¹ Ja̧'hua̧nö̧ ja̧'a̧ Job ädätö pä'inö: ² Ttömä ttö̧ȩpä̧rö̧sä̧ ucú päcumä. Ja̧'hua̧nö̧ ja̧'a̧ttö̧ ¿Tta̧a̧nö̧ ujuruhua'anötö̧ ttöjasämä DIOS ro̧ȩpu̧mä̧? ³ Ya̧tȩ juo̧u̧cu̧ päächäcuä'uttömä pa̧'a̧nö̧ ji̧yä̧cu̧ pääjisä pa pe'ömä juiyaa ja̧'hua̧nö̧ ri̧ȩnä̧ jö̧ttö'i̧nä̧ ji̧yȩtȩ'i̧nä̧ adati̧yä̧cua̧. ⁴ Diosmä amiso'quinämä huo̧juä̧huä̧ huȩnȩ ku̧nä̧rö̧ ja̧'hua̧ta̧'a̧nö̧ ujurumä ju̧ru̧hua̧; ¿Dijä̧ttö̧ ya'utenä Ja̧u̧rö̧ 'qui'ädäcuäu to'ija̧'a̧cu̧ pä'inömä juhua'atäcu jȩö̧mä̧ isojuo'epinömä?-- ⁵ Ja̧u̧tä̧ ja̧'a̧ ya̧tȩrö̧'i̧nä̧ jiähuoca'a rö̧ä̧nä̧ ö̧ra̧huä̧ri̧'o̧mȩnä̧mä̧ mö̧ä̧'ca kara'acu pporädö ku̧nö̧mä̧ --- ⁶ Ja̧u̧mä̧ rȩjȩmä̧ boreönä jȩpö̧ ja̧'a̧ ja̧'hua̧nö̧ jȩpö̧ 'chu̧huä̧ro̧mȩmä̧ tti̧ȩpö̧nä̧ jȩpö̧. ⁷ Ja̧u̧ Diostä ja̧'a̧ kä̧hua̧rö̧ cuä̧rä̧mä̧ päö'acuätä jȩi̧yä̧cu̧mä̧; ja̧'hua̧ta̧nö̧ si̧ri̧'cörä'inä, kä̧dȩpu̧ juiyönä jȩpö̧mä̧, ⁸ Chutä katätä mo̧ro̧jä̧'i̧nä̧ te'ädö ja̧'hua̧ta̧'a̧nö̧ aje ppau obi'i̧nä̧ kä̧dö̧ icumä, ⁹ ja̧u̧mä̧ uhuäbe'inömä̧ äteyu siri'corö'inä, oyunä ttu̧rȩju̧nä̧ jȩpö̧mä̧. ¹⁰ Ja̧u̧ Diostä ja̧'a̧ bäreö jähuä jȩpö̧mä̧, ttu̧huo̧jui̧pö̧ juiyönä jö̧'i̧nä̧ ja̧'hua̧ta̧nö̧ jȩtto̧cö̧ jähuä pa̧ja̧cuä̧ juiyö'i̧nä̧. ¹¹ Topittö̧, Ja̧u̧mä ttö chippeyänä 'cuä'opö ja̧'hua̧nö̧ 'cuäopa'anä̧ ttömä tochococu, koromä otonä 'cuä̧'opu ja̧'hua̧nö̧ 'cuäopa̧'a̧nä̧ chu̧huo̧jui̧pö̧ juiyönä hua̧. ¹² Ja̧u̧ ji̧yȩtȩ 'choiputtömä ¿Dijä̧ttö̧ ja̧u̧rö̧ jȩ'cuä̧ päö'anö hua̧? ¿Dijättö ja̧u̧rö̧ päö'anö̧ hua̧mä̧? ¿Ucumä däje jȩ'cuä̧ttö̧ jö̧nä̧? ¹³ Dios ö̧'ä̧i̧mä̧ ȩmö̧ icuocö jä̧cua̧; Rahabrö ppä'ädätömä Ja̧u̧ ä'ca jo̧mȩttö̧mä̧ ttucuomä̧ te'ähuocotö. ¹⁴ ¿Tta̧'a̧nö̧ jö̧nä̧tä̧ Ja̧u̧ru̧mä̧ chädäta'anö̧ttö̧, ji̧yȩtȩ Ja̧u̧cu̧ chucuocua'a̧nö̧ jö̧ jȩpö̧ chu̧ju̧na̧'a̧nö̧ tä̧ji̧? ¹⁵ Adihuä i̧sa̧ chuttö'i̧nä̧, Ja̧u̧ru̧mä̧ chädätö juiyö'anö ja̧'a̧; ttädätajueimä röji pähuä ttö̧ja̧sa̧ rerö̧jö̧nä̧ toattö pä'ötä jädepö'a̧nö̧ ja̧'a̧. ¹⁶ Ji̧nä̧ Ja̧u̧ru̧ huochöttö'i̧nä̧, Ja̧u̧mä̧ ädäta'anä, ttömä Ja̧u̧ru̧ huochömä ä̧ju̧cuä̧cu̧sä̧ pä'ömä chesetö juiyö'anö̧ ja̧'a̧. ¹⁷ Isopäi'önä Ja̧u̧mä̧ rö̧ä̧nä̧ kä̧ru̧'co̧huoppanä̧ kȩdö̧ icuäcusä ja̧'hua̧nö̧ jo̧mȩnä̧ chuttahuiyämä koro'i̧nä̧ jo̧ca̧'a̧nä̧ yabonötä̧ rö̧ä̧cha̧'a̧. ¹⁸ Ja̧u̧mä̧ yorö'isä a̧'u̧cu̧nä̧tä̧'i̧nä̧ juächu juiyönä jȩä̧cu̧sä̧, ja̧'hua̧nö̧ jȩtta̧jueimä Ja̧u̧mä̧ reö jähuätä jä̧huä̧pä̧ya̧ susuhuächönä jȩä̧cu̧sä̧. ¹⁹ Ttujuru jähuä jö̧ttö̧mä̧, ¡topätucui ja̧u̧mä̧ ju̧ru̧hua̧ ja̧'a̧! Ji̧yȩtȩ adihuomenä̧ jȩä̧cuä̧cuä̧ jö̧ttö̧mä̧, ¿Di̧jä̧ttö̧ ä̧tȩpö̧'a̧nö̧ hua̧mä̧? ²⁰ Ttömä surojömä̧ jȩpo̧cö̧ cha'anä̧, chä̧mö̧nä̧ chätätä ro̧'ȩpö̧'a̧nö̧ hua̧sä̧; ja̧'hua̧ta̧nö̧ surojuttömä chu̧ji̧pi̧na̧'a̧nä̧, chi̧huȩnȩtä̧ ka̧cuä̧mö̧ toö'anö̧ ja̧'a̧ hua̧sä̧ suronä jȩpö̧ pä'ömä̧. ²¹ Ttömä surojö jȩpä̧ji̧ pä'ömä huȩnȩcuä̧cho̧cö̧sä̧, ja̧'hua̧nö̧ ja̧'a̧nä̧ ttötä cha̧mö̧nä̧ pa̧ja̧tö̧mä̧ tta̧'ä̧rä̧cuä̧huo̧cö̧sä̧; cha̧'cua̧rö̧mä̧ cha̧mö̧nä̧ pa̧ja̧tö̧tä̧ ku'cähuocösä. ²² Imicu̧nä̧ jö̧nä̧mä̧ jo̧ca̧'a̧, ja̧'hua̧nö̧ ji̧yä̧cu̧ ttömä̧ pä'ösä ja̧u̧mä̧ ttö̧ja̧ surönä jȩpo̧co̧tö̧rö̧'i̧nä̧ surönä̧ jȩpä̧tu̧cu̧ yo̧mȩtȩnä̧ siepö icu. ²³ Ji̧yȩtȩ mä̧richei̧ rȩbȩö̧ ttieruhua'anä̧ cuä'äö icuttömä̧, jau̧mä̧ ya̧tȩ surönä̧ jȩpo̧co̧tö̧ ttä'ca jo̧mȩttö̧ ya̧huä̧hua̧'a̧nö̧tä̧ hua̧. ²⁴ Pi̧jä̧ rȩjȩmä̧ suronä jȩpä̧tö̧ ttö̧mo̧nä̧tä̧ iyähui'i̧na̧'a̧; Diosmä̧ ru̧ji̧ pä'ö icuähuä ttö̧jä̧rö̧mä̧ tti'ä a̧tto̧pö̧. Ja̧u̧tä̧ pi̧yȩ'i̧nä̧ jȩpö̧ ja̧'a̧mä̧ ja̧u̧ttö̧mä̧ ¿di jä̧ttö̧ ka̧ra̧ jȩö̧'a̧nö̧ hua̧? ²⁶ Ttö chöjö̧ mo̧ro̧mä̧ juiyo jurunä 'cuäopa'a ya̧tȩ huȩnȩ ȩcuä̧ i̧sa̧ joö'anö; ttö a̧'cua̧rö̧ chö̧jö̧mä̧ töipächa'a; jahuätömä adiunämä tottococusä chö̧jo̧mȩttö̧mä̧. ²⁵ Jurunätä̧ 'cuäopätö huoi'ca papiro o̧na̧ttö̧ adihuä'ca jä̧i̧nö̧'anö ja̧'hua̧ta̧'a̧nö̧ buo pare ö̧'o̧ya̧rö̧ ȩmu̧ jurunä rȩjȩcu̧ juiächiö ema jä̧i̧nö̧anö. ²⁷ Ttörö barau unichi̧ö̧ chö̧jö̧ttö̧mä̧,chi'änämä cha̧'cua̧ ttö̧dȩcu̧mä̧ juiyö̧'anö ja̧'a̧ eseutä chö̧ja̧'a̧ttö̧, ²⁸ ttö pi̧yȩ o'cajuiyönä chusuräumä yedecunä jä̧cu̧sä̧ ucuru, huo̧jua̧sä̧ ucu cuä'cattömä huȩnȩ hua̧sä̧ pä'ö. ²⁹ Ttömä ro̧ȩcua̧ chö̧jä̧cua̧sä̧; ja̧'hua̧nö̧ jä̧'a̧ttö̧,?Tocu pä'ö juhua'a yabocu chörocuacua?. ³⁰ Tötä chamonö diyahuoppa i̧sa̧ppȩttö̧ chötöcäuttu'inä ja̧'hua̧nö̧ jȩpö̧ chu̧mu̧mä̧ adiunätä tea'a, teönätä̧ hua̧sä̧ pädöttö'inä, ³¹ Diosmä sa̧huä̧hua̧rä̧ ra̧'a̧tä̧ kä'ö icuajacusä, ja̧'hua̧ta̧'a̧nö̧ cha̧mo̧nä̧ chö̧'ca̧tä̧huä̧ti̧yu̧'i̧nä̧ amisuru'anö ja̧'a̧ törömä. ³² Diosmä ttö̧ja̧sa̧ mä̧cö̧, ttö'anömä, ttö chädätarö pä'ömä, ja̧u̧cu̧ ticha pä'ömä suronä jȩttö̧rö̧ röji pähuomecu̧. ³³ Ya̧tȩ'i̧nä̧ röji pä'ömä toa'a ujuturu pa̧'a̧nö̧mä̧cö̧ pä'ö mea̧ pä̧'ö̧mä̧. ³⁴ Ka̧ra̧ röji pä'ömä toa'a Dios ötta'ca ttörö huä'ca jȩpö̧ icu'anö hua̧mä̧, yedecunä yepä'chu jȩpö̧ icumä. ³⁵ Ja̧'hua̧nö̧ jo̧mȩnä̧ yedecuoca'a chucuocua'anö ja̧'a̧. Ja̧'hua̧nö̧ ja̧'a̧nä̧ ja̧u̧ jueimä ttönä ka̧'a̧ttö̧, jȩchö̧ juiyönä jä̧cu̧sä̧.