¹ ¿Ttö̧ja̧sa̧mä̧ pi̧jä̧ rȩjȩnä̧ttö̧ pä̧i̧cu̧nä̧mä̧ aditocö? ¿U̧mo̧ro̧ mo̧ro̧mä̧, mitö jurunä̧tä̧ adita pä'ö huȩ'ä̧hua̧ u̧mo̧ro̧ mo̧ro̧ jä̧'i̧jö̧'a̧nö̧mä̧ jo̧ca̧'a̧? ² A̧mä̧cö̧ jähuä aditönä huȩ'ä̧hua̧mä̧ nipä̧cha̧'a̧ o̧ju̧tä̧ro̧mȩ i̧'chi̧'a̧ pä'ö pä̧huä̧rö̧jä̧cu̧, mitö jurunä̧tä̧ adita pä'ö huȩ'ä̧hua̧ ttimitarö pä'ö toa'a jä̧'i̧nö̧'a̧nö̧ topö_ ³ ja̧'hua̧nö̧tä̧ jȩpä̧cuä̧hua̧sä̧ usurä chȩmä̧u̧ kä̧hua̧tö̧nä̧ cha̧mi̧'qui'ächi'ö chö̧ja̧ pä'ömä; yodomä huȩnȩtä̧ rö̧ä̧nä̧ kö̧nä̧ iyähui'inä̧cu̧sä̧. ⁴ Chu̧rä̧mä̧do̧mȩnä̧mä̧, cha̧mö̧nä̧ pa̧ja̧tö̧ pä'äusä: ¿Ti̧yȩnö̧ chä̧rä̧mi̧'ä̧cua̧'a̧ttö̧ ja̧'hua̧ta̧'a̧nö̧ yodomä̧ ti̧yȩnö̧ i̧huä̧cua̧'a̧ttö̧? Mo̧ro̧ juoa'a jubö ppa̧'ä̧chä̧rö̧ cue'ächö kä̧nö̧ 'cuä'ächi'ösä. ⁵ Chidepämä̧ mi̧yu̧tä̧ juoächina̧'a̧ ja̧'hua̧ta̧'a̧nö̧ rȩba̧ i̧sa̧ppȩtä̧; chi̧jȩta̧ uttahuiyämä̧ 'cuäi'omenä ja̧u̧nu̧ o'ca'amä isähuatä pä'i'ö räopinä̧cu̧sä̧. ⁶ Chu̧mo̧ro̧mä̧ juiyo jurunä̧ 'cuäoa'a 'tö̧ä̧hua̧ppä pö̧jä̧ta̧nä̧ ttittopa'a jä̧'i̧nö̧'a̧nö̧; recuomä tta̧ttä̧ro̧ca̧'a̧tä̧. ⁷ Diosmä̧, ttö cha̧'cua̧rö̧mä̧ ju̧ättoppa jä̧'i̧nö̧'a̧nö̧ ja̧'a̧ pä'ö a̧mö̧cuädittö; chi'äriyämä juhua'a yabocumä̧ adiumä tooca'a jä̧cua̧'a̧. ⁸ Dios öäre, ttörö to̧ä̧rö̧mä̧, tä'cö juhua'a yabocumä topocö; ja̧u̧ Dios ö'äriyämä täcö ttönätä̧ ko̧cuä̧cua̧'a̧, ja̧'hua̧nö̧ jo̧mȩnä̧ täcö ttömä toäcua'a. ⁹ Ajiya isoppa ka̧ca̧cui̧pö̧ dä'ähuächäcua'a jä̧'i̧nö̧'a̧nö, hua'are reju Seolra̧'a̧ mȩyȩhuä̧tö̧mä̧ pä'äjita'anömä ppa̧'a̧cho̧co̧tö̧. ¹⁰ Ja̧u̧mä̧ ojusodera'amä ppa̧'a̧cho̧cö̧ jä̧cua̧; ö̧jo̧mȩttö̧'i̧nä̧ pä'äjita'anömä ttu̧huo̧juo̧co̧cu̧ jä̧cua̧. ¹¹ Ja̧'hua̧nö̧ jo̧mȩnä̧ ttö chu̧cuo̧cuä̧cua̧sä̧; 'corunämä chö̧ji̧yä̧cua̧sä̧ cha̧cua̧ ajacuättö; Ttö cha̧'cua̧nä̧ chusuräu pä̧dä̧cua̧sä̧. ¹² ¿Ttömä aje dähuoto i̧sa̧ buo 'cua̧rö̧nä̧ hua̧sä̧ tä̧ji̧ ucu ttörö tta̧'a̧rä̧tö̧rö̧ cu̧ju̧nu̧nä̧mä̧? ¹³ Pa̧'a̧nö̧ pädomenämä: Chö'omenätä suronä jö̧mä adiunä jä̧cua̧sä̧, ¹⁴ ja̧'hua̧ta̧'a̧nö̧ chä'ome ja̧'a̧ ttörö suronä jö̧ adinänö jä̧cuo̧mȩmä̧, ja̧'hua̧nö̧ jo̧mȩnä̧, UCUMÄ chu̧'cuo̧ti̧nä̧ yecuepe'äcusä ja̧'hua̧nö̧tä̧ i̧jȩcuä̧cha̧'a̧ tochönä'inä; ¹⁵ ja̧'hua̧nö̧ jo̧ttö̧mä̧, ttomä nu̧'u̧ tticuäcu pä'ajisä tode'a pä'ötä chidepä'inä repedoca'atä. ¹⁶ Cha̧'cua̧rö̧mnä̧ chöjo'cö juiyönä jä̧cu̧sä̧; a̧'cua̧rö̧ chö̧jö̧ juiyö'anö ja̧'a̧ 'cuäopönämä; katätä jaropi'ätucuittö ttö chö̧jö̧ mo̧ro̧mä̧ micuähuoca'a. ¹⁷ ¿Tide jua̧'a̧ jä̧tö̧ ttö̧ja̧sa̧a̧mä̧ UCU tocu'arö pä'ömä, ja̧u̧ru̧ cuamucuäda pä'ömä, ¹⁸ mo̧ro̧ juoöta'anö tocu'arö pä'ömä ja̧'hua̧ta̧'a̧nö̧ 'cuäopönä ko̧cuä̧mö̧ tocu'arö pä'ömä? ¹⁹ ¿Törö ja̧a̧tä̧ to'cua peömä tta̧'a̧nö̧ recuä cua'a̧ttö̧, ttötä chä isoya 'cudädiomebu ja̧a̧tä̧ to'cuiyä̧cua̧sä̧? ²⁰ Ji̧nä̧́ suronä jȩchi̧nö̧mä̧, ¿ ucurumä ta̧'a̧nö̧ jȩa̧nö̧ttö̧ juo̧u̧mä̧, u̧mä̧tö̧rö̧ to̧'cua̧ra̧'a̧ttö̧mä̧? ¿Ucurö toicu jö̧mä̧ dä̧ pe'ö ttörö cuiyättö, ttötä'inä jȩchi̧yö̧nä̧ jö̧mä̧? ²¹ ¿Ttö suronä jȩchi̧nö̧mä̧ unichiö dä̧ pe'ö ja̧a̧tä̧ to'cuoca̧a̧ttö̧? Cha̧'cua̧rö̧mä̧ ji̧'qui̧cha̧nö̧tä̧ ki̧ä̧cu̧sä̧; ttöhuȩcuä̧nä̧ topu cuichöttömä, täcö 'corujodä chö'caatä ja̧cua̧a̧.