ö kuhuicu iyahuome surojö juiyönä ttiya pe'ö. ¹⁵ Ya̧tȩ ttö̧ja̧sa̧ huȩnȩ juiyönä kä̧cuä̧huä̧nä Ö̧Ä̧NÄ̧HUA̧CU̧ adiu eseu ö̧ja̧ pä'ö, i̧sa̧ idepä iyäjimä iyäji mo̧ro̧tä̧ ucui'a pä'ö jä̧cua̧'a̧. Ja̧u̧mä̧ koro mo̧ro̧ ucua pä'ömä yorö'iso u̧ju̧ni̧'a̧ pä'ömä juiyäcua'a. ¹⁶ Ja̧'hua̧nö̧ ja̧'a̧nä̧ i̧sa̧rö̧ cuä'ö icu ji̧yȩtȩ päcumä jȩchä̧cua̧sä̧ pä'ö iyöttö'inä, ucurutä pä̧huä̧rö̧jo̧mȩnä̧ cuiyuttö'inä i̧sa̧rö̧ cuä'ö icu cuiyäji mo̧ro̧tä̧ cucui'a pä'ö jä̧cua̧'a̧, ja̧'hua̧nö̧ ja̧'a̧nä̧ cucuomenä ka̧cui̧pä̧ji̧mä̧ koro mo̧ro̧ ttucua pä'ötä jä̧cuȩ. ¹⁷ Ja̧'hua̧nö̧ ja̧'a̧nä̧ i̧sa̧ cuä'ö tticuäjäcu idepä ka̧cui̧pä̧ji̧ttö̧ huäbodäcuä mo̧ro̧ jo̧mȩnä̧ kö̧ttö̧mä̧ kutä i̧cuä̧huä̧cuȩ. ¹⁸ Huȩnȩ juiyönä ttö̧ja̧ pä'ö I̧sa̧ cuä'ö icu i̧yä̧hua̧ idepä huäbodäcuä mo̧ro̧ päi'önä ka̧cu̧ ucuttumä, ȩmä̧huo̧cö̧ jä̧cua̧ ja̧'hua̧ta̧'a̧nö̧ iyäji'inä ȩmä̧huo̧ca̧'a̧ jä̧cua̧'a̧, surojö jö̧nä̧tä̧ to̧ä̧cuä̧huä̧cuȩ juhua'atäcu ja̧u̧ cuäjimä suronä jȩpä̧ji̧ pä'ötä huȩnȩcuä̧cua̧. ¹⁹ Ji̧yȩtȩ surojö idepänä mȩä̧huä̧chä̧ji̧ttö̧mä̧ ttucua pä'ömä jo̧cö̧ jä̧cuȩ. Kutä i̧cuä̧huä̧cuȩ, idepä ka̧cui̧pä̧ji̧mä̧, surojömä juiyö ja̧'a̧ttö̧ ttucua pä'ötä jä̧cuȩ. ²⁰ Ja̧'hua̧nö̧ ja̧'a̧nä̧ ttö̧ja̧sa̧ su̧ro̧pa̧ i̧sa̧ cuä'ö tticuäjäcu idepä huȩnȩ juiyönä ttö̧ja̧ pä'ö TÖ̧Ä̧NÄ̧HUA̧RÖ̧ ttiyäji curumä, ahuaruhuättömä 'cä̧'ȩpö̧ i̧cuä̧huä̧cua̧. ²¹ Ya̧tȩ ji̧yȩtȩ surojö kä̧cu̧nä̧ ttö̧ja̧sa̧rö̧ jö̧ttö̧'i̧nä̧, de'a i̧sa̧rö̧ jö̧ttö̧'i̧nä̧, korojuei jö̧ttö̧'i̧nä̧ ja̧'hua̧ta̧'a̧nö̧ su̧ro̧tä̧cuä̧huä̧nä̧ jö̧ttö̧'i̧nä̧ mȩ'ö̧rö̧mä̧ juhua'atäcu ji̧yȩtȩ i̧sa̧ cuä'ö tticuäcu idepä huȩnȩ huiyönä ttö̧ja̧ pä'ö TÖ̧Ä̧NÄ̧HUA̧RÖ̧ ttiya pä'ö ku̧nä̧huä̧ curumä, ahuaruhuättömä 'cä̧'ȩpö̧ i̧cuä̧huä̧cua̧. ²² Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ Moiséscu ucuocumä pä'inö: ²³ Israel ttö̧ja̧rö̧ ji'äumä pa̧'a̧nö̧ pä'itö: Ucutumä päcäyä ö̧a̧dȩ'i̧nä̧, oveja ö̧a̧dȩ'i̧nä̧ ja̧'hua̧ta̧'a̧nö̧ cabra ö̧a̧dȩ'i̧nä̧ cucuätucua pä'ömä jo̧ca̧'a̧. ²⁴ I̧sa̧ a̧mö̧nä̧ pa̧ja̧tö̧ 'corujuo'ächäji ö̧a̧dȩcö̧, I̧sa̧ de'a isotö yu̧yu̧pö̧ tticuäjäcu öademä̧ korojuei ttadita pä'ötä pätetö ku̧nä̧huä̧cuȩ, ja̧'hua̧nö̧ ja̧'a̧nä̧ ja̧u̧mä̧ cuäcuähuocö jä̧cuȩ. ²⁵ Ya̧tȩ i̧sa̧ ö̧a̧dȩ ocuränä ku icuTÖ̧Ä̧NÄ̧HUA̧RÖ̧ ttiya pä'ö ku̧nä̧huä̧ curumä, ahuaruhuättömä 'cä̧'ȩpö̧ i̧cuä̧huä̧cua̧. ²⁶ Ucutumä i̧sa̧ ucuojamä yoriso cucuätucuä cuojusodetucuttömä, ppiyuhuä ucuoja jö̧ttö̧'i̧nä̧ i̧sa̧ ka̧ra̧ ucuoja jö̧ttö̧'i̧nä̧. ²⁷ Ya̧tȩ i̧sa̧ ucuoja curumä, ahuaruhuättömä 'cä̧'ȩpö̧ i̧cuä̧huä̧cua̧." ²⁸ Ja̧'hua̧nö̧ ja̧'a̧ttö̧ ucuocu päinö Moiserö: ²⁹ "Ucuocui jiähui Israel ttö̧ja̧rö̧: Chuttä amänä surojö juiya pä'ö i̧sa̧rö̧ cuä'ö iyähuä iyö'anö ja̧'a̧ Ö̧Ä̧NÄ̧HUA̧RÖ̧ i'chächö'anö ja̧'a̧ juorötä 'cä̧'ȩpö̧ cuä'ö icu iyähuättö TÖ̧Ä̧NÄ̧HUA̧RÖ̧. ³⁰ TÖ̧Ä̧NÄ̧HUA̧RÖ̧ iyähuämä ocuränä ku'icu ttiyö'anö ja̧'a̧ ttämonä ttumunä i'cächö. Ja̧u̧mä̧ i'cächö'anö ja̧'a̧ amucattö ö̧a̧dȩ'i̧nä̧, amuca isäbämä öäre iyähuä TÖ̧Ä̧NÄ̧HUA̧ ä'ca jo̧mȩttö̧ adihua pä'ö. ³¹ Sacerdote hua̧mä̧ ku'icu iyähuä'ca ko̧mȩttö̧ ku'icuäcua̧ ö̧a̧dȩmä̧, ja̧'hua̧'a̧nö̧ ja̧'a̧nä̧ amucamä Aarontä̧ i̧tti̧mu̧cu̧ ȩmä̧cua̧. ³² Ucutumä cuiyätucu'anö ja̧'a̧ u̧huo̧jua̧'a̧nä̧ öjatö sacerdoterömä cuiäretucu iyähuä jä̧ji̧mä̧. ³³ Sacerdote hua̧, Arón i̧tti̧mu̧tö̧ ya̧tȩ, huȩnȩ juiyönä ttöja pä'ö i̧sa̧ ucuoja iyähuä iyömä ja̧'hua̧ta̧'a̧nö̧ ö̧a̧dȩ'i̧nä̧ ja̧u̧mä̧ ȩmä̧cua̧ u̧huo̧jua̧'a̧nä̧ a̧na̧nȩ idepä'ca iäre iyäji micuä. ³⁴ Ja̧hua̧nö̧ ji̧yä̧cu̧ Israel ttö̧ja̧tä̧ jä̧cua̧'a̧ pä'ösä ttömä; Ttiäre iyähuä ttiya pä'ö amöca isäbättö'inä ja̧'hua̧ta̧'a̧nö̧ abó iso'tättö'inä, Ja̧u̧ma̧ iyähui'ina'a̧ sacerdotehua̧ Aronrö̧, Ja̧'hua̧ta̧'nö̧ i̧tti̧mö̧rö̧'i̧nä̧ yoräteunätä̧. ³⁵ Pi̧yȩ ji̧na̧'a̧ Aarónrö̧ ja̧'hua̧ta̧'a̧nö̧ i̧tti̧murö̧'i̧nä̧ iyähui'inömä TÖ̧Ä̧NÄ̧HUA̧RÖ̧ ku'icu iyähuä päi'önä ji̧nö̧mä̧, ji̧yȩnö̧ mo̧ro̧ Moisés i̧jȩpi̧nö̧ TÖ̧Ä̧Ö̧NÄ̧HUA̧ ä'cajome sacerdote huotö tta̧di̧tä̧cuä̧. ³⁶ Pi̧yȩ ji̧na̧'a̧ TÖ̧Ä̧NÄ̧HUA̧ hue'inömä Israél ttö̧ja̧rö̧ ttiya pä'ö, Ji̧yȩnö̧ mo̧ro̧ CHUTÄ sacerdote huotörö u'cucuetinö pä̧nä̧. 'Cuäopönätä̧ jahuätö ttähuaruhuärö 'chä̧cuä̧ ji̧na̧'a̧. ³⁷ Pi̧yȩtä̧ huedömä ku'icu iyähuä, ö̧huä̧ju̧ trigottö iyähuä, suronä jȩttä̧ji̧ jȩä̧chö̧nä̧ iyähuä, suronä jȩpä̧ji̧ i̧yä̧cuȩ'i̧, ucuotönö iyähuä, ja̧'hua̧ta̧'a̧nö̧ cuäicu iyähuä ttiya pe'ö surojö juiyönä päi'a pe'ö, ³⁸ TÖÄNÄHUA̧ iyö hue'inö̧ Moisesrö Sinaí inähuättö, jo̧ú̧ hueínö mo̧ró̧ Israel ttö̧ja̧rö̧ ttiya pe'ö cuäicu iyahuä TÖ̧Ä̧NÄHUA̧RÖ̧ Sinaí pämäroppä dauhuiyä juiyä'cattö̧.