¹ Täcö 'cuä'ächächusä cha̧'cua̧rö̧nä̧mä̧. Täcö juȩö̧nä̧tä̧ chu̧cuo̧cuä̧cua̧sä̧ ttörö surojömä̧. ² Diorö pä̧dä̧cua̧sä̧; Ucutä jähuä päcuättö, ji'ähuittö 'ta̧'a̧nö̧ ja̧'a̧ pä̧cua'attö̧. ³ Ja̧'hua̧nö̧ ttörö cuinepä̧ra̧'a̧mä̧ adihuäcujä tä̧ji̧, u̧sä̧rö̧jä̧ ucutä cu̧mö̧nä̧ adicuämä ya̧cuä̧hua̧'a̧nä̧ suronä jȩpä̧tö̧ tta̧mö̧cuädäjimä? ⁴ Ttö̧ja̧ 'cua̧rö̧nä̧ cui'äre ku̧nä̧rö̧jä̧? ¿Topujä ttö̧ja̧sa̧ toa'a jä̧'i̧ja̧'a̧nö̧. ⁵ Ucu cu̧mo̧ro̧mä̧ pi̧jä̧ ttö̧ja̧ ttu̧mo̧ro̧ jä̧'i̧ja̧'a̧nö̧ ja̧'a̧, cuhuäpächinö̧ a̧'ȩ'i̧nä̧ ku̧nä̧rö̧jä̧ ttö̧ja̧ 'cua̧rö̧nä̧, ⁶ ucumä suronä jȩchö̧ ka̧cuä̧mö̧ topöjä ja̧'hua̧ta̧'a̧nö̧ suronä jȩchö̧ o'ca'anä ru̧'ä̧rö̧jä̧, ⁷ ucumä huo̧ja̧jä̧ pidemä surojö jui̧'a̧ pä̧'ö̧mä̧ ya̧tȩ'i̧nä̧ toa'a ppädö'anö hua̧mä̧ ucu cu̧mu̧ttö̧mä? ⁸ Cu̧mö̧pi̧yä̧nä̧mä̧ ttö̧ja̧sa̧ jö̧nä̧ chäcua'acutä aditinö̧jä̧ ja̧'hua̧ta̧'a̧nö̧ ttönä todeu'inä o'cajuiyönä̧tä̧ ja̧'hua̧nö̧ cuaditina'anä jitämä si'epö cuicua päcuäcusä. ⁹ A̧mö̧cuädittö, jitämä jädepäcijä, redä'ca i̧sa̧ppȩttö̧ cuaditinäcu̧ cha'anä; ¿Pä'äjita'anö redä'ca i̧sa̧ppȩra̧'a̧cu̧ cuȩpä̧cua̧sä̧? ¹⁰ Atateja juättopa'a jä̧'i̧nö̧'a̧nö̧ juäcuopococu pinö̧sä̧, ja̧'hua̧nö̧ queso jä̧'i̧nö̧'a̧nö̧ uppäcuähua jö̧nä̧mä̧ jȩ'cuo̧co̧cu̧ pi̧nö̧sä̧? ¹¹ Ttö ja̧ttä̧pä̧ya̧nä̧mä̧ chi̧jȩta̧'i̧nä̧, chidepä'i̧nä̧ ku̧ni̧nö̧jä̧ ja̧'hua̧ta̧nö̧ chihue'quiyö'i̧nä̧ chihuehui appiyä'i̧nä̧ bi'cäunä̧ ku̧ni̧nö̧jä̧. ¹² Cha̧'cua̧ru̧ cuiyinä̧cu̧sä̧ ja̧'hua̧ta̧'a̧nö̧ cutodecuinö̧mä̧ päcuinäcusä; ucu ppäcuädömä̧ cha̧'cua̧ru̧hua̧rö̧ adiu jȩpö̧ ku̧nö̧. ¹³ Ja̧'hua̧nö̧ ja̧'a̧nä̧ pi̧yȩmä̧ ucu cuamiso'quinä̧ daju cuicuinä̧cu̧sä̧. Ttömä̧ pi̧yȩ cuä̧mö̧cuädinö̧mä̧ juo̧jua̧sä̧: ¹⁴ ttö suronä̧ jȩchi̧nö̧tö̧mä̧, ucumä̧ to'cu'anö ja̧'a̧; surönä̧ jȩchä̧ji̧mä̧ jȩpö̧ icu juiyö'a̧nö̧ hua̧sä̧. ¹⁵ Ttö su̧ro̧pa̧ jö̧nä̧ hua̧ chöttömä, ¡ttöhue! Ttömä adihuä i̧sa̧ chöttömä̧, chu̧'i̧nä̧ cädepu juiyö'anö̧ hua̧sä̧, juhua'amä̧ täcö rö̧ä̧nä̧ su̧ro̧pa̧ cha'attö̧ ja̧'hua̧ta̧'a̧nö̧ ttötä cha̧mö̧nä̧ pa̧ja̧tö̧ usurä chȩmä̧u̧tä̧ tochäcuähua'attö. ¹⁶ chu a̧mö̧nä̧ pajatö cäecuttömä, ucumä̧ mö yähui 'cua̧rö̧nä̧ rucua'anö̧ hua̧sä̧; juhua'a yabonä̧nö̧, ucu cujurömä cui̧jȩpä̧cua̧sa̧. ¹⁷ Ucumä jarepätörö 'cächöjä ttö jȩchi̧nö̧ ittähua pä'ö ja̧'hua̧nö̧ jȩpö̧ ucu cuamisurunä jo̧mä̧ rö̧ä̧chi̧a̧'a̧ ttöcu̧mä̧; ro̧cuȩpä̧cu̧sä̧ cumuhuäyotö su̧ru̧da̧u̧ jarepätucu. ¹⁸ ¿Tocu pä'ö, cha̧ju̧ 'cöacuä jahuätö räepu ku̧ju̧ni̧nä̧ttö̧? Ttömä pä̧cua̧rö̧jä̧cu̧sä̧ yucuäpächö juiyinädó pä'ötä, ya̧tȩ'i̧nä̧ tö'ö juiyäcua'anö. ¹⁹ Ttö cha̧ju̧ 'cö'acuä jahuättötä todeinädó pädönä jä̧cu̧sä̧ cho̧jö̧ juiyäcua'anö ²⁰ ¿Ttö cha̧'cua̧rö̧ mo̧ro̧mä̧ ji̧'qui̧cha̧nö̧tä̧ chi̧'i̧po̧ca̧'a̧ tä̧jí̧? Ja̧hua̧nö̧ jö̧ttö̧mä̧ ja̧'á̧tä̧ topittö, jurunätä̧ 'cuä'ächö chä̧'a̧'a̧nä̧ ja̧'a̧tä̧ topittö, ²¹ pä'äji ta'anö ppa̧'a̧chö̧ tochocomecu̧ chi̧'chä̧cua̧'a̧ ä'canä, rȩjȩ yo̧mȩcu̧ ja̧'hua̧ta̧'a̧nö̧ hua'are tto̧ȩpä̧ro̧mȩcu̧, juȩnȩ rȩjȩmä̧ yo̧mȩ yo̧ö̧ yodo jä̧'i̧nö̧'a̧nö̧, ²² juȩnȩ rȩjȩmä̧ hua'are isoppatä ro̧mȩ, adiunä jȩpö̧ ku̧nä̧huä̧ jui̧yö̧nä̧ jo̧mȩ, tȩa̧u̧mä̧ yodo kö'co jä̧'i̧nö̧'a̧nö̧tä̧ jo̧mȩ."